Whlẹngán sọn Omọ̀ Hẹhùtọ lọ Tọn lẹ Mẹ
“[Jehovah] na de we sọn omọ̀ hẹhùtọ tọn mẹ.”—PSALM 91:3.
1. Mẹnu wẹ “hẹhùtọ” lọ, podọ naegbọn e do yin kanylantọ?
KLISTIANI nugbo lẹpo wẹ nọ pehẹ mẹgbeyantọ de he tindo nuyọnẹn po ayiha wintinwintin po hugan jọwamọ tọn. E yin alọdlẹndo to Psalm 91:3 mẹ taidi “hẹhùtọ.” Mẹnu wẹ kẹntọ ehe? Sọn zinjẹgbonu 1er juin 1883 [Glẹnsigbe] tọn gbọ́n, linlinnamẹwe ehe ko do e hia ma nado yin mẹdevo de hugan Satani Lẹgba. Kẹntọ daho ehe nọ gbọn ayiha wintinwintin dali tẹnpọn nado hẹn omẹ Jehovah tọn lẹ buali bo domọwle yé dile hẹhùtọ de nọ tẹnpọn nado domọwle ohẹ̀ do.
2. Naegbọn Satani do yin yiyijlẹdo hẹhùtọ de go?
2 To hohowhenu, ohẹ̀ lẹ nọ yin wiwle na hàngbe milomilo po whanpẹ yetọn po, nado yin hùhù dù, podọ nado yin yiyizan taidi avọ́sannu. Ṣigba to jọwamọ-liho, ohẹ̀ lẹ nọ họ́ yede bo nọ nọ̀ aṣeji, podọ e ma nọ bọawu nado wle yé do omọ̀ mẹ. Enẹwutu, to ojlẹ Biblu tọn lẹ mẹ, hẹhùtọ de nọ yí sọwhiwhe do plọn nuyiwa po aṣa ohẹ̀ wunmẹ he e jlo na domọwle lẹ tọn po whẹ́. Enẹgodo, e nọ kàn ayiha wintinwintin lẹ nado domọwle yé. To Satani yiyijlẹdo hẹhùtọ de go mẹ, Biblu gọalọna mí nado yọ́n aliho nuyiwa tọn etọn lẹ. Lẹgba nọ plọn nado yọ́n dopodopo mítọn. E nọ doayi aṣa po nuyiwa mítọn lẹ po go bo nọ wleawuna omọ̀ whiwhla lẹ nado sọgan wle mí gbẹ̀te. (2 Timoti 2:26) Eyin e wle mí, enẹ na zẹẹmẹdo husudo mítọn to gbigbọ-liho bo sọgan dekọtọn do vasudo mlẹnmlẹn mẹ na mí. Enẹwutu, nado basi hihọ́na míde, mí dona yọ́n ayiha wintinwintin “hẹhùtọ” lọ tọn lẹ.
3, 4. Whetẹnu wẹ ayiha gigẹdẹ Satani tọn lẹ nọ taidi kinnikinni de tọn? lopa de tọn?
3 Gbọn nuyijlẹdonugo he họnwun de yiyizan dali, psalm-kàntọ lọ sọ yí ayiha gigẹdẹ Satani tọn lẹ jlẹdo kinnikinni-vu kavi lopa de tọn lẹ go. (Psalm 91:13) Taidi kinnikinni de, Satani nọ yangbé omẹ Jehovah tọn lẹ tọn tlọlọ to whedelẹnu gbọn homẹkẹn kavi aṣẹpatọ lẹ yiyizan dali. (Psalm 94:20) Mẹgbeyinyan kinnikinni tọn nkọ enẹ sọgan hẹn omẹ vude dahli. Ṣigba to suhugan ninọmẹ lẹ tọn mẹ, mẹgbeyinyan tlọlọ ehelẹ nọ saba yin adà awetọ nuhe yin nukundo lọ tọn bo nọ hẹn kọndopọ omẹ Jiwheyẹwhe tọn lẹ tọn lodo dogọ. Etẹwẹ dogbọn mẹgbeyinyan to aliho gigẹdẹ mẹ taidi lopa tọn nkọ he Satani nọ yizan lẹ dali?
