Yin Pinpọnhlan Taidi Mẹhe Jẹ Nado Mọ Ahọluduta de Yí
“Ehe basi ohia whẹdida Jiwheyẹwhe tọn dodo he ma buwun; na yè nido lẹn mì jẹ na ahọludu Jiwheyẹwhe tọn.”—2 TẸS. 1:5.
1, 2. Na nuhe dù whẹdida, etẹwẹ yin lẹndai Jiwheyẹwhe tọn, podọ mẹnu wẹ na hẹn whẹdida enẹ ṣẹ?
TO NUDI owhe 50 W.M., apọsteli Paulu tin to Atẹni. Na e mọ bọ boṣiọ-sinsẹ̀n gbayipe to finẹ wutu, ehe dotukla ẹ bọ e yin whinwhàn nado dekunnu to aliho ayidego tọn de mẹ. E dotana hodidọ etọn po hogbe delẹ po he dona ko dọ̀n ayidonugo kosi he to todoaina ẹn lẹ tọn. E dọmọ: “To dinvie [Jiwheyẹwhe] degbena gbẹtọ lẹ to ofi popo dọ yé do lẹnvọjọ: sọle ewọ ko de azán de, ehe mẹ ewọ na dawhẹna aihọn to dodo mẹ to dawe he ewọ ko do de mẹ; ehe tọn e ko na adọgbigbo hlan gbẹtọ lẹpo, to ehe mẹ e ko fọ́n ẹn sọn oṣiọ lẹ mẹ.”—Owalọ 17:30, 31.
2 Lehe e hẹnmẹ lẹnnupọn do sọ nado yọnẹn dọ Jiwheyẹwhe ko de whẹdazan sọgodo tọn de na gbẹtọvi lẹ! Paulu ma dọ yinkọ mẹhe na hẹn whẹdida enẹ ṣẹ tọn to hodidọ etọn mẹ to Atẹni gba, ṣigba mí yọnẹn dọ Jesu Klisti he yin finfọnsọnku lọ wẹ. Kọdetọn whẹdida he Jesu na hẹnṣẹ lọ tọn na yin okú kavi ogbẹ̀.
3. Naegbọn Jehovah do basi alẹnu de hẹ Ablaham, podọ mẹnu wẹ yí adà tangan de wà to hẹndi etọn mẹ?
3 Whẹdazan enẹ na dẹn họ̀ owhe 1 000. Jesu na deanana ẹn to oyín Jehovah tọn mẹ taidi Ahọlu Ahọluduta Jiwheyẹwhe tọn, ṣigba e ma na yin ewọ kẹdẹ gba. Jehovah de mẹdevo lẹ sọn gbẹtọvi lẹ mẹ nado dugán hẹ Jesu bo dawhẹ to azán he na dẹn họ̀ owhe fọtọ́n enẹ gblamẹ. (Yijlẹdo Luku 22:29, 30 go.) Diblayi owhe 4 000 die wayi, Jehovah ze dodonu Whẹdazan enẹ tọn dai to whenuena e basi alẹnu de hẹ devizọnwatọ nugbonọ etọn Ablaham. (Hia Gẹnẹsisi 22:17, 18.) E họnwun dọ alẹnu enẹ jẹ nuyiwa ji to 1943 J.W.M. Na nugbo tọn, Ablaham ma penugo nado mọnukunnujẹ nuhe alẹnu enẹ na zẹẹmẹdo na gbẹtọvi lẹ mẹ to gigọ́ mẹ gba. Ṣigba to egbehe, míwlẹ sọgan mọdọ, kẹdẹdile alẹnu lọ dọ do, okún Ablaham tọn yí adà tangan de wà to hẹndi lẹndai Jiwheyẹwhe tọn mẹ nado dawhẹna gbẹtọvi lẹ.
4, 5. (a) Mẹnu wẹ yin adà tintan okún Ablaham tọn, podọ etẹwẹ e dọ gando Ahọluduta lọ go? (b) Whetẹnu wẹ todido lọ nado yin mahẹtọ to Ahọluduta lọ mẹ yin hunhundonuvo mlẹnmlẹn?
4 E wá họnwun dọ Jesu he yin dide gbọn gbigbọ wiwe dali to owhe 29 W.M. bo gbọnmọ dali lẹzun Mẹssia kavi Klisti dopagbe lọ wẹ adà tintan okún Ablaham tọn. (Gal. 3:16) Jesu yí owhe atọ̀n-daa he bọdego zan nado dọyẹwheho wẹndagbe Ahọluduta lọ tọn na akọta Ju lẹ tọn. To whenue Johanu Baptizitọ lọ yin wiwle godo, Jesu dohia dọ mẹdevo lẹ sọgan donukun nado yin mahẹtọ to Ahọluduta enẹ mẹ to whenuena e dọmọ: “Sọn azán Johanu Baptizitọ lọ tọn lẹ gbè kakajẹ din, ahọluduta olọn tọn wẹ yin yanwle lọ he gbẹtọ lẹ yí vivẹnu do to afọdona, podọ alọ mẹhe to vivẹnudo zọnmii lẹ tọn to pipla ẹ.”—Mat. 11:12, NW.
