Be Hiẹ Nọ Miọnhomẹna Mẹdevo lẹ Ya?

OSÓ Helmoni tọn tin to hùwaji pete Osó Lẹbanọni tọn lẹ bo yiaga hugan jiyiyi ohù tọn na mẹtlu 2 814. Na suhugan ojlẹ lẹ tọn to owhe dopo mẹ, osin-agó nọ ṣinyọ́n aga pete Osó Helmoni tọn ji, podọ azọ̀ gbigblọ zánmẹ tọn nọ hẹ̀ do osin-agó lọ bo nọ yọ́ ẹ nado diọ ẹ zun ahún. Ahún lọ nọ jà do ogbé, atin-sinsẹ́nnọ lẹ po vẹntin lẹ po ji to odò. To ojlẹ gaa alunlun Islaeli hohowhenu tọn lẹ whenu, ahún mimiọn mọnkọtọn yin asisa tangan fifá tọn de he nọ gọalọna ogbé lẹ nado vùn.

To ohàn he yin gbigbọdo gbọn Jiwheyẹwhe dali de mẹ, pọninọ dagbe he tin to sinsẹ̀n-basitọ Jehovah tọn lẹ ṣẹnṣẹn yin yiyijlẹdo “ahún Helmoni tọn, he nọ fán do osó Ziọni tọn lẹ ji” go. (Psalm 133:1, 3) Kẹdẹdile Osó Helmoni tọn nọ wleawuna ahún mimiọn lẹ na ogbé lẹ do, mílọsu sọgan miọnhomẹna mẹhe mí dukosọ hẹ lẹ. Nawẹ mí sọgan wà ehe gbọn?

Apajlẹ Homẹmiọnnamẹ Jesu Tọn

Jesu Klisti tindo nuyiwadomẹji sisosiso do mẹdevo lẹ ji. Tintin to e dè, etlẹ yin na ojlẹ vude poun nọ yin homẹmiọnnamẹnu tlala. Di apajlẹ, Wẹndagbe-kàntọ Malku dọmọ: ‘Jesu ze ovi lẹ daga to awà etọn lẹ mẹ, bo yí alọ etọn lẹ do yé ji, bo dona yé.’ (Malku 10:16) Lehe enẹ na ko miọnhomẹna ovi enẹlẹ do sọ!

To ozán he Jesu yizan gbọngodo to aigba ji taidi gbẹtọvi de whenu, e klọ afọ devi etọn lẹ tọn. Whiwhẹ etọn dona ko yinuwado yé ji. Enẹgodo, Jesu dọna yé dọmọ: “Yẹn ko na ohia mì, na mì nido nọ wà dile yẹn wà hlan mì do.” (Johanu 13:1-17) Mọwẹ, yé lọsu dona tindo whiwhẹ. Dile etlẹ yindọ apọsteli lọ lẹ ma yawu mọnukunnujẹ nuhe dọ Jesu te mẹ bo jẹ núdọ̀n ji to ozán enẹ mẹ gando mẹhe yè lẹn nado yin kiklo hú to ṣẹnṣẹn yetọn go, Jesu ma gblehomẹ. Kakatimọ, e yí sọwhiwhe do yihojlẹdohogo hẹ yé. (Luku 22:24-27) Etlẹ yin to “whenuena yè to vivlẹ [Jesu], e ma vlẹ omẹ.” Na nugbo tọn, “whenuena e sọ jiya, e ma wadán; ṣigba bo jo ede hlan ewọ he nọ yí dodo do dawhẹ.” E jẹ dọ mí ni hodo apajlẹ homẹmiọnnamẹ Jesu tọn.—1 Pita 2:21, 23.