4 Lẹgba nọ yí nuyọnẹn hugan jọwamọ etọn zan nado yangbé mítọn to aliho oklọ po mẹhusudo po tọn mẹ kẹdẹdile odàn adínọ de nọ wà do sọn nuglọ. To aliho ehe mẹ, e ko penugo nado hẹn ayiha omẹ Jiwheyẹwhe tọn delẹ tọn flu gbọn kiklọ yé nado wà ojlo etọn kakati nido yin Jehovah tọn dali, ehe hẹn kọdetọn vẹadi lẹ wá. Mí dopẹ́ dọ mí ma tin to wunvi mẹ gando bublu kavi ayiha gigẹdẹ Satani tọn lẹ go. (2 Kọlintinu lẹ 2:11) Mì gbọ mí ni gbadopọnna ẹnẹ to omọ̀ mẹhusudo tọn he “hẹhùtọ” lọ nọ yizan lẹ mẹ.
Obu Gbẹtọ Tọn
5. Naegbọn omọ̀ he yin “obu gbẹtọ tọn” do nọ tindo kọdetọn dagbe sọmọ?
5 “Hẹhùtọ” lọ yọnẹn dọ to jọwamọ-liho, gbẹtọ nọ jlo nado yin alọkẹyi gbọn mẹdevo lẹ dali. Klistiani lẹ ma nọ sinyẹn ahun yetọn do mẹhe lẹdo yé lẹ bo nọ dovọ́na linlẹn po numọtolanmẹ yetọn lẹ po gba. Na Lẹgba yọ́n ehe wutu, e nọ jlo nado yí ahunmẹdunamẹnu yetọn gando nuhe gbẹtọ lẹ lẹn do yé go zan. Di apajlẹ, e nọ klọ omẹ Jiwheyẹwhe tọn delẹ nado hẹn jlẹkajininọ yetọn bu gbọn “obu gbẹtọ tọn” yíyí do domọwle yé dali. (Howhinwhẹn lẹ 29:25) Eyin devizọnwatọ Jiwheyẹwhe tọn lẹ kọnawudopọ hẹ mẹdevo lẹ to nuhe Jehovah jẹagọdo lẹ wiwà mẹ kavi nọma wà nuhe Ohó Jiwheyẹwhe tọn degbena yé nado wà na obu gbẹtọ tọn wutu, be yé ko jai jẹ omọ̀ “hẹhùtọ” lọ tọn mẹ niyẹn.—Ezekiẹli 33:8; Jakobu 4:17.
6. Apajlẹ tẹwẹ do lehe jọja de sọgan yin wiwle do omọ̀ “hẹhùtọ” lọ tọn mẹ do hia?
6 Di apajlẹ, jọja de sọgan joawuna kọgbidinamẹ wehọmẹvigbẹ́ etọn lẹ tọn bo nù siga. Siga nùnù sọgan ko dẹn do linlẹn etọn to whenuena e jei wehọmẹ to gbenẹgbe. Ṣigba to ojlẹ kleun de godo, e ko jẹ nuhe na gbleawuna ẹn to agbasa-liho bo ma na hẹn homẹhun Jiwheyẹwhe wà ji. (2 Kọlintinu lẹ 7:1) Etẹwẹ dọ̀n ẹn biọ enẹ mẹ? Vlavo e ko dogbẹ́ ylankan lẹ bo to budi dọ yé na gbẹ́ emi dai. Jọja lẹ emi, mì ma dike “hẹhùtọ” lọ ni klọ mì biọ omọ̀ mẹ blo! Mì họ́ mìde ma nado jogbe, etlẹ yin to onú flinflin lẹ mẹ, na mì nikaa yin wiwle gbẹ̀te. Mì setonuna avase Biblu tọn nado dapana ogbẹ́ ylankan.—1 Kọlintinu lẹ 15:33.