5 E jẹna ayidego dọ, tlolo whẹpo Jesu do dọho gando mẹhe alọ yetọn na ‘plá’ Ahọluduta olọn tọn lẹ go, e dọmọ: “Nugbo yẹn dọ hlan mì, To yé he yè ji sọn yọnnu mẹ lẹ mẹ, mẹde ma fọ́n he klohu Johanu Baptizi: ṣigba mẹhe whè gbau to ahọludu olọn tọn mẹ klohu i.” (Mat. 11:11) Naegbọn e do yinmọ? Na todido lọ nado yin mahẹtọ to Ahọluduta lọ mẹ ma ko yin hunhundonuvo mlẹnmlẹn na nugbonọ lẹ kakajẹ whenue gbigbọ wiwe yin kinkọ̀n jẹgbonu to Pẹntikọsti 33 W.M. Johanu Baptizitọ ko kú to whenẹnu.—Owalọ 2:1-4.
Okún Ablaham Tọn Yin Whẹsuna Taidi Dodonọ
6, 7. (a) Linlẹn tẹ mẹ wẹ okún Ablaham tọn tin “di sunwhlẹvu olọn tọn lẹ” te? (b) Dona tẹwẹ Ablaham mọyi, podọ dona mọnkọtọn tẹwẹ okún etọn to mimọyi?
6 Ablaham yin didọna dọ okún etọn na jideji “di sunwhlẹvu olọn tọn lẹ” podọ taidi tọkẹ́n to huto. (Gẹn. 13:16; 22:17) To hogbe devo mẹ, to ojlẹ Ablaham tọn mẹ, gbẹtọvi lẹ ma sọgan yọ́n omẹ nẹmu he okún ehe na bẹhẹn. Ṣigba to godo mẹ, sọha tangan mẹhe okún gbigbọmẹ tọn etọn na bẹhẹn lẹ tọn wá yin didehia. Gbọnvona Jesu, sọha yetọn na yin 144 000.—Osọhia 7:4; 14:1.
7 Ohó Jiwheyẹwhe tọn dọ gando yise Ablaham tọn go dọmọ: “[Ablaham] yise to OKLUNỌ mẹ; e sọ hia ẹ hlan ẹn na dodo.” (Gẹn. 15:5, 6) Nugbo wẹ dọ, gbẹtọvi depope ma tin he yin dodonọ mlẹnmlẹn. (Jak. 3:2) Etomọṣo, na yise ayidego tọn he Ablaham dohia wutu, Jehovah yinuwa hẹ ẹ taidi dọ ewọ yin dodonọ bo tlẹ sọ ylọ ẹ dọ họntọn etọn. (Isa. 41:8) Mẹhe nọpọ́ hẹ Jesu do wleawuna okún gbigbọmẹ tọn Ablaham tọn lẹ lọsu ko yin whẹsuna taidi dodonọ, podọ ehe nọ hẹn dona susu wá na yé hú dehe Ablaham mọyi.
8. Dona tẹlẹ wẹ to tepọn hagbẹ okún Ablaham tọn lẹ?
8 Klistiani yiamisisadode lẹ yin whẹsuna taidi dodonọ na yé do yise hia to avọ́sinsan ofligọ Jesu tọn mẹ wutu. (Lom. 3:24, 28) To nukun Jehovah tọn mẹ, yé yin whẹsuna sọn ylando si bo yin dide gbọn gbigbọ wiwe dali taidi ovi gbigbọmẹ tọn Jiwheyẹwhe tọn lẹ, yèdọ mẹmẹsunnu Jesu Klisti tọn lẹ. (Joh. 1:12, 13) Yé biọ alẹnu yọyọ lọ mẹ bo wleawuna akọta yọyọ de, enẹ wẹ “Islaeli Jiwheyẹwhe tọn.” (Gal. 6:16; Luku 22:20) Lẹblanulọkẹyi jiawu nankọ die! Na Jiwheyẹwhe yinuwa do ota yetọn mẹ to aliho mọnkọtọn mẹ wutu, Klistiani yiamisisadode lẹ ma nọ donukun nado nọgbẹ̀ kakadoi to aigba ji. Yé yí todido enẹ do sanvọ́ na ayajẹ mayọnjlẹ lọ he yin nado kọnawudopọ hẹ Jesu to Whẹdazangbe bo dugán hẹ ẹ to olọn mẹ wutu.—Hia Lomunu lẹ 8:17.