Jesu dọmọ: “Mì yí zẹgẹ ṣie do okọ̀ mìtọn, na mi nisọ plọn nupinplọn ṣie: na homẹmimiọnnọ podọ ayiha whiwhẹnọ wẹ yẹn: mì nasọ mọ gbọjẹ hlan alindọn mìtọn lẹ.” (Matiu 11:29) Etẹwẹ na ko yin numọtolanmẹ towe eyin Jesu lọsu wẹ to nuplọn we tlọlọ? To whenuena tòmẹnu etọn lẹ sè nuplọnmẹ etọn to sinagọgu yetọn mẹ, e paṣa yé sọmọ bọ yé dọmọ: “Fie wẹ dawe he hẹn nuyọnẹn he po huhlọn helẹ po sọn?” (Matiu 13:54) Nupinplọn gando gbẹzan Jesu tọn po lizọnyizọn etọn po go sọgan plọn nususu mí gando lehe mí sọgan miọnhomẹna mẹdevo lẹ do go. Mì gbọ mí ni gbadopọnna lehe Jesu ze apajlẹ ayidego tọn de dai to hogbe mẹjlọdote tọn lẹ po gbigbọ alọgọnamẹ tọn po mẹ do.

Ohó Mẹjlọdote Tọn Didọ

E bọawu taun nado hẹn ohọ̀ de gble hugan nado gbá yọyọ de. Nunọwhinnusẹ́n dopolọ wẹ gando hodidọ mítọn go. Taidi gbẹtọvi mapenọ lẹ, mímẹpo wẹ tindo awugbopo mítọn lẹ. Ahọlu Sọlọmọni dọmọ: “Gbẹtọ nugbonọ de ma tin to aigba ji, he to dagbe wà bo ma waylan.” (Yẹwhehodọtọ 7:20) E nọ bọawu nado mọ awugbopo mẹdevo tọn lẹ bo hẹn ẹn gbọjọ gbọn hogbe whánsọmẹ tọn lẹ dali. (Psalm 64:2-4) To alọ devo mẹ, e nọ vẹawu nado hẹn hogbe mítọn lẹ yin dehe na jlọmẹdote.

Jesu yí odẹ́ etọn zan nado jlọ gbẹtọ lẹ dote. E ze nuhe na miọnhomẹna yé to gbigbọ-liho donukọnna yé gbọn wẹndagbe Ahọluduta lọ tọn lilá na yé dali. (Luku 8:1) Jesu sọ miọnhomẹna mẹhe lẹzun devi etọn lẹ gbọn Otọ́ olọnmẹ tọn etọn didehia yé dali. (Matiu 11:25-27) Abajọ gbẹtọ lẹ nọ dọnsẹpọ ẹ!

To vogbingbọn mẹ, wekantọ lẹ po Falesi lẹ po ma nọ ze nuhudo mẹdevo lẹ tọn do lẹnpọn mẹ gba. “Yé yiwanna tẹnmẹ daho to núdùdù kọ̀n, po aisintẹn daho po to sinagọgu mẹ,” wẹ Jesu dọ. (Matiu 23:6) Na nugbo tọn, yé nọ ṣàn omẹ paa lẹ kò dọmọ: “Agundaho [ehe] he ma yọ́n osẹ́n lọ wẹ yè hodẹ̀do.” (Johanu 7:49) Na taun tọn, nudepope ma yin homẹmiọnnamẹnu to enẹ mẹ!

Hogbe mítọn nọ saba do nuhe mí yin to homẹ po nukun he mí nọ yí do pọ́n mẹdevo lẹ po hia. Jesu dọmọ: “Gbẹtọ dagbe sọn adọkunnu dagbe ayiha etọn mẹ tọn wẹ e nọ hẹn enẹ he yin dagbe tọnjẹgbonu sọn wá; gbẹtọ ylankan sọn adọkunnu ylankan etọn mẹ tọn wẹ e nọ hẹn enẹ he yin ylankan tọnjẹgbonu sọn wá: na sọn onú ayiha gege tọn mẹ wẹ onù nọ dọ.” (Luku 6:45) To whelọnu lo, etẹwẹ mí sọgan wà nado hẹn ẹn diun dọ hogbe mítọn lẹ nọ miọnhomẹna mẹdevo lẹ?