7. Nawẹ Satani sọgan zọ́n bọ mẹjitọ delẹ na hẹn jlẹkajininọ yetọn bu to gbigbọ-liho gbọn?
7 Mẹjitọ Klistiani vivẹnunọ lẹ nọ ylọ azọngban Owe-wiwe tọn yetọn he yin nado penukundo whẹndo yetọn go to agbasa-liho dọ nujọnu. (1 Timoti 5:8) Ṣigba, yanwle Satani tọn wẹ yindọ Klistiani lẹ ni hẹn jlẹkajininọ yetọn bu to whẹho ehe mẹ. Vlavo yé tindo aṣa lọ nado nọ gọ̀n opli lẹ na yé nọ joawuna kọgbidinamẹ ogán yetọn lẹ tọn nado wà gàngodo-zọ́n. Yé sọgan nọ dibu nado biọgbè nado sọgan tin to adà plidopọ agbegbe tọn lẹpo ji bo sẹ̀n Jehovah to pọmẹ hẹ mẹmẹsunnu yetọn lẹ. Nuhe na basi hihọ́na mí sọta omọ̀ ehe wẹ nado “dotudo OKLUNỌ go.” (Howhinwhẹn lẹ 3:5, 6) Humọ, eyin mí nọ flindọ mímẹpo wẹ yin hagbẹ whédo Jehovah tọn bọ ewọ ko hẹn ẹn zun dandan na ede nado penukundo mí go, enẹ na gọalọna mí nado hẹn jlẹkajininọ mítọn go. Mẹjitọ lẹ emi, be mì yise dọ Jehovah na penukundo mìwlẹ po whẹndo mìtọn po go to aliho de kavi devo mẹ eyin mì wà ojlo etọn ya? Kavi be Lẹgba na wle mì gbẹ̀te bo na hẹn mì nado wà ojlo etọn na obu gbẹtọ tọn wutu wẹ ya? Mí vẹ̀ mì nado lẹnnupọndo kanbiọ ehelẹ ji to odẹ̀ mẹ.
Omọ̀ Ojlo Agbasanu lẹ Bibẹpli Tọn
8. Aliho tẹ mẹ wẹ Satani nọ yí oklọ agbasanu bibẹpli tọn zan te?
8 Satani sọ nọ yí oklọ agbasanu lẹ bibẹpli tọn zan nado domọwle mí. Tito ajọwiwa aihọn ehe tọn nọ saba ze tito adọkunnọ lilẹzun to zánto dopo mẹ tọn lẹ daga he sọgan doyẹklọ delẹ to omẹ Jiwheyẹwhe tọn lẹ mẹ ga. To whedelẹnu, mẹdelẹ sọgan yin tudohomẹna dọmọ: “Vánkan do azọ́n go. Eyin a tẹnpọn bọ apò towe pẹ̀n, a na vò bo na dugbẹ towe. A tlẹ sọgan lẹzun gbehosọnalitọ.” Hogbe mọnkọtọn lẹ sọgan wá sọn onù mẹhe ma tin to jlẹkaji lẹ tọn mẹ he nọ tẹnpọn nado duale sọn haṣinṣan mẹmẹsunnu lẹ tọn mẹ to agun Klistiani tọn mẹ. Lẹnnupọndo tudohomẹnamẹ enẹ ji po sọwhiwhe po. Be e ma jlo na taidi nulẹnpọn dawe “nulunọ” he yin nùdego to oló Jesu tọn mẹ lọ tọn ya?—Luku 12:16-21.
9. Naegbọn nujijlo sọgan hẹn Klistiani delẹ jai jẹ omọ̀ mẹ?
9 Satani nọ deanana titonu ylankan etọn to alọpa de mẹ bọ e nọ whàn gbẹtọ lẹ nado to nujlo. Vudevude, ojlo enẹ sọgan yinuwado gbẹzan Klistiani de tọn ji, bo na finyọ́n ohó lọ hù bo hẹn ẹn zun “madosinsẹ́nnọ.” (Malku 4:19) Biblu na tuli mí nado tindo pekọ to núdùdù po avọ̀ po mẹ. (1 Timoti 6:8) Ṣigba mẹsusu nọ jai jẹ omọ̀ “hẹhùtọ” lọ tọn mẹ na yé ma hodo ayinamẹ enẹ to gbẹzan yetọn mẹ wutu. Be e sọgan yindọ goyiyi wẹ hẹn yé nado lẹndọ yé dona dugbẹ jẹ obá de mẹ ya? Etẹwẹ dogbọn dopodopo mítọn dali? Be ojlo mítọn nado tindo agbasanu lẹ nọ hẹn mí sisẹ́ nuhe gando sinsẹ̀n-bibasi nugbo go lẹ do godo wẹ ya? (Hagai 1:2-8) E blawu dọ, to ojlẹ nuhahun akuẹzinzan tọn lẹ mẹ, mẹdelẹ ko yí gbigbọnọ-yinyin yetọn do sanvọ́ nado sọgan zindonukọn to gbẹzan wunmẹ he yé ko nọ zan dai mẹ. Gbigbọ agbasanu bibẹpli tọn mọnkọtọn nọ hẹn homẹhun “hẹhùtọ” lọ!