9, 10. (a) Whetẹnu wẹ Klistiani lẹ yin dide gbọn gbigbọ wiwe dali to tintan whenu, podọ etẹwẹ yé gbẹsọ dona wà? (b) Alọgọ tẹwẹ Klistiani yiamisisadode enẹlẹ mọyi?
9 To Pẹntikọsti 33 W.M., dotẹnmẹ lọ yin nina pipli gbẹtọvi nugbonọ delẹ tọn nado tin to mẹhe na dugán hẹ Jesu to Whẹdazangbe lẹ mẹ. Nudi devi Jesu tọn 120 wẹ yin bibaptizi po gbigbọ wiwe po bo gbọnmọ dali lẹzun Klistiani yiamisisadode tintan lẹ. Ṣigba bẹjẹeji de poun wẹ ehe yin na yé. Sọn whenẹnu sọyi, yé dona do nugbonọ-yinyin yetọn na Jehovah hia mahopọnna whlepọn he Satani na hẹnwa yé ji lẹpo. Yé dona yin nugbonọ kakajẹ okú nado sọgan mọ jẹgbakun gbẹninọ olọn mẹ tọn yí.—Osọhia 2:10.
10 Na Klistiani yiamisisadode lẹ nido jẹ yanwle ehe kọ̀n, Jehovah nọ wleawuna tudohomẹnamẹ gọna tulinamẹ he yé tindo nuhudo etọn gbọn Ohó etọn po agun Klistiani tọn po gblamẹ. Di apajlẹ, apọsteli Paulu wlanwe hlan Klistiani yiamisisadode lẹ to Tẹsalonika dọmọ: “Mí nọ jlahomẹdona mẹdopodopo to mì mẹ . . . bọ yè sọ to homẹmiọnna mì, bosọ to hokọna mì dile otọ́ nọ basi na ovi etọn lẹ do. Na mì nido zinzọnlin dole e jẹ na Jiwheyẹwhe tọn do, mẹhe ylọ mì do ahọludu po gigo etọn po mẹ.”—1 Tẹs. 2:11, 12.
11. Kandai tẹwẹ Jehovah hẹn tin-to-aimẹ na hagbẹ “Islaeli Jiwheyẹwhe tọn” lẹ?
11 Owhe 60 linlán to whenuena hagbẹ tintan agun Klistiani yiamisisadode lẹ tọn ko yin dide godo, Jehovah mọdọ e jẹ nado wleawuna kandai tẹgbẹ tọn de gando lizọnyizọn aigba ji tọn Jesu tọn go gọna nuyiwa po ayinamẹ etọn lẹ po hlan Klistiani yiamisisadode owhe kanweko tintan tọn lẹ. Jehovah gbọnmọ dali yí Owe Wiwe gbọdo Glẹki tọn lẹ dogọ Owe Wiwe gbọdo Heblu tọn he ko tin-to-aimẹ to whenẹnu lẹ. Owe Wiwe Heblu tọn lẹ yin kinkàn to tintan whenu na akọta Islaeli agbasalan tọn, to ojlẹ he mẹ yé tindo haṣinṣan vonọtaun de hẹ Jiwheyẹwhe. Owe Wiwe Glẹki tọn lẹ yin kinkàn titengbe na “Islaeli Jiwheyẹwhe tọn,” yèdọ mẹhe yin yiyiamisisadode taidi mẹmẹsunnu Klisti tọn lẹ podọ ovi gbigbọmẹ tọn Jiwheyẹwhe tọn lẹ. Etomọṣo, enẹ ma zẹẹmẹdo to aliho depope mẹ dọ mẹhe ma yin Islaelivi lẹ ma sọgan mọ ale susu yí sọn Owe Wiwe Heblu tọn lẹ pinplọn mẹ gba. Mọdopolọ, Klistiani he ma yin dide gbọn gbigbọ wiwe dali lẹ nọ mọ ale mayọnjlẹ lẹ yí eyin yé plọn ayinamẹ he tin to Owe Wiwe Glẹki tọn mẹ lẹ bosọ nọgbẹ̀ sọgbe hẹ yé.—Hia 2 Timoti 3:15-17.
