Dọnsẹpọ Jiwheyẹwhe
Otọ́ He Nkọ Ma Pé Awe
“OTỌ́.” Hogbe he nọ fọ́n numọtolanmẹ sinsinyẹn dote to gbẹtọ lẹ mẹ taidi ehe ma sù. Otọ́ he yiwanna ovi etọn lẹ nugbonugbo nọ gọalọna yé nado tindo kọdetọn dagbe. Abajọ Biblu ylọ Jehovah Jiwheyẹwhe dọ “Otọ́.” (Matiu 6:9) Otọ́ nankọ wẹ Jehovah yin? Nado na gblọndo, mì gbọ mí ni gbadopọnna nuhe Jehovah dọna Jesu to baptẹm Jesu tọn whenu. To popolẹpo mẹ, aliho he mẹ otọ́ de nọ dọho na ovi etọn lẹ te nọ do nususu hia gando mẹjitọ he nkọ ewọ yin go.
To nudi octobre owhe 29 W.M., Jesu yì Tọ̀sisa Jọdani mẹ nado yin bibaptizi. Biblu dọ nuhe jọ na mí dọmọ: “Podọ Jesu, whenuena yè ko baptizi na ẹn, e tọ́n jẹage to afọdoponẹji sọn osin mẹ: bo pọ́n, olọn hùn hlan ẹn, e mọ [gbigbọ] Jiwheyẹwhe tọn jẹte di apoe bo jẹ do e ji: bo pọ́n, ogbè de sọn olọn lẹ mẹ, didọmọ, Ehe wẹ Visunnu ṣie; Mẹvivẹ ṣie, mẹhe mẹ homẹ ṣie vivi te tlala.”a (Matiu 3:16, 17) Hogbe owanyi sisosiso tọn he Jehovah lọsu dọ enẹlẹ do nususu hia mí gando Otọ́ he nkọ ewọ yin go. Doayi onú atọ̀n he Jehovah dọna Ovi etọn go.
Tintan, gbọn hogbe lọ lẹ “ehe wẹ Visunnu ṣie” he yin yiyizan dali, Jehovah to didọ na taun tọn dọ, ‘N’nọ doawagun nado yin Otọ́ towe.’ Otọ́ he tindo wuntuntun nọ hẹn pekọwana ojlo sinsinyẹn he ovi etọn lẹ tindo nado mọ hogbe alọkẹyi tọn po ayidonugo po yí. Mẹjitọ lẹ dona nọ vọ́ jide na dopodopo ovi yetọn lẹ tọn dọ emi yọ́n pinpẹn yetọn taidi hagbẹ whẹndo lọ tọn. Lẹnnupọndo nuhe na ko yin numọtolanmẹ Jesu tọn ji—etlẹ yin taidi mẹhomẹ de—nado sè hogbe alọkẹyi tọn mọnkọtọn lẹ sọn Otọ́ etọn dè!
Awetọ, gbọn Ovi etọn yiylọdọ “mẹvivẹ ṣie” dali, Jehovah do owanyi he e tindo na Jesu hia to gbangba. To linlẹn de mẹ, nuhe dọ Otọ́ lọ te wẹ yindọ ‘N’yiwanna we.’ Otọ́ dagbe nọ dọna ovi etọn lẹ dọ emi yiwanna yé sisosiso. Hogbe mọnkọtọn lẹ—to pọmẹ hẹ dohia owanyi tọn to jọwamọ-liho—nọ gọalọna ovi lẹ nado voawu. Lehe e na ko yinuwado Jesu ji do sọ nado sè ogbè Otọ́ etọn tọn he to owanyi dohia ẹ!
Atọ̀ntọ, gbọn hogbe lọ lẹ “mẹhe mẹ homẹ ṣie vivi te tlala” yiyizan dali, Jehovah dohia dọ ewọ kẹalọyi Ovi etọn. E taidi dọ Jehovah to didọmọ, ‘Ovi, nuhe a wà hẹn homẹ ṣie hùn.’ Otọ́ owanyinọ nọ dín dotẹnmẹ hundote lẹ nado hẹn ẹn zun yinyọnẹn na ovi etọn lẹ dọ onú dagbe he yé dọ kavi wà hùnhomẹ na ẹn. Ovi lẹ nọ mọ huhlọn po adọgbigbo po yí to whenuena mẹjitọ lẹ yí hogbe alọkẹyi tọn lẹ zan na yé. Na jide tọn, Jesu na ko yin tulina nado sè dọ homẹ Otọ́ etọn tọn hùn do e go!
Na nugbo tọn, Otọ́ taidi Jehovah nkọ ma pé awe. Be e jlo we nado tindo otọ́ mọnkọtọn ya? Eyin mọ wẹ, homẹ towe na hùn nado yọnẹn dọ hiẹ sọgan tindo haṣinṣan de hẹ Jehovah. Eyin hiẹ tindo yise bo plọnnu gandego bosọ dovivẹnu vẹkuvẹku nado wà ojlo etọn, ewọ na dọnsẹpọ we. Biblu dọmọ: “Mì sẹpọ Jiwheyẹwhe, ewọ nasọ sẹpọ mì.” (Jakobu 4:8) Etẹwẹ sọ sọgan hẹn we tindo numọtolanmẹ hihọ́ tọn hugan nado tindo haṣinṣan pẹkipẹki hẹ Jehovah Jiwheyẹwhe, Otọ́ dagbe hugan he mẹde na jlo nado tindo?
[Nudọnamẹ odò tọn]
a Sọgbe hẹ kandai dopolọ to owe Wẹndagbe Luku tọn mẹ, Jehovah yí hogbe mẹdetiti tọn “hiẹ” zan dọmọ: ‘Hiẹ wẹ Ovi yiwanna ṣie; hiẹ mẹ yẹn yin homẹhunnọ tlala.’—Luku 3:22.