Omọ̀ Ayidedai He Ma Sọgbe lẹ Tọn
10. Mẹdetiti gbigbejepọn tẹwẹ Klistiani dopodopo dona basi?
10 Ayiha gigẹdẹ “hẹhùtọ” lọ tọn devo wẹ nado hẹn pọndohlan jọwamọ gbẹtọ lẹ tọn gando dagbe po oylan po go gblezọn. Ayilinlẹn he nkọtọn gbayipe to Sọdọmi po Gọmọla po wẹ nọ sọawuhia to suhugan ayidedai egbezangbe tọn lẹ mẹ. Linlin he nọ yin nina to televiziọn ji podọ to linlinwe lẹ mẹ lọsu nọ ze danuwiwa po ojlo agọ̀ zanhẹmẹ tọn po daga. Susu nuhe nọ sọawuhia taidi ayidedai to linlinnamẹnu lẹ mẹ nọ hẹn nugopipe gbẹtọ lẹ tọn nado “to dagbe po oylan po yọnẹn” flu. (Heblu lẹ 5:14) Ṣigba, flin nuhe Jehovah dọ gbọn yẹwhegán Isaia gblamẹ dọmọ: “Dindọn wẹ na yé he to oylan ylọ dọ dagbe lẹ, bo to dagbe ylọ dọ oylan.” (Isaia 5:20) Be “hẹhùtọ” lọ ko gbọn ayiha gigẹdẹ dali yí ayidedai he ma sọgbe enẹlẹ do hẹn nulẹnpọn towe flu wẹ ya? E jẹ dọ hiẹ ni gbeje dewe pọ́n.—2 Kọlintinu lẹ 13:5.
11. Avase tẹwẹ yin nina gando aihundida televiziọn ji tọn lẹ go to linlinnamẹwe ehe mẹ?
11 To nudi owhe 25 die wayi, Atọ̀họ̀-Nuhihọ́ Lọ Tọn gbọn owanyi dali na avase sinsẹ̀n-basitọ nugbo Jiwheyẹwhe tọn lẹ gando aihundida televiziọn ji tọn (feuilleton) lẹ go.a Gando nuyiwadomẹji gigẹdẹ aihundida televiziọn ji tọn he gbayipe lẹ tọn go, linlinnamẹwe lọ dọmọ: “Ojlo owanyi tọn nọ yin yiyizan nado suwhẹna walọyizan depope. Di apajlẹ, jọja tlẹnnọ he mọhò de dọna họntọn etọn dopo dọmọ: ‘N’ka yiwanna Victor be. N’ma gbẹ́ nuhe na jọ. . . . Nude masọ jlo mi to gbẹ̀mẹ hú nado jivi dopo na ẹn!’ Hogbe ehelẹ sisè dile húnhiho yẹẹ de to yìyì na hẹn ẹn vẹawu nado mọdọ aliho gbẹninọ tọn etọn ylan. Onú Victor tọn nọ jẹ e ji na hiẹ lọsu podọ a tindo awuvẹmẹ na viyọnnu lọ. A ‘mọnukunnujẹ’ ninọmẹ etọn mẹ. Yọnnu de he ko nọ pọ́n aihundida mọnkọtọn lẹ dai bo wá gọ̀ biọ ede mẹ to godo mẹ dọmọ: ‘E na paṣa we dọ nuhe mọ a te lẹpo wẹ a na suwhẹna. Mí yọnẹn ganji dọ fẹnnuwiwa ma yọ́n. . . . Ṣigba n’doayi e go dọ n’ko jẹ mahẹ tindo to e mẹ ji to ayiha ṣie mẹ.’ ”
