“Mì Diọnukunsọ Lẹgba”
“Mì diọnukunsọ [Lẹgba]; e nasọ họ̀n sọn mì dè.”—JAKOBU 4:7.
1. Nawẹ mí sọgan basi zẹẹmẹ aihọn dintọn gbọn, podọ etẹwutu mẹyiamisisadode lẹ po gbẹdohẹmẹtọ yetọn lẹ po dona tin to aṣeji?
“JIWHEYẸWHE matin ba, ṣigba Lẹgba gbẹ́ tin.” Hogbe André Malraux, wekantọ Flansenu tọn enẹlẹ sọgan yin yiyizan ganji na aihọn he mẹ mí to gbẹnọ te. Azọ́n gbẹtọ lẹ tọn nọ do ayiha wintinwintin Lẹgba tọn lẹ hia hugan ojlo Jiwheyẹwhe tọn. Satani to ‘azọ́n huhlọnnọ, ohia, lalo he jiawu, po oklọ mawadodo tọn lẹpo po wà nado hẹn mẹhe to dindọn lẹ’ buali. (2 Tẹsalonikanu lẹ 2:9, 10) Ṣigba, to ‘azán godo tọn’ ehelẹ mẹ, devizọnwatọ klandowiwe Jiwheyẹwhe tọn lẹ ji wẹ Satani to ayidonugo zedo, bo to awhàn-tọ́n Klistiani yiamisisadode, “ehe to osẹ́n Jiwheyẹwhe tọn yìn, bosọ hẹn okunnu Klisti tọn go gligli lẹ.” (2 Timoti 3:1; Osọhia 12:9, 17) Mẹyiamisisadode ehelẹ po gbẹdohẹmẹtọ yetọn he tindo todido aigba ji tọn lẹ po dona tin to aṣeji.
2. Nawẹ Satani klọ Evi gbọn, podọ obu tẹwẹ apọsteli Paulu dohia?
2 Satani yin mẹklọtọ mlẹnmlẹn. To odàn de yiyizan taidi hoyidọtọ mẹ, e klọ Evi nado lẹndọ e sọgan yin ayajẹnọ gbọn ede kinklan sọn Jiwheyẹwhe dè dali. (Gẹnẹsisi 3:1-6) Owhe fọtọ́n donu ẹnẹ delẹ to nukọnmẹ, apọsteli Paulu dibu dọ Klistiani yiamisisadode he tin to Kọlinti lẹ sọgan jai jẹ oklọ Satani tọn lẹ mẹ. Paulu wlan dọmọ: “Obu didi mi, dọ to onú depope mẹ dile odàn klọ Evi gbọn oklọ etọn dali, na yè nikaa hẹn ayiha mìtọn gble sọn malẹnayiawe he tin to Klisti mẹ mẹ.” (2 Kọlintinu lẹ 11:3) Satani nọ hẹn ayiha po nulẹnpọn gbẹtọ lẹ tọn po gblezọn. Kẹdẹdile e klọ Evi do, e sọgan hẹn Klistiani lẹ nado wá tadona he ma sọgbe lẹ kọ̀n bo lẹndọ ayajẹ yetọn sinai do nuhe Jehovah po Ovi etọn po gbẹ́ lẹ wiwà ji.
3. Hihọ́ tẹwẹ Jehovah nọ wleawuna sọta Lẹgba?
3 Mí sọgan yí Satani jlẹdo hẹ̀hutọ he nọ dó omọ̀ nado wle ohẹ̀ he ma to aṣeji lẹ go. Nado dapana omọ̀ Satani tọn lẹ, mí dona ‘gbọṣi ofi whiwhla Gigogán tọn,’ yèdọ nọtẹn hihọ́ yẹhiadonu tọn de he Jehovah nọ wleawu etọn na mẹhe yọ́n nupojipetọ-yinyin wẹkẹ tọn etọn to nuwiwa yetọn mẹ lẹ. (Psalm 91:1-3) Mí tindo nuhudo hihọ́ he Jiwheyẹwhe nọ wleawuna gbọn Ohó etọn, gbigbọ etọn, po titobasinanu etọn po gblamẹ lẹpo tọn, na mí “nido nọte pehẹ bublu [Lẹgba] tọn lẹ.” (Efesunu lẹ 6:11) Hogbe Glẹki tọn na “bublu” sọgan sọ yin lilẹdo “nuyiwa ayiha wintinwintin tọn,” kavi “oklọ.” Matin ayihaawe, Lẹgba nọ yí nuyiwa oklọ po ayiha wintinwintin tọn susu po zan nado domọwle devizọnwatọ Jehovah tọn lẹ.