Onú dopo wẹ yindọ, mí sọgan yiagbọji bo lẹnnupọn whẹpo do dọho. Howhinwhẹn lẹ 15:28 dọmọ: ‘Ayiha dodonọ tọn nọ lẹnayihamẹpọn nado gblọn.’ Ayihamẹlinlẹnpọn mọnkọtọn ma dona yí whenu susu to mí si. To nulinlẹnpọn na ojlẹ kleun de godo, mí sọgan ko yọnẹn eyin nuhe mí na dọ na miọnhomẹna mẹdevo lẹ. Mí sọgan kanse míde dọ: ‘Be nuhe n’jlo na dọ ehe ka dọnmẹdogo ya? Be nugbo wẹ ya, kavi yèdọ-yèdọ poun? Be ‘ohó he yè na dọ to ojlẹ etọn mẹ’ wẹ ya? Be e na miọnhomẹna mẹhe n’jlo na dọ ẹ na lẹ bosọ jlọ yé dote ya?’ (Howhinwhẹn lẹ 15:23) Eyin mí wá tadona kọ̀n dọ nuhe mí jlo na dọ ma jlọmẹdote kavi ma sọgbe to ojlẹ enẹ mẹ, mì gbọ mí ni dovivẹnu vẹkuvẹku nado dapana ẹn. Na taun tọn, naegbọn mí ma na dovivẹnu nado dín nudevo he na jlọmẹdote bosọ sọgbe do otẹn etọn mẹ? Ohó lẹnpọn matindo tọn lẹ taidi “sisọ́ ohí de tọn” to whenuena hogbe mẹjlọdote tọn lẹ yin “núgángán.”—Howhinwhẹn lẹ 12:18.

Alọgọ devo wẹ nado ze ayidonugo mítọn pete do nuhe hẹn yisenọ hatọ mítọn lẹ yin nuhọakuẹ to nukun Jiwheyẹwhe tọn mẹ ji. Jesu dọmọ: “Mẹdepope ma sọgan wá dè e, adavo Otọ́ he do mi hlan dọ̀n ẹn.” (Johanu 6:44) Jehovah nọ mọ jẹhẹnu dagbe lẹ to devizọnwatọ nugbonọ etọn lẹ dopodopo mẹ—etlẹ yin mẹhe mí sọgan lẹndọ gbẹtọ-yinyin yetọn sinyẹn lẹ. Eyin mí dovivẹnu vẹkuvẹku nado yọ́n jẹhẹnu dagbe yetọn lẹ, e na whàn mí nado nọ dọ dagbe yetọn.

Gọalọna Mẹdevo Lẹ

Jesu mọnukunnujẹ awufiẹsa mẹhe to yinyin kọgbidina lẹ tọn mẹ to gigọ́ mẹ. Na nugbo tọn, “whenuena e mọ agundaho lẹ, e wàlẹblanu na yé, na yè hẹn agbọ́pé yé, bosọ hẹn apọṣi yé di lẹngbọ he ma tindo lẹngbọhọtọ de.” (Matiu 9:36) Ṣigba Jesu mọnú zẹ̀ ninọmẹ awubla tọn yetọn go; e yí nude wà nado gọalọna yé. E basi oylọna yé dọmọ: “Mì wá dè e, mì he to tuklajẹ, bọ yè doagban pinpẹn na lẹ, yẹn nasọ na gbọjẹ mì.” E sọ na yé jide dọmọ: “Zẹgẹ ṣie bọawu, agbàn ṣie sọ fua.”—Matiu 11:28, 30.

To egbehe, mí to gbẹnọ to “ojlẹ awusinyẹn tọn lẹ” mẹ. (2 Timoti 3:1) Susu gbẹtọ lẹ tọn wẹ ‘magbọjẹ aihọn ehe tọn’ ko doagban pinpẹn na. (Matiu 13:22) Mẹdelẹ tindo nuhahun ayimajai tọn na ninọmẹ mẹdetiti tọn lẹ wutu. (1 Tẹsalonikanu lẹ 5:14) Nawẹ mí sọgan miọnhomẹna mẹhe to nuhudo mẹ lẹ gbọn? Taidi Klisti, mí sọgan gọalọ nado hẹn agban yetọn fua.