12. Whẹwhinwhẹ́n tẹlẹ wẹ zọ́n bọ avase he yin nina gando tito-to-whinnu televiziọn ji tọn delẹ go do sọgbe taun todin?
12 Sọn whenue gbọ́n hosọ enẹlẹ ko yin zinzinjẹgbonu, tito-to-whinnu mọnkọtọn he nọ hẹn ahun gblezọn lẹ ko sudeji dogọ. To fisusu, tito-to-whinnu mọnkọtọn lẹ nọ yin didohia na ganhiho 24 to azán dopodopo ji. Sunnu, yọnnu po jọja aflanmẹ susu po wẹ nọ yí ayidedai mọnkọtọn lẹ do na núdùdù ayiha po ahun yetọn lẹ po gbọzangbọzan. Ṣigba mí ma dona yí nulẹnpọn agọ̀ do klọ mídelẹ gba. Nuṣiwa wẹ e na yin nado lẹndọ ayidedai he gblezọn lẹ ma ylan sọ nuhe mí nọ mọ to aihọn mẹ to paa mẹ lẹ. Be Klistiani de sọgan suwhẹna ede eyin e de nado pọ́n aihundida mẹhe e ma na ko lẹn gbede nado ylọ wá owhé etọn gbè lẹ tọn ya?
13, 14. Etẹwẹ mẹdelẹ dọ nado do ale he yé mọyi sọn avase he yin nina gando televiziọn go lẹ mẹ hia?
13 Mẹsusu wẹ mọaleyi sọn tonusisena avase enẹ he “afanumẹ nugbonọ, nuyọnẹntọ” lọ na mẹ. (Matiu 24:45-47) To ayinamẹ sinai do Biblu ji he to tlọlọ lọ lẹ hihia godo, mẹdelẹ kanwe nado dọ lehe hosọ lọ lẹ yinuwado yé ji do.b Mẹdopo yigbe dọmọ: “Na owhe 13, n’yin afanumẹ aihundida televiziọn ji tọn lẹ tọn. N’lẹndọ gbigbọnọ-yinyin ṣie ma na hoapa eyin n’saa to opli Klistiani tọn lẹ yì bo nọ tọ́n dopodopo na sinsẹ̀nzọn kunnudegbe tọn. Ṣigba n’wá kẹalọyi pọndohlan aihọn tọn he aihundida mọnkọtọn lẹ nọ zedaga dọ eyin asu towe nọ yinuwa hẹ we to aliho agọ̀ mẹ kavi a mọdọ e ma yiwanna we, hiẹ sọgan doafọgbé—na ewọ lọsu wẹ zọ́n. Gbọnmọ dali, na n’lẹndọ n’tindo ‘whẹjijọ’ wutu, n’doalọ to walọ ylankan enẹ mẹ bo waylando do Jehovah po alọwlemẹ ṣie po.” Yọnnu ehe yin didesẹ sọn agun mẹ. To godo mẹ, e gọ̀ biọ ede mẹ, bo lẹnvọjọ bosọ yin gigọyí. Avase hosọ lọ lẹ tọn gando aihundida televiziọn ji tọn lẹ go vọ́ huhlọnna gbemima etọn ma nado pọ́n aihundida he Jehovah gbẹwanna lẹ ba.—Amọsi 5:14, 15.
14 Wehiatọ devo he aihundida enẹlẹ yinuwado gbẹzan etọn ji dọmọ: “N’viavi whenuena n’hia hosọ lọ lẹ, na n’mọdọ n’masọ to Jehovah sẹ̀n po ahun lẹpo po ba. N’dopà na Jiwheyẹwhe ṣie dọ n’ma nasọ yin afanumẹ aihundida ehelẹ tọn ba.” To pinpẹn-nutọn-yinyọnẹn etọn didohia na hosọ lọ lẹ godo, mẹmẹyọnnu de yigbe dọ emi ko lẹzun afanumẹ aihundida televiziọn ji tọn lẹ tọn bo wlan dọmọ: “N’nọ kanse dee . . . eyin ehe ma na ko yinuwado haṣinṣan ṣie hẹ Jehovah ji. Nawẹ yẹn sọgan yin họntọn ‘yetọn’ bosọ yin họntọn Jehovah tọn to ojlẹ dopolọ mẹ gbọn?” Eyin aihundida televiziọn ji tọn mọnkọtọn lẹ sọgan hẹn ahun gbẹtọ lẹ tọn gblezọn to owhe 25 die wayi, nuyiwadomẹji tẹwẹ yé na tindo to egbehe? (2 Timoti 3:13) Mí dona nọ̀ aṣeji gando omọ̀ Satani tọn he yin ayidedai he ma sọgbe wunmẹ lẹpo go, vlavo aihundida televiziọn ji tọn, video ji tọn, kavi yẹdide húnhiho gblezọn lẹ tọn.