Omọ̀ He Satani Dó na Klistiani Fliflimẹ Tọn Lẹ
4. Lẹdo wunmẹ tẹmẹ wẹ Klistiani fliflimẹ tọn lẹ nọgbẹ̀ te?
4 Klistiani owhe kanweko tintan po awetọ W.M. po tọn lẹ nọgbẹ̀ to ojlẹ he mẹ Ahọluigba Lomu tọn to huhlọn etọn yizan to gigọ́mẹ. Pax Romana (Jijọho Lomu tọn) dike ajọwiwa disa ganji. Kọdetọn dagbe ehe hẹn ojlẹ ayidedai tọn susu wá na nukọntọ lẹ, bọ togán lẹ hẹn ẹn diun dọ gbẹtọ paa lẹ tindo ayidedai susu na yé ni ma do fọ́ngu. Gbọjẹzan lẹ tlẹ sù sọ azọ́nzan lẹ to whedelẹnu. Togán lẹ yí tokuẹ lẹ zan nado wleawuna núdùdù po ayidedaitẹn lẹ po na gbẹtọ lẹ, bo hẹn hogọ́ yé bosọ hẹn ayiha yetọn jai.
5, 6. (a) Etẹwutu e ma sọgbe dọ Klistiani lẹ ni nọ yì aihundatẹn po nupọntẹn Lomu tọn lẹ po? (b) Omọ̀ tẹwẹ Satani yizan, podọ nawẹ Klistiani lẹ sọgan dapana ẹn gbọn?
5 Be ninọmẹ ehe yin owù de na Klistiani fliflimẹ tọn lẹ wẹ? Sọn avase he wekantọ he nọgbẹ̀ bọdo ojlẹ apọsteli lẹ tọn go, taidi Tertullien na lẹ mẹ, suhugan nuwiwa ayidedai ojlẹ enẹ mẹ tọn lẹ bẹ owù gbigbọmẹ po walọ dagbe tọn lẹ po hẹn na Klistiani nugbo lẹ. Owù dopo wẹ yindọ, suhugan hùnwhẹ po aihundida lanmẹyiya tọn paa lẹ po nọ yin bibasi nado doyẹyigona yẹwhe kosi tọn lẹ. (2 Kọlintinu lẹ 6:14-18) To nupọntẹn lẹ mẹ, suhugan aihundida lọ lẹ tọn wẹ tlẹ nọ gọ́ na fẹnnuwiwa kavi danuwiwa hùnsọndai tọn. Dile ojlẹ to yìyì, ojlo he gbẹtọ lẹ tindo na yé depò, bọ nudohia wedudu tọn lẹ yí otẹn yetọn. To owe etọn Daily Life in Ancient Rome mẹ, whenuho-kàntọ Jérôme Carcopino dọmọ: “To aihundida ehelẹ mẹ, aihundatọ-yọnnu lẹ vò nado jẹmẹ́ . . . Ohùn susu nọ yin sinsọndai . . . [Nudohia lọ] nọ bẹ walọ gblezọn he ko dùto gbẹtọ lọ lẹ ji jẹ obá he siso hugan mẹ hẹn. Nudohia mẹhẹnjọsi tọn mọnkọtọn lẹ ma nọ hiọawu na yé gba na nuyiwa hùnsọndai aihundatẹn lọ tọn lẹ ko hù numọtolanmẹ yetọn bo ko hẹn linlẹn yetọn lẹ gblezọn sọn ojlẹ dindẹn die wutu.”—Matiu 5:27, 28.
6 To nupọntẹn lẹ, gbẹtọ lẹ nọ hoavùn hẹ yede jẹ kúdonu kavi nọ hoavùn hẹ gbekanlin lẹ, vlavo bo nọ hù yé kavi yin hùhù gbọn kanlin lọ lẹ dali. Sẹ́nhẹngbatọ heyin whẹgbledo lẹ, podọ Klistiani susu to godo mẹ, nọ yin dindlan na gbekanlin ylankan lẹ. Yanwle oklọ Satani tọn to ojlẹ fliflimẹ tọn enẹlẹ mẹ wẹ nado hù numọtolanmẹ wangbẹna tọn he gbẹtọ lẹ tindo na fẹnnuwiwa po danuwiwa po, kaka onú ehelẹ nado lẹzun onú paa lẹ bọ gbẹtọ lẹ na nọ jlo yé. Aliho dopo he mẹ yé na dapana omọ̀ enẹ te wẹ nado nọla na aihundatẹn po nupọntẹn lọ lẹ po.—1 Kọlintinu lẹ 15:32, 33.
