‘Mì Wá Dè E, Yẹn Nasọ Fakọna Mì’
Jọja He Taidi Ahun-Jijà Awumiọnnamẹ Tọn Lẹ
E HỌNWUN dọ Jesu Klisti yí hodotọ jọja etọn lẹ dogọ to whenue e dọ: ‘Mì wá dè e, yẹn nasọ fakọna mì.’ (Matiu 11:28) To whenuena gbẹtọ lẹ jẹ ovivu lẹ hẹnwa e dè ji, devi etọn lẹ tẹnpọn nado kọna yé. Ṣigba Jesu dọmọ: “Mì gbọ yọpọvu lẹ ni wá dè e, mì sọ kọna yé blo.” Jesu tlẹ “ze [yọpọvu lẹ] daga to awa etọn lẹ mẹ . . . bo dona yé.” (Malku 10:14-16) Matin ayihaawe, nukun nujọnu tọn wẹ Jesu yí do pọ́n jọja lẹ.
Biblu dọho gando jọja sunnu po yọnnu nugbonọ lẹ po, gọna yọpọvu po ovivu he ze apajlẹ dagbe dai to Jiwheyẹwhe sinsẹ̀n mẹ lẹ po go. Owe Psalm lẹ tọn dọ dọdai ‘hagbẹ jọja lẹ tọn’ de he miọnawunamẹ taidi ahun-jijà. E sọ dọho gando “dẹpẹ” po “awhli” po he to oyín Jehovah tọn pà lẹ go ga.—Psalm 110:3; 148:12, 13.
Nọtẹn de He Mẹ Jọja lẹ Na Vùn Te
E sọgbe nado yí jọja lẹ jlẹdo ahun-jijà go, na ahun nọ yin kinkọndopọ hẹ adọkun po dona po wutu. (Gẹnẹsisi 27:28) Ahun nọ miọnawunamẹ, bo nọ fakọnamẹ. To ojlẹ tintin tofi Klisti tọn ehe whenu, jọja Klistiani lẹ jo yede sọn ojlo mẹ po jejejininọ po to sọha susu mẹ. Kẹdẹdi ahun-jijà he nọ miọnawunamẹ, jọja sunnu po yọnnu po susu to Jiwheyẹwhe sẹ̀n po ayajẹ po bo nọ gọalọna sinsẹ̀n-basitọ hatọ yetọn lẹ.—Psalm 71:17.
E mayin dọ jọja Klistiani lẹ nọ fakọna mẹdevo lẹ poun wẹ gba; yelọsu nọ mọ kọfanamẹ to sinsẹ̀nzọn yetọn mẹ. Titobasinanu Jiwheyẹwhe tọn yin nọtẹn de he mẹ yé sọgan vùn te. Na yé nọ tẹdo nujinọtedo yiaga walọdagbe tọn lẹ go wutu, jọja sunnu po yọnnu po lẹ nọ duvivi haṣinṣan pẹkipẹki de tọn hẹ Jiwheyẹwhe. (Psalm 119:9) To agun lọ mẹ, yé nọ tindo mahẹ to nuwiwa mẹjlọdote tọn lẹ mẹ bo nọ mọ họntọn dagbe lẹ, bọ ehelẹ nọ yidogọna gbẹzan pekọnọ he tindo zẹẹmẹ de.
‘E Nọ Hẹnmẹ Jẹ Gángán bo Nọ Fakọnamẹ’
Be jọja Klistiani lẹ lọsu nọ mọdọ yé taidi ‘ahun-jijà lẹ’ ya? Tania, heyin awhlivu de nọ yí zohunhun do tindo mahẹ to nuwiwa agun tọn lẹ mẹ bo nọ yí ayajẹ do yí hugan ganhiho 70 zan to osun dopodopo mẹ to lizọnyizọn lọ mẹ. Etẹwẹ yin numọtolanmẹ etọn? “Yẹn tindo numọtolanmẹ kọfanamẹ po ayajẹ po tọn,” wẹ e dọ. “Jehovah po titobasinanu aigba ji tọn etọn po tintindo to gbẹzan ṣie mẹ ko ‘hẹn mi jẹ gángán bo ko fakọna mi.”—Howhinwhẹn lẹ 3:8.