Omọ̀ He Gbemanọpọ lẹ Nọ Hẹnwa
15. Nawẹ Lẹgba nọ wle mẹdelẹ gbẹ̀te gbọn?
15 Satani nọ yí gbemanọpọ lẹ zan taidi omọ̀ de nado hẹn kinklan wá omẹ Jehovah tọn lẹ ṣẹnṣẹn. Mí sọgan jẹ omọ̀ enẹ mẹ mahọpọnna lẹblanulọkẹyi vonọtaun he mí tindo lẹ. Mẹdelẹ nọ yin wiwle gbẹ̀te gbọn Lẹgba dali na yé na dotẹnmẹ gbemanọpọ lẹ nado hẹn jijọho po pọninọ gbigbọmẹ tọn dagbedagbe he Jehovah ko hẹn tin-to-aimẹ po gble.—Psalm 133:1-3.
16. Nawẹ Satani to ayiha gigẹdẹ kàn nado hẹn pọninọ mítọn gble gbọn?
16 To Wẹkẹ-whàn I whenu, Satani tẹnpọn nado sukúndona adà aigba ji tọn titobasinanu Jehovah tọn gbọn mẹgbeyinyan tlọlọ dali, ṣigba e gboawupo. (Osọhia 11:7-13) Sọn whenẹnu gbọ́n, e to ayiha gigẹdẹ kàn nado hẹn pọninọ mítọn gble. Eyin mí na dotẹnmẹ gbemanọpọ lẹ nado hẹn kinklan wá, be mí ko to ali hundote na “hẹhùtọ” lọ niyẹn. Mí sọgan gbọnmọ dali glọnalina gbigbọ wiwe nado yinuwa po awuvivo po to gbẹzan mítọn mẹ podọ to agun mẹ. Eyin enẹ jọ, homẹ Satani tọn na hùn na nudepope he bẹpla jijọho po pọninọ agun lọ tọn po nọ yinuwado azọ́n yẹwhehodidọ tọn ji.—Efesunu lẹ 4:27, 30-32.
17. Etẹwẹ mẹhe tindo gbemanọpọ lẹ sọgan wà nado didẹ yé?
17 Etẹwẹ hiẹ sọgan wà eyin gbemanọpọ de tin to hiẹ po Klistiani hatọ de po ṣẹnṣẹn? Nugbo wẹ dọ ninọmẹ dopodopo nọ gbọnvo. Etomọṣo, dile etlẹ yindọ whẹwhinwhẹ́n susu wẹ sọgan hẹn nuhahun wá, whẹwhinwhẹ́n depope ma tin nado gọ̀n ma didẹ gbemanọpọ lẹ. (Matiu 5:23, 24; 18:15-17) Ayinamẹ he tin to Ohó Jiwheyẹwhe tọn mẹ yin gbigbọdo bosọ yin pipé. Eyin nunọwhinnusẹ́n Biblu tọn lẹ yin yiyizan, yé ma nọ gboawupo gbede. Yé nọ tindo kọdetọn dagbe to whepoponu!
