Be Hiẹ Nọ Pọ́n Jehovah Hlan Taidi Otọ́ Towe Ya?

“OKLUNỌ, plọn mí lehe mí na nọ hodẹ̀ do.” To whenue dopo to devi Jesu tọn lẹ mẹ basi obiọ enẹ, e dọmọ: “Whedepopenu he mì to dẹ̀ho, mì nọ dọ, ‘Otọ́, na oyín towe ni yin kinklandowiwe.’” (Luku 11:1, 2) Jesu sọgan ko yí tẹnmẹ-yinkọ vonọtaun lẹ taidi “Ganhunupotọ,” ‘Nuplọnmẹtọ Daho,’ ‘Mẹdatọ,’ ‘Hohotọ Azán lẹ tọn,’ “Ahọlu madopodo,” zan na Jehovah. (Gẹn. 49:25; Isa. 30:20; 40:28; Dan. 7:9; 1 Tim. 1:17) Kakatimọ, Jesu de nado ylọ ẹ dọ “Otọ́.” Etẹwutu? Vlavo na e jlo dọ mí ni nọ dọnsẹpọ Mẹhe yiaga hugan to wẹkẹ mẹ lọ dile ovi pẹvi de nọ dọnsẹpọ otọ́ owanyinọ etọn do.

Ṣigba, e nọ vẹawuna mẹdelẹ nado pọ́n Jiwheyẹwhe hlan taidi Otọ́ yetọn. Mẹmẹyọnnu de he nọ yin Atsukoa dọ dọ, “Owhe susu to baptẹm ṣie godo, e gbẹ́ vẹawuna mi nado dọnsẹpọ Jehovah bo hodẹ̀ hlan ẹn taidi Otọ́ de.” To whenuena e to whẹwhinwhẹ́n na gando ninọmẹ etọn go, e dọmọ: “N’ma tlẹ sọgan dọ eyin Baba ṣie do owanyi hia mi pọ́n.”

To azán godo tọn awusinyẹn tọn ehelẹ mẹ, “owanyi jọwamọ tọn” he mẹde nọ jlo nado mọyi sọn otọ́ etọn dè to didepo taun. (2 Tim. 3:1, 3) Enẹwutu e ma paṣa mí dọ mẹdelẹ nọ tindo numọtolanmẹ Atsuko tọn nkọ. Ṣigba mí sọgan deji, na mí tindo whẹwhinwhẹ́n dolido susu nado nọ pọ́n Jehovah hlan taidi Otọ́ owanyinọ mítọn.

Jehovah—Awuwledainanutọ Owanyinọ

Eyin mí na pọ́n Jehovah hlan taidi Otọ́ mítọn, mí dona jẹakọ hẹ ẹ ganji. Jesu dọmọ: “Mẹde ma yọ́n Visunnu lọ to gigọ́ mẹ, adavo Otọ́ lọ, mọdopolọ mẹdepope ma yọ́n Otọ́ lọ to gigọ́ mẹ adavo Visunnu lọ po mẹdepope he Visunnu lọ jlo nado de e hia hlan po.” (Mat. 11:27) Aliho dagbe hugan he mẹ mí sọgan yọ́n Jehovah taidi Otọ́ de te wẹ nado nọ lẹnnupọndo nuhe Jesu dehia gando Jiwheyẹwhe nugbo lọ go lẹ ji. To whelọnu lo, etẹwẹ Jesu dehia gando Otọ́ etọn go?

Na Jesu yọ́n Jehovah taidi Mẹhe na ẹn ogbẹ̀ wutu, e dọmọ: “Yẹn to ogbẹ̀ na Otọ́ lọ tọn wutu.” (Joh. 6:57) Otọ́ lọ wẹ na mílọsu ogbẹ̀. (Ps. 36:9; Owalọ 17:28) Etẹwẹ whàn Jehovah nado na ogbẹ̀ mẹdevo lẹ? Be e mayin owanyi wẹ ya? Na nunina enẹ he e na mí wutu, mílọsu dona yiwanna Otọ́ mítọn olọn mẹ tọn.

Aliho titengbe hugan he mẹ Jiwheyẹwhe do owanyi hia gbẹtọvi lẹ te wẹ avọ́sinsan ofligọ Jesu tọn he e wleawuna. Ofligọ lọ hẹn ẹn yọnbasi na gbẹtọvi ylandonọ lẹ nado tindo haṣinṣan pẹkipẹki de hẹ Jehovah gbọn Ovi yiwanna etọn gblamẹ. (Lom. 5:12; 1 Joh. 4:9, 10) Podọ na Otọ́ mítọn olọn mẹ tọn nọ hẹn opagbe etọn lẹ di wutu, mí deji dọ mẹhe yiwanna ẹn bosọ nọ setonuna ẹn lẹpo na duvivi “mẹdekannujẹ gigonọ he yin ovi Jiwheyẹwhe tọn lẹ tọn” to godo mẹ.—Lom. 8:21.