7, 8. (a) Etẹwutu e na ko yin nululu na Klistiani de nado yì pọ́n wezundido osọ́ lẹ tọn? (b) Nawẹ Satani sọgan ko yí tọ̀lẹtẹn Lomu tọn lẹ zan nado domọwle Klistiani lẹ gbọn?
7 Matin ayihaawe, wezundido osọ́ lẹ tọn he nọ yin didohia to nupọntẹn lẹ nọ fọnjlodotenamẹ taun, ṣigba e ma sọgbe na Klistiani lẹ, na gbẹtọgun lẹ nọ saba wà danú wutu. Wekantọ owhe kanweko-atọ̀ntọ tọn de na linlin dọ nupọntọ delẹ nọ hoavùn, bọ Carcopino dọ dọ “sunwhlẹvupọntọ po ayọdetọ lẹ po nọ tindo ajọwatẹn yetọn” to ohọ̀ nupọntẹn lọ tọn lẹ glọ. E họnwun dọ, nupọntẹn Lomu tọn mayin nọtẹn dagbe de na Klistiani lẹ gba.—1 Kọlintinu lẹ 6:9, 10.
8 Etẹwẹ dogbọn tọ̀lẹtẹn he diyin Lomu tọn lẹ dali? Nugbo wẹ dọ nudepope ma ylan to tọ̀lilẹ mẹ nado wé gba. Ṣigba suhugan tọ̀lẹtẹn Lomu tọn lẹ yin owhé daho he bẹ abò agbasa dindọn (massage) tọn, aihundatẹn lanmẹyiya tọn, akọhotẹn, gọna nudùtẹn po ahànnutẹn lẹ po hẹn. Dile etlẹ yindọ ojlẹ voovo wẹ yin didedovo na omẹ vijinu voovo tọn lẹ nado lawu, tọ̀lilẹ pọmẹ tọn nọ saba yin alọkẹyi. Clément Alexandrie tọn wlan dọmọ: “Tọ̀lẹtẹn lẹ nọ yin hùnhùn hlan sunnu po yọnnu lẹ po to paa mẹ; podọ yé nọ jẹmẹ́ to finẹ na nuyiwa gblewa tọn lẹ.” Gbọnmọ dali, Satani sọgan ko yí nọtẹn heyin alọkẹyi de zan taidi omọ̀ de na Klistiani lẹ po awubibọ po. Nuyọnẹntọ lẹ nọ nọla na ofi mọnkọtọn lẹ.
9. Omọ̀ tẹlẹ wẹ Klistiani fliflimẹ tọn lẹ dona dapana?
9 Akọhiho yin ayidedai yiwanna de to gbẹtọ lẹ ṣẹnṣẹn to whenue Ahọluigba Lomu tọn tin to gigo yiaga hugan etọn mẹ. Klistiani fliflimẹ tọn lẹ sọgan dapana súgbigbò he nọ wá aimẹ to wezundido osọ́ tọn lẹ tẹnmẹ kiki gbọn olá ninọ na ofi enẹlẹ dali. Akọhiho flinflin he jẹagọdo osẹ́n sọ nọ yin bibasi to hotẹli po ahànnutẹn lẹ po mẹ. Akọhotọ lẹ nọ gbòsú do sọha zannu kavi ohú he tin to alọ agbàwhlẹnhẹmẹtọ tọn mẹ lẹ ji. Akọhiho nọ hẹn awuvivi dogọ wá na gbẹtọ lẹ, na e nọ na yé todido akuẹ mimọ to aliho he bọawu mẹ tọn. (Efesunu lẹ 5:5) Humọ, yọnnu he nọ wazọ́n to ahànnutẹn lẹ nọ saba yin galọtọ lẹ, bo nọ yí owù fẹnnuwiwa tọn dogọ. Delẹ niyẹn to omọ̀ he Satani dó na Klistiani he nọ̀ tòdaho he tin to Ahọluigba Lomu tọn mẹ lẹ. Be onú lẹ gbọnvo taun to egbehe wẹ ya?