Ariel, jọja lizọnyizọnwatọ whenu-gigọ́ tọn devo yọ́n pinpẹn núdùdù gbigbọmẹ tọn he agun lọ to nina ẹn tọn. “To whenuena yẹn yì opli, plidopọ lẹdo tọn po agbegbe tọn lẹ po bo penugo nado dùnú to tafo gbigbọmẹ tọn Jehovah tọn ji, ehe nọ fakọna mi to gbigbọ-liho taun,” wẹ e dọ. “Podọ homẹ ṣie nọ hùn nado yọnẹn dọ yẹn tindo azọ́nwatọgbẹ́ lẹ lẹdo aihọn pé.” To zẹẹmẹ bibasina asisa yiaga hugan kọfanamẹ lọ tọn mẹ, e dọmọ: “E nọ fakọnamẹ taun nado tindo Jehovah taidi họntọn, titengbe to whenuena yẹn se kavi mọ nugandomẹgo ylankan he aihọn ehe to tintindo do gbẹtọ lẹ ji.”—Jakobu 2:23.
To whenue Abishai pé owhe 20-mẹvi, e to devizọnwa taidi wẹndagbe-jlatọ whenu-gigọ́ tọn po devizọnwatọ lizọnyizọnwiwa tọn de po to agun mẹ. E dọ numimọ etọn to hogbe ehelẹ mẹ: “Yẹn tindo numọtolanmẹ kọfanamẹ tọn na yẹn yọ́n lehe yẹn na pehẹ susu nuhahun he jọja lẹ to nukọnpan to egbehe lẹ tọn do wutu. Nugbo Biblu tọn ko gọalọna mi nado ze ayidonugo do nuhe yẹn dona wà nado sẹ̀n Jehovah po ahundopo po lẹ ji.”
To bẹjẹeji owhe aflanmẹ tọn etọn, Antoine nọ yawu gblehomẹ. E zìn aisinnu do wehọmẹvi hatọ de pọ́n, bosọ sọ́ wekantin mẹdevo. Antoine mayin mẹhe sọgan fakọnamẹ de gba! Ṣigba anademẹ Biblu tọn lẹ diọ jijọ etọn. Todin he e yin owhe 19-mẹvi bo to sinsẹ̀nzọnwa taidi devizọnwatọ lizọnyizọnwiwa tọn po gbehosọnalitọ whepoponu tọn de po to agun etọn mẹ, e dọmọ: “Yẹn dopẹna Jehovah dọ e dike yẹn ni tindo oyọnẹn ewọ tọn podọ na e gọalọna mi nado mọdọ yẹn dona nọ dù to dee ji bo diọ gbẹzan ṣie wutu. To aliho ehe mẹ, yẹn ko dapana nuhahun susu.”
Mẹdevo lẹ nọ doayi jijọ kọfanamẹ jọja Klistiani lẹ tọn go. Matteo yin jọja Kunnudetọ de to Italie. Mẹplọntọ etọn magbe dọ mẹdepope he zan hogbe agbàagba to klasi lọ mẹ na sú akuẹ kleun de. To ojlẹ vude godo, wehọmẹvi lọ lẹ biọ dọ osẹ́n lọ ni yin hùzẹdeji na, yé dọ dọ, “yé ma sọgan gọ̀n ma zan hogbe agbàagba lẹ gba.” Mateo dọmọ: “Ṣigba mẹplọntọ lọ gbẹ́, bo yí yẹn, Kunnudetọ Jehovah tọn de zan taidi apajlẹ, bo pà mi to klasi lọ blebu nukọn na hogbe dagbe he yẹn nọ yizan lẹ wutu.”
To klasi bẹwlunọ de mẹ to Thaïlande, mẹplọntọ lọ ylọ Racha owhe 11-mẹvi ṣite to klasi lọ mẹ bo pà ẹ na walọ etọn, dọmọ: “Etẹwutu mìmẹpo ma sọgan hodo apajlẹ etọn? E nọ yí sọwhiwhe do plọnnu bo nọ zan walọ dagbe.” Enẹgodo e dọna wehọmẹvi lọ lẹ dọ: “Yẹn lẹndọ mì dona lẹzun dopo to Kunnudetọ Jehovah tọn lẹ mẹ, taidi Racha, nado hẹn walọ mìtọn lẹ pọnte deji.”
Homẹhunnu de wẹ e nọ yin nado mọ jọja Klistiani fọtọ́n susu he to nuplọn dogọ gando Jehovah go bo to ojlo etọn wà lẹ. Jọja dagbe mọnkọtọn lẹ to nuyọnẹn he zẹ̀ owhe yetọn go dohia. Jiwheyẹwhe sọgan gọalọna yé nado tindo kọdetọn dagbe to gbẹzan dinwhenu tọn yetọn mẹ bosọ na yé sọgodo gigonọ de to aihọn yọyọ he ja mẹ. (1 Timoti 4:8) To ninọmẹ he gbọgbé to gbigbọ-liho titonu ehe, he gọ́ na jọja he ma tindo pekọ bo ko jẹflumẹ lẹ tọn mẹ, jọja Klistiani lẹ nọ do vogbingbọn kọfanamẹ tọn de hia!