Otọ́ mítọn olọn mẹ tọn sọ nọ hẹn “owhè etọn zẹ̀ do” mí ji egbesọegbesọ. (Mat. 5:45) Vlavo wẹ mí do nọ flindọ nujọnu wẹ e yin dọ mí ni nọ hodẹ̀ bo biọ dọ owhè ni zẹ̀. Etomọṣo, mí nọ tindo nuhudo etọn bosọ nọ duvivi yozò etọn tọn taun! Humọ, Awuwledainanutọ dagbe hugan wẹ Otọ́ mítọn yin, mẹhe ko nọ yọ́n nuhudo agbasa tọn mítọn lẹ whẹpo mí do nọ biọ to e si. Enẹwutu, be e ma jẹ dọ mí ni yiagbọji bo doayi lehe Otọ́ mítọn olọn mẹ tọn nọ penukundo nudida etọn lẹ go do bosọ lẹnnupọndo yé ji po pinpẹn-nutọn-yinyọnẹn po ya?—Mat. 6:8, 26.

Otọ́ Mítọn —Hihọ́-Basinamẹtọ Lẹblanunọ

Dọdai Isaia tọn hẹn omẹ Jiwheyẹwhe tọn hohowhenu tọn lẹ deji dọmọ: “Osó daho lẹ na fọnyi, yè nasọ họ̀n okọ́ta lẹ sẹ̀; ṣigba homẹdagbe ṣie ma na yì sọn dè we, mọ yẹn ma na de alẹnu jijọho ṣie tọn sẹ̀, wẹ OKLUNỌ [hihọ́-basinamẹtọ lẹblanunọ towe] dọ.” (Isa. 54:10) Nado vọ́ nùzindo nuagokun ehe ji, Jesu dohia to odẹ̀ he e hò to ozán he jẹnukọnna okú etọn mẹ dọ Jehovah yin hihọ́-basinamẹtọ lẹblanunọ de nugbonugbo. Jesu hodẹ̀ do ota devi etọn lẹ tọn mẹ dọmọ: “Yewlẹ tin to aihọn lọ mẹ bọ yẹn ja dè we. Otọ́ Wiwe, họ́ yé na oyín towe he hiẹ ko na mi lọ wutu.” (Joh. 17:11, 14) Jehovah ko basi-hihọ́na hodotọ Jesu tọn lẹ.

Dopo to aliho he mẹ Jiwheyẹwhe nọ basi-hihọ́na mí sọn ayiha gigẹdẹ Satani tọn lẹ si te to egbehe wẹ, awuwiwlena núdùdù gbigbọmẹ tọn he nọ wá do gànmẹ gbọn “afanumẹ nugbonọ podọ nuyọnẹntọ lọ” gblamẹ. (Mat. 24:45) Núdùdù he nọ namẹ huhlọn enẹ yin dandannu eyin mí na “ze gbaja Jiwheyẹwhe tọn blebu dó.” Di apajlẹ, lẹnnupọndo “awọ̀yinu daho yise tọn,” he mí “sọgan yí do ṣimiyọ́n ogá miyọnnọ mẹylankan lọ tọn lẹpo” ji. (Efe. 6:11, 16) Yise he mí nọ dohia nọ basi-hihọ́na mí sọn owù gbigbọmẹ tọn lẹ si, podọ enẹ nọ dohia dọ mí yọ́n pinpẹn huhlọn hihọ́-basinamẹ Otọ́ mítọn tọn.

Mí sọgan plọnnu dogọ gando lẹblanu Otọ́ mítọn olọn mẹ tọn go eyin mí yí sọwhiwhe do gbadopọnna lehe Ovi Jiwheyẹwhe tọn yinuwa do to whenue e tin to aigba ji. Doayi nuhe kandai Malku 10:13-16 tọn dọ go. To wefọ enẹlẹ mẹ, Jesu dọna devi etọn lẹ dọmọ: “Mì gbọ yọpọvu lẹ ni wá dè e.” Dile ovi flinflin enẹlẹ pli lẹdo Jesu, e dọ̀n yé dogo po lẹblanu po bosọ dona yé. Lehe homẹ yetọn na ko hùn do sọ! Podọ na Jesu dọ dọ: “Ewọ he ko mọ mi ko mọ Otọ́ lọ ga,” ehe hẹn mí yọnẹn dọ Jiwheyẹwhe nugbo lọ nọ jlo dọ mí ni wá emi dè.—Joh. 14:9.

Jehovah Jiwheyẹwhe wẹ Asisa owanyi tọn, podọ owanyi etọn mado dogbó. Ewọ wẹ Awuwledainanutọ po Hihọ́-basinamẹtọ daho hugan lọ po he jlo dọ mí ni nọ dọnsẹpọ emi. (Jak. 4:8) Enẹwutu, ayihaawe matin dọ Jehovah wẹ Otọ́ dagbe hugan lọ!

Ale Mítọn lẹ Sù!