18. Naegbọn apajlẹ Jehovah tọn hihodo na gọalọna mí nado didẹ gbemanọpọ lẹ?
18 Jehovah nọ “wleawu nado jona,” podọ e nọ “jona” mí nugbonugbo. (Psalm 86:5; 130:4) Mí nọ dohia dọ mí yin ovi yiwanna Jehovah tọn eyin mí hodo apajlẹ etọn. (Efesunu lẹ 5:1) Mímẹpo wẹ yin ylandonọ bosọ tindo nuhudo jona Jehovah tọn vẹkuvẹku. Enẹwutu, mí dona payi eyin mí tindo ayilinlẹn lọ ma nado jona mẹdevo lẹ. Mí sọgan taidi afanumẹ he yin nùdego to oló Jesu tọn mẹ he gbẹ́ nado jo ahọ́ afanumẹ hatọ etọn tọn na ẹn dile ehe ma tlẹ sọtẹ́n yijlẹdo ahọ́ he klunọ ewọ lọsu tọn ko jona ẹn go. Whenuena klunọ lọ sè ehe, e wle afanumẹ he ma jonamẹ lọ do ganmẹ. Jesu dotana oló lọ dọmọ: “Mọkẹdẹ ga wẹ Otọ́ ṣie olọn tọn na wà hlan mì do, eyin dopodopo mìtọn sọn ayiha mìtọn mẹ ma jona mẹmẹsunnu etọn lẹ.” (Matiu 18:21-35) Matin ayihaawe, ayihamẹlinlẹnpọn do oló enẹ ji po nulinlẹnpọndo whla nẹmunẹmu he Jehovah ko jona mí po ji na gọalọna mí to whenue mí to tintẹnpọn nado didẹ gbemanọpọ de hẹ mẹmẹsunnu mítọn!—Psalm 19:14.
Hihọ́ Mimọ to “Fiwhiwhlá Gigogán Tọn Mẹ”
19, 20. Nukun tẹwẹ mí dona yí do pọ́n “fiwhiwhlá” po “oyẹ̀” Jehovah tọn po to ojlẹ ylankan ehelẹ mẹ?
19 Mí to gbẹnọ to ojlẹ ylankan de mẹ. Eyin hihọ́-basinamẹ owanyinọ Jehovah tọn dẹ́n, Satani na ko sukúndona mímẹpo. Enẹwutu, nado dapana yinyin wiwle do omọ̀ “hẹhùtọ” lọ tọn mẹ, mí dona gbọṣi nọtẹn hihọ́-basinamẹ yẹhiadonu tọn lọ mẹ bo “sinai to fiwhiwhlá Gigogán tọn mẹ” nado tin to “oyẹ̀ Ganhunupo tọn glọ.”—Psalm 91:1.
20 Mì gbọ mí ni nọ pọ́n nuflinmẹ po anademẹ Jehovah tọn lẹ po hlan to whepoponu taidi hihọ́ de kakati nido yin aliglọnnamẹnu. Mímẹpo wẹ to ahidi hẹ mẹgbeyantọ de he tindo nuyọnẹn he hugan jọwamọ tọn. Matin alọgọ owanyinọ Jehovah tọn, mẹdepope ma na gán sọn omọ̀ lọ mẹ. (Psalm 124:7, 8) Enẹwutu, mì gbọ mí ni hodẹ̀ dọ Jehovah ni whlẹn mí sọn omọ̀ “hẹhùtọ” lọ tọn lẹ mẹ!—Matiu 6:13.
[Nudọnamẹ Odò Tọn]
a Atọ̀họ̀-Nuhihọ́ Lọ Tọn [Flansegbe] 1er mars 1983, weda 3-7.
b Atọ̀họ̀-Nuhihọ́ Lọ Tọn [Flansegbe] 1er mars 1983, weda 23.
Be Hiẹ Flin Ya?
• Naegbọn “obu gbẹtọ tọn” do yin omọ̀ mẹhusudo tọn de?
• Nawẹ Lẹgba nọ yí oklọ agbasanu bibẹpli tọn zan gbọn?
• Nawẹ Satani ko klọ mẹdelẹ biọ omọ̀ ayidedai he ma sọgbe lẹ tọn mẹ gbọn?
• Omọ̀ tẹwẹ Lẹgba nọ yizan nado hẹn pọninọ mítọn gble?
[Yẹdide to weda 27]
Mẹdelẹ ko yin wiwle do omọ̀ mẹ na “obu gbẹtọ tọn” wutu
[Yẹdide to weda 28]
Be hiẹ nọ deayidai to nuhe Jehovah gbẹwanna lẹ mẹ wẹ?
[Yẹdide to weda 29]
Etẹwẹ hiẹ sọgan wà eyin gbemanọpọ de tin to hiẹ po Klistiani hatọ de po ṣẹnṣẹn?