12. Etẹwẹ Paulu flin Klistiani yiamisisadode lẹ?
12 Klistiani owhe kanweko tintan tọn lẹ yin whẹsuna taidi dodonọ bosọ yin dide gbọn gbigbọ wiwe dali nado sọgan mọ ogú olọn mẹ tọn yetọn yí. Nugbo lọ dọ yé yin yiyiamisisadode ma hẹn yé zun ahọlu do Klistiani yiamisisadode hatọ yetọn lẹ ji to whenuena yé gbẹ́ pò to aigba ji gba. E họnwun dọ, Klistiani dowhenu tọn delẹ yí nukunpẹvi do pọ́n whẹho enẹ bo jẹ ogántẹn he ma sọgbe dín ji to mẹmẹsunnu yetọn lẹ ṣẹnṣẹn to agun mẹ. Taidi kọdetọn de, Paulu yin whinwhàn nado kanse dọmọ: “Dinvie mìwlẹ yin omẹ he gọ́, dinvie mìwlẹ yin adọkunnọ, mìwlẹ to gandu di ahọlu matin mí: mọwẹ, yẹn sọ jlo dọ mì ni to gandu, na míwlẹ ga nido dugán hẹ mì.” (1 Kọl. 4:8) Enẹwutu, Paulu flinnu mẹyiamisisadode azán etọn gbè tọn lẹ dọmọ: “E ma yindọ míwlẹ tindo huhlọn to yise mìtọn ji wutu gba, ṣigba alọgọnamẹtọ ayajẹ mìtọn tọn wẹ míwlẹ yin.”—2 Kọl. 1:24.
Sọha He Yin Didọdai lọ to Pipé
13. Nawẹ oylọ mẹyiamisisadode lẹ tọn zindonukọn to owhe 33 W.M. godo gbọn?
13 E ma yin Klistiani yiamisisadode 144 000 lẹpo wẹ yin dide to owhe kanweko tintan mẹ gba. Oylọ yetọn zindonukọn to ojlẹ apọsteli lẹ tọn gblamẹ podọ to enẹgodo, sọha mẹhe nọ yin yiylọ lẹ tọn yìdo. Ṣigba, oylọ lọ zindonukọn to owhe kanweko he bọdego lẹ gblamẹ kakajẹ azán mítọn gbè. (Mat. 28:20) To godo mẹ, whenuena Jesu jẹ gandu ji to 1914, nujijọ lẹ zindonukọn po awuyiya po.
14, 15. Etẹwẹ ko jọ to ojlẹ mítọn mẹ gando oylọ mẹyiamisisadode lẹ tọn go?
14 Tintan whẹ́, Jesu klọ́ olọn mẹ wé sọn hẹnflu he nukundidiọsọ gandudu Jiwheyẹwhe tọn ko hẹnwa lẹpo mẹ. (Hia Osọhia 12:10, 12.) Enẹgodo, e lẹ́ ayidonugo etọn hlan bibẹpli pipotọ hagbẹ gandutọ Ahọluduta etọn sọgodo tọn lẹ tọn na sọha yetọn nido pé 144 000. To gblagbla owhe 1930 lẹ tọn, e họnwun dọ azọ́n enẹ ko yinukọn taun podọ susu mẹhe to alọkẹyi azọ́n yẹwhehodidọ tọn lẹ ma tindo ojlo nado yì olọn mẹ. Gbigbọ ma nọ dekunnuna yé dọ yé yin ovi Jiwheyẹwhe tọn lẹ. (Yijlẹdo Lomunu lẹ 8:16 go.) Kakatimọ, yé nọ mọ yede taidi “lẹngbọ devo” he tindo todido nado nọgbẹ̀ kakadoi to paladisi mẹ to aigba ji lẹ. (Joh. 10:16) Enẹwutu, to 1935 godo, lẹndai tangan azọ́n yẹwhehodidọ lọ tọn wá yin nado bẹ “gbẹtọ susugege” de pli, yèdọ mẹhe apọsteli Johanu mọ to numimọ mẹ, ehe na lùn “nukunbibia daho” lọ tọ́n lẹ.—Osọhia 7:9, 10, 14.
15 Etomọṣo, sọn owhe 1930 lẹ gblamẹ, omẹ vude delẹ ko mọ oylọ olọn mẹ tọn yí. Etẹwutu? To ninọmẹ delẹ mẹ, e sọgan yindọ yé diọtẹnna mẹhe ko yin yiylọ dai bo masọ wá yin nugbonọ ba lẹ wẹ. (Yijlẹdo Osọhia 3:16 go.) Paulu tlẹ donù mẹyinyọnẹn etọn delẹ go he ko jo nugbo do. (Flp. 3:17-19) Mẹnu lẹ wẹ Jehovah na de nado diọtẹnna omẹ mọnkọtọn lẹ? Na nugbo tọn, etọn wẹ nado basi nudide enẹ. Etomọṣo, e sọgbe hẹ lẹnpọn dagbe dọ e ma na de mẹhe ṣẹṣẹ yise lẹ gba, adavo mẹhe ko do nugbonọ-yinyin yetọn hia jẹ obá de mẹ—taidi devi he Jesu dọhona to whenue e do hùnwhẹ Oflin tọn ai lẹ.a—Luku 22:28.
16. Ayajẹ tẹwẹ mí nọ tindo dile mẹyiamisisadode lẹ tin to ṣẹnṣẹn mítọn, podọ etẹwẹ mí sọgan yise po jidide po?
16 Ṣigba, e taidi dọ e