Omọ̀ He Satani Nọ Dó to Egbehe Lẹ
10. Nawẹ ninọmẹ egbezangbe tọn taidi dehe gbayipe to Ahọluigba Lomu tọn mẹ lẹ gbọn?
10 To paa mẹ, omọ̀ Satani tọn lẹ ma ko diọ to owhe kanweko lẹ gblamẹ gba. Apọsteli Paulu na ayinamẹ sinsinyẹn Klistiani he tin to tòdaho gblezọn Kọlinti tọn mẹ lẹ, na “alọ Satani tọn” ni ma do plá yé. E dọmọ: “Mí mayin madọnanọ oklọ [Satani tọn] lẹ tọn gba.” (2 Kọlintinu lẹ 2:11) To otò he hunnukun susu mẹ, ninọmẹ lọ diblayin nudopolọ hẹ dehe gbayipe to ojlẹ he mẹ Ahọluigba Lomu tọn to huhlọn etọn yizan to gigọ́mẹ. Mẹsusu tindo whenu dogọ na ayidedai hugan gbede pọ́n tọn. Akọhiho tohọluduta tọn lẹ tlẹ nọ ze todido whanpẹnọ de donukọnna wamọnọ lẹ. Ayidedai he ma vẹahi susu wẹ tin na gbẹtọ lẹ. Aihundatẹn lanmẹyiya tọn lẹ nọ gọ́, gbẹtọ lẹ nọ hòakọ, gbẹtọgun lẹ po aihundatọ lanmẹyiya tọn lẹ po nọ lẹzun danuwatọ to whedelẹnu. Húnhiho gblezọn lẹ nọ to núdọ, bọ nudohia mawé tọn lẹ nọ to yìyì to oplò ji podọ to sinemoto po televiziọn po ji. To otò delẹ mẹ, tọ̀lẹtẹn pọmẹ tọn lẹ gbayipe taun, to ma donù mẹhe nọ jẹmẹ́ nado lẹtọ̀ to huto lẹ go. Kẹdẹdile e yin do to owhe kanweko tintan sinsẹ̀n Klistiani tọn whenu, Satani to tintẹnpọn nado yí nuwiwa ayidedai aihọn tọn lẹ do dọ̀n devizọnwatọ Jiwheyẹwhe tọn lẹ.
11. Omọ̀ tẹlẹ wẹ tin to ojlo nado gbọjẹ bo deayidai mẹ?
11 To aihọn he mẹ kọgbidinamẹ sù te ehe mẹ, nuhe sọgbe wẹ e yin nado nọ jlo nado gbọjẹ kavi deayidai. Ṣigba, kẹdẹdile tọ̀lẹtẹn Lomu tọn lẹ bẹ adà he tindo owù taun lẹ hẹn na Klistiani fliflimẹ tọn lẹ do, mọwẹ gbọjẹ-yitẹn delẹ ko lẹzun omọ̀ he Satani nọ yizan nado plan Klistiani egbezangbe tọn lẹ biọ fẹnnuwiwa po ahànnumu po mẹ do. Paulu wlanwe hlan Klistiani Kọlinti tọn lẹ dọmọ: “Yè klọ mì blo: ogbẹ́ ylankan nọ hẹn walọ dagbe gble. Mì fọ́n hlan dodo, mì waylando blo: na mẹdelẹ ma tindo oyọnẹn Jiwheyẹwhe tọn.”—1 Kọlintinu lẹ 15:33, 34.