Mẹdelẹ nọ dín kọgbọ na yede gbọn nuhahun yetọn lẹ didọ tọ́n dali. Eyin mẹhe apọ̀ ko ṣì lẹ wá mí dè na alọgọ, be mí nọ yí whenu zan nado dotoaina yé po sọwhiwhe po ya? Nado dotoai po awuvẹmẹ po nọ biọ mẹplọnlọ-dido-mẹdetiti go. E nọ biọ ayidonugo pete zizedo nuhe mẹlọ to didọ ji, kakati nado to nulẹnpọndo nuhe mí na dọ kavi lehe mí na didẹ nuhahun lọ do ji. Gbọn todidoai po sọwhiwhe po, nukunji pinpọ́n, podọ nukiko yẹsẹ to whenuena e sọgbe nado wàmọ dali, mí nọ dohia dọ mí to yetọn hòpọn.

To agun Klistiani tọn mẹ, dotẹnmẹ hundote susu wẹ tin nado na tuli yisenọ hatọ lẹ. Di dohia, to whenuena mí yì opli to Plitẹnhọ Ahọluduta tọn mẹ, mí sọgan dọnsẹpọ mẹhe to ahidihẹ nuhahun agbasalilo tọn lẹ. To whedelẹnu, nuhe e nọ biọ lẹpo wẹ nado yí nukunwhiwhe kleun de zan hẹ yé jẹnukọnna opli podọ to godo etọn nado jlọ yé dote po hogbe tulinamẹ tọn lẹ po. Mí sọ sọgan doayi mẹhe nọ gọ̀n Oplọn Agunwe he mí nọ yì lẹ go. Eyin e yọnbasi, mí sọgan ylọ yé to alokan ji bo kàn dagbemẹninọ yetọn biọ kavi na alọgọ he jẹ.—Filippinu lẹ 2:4.

Mẹho agun tọn lẹ nọ didá azọngban pinpẹn lẹ to agun mẹ. Nususu wẹ mí sọgan wà nado gọalọ bo hẹn azọngban yetọn fua gbọn gbekinkọndopọ po whiwhẹ yíyí do penukundo azọ́ndenamẹ depope he mí sọgan mọyi po go dali. Ohó Jiwheyẹwhe tọn na tuli mí dọmọ: ‘Mì nọ yí mẹhe yin nukọntọ to mì mẹ lẹ sè, bo nọ litai hlan yé: na yé to alindọn mìtọn lẹ họ́, yé he ma sọgan nọma dogbè onú yè wà lẹ tọn, na yé nido yí ayajijẹ do basi i, e yin po homẹgble po blo: na enẹ ma yin alenu na mì gba.’ (Heblu lẹ 13:17) Eyin mí nọ do gbigbọ gbekọndopọ tọn hia, mí sọgan miọnhomẹna yé he nọ “pọ́n onú go” to aliho dagbe mẹ lẹ.—1 Timoti 5:17.

Sudeji to Hodidọ Mẹjlọdote Tọn po Nuyiwa Alọgọnamẹ Tọn lẹ po Mẹ

Ahún mimiọn he nọ wá sọn osin flinflin madosọha he nọ jà dẹẹdẹ wá odò lẹ mẹ taidi nuhe ma nọ wá sọn fidepope wẹ nkọ. Mọdopolọ, vlavo wẹ nuyiwa homẹdagbe tọn dopo poun na miọnhomẹna mẹdevo lẹ to whenuena e yindọ jẹhẹnu he taidi Klisti tọn he mí wleawuna dẹẹdẹ lẹ didohia to ojlẹ lẹpo mẹ wẹ nọ hẹn homẹmimiọn wá.

“Mì nọ yí homẹdagbe do yiwanna mìnọzo di mẹmẹsunnu,” wẹ apọsteli Paulu wlan. “To yẹyi mẹ mì nọ na pipà daho mìnọzo.” (Lomunu lẹ 12:10) Mì dike mí ni yí ayinamẹ Paulu tọn do yizan mẹ. Mì gbọ mí ni nọ miọnhomẹna mẹdevo lẹ to hodidọ po nuyiwa mítọn lẹ po mẹ.

[Yẹdide to weda 16]

Ahún Osó Helmoni tọn—asisa fifá tọn de he nọ gọalọna ogbé lẹ nado vùn

[Yẹdide to weda 17]

Mẹhe nọ dotoai po awuvẹmẹ po nọ miọnhomẹna mẹdevo lẹ