Mí na mọ ale susu yí eyin mí dejido Jehovah go taidi Otọ́ owanyinọ po awuvẹmẹtọ mítọn olọn mẹ tọn po. (Howh. 3:5, 6) Jesu mọaleyi na e deji mlẹnmlẹn do Otọ́ etọn go wutu. E dọna devi etọn lẹ dọmọ: “Yẹn ma to dee ṣo, ṣigba Otọ́ he do mi hlan tin po yẹn po.” (Joh. 8:16) Jesu ma tindo ayihaawe gando godonọnamẹ Jehovah tọn go gbede. Di apajlẹ, to baptẹm etọn whenu, e vọ́ jide mọyi sọn Otọ́ etọn dè dọmọ: “Ehe wẹ Visunnu ṣie, mẹyiwanna lọ, mẹhe yẹn ko kẹalọyi.” (Mat. 3:15-17) To ojlẹ kleun de jẹnukọnna okú Jesu tọn, e dawhá dọmọ: “Otọ́, alọ towe mẹ wẹ yẹn jo gbigbọ ṣie do.” (Luku 23:46) Jidide he Jesu tindo to Otọ́ etọn mẹ ma depò gbede.

Mílọsu sọgan wà nudopolọ. To whenuena e yindọ Jehovah tin to awhàn mítọn mẹ, etẹwẹ mí nasọ dibuna? (Ps. 118:6) Atsuko he go mí donù wayi nọ saba dejido nugopipe edetiti tọn go nado duto nuhahun etọn lẹ ji. Ṣigba e plọnnu gando gbẹzan po lizọnyizọn Jesu tọn po go, titengbe haṣinṣan pẹkipẹki he Jesu wleawuna hẹ Otọ́ olọn mẹ tọn etọn. Etẹwẹ yin kọdetọn lọ? Atsuko dọmọ: “N’wá yọ́n nuhe e zẹẹmẹdo nado tindo Otọ́ de podọ nado dejido ewọ go. N’tindo jijọho po ayajẹ nujọnu tọn po todin lo. Na nugbo tọn, whẹwhinwhẹ́n depope ma tin nado hanú.”

Ale devo tẹwẹ mí nọ mọyi eyin mí pọ́n Jehovah hlan taidi Otọ́ mítọn? To paa mẹ, ovi lẹ nọ saba yiwanna mẹjitọ yetọn lẹ bo nọ jlo nado hẹn homẹ yetọn hùn. Owanyi whàn Ovi Jiwheyẹwhe tọn nado ‘wà nuhe nọ hẹn homẹhun Otọ́ etọn to whepoponu.’ (Joh. 8:29) Mọdopolọ, owanyi he mí tindo na Otọ́ mítọn olọn mẹ tọn na whàn mí nado nọ yinuwa po nuyọnẹn po bosọ nọ “pà [ẹ] to gbangba.”—Mat. 11:25; Joh. 5:19.

Otọ́ Mítọn ‘Nọ Hẹn Adusilọ Mítọn Go’

Otọ́ mítọn olọn mẹ tọn ko sọ hẹn “alọgọtọ” de tin-to-aimẹ na mí—enẹ wẹ gbigbọ wiwe etọn. Jesu dọmọ: “E na deanana mì yì nugbo lọ lẹpo kọ̀n.” (Joh. 14:15-17; 16:12, 13) Gbigbọ wiwe Jiwheyẹwhe tọn sọgan gọalọna mí nado yọ́n Otọ́ mítọn dogọ. E sọgan gọalọna mí nado họ́ “nuhe hẹnai lẹ liai,” yèdọ, linlẹn agọ̀ lẹ, kavi pọndohlan he yè sọtadona lẹ, bo gbọnmọ dali “to linlẹn lẹpo hẹnwa mẹmẹglọ mẹ nado hẹn yé setonuna Klisti.” (2 Kọl. 10:4, 5) Enẹwutu, mì gbọ mí nọ hodẹ̀ hlan Jehovah dọ ni na mí “alọgọtọ” he e dopagbe etọn na mí lọ, bo deji dọ “Otọ́ he to olọn mẹ [na] na gbigbọ wiwe mẹhe to bibiọ ẹ lẹ!” (Luku 11:13) E sọ jẹ dọ mí ni nọ hodẹ̀ na gbigbọ wiwe nido gọalọna mí nado dọnsẹpọ Jehovah hú gbede pọ́n.

Ovi pẹvi de nọ deji, nọ tindo numọtolanmẹ hihọ́ tọn bo ma nọ dibu, eyin e to zọnlinzin hẹ otọ́ etọn alọ to alọ mẹ. Eyin hiẹ nọ pọ́n Jehovah hlan taidi Otọ́ towe nugbonugbo, hiẹ sọgan deji do hogbe homẹmiọnnamẹ tọn ehelẹ go dọmọ: “Yẹn OKLUNỌ Jiwheyẹwhe towe, na hẹn adusilọ towe go, bo na dọhlan we dọ, A dibu blo; yẹn na gọalọna we.” (Isa. 41:13) Hiẹ sọgan duvivi lẹblanulọkẹyi vonọtaun lọ tọn nado ‘to zọnlinzin hẹ’ Jiwheyẹwhe kakadoi. (Mika 6:8) Enẹwutu, zindonukọn to ojlo etọn wiwà mẹ, podọ hiẹ na duvivi owanyi, ayajẹ, po numọtolanmẹ hihọ́ tọn po, dile a to Jehovah pọnhlan taidi Otọ́ towe.

[Nudọnamẹ odò tọn]