12. Etẹwẹ yin delẹ to omọ̀ he Satani nọ yizan nado wle devizọnwatọ Jehovah tọn lẹ to egbehe mẹ?
12 Mí mọ lehe Satani yí oklọ zan nado hẹn linlẹn Evi tọn gblezọn do. (2 Kọlintinu lẹ 11:3) To egbehe, omọ̀ Satani tọn dopo wẹ nado hẹn Klistiani lẹ nado lẹndọ eyin yé yí aliho aihọn tọn lẹ zan ganji bo dohia dọ gbẹtọ paa taidi mẹdevo lẹ wẹ Kunnudetọ Jehovah tọn lẹ yin, yé na tindo kọdetọn dagbe to mẹdelẹ dindọn biọ nugbo Klistiani tọn mẹ. Yé nọ yì zẹjlẹgo to whedelẹnu, bọ adà awetọ wẹ nọ yin kọdetọn lọ. (Hagai 2:12-14) Omọ̀ Satani tọn devo wẹ nado whàn Klistiani klandowiwe lẹ, jọja po mẹhomẹ po, nado zan gbẹzan awe bo ‘hẹn homẹgble gbigbọ wiwe Jiwheyẹwhe tọn.’ (Efesunu lẹ 4:30) Mẹdelẹ ko jai jẹ omọ̀ ehe mẹ gbọn Internet ṣiṣizan dali.
13. Omọ̀ nuglọ tọn tẹwẹ yin dopo to nuwiwa oklọ Satani tọn lẹ mẹ, podọ ayinamẹ Howhinwhẹn tọn tẹwẹ sọgbe tofi?
13 Omọ̀ Satani tọn devo wẹ afinyọnnuwiwa nuglọ tọn. Klistiani nugbo depope ma sọgan tindo mahẹ to Satani sinsẹ̀n kavi afinyọnnuwiwa mẹ sọn ojlo mẹ gba. Ṣogan, to mayọnẹn mẹ, mẹdelẹ ma nọ kiyananu eyin e wá jẹ yẹdide-to-kanji, nudohia televiziọn tọn lẹ, aihundida video tọn lẹ pinpọ́n, gọna owe yọpọvu lẹ tọn po owe nukikodonamẹ tọn he nọ zinnudo danuwiwa kavi afinyọnnuwiwa po lẹ ji hihia. Mí dona nọla na nudepope he tindo ohia afinyọnnuwiwa tọn. Howhinwhẹn nuyọnẹn tọn lọ dọmọ: “Owùn po omọ̀ po tin to aliho yẹwatọ lẹ tọn ji, ewọ he whlá ayiha etọn na dẹn do yé.” (Howhinwhẹn lẹ 22:5) Na Satani wẹ yin “yẹwhe owhenu he tọn” wutu, nudepope he gbayipe taun sọgan tindo omọ̀ etọn lẹ dopo to nuglọ.—2 Kọlintinu lẹ 4:4; 1 Johanu 2:15, 16.
Jesu Diọnukunsọ Lẹgba
14. Nawẹ Jesu nọavunte sọta whlepọn tintan Lẹgba tọn gbọn?
14 Jesu wleawuna apajlẹ dagbe nukundiọsọ Lẹgba po hinhẹn ẹn nado họnyi tọn po. To baptẹm po nùbibla na azán 40 po etọn godo, Satani whlé Jesu pọ́n. (Matiu 4:1-11) Whlepọn tintan yí huvẹ he to Jesu hù to nùbibla lọ godo zan. Satani biọ to Jesu si nado wà azọ́njiawu tintan etọn nado hẹn nuhudo agbasa tọn de gbọ. To hoyidọ sọn Deutelonomi 8:3 mẹ, Jesu gbẹ́ nado yí huhlọn etọn lẹ zan to aliho ṣejannabi tọn mẹ bo dohia dọ núdùdù gbigbọmẹ tọn yin nujọnu hugan agbasa tọn.
15. (a) Ojlo jọwamọ tọn tẹwẹ Satani yí do whlé Jesu pọ́n? (b) Etẹwẹ yin dopo to nuyiwa oklọ tọn tangan he Satani nọ yizan sọta devizọnwatọ Jiwheyẹwhe tọn lẹ to egbehe, ṣigba nawẹ mí sọgan diọnukunsọ ẹ gbọn?
15 Linlẹn he fọnjlodotenamẹ gando whlepọn ehe go wẹ yindọ Lẹgba ma dín dọ Jesu ni waylando zanhẹmẹ tọn gba. Huvẹ, he nọ fọ́n ojlo núdùdù tọn dote to jọwamọ-liho wẹ yin ojlo sinsinyẹn agbasa tọn he e yí do whlé Jesu pọ́n to ojlẹ ehe mẹ. Whlepọn tẹlẹ wẹ Lẹgba nọ yizan nado dọ̀n omẹ Jiwheyẹwhe tọn lẹ to egbehe? Yé sù bosọ gbọnvo, ṣigba e to whlepọn zanhẹmẹ tọn yizan taidi dopo to omọ̀ tangan etọn lẹ mẹ to vivẹnudido etọn nado gbà tenọgli omẹ Jehovah tọn lẹ tọn mẹ. Gbọn apajlẹ Jesu tọn hihodo dali, mí sọgan diọnukunsọ Lẹgba bo nọavunte sọta whlepọn lẹ. Kẹdẹdile Jesu dù to nuzedonukọnnamẹ Satani tọn lẹ ji gbọn wefọ he sọgbe lẹ finflin dali do, mílọsu sọgan flin wefọ lẹ taidi Gẹnẹsisi 39:9 po 1 Kọlintinu lẹ 6:18 po, eyin mí yin whiwhlepọn.
16. (a) Nawẹ Satani whlé Jesu pọ́n whlaawetọ gbọn? (b) Aliho tẹlẹ mẹ wẹ Satani sọgan tẹnpọn nado whlé mí pọ́n nado tẹ́n Jehovah pọ́n te?
16 Enẹgodo, Lẹgba dọna Jesu dọ e ni lọ́n jẹte sọn adó tẹmpli tọn ji bo tẹ́n nugopipe Jiwheyẹwhe tọn nado basi hihọ́na ẹn gbọn angẹli Etọn lẹ dali pọ́n. To hoyidọ sọn Deutelonomi 6:16 mẹ, Jesu gbẹ́ nado whlé Otọ́ etọn pọ́n. Satani sọgan gọ̀n ma whlé mí pọ́n nado lọ́n sọn adó tẹmpli de tọn ji, ṣigba e sọgan whlé mí pọ́n nado tẹ́n Jehovah pọ́n. Be mí nọ yin whiwhlepọn nado pọ́n fie mí sọgan hodo aṣọdido po nusísọ́ he to zoji to aihọn mẹ lẹ po jẹ bo ma na yin ayinamẹ na wẹ ya? Be mí nọ yin whiwhlepọn gando ayidedai he ma sọgbe lẹ go wẹ ya? Eyin mọwẹ, mí sọgan to Jehovah whlé pọ́n. Eyin mí tindo ayilinlẹn mọnkọtọn lẹ, kakati Satani ni họ̀n na mí, e na gbọṣi mí dè bo na to tintẹnpọn pludopludo nado klọ mí nado kọnawudopọ hẹ ẹ.
17. (a) Nawẹ Lẹgba whlé Jesu pọ́n whlaatọ̀ntọ gbọn? (b) Nawẹ Jakobu 4:7 sọgan yin nugbo na mí gbọn?
17 To whenuena Satani dọ dọ emi na na ahọludu aihọn tọn lẹpo Jesu na nuyiwa sinsẹ̀n-bibasi tọn dopo poun, Jesu sọ diọnukunsọ ẹ gbọn hoyidọ sọn Owe-wiwe mẹ dali, bo nọte gligli to adà sinsẹ̀n-bibasi Otọ́ etọn tọn mẹ. (Deutelonomi 5:9; 6:13; 10:20) Satani sọgan gọ̀n ma ze ahọludu aihọn tọn lẹ donukọnna mí, ṣigba e nọ yí yanwle agbasanu bibẹpli tọn do whlé mí pọ́n gbọzangbọzan, bo tlẹ nọ na mí todido nuhe taidi ahọluduta mẹdetiti tọn pẹvi de tọn. Be mí nọ yinuwa dile Jesu wà do, bo nọ na Jehovah mẹdezejo mlẹnmlẹn mítọn ya? Eyin mọwẹ, nuhe jọ do Jesu go na jọ do mílọsu go. Kandai Matiu tọn dọmọ: “Whenẹnu wẹ [Lẹgba] jo e dai.” (Matiu 4:11) Satani na jo mí do eyin mí nọavunte sọta ẹ gligli gbọn nunọwhinnusẹ́n he sọgbe Biblu tọn lẹ finflin bosọ yí yé zan dali. Devi Jakobu wlan dọmọ: “Mì diọnukunsọ [Lẹgba]; e nasọ họ̀n sọn mì dè.” (Jakobu 4:7) Klistiani de kanwe hlan alahọ Kunnudetọ Jehovah tọn lẹ tọn he tin to France dọmọ: “Satani yin mẹklọtọ nugbonugbo. Dile etlẹ yindọ ayilinlẹn ṣie lẹ sọgbe taun, yẹn mọ ẹn taidi nuhe sinyẹn taun nado duto numọtolanmẹ po ojlo ṣie lẹ po ji. Ṣigba, po adọgbigbo, homẹfa, podọ hú popolẹpo, alọgọ Jehovah tọn po, yẹn ko penugo nado hẹn tenọgligo bo gbọṣi nugbo lọ mẹ.”
Mí Yin Hinhẹn Pegan Mlẹnmlẹn Nado Diọnukunsọ Lẹgba
18. Gbaja gbigbọmẹ tọn tẹlẹ wẹ nọ hẹn mí pegan nado diọnukunsọ Lẹgba?
18 Jehovah ko na mí gbaja gigọ́ gbigbọmẹ tọn he na hẹn mí penugo nado ‘nọtegligli pehẹ bublu Lẹgba tọn lẹ.’ (Efesunu lẹ 6:11-18) Owanyi mítọn na nugbo lọ na blá gbaja na adaja mítọn, kavi hẹn mí sọgbe na nuwiwa Klistiani tọn. Gbemima mítọn nado tẹdo nujinọtedo dodo Jehovah tọn lẹ go na taidi tùnudo dodo tọn he na basi hihọ́ na ahun mítọn. Eyin mí yí wẹndagbe lọ do doafọpana afọ mítọn lẹ, mí na nọ tọ́n yì azọ́n yẹwhehodidọ tọn mẹ to gbesisọmẹ, bọ ehe na hẹn mí lodo bo basi hihọ́na mí to gbigbọ-liho. Yise he lodo mítọn na taidi awọyinu daho de, he to hihọ́ basina mí sọn ‘ogá mẹylankan lọ tọn,’ podọ mẹgbeyinyan po whlepọn oklọ tọn etọn lẹ po si. Todido nujikudo tọn mítọn to hẹndi opagbe Jehovah tọn lẹ tọn mẹ na taidi ogangbakun de he to hihọ́ basina nugopipe nulẹnpọn tọn mítọn bo nọ na mí jijọho ayiha mẹ tọn. (Filippinu lẹ 4:7) Eyin mí yí Ohó Jiwheyẹwhe tọn zan ganji, e na taidi ohí de he mí sọgan yizan nado hẹn gbẹtọ lẹ jẹ mẹdekannu sọn kanlinmọgbenu gbigbọmẹ tọn Satani tọn. Mí sọgan sọ yí i zan nado yiavunlọna míde, yèdọ dile Jesu wà do to whenue e yin whiwhlepọn.
19. Gbọnvona ‘nukundidiọsọ Lẹgba,’ etẹwẹ sọ yin dandannu?
19 Gbọn “gbaja Jiwheyẹwhe tọn lẹpo” biblá dogo gọna dẹ̀hiho to whepoponu dali, mí sọgan deji dọ Jehovah na họ́ mí to whenue Satani yangbé mítọn. (Johanu 17:15; 1 Kọlintinu lẹ 10:13) Ṣigba Jakobu dohia dọ ‘nukundidiọsọ Lẹgba’ poun ma ko pé gba. Hú popolẹpo, mí sọ dona ‘litaina Jiwheyẹwhe,’ mẹhe nọ penukundo mí go. (Jakobu 4:7, 8) Hosọ he bọdego na do lehe mí sọgan wà ehe do hia.
Nawẹ Hiẹ Na Na Gblọndo Gbọn?
• Omọ̀ Satani tọn tẹlẹ wẹ Klistiani fliflimẹ tọn lẹ dona dapana?
• Nuyiwa oklọ tọn tẹlẹ wẹ Satani nọ yizan to egbehe nado domọwle devizọnwatọ Jehovah tọn lẹ?
• Nawẹ Jesu nọavunte sọta whlepọn Lẹgba tọn lẹ gbọn?
• Gbaja gbigbọmẹ tọn tẹlẹ wẹ nọ hẹn mí penugo nado diọnukunsọ Lẹgba?
[Yẹdide to weda 9]
Jesu diọnukunsọ Lẹgba gligli
[Yẹdide to weda 10]
Klistiani owhe kanweko tintan tọn lẹ gbẹ́ ayidedai danuwiwa po mawé tọn lẹ po dai
[Asisa Yẹdide tọn]
The Complete Encyclopedia of Illustration/J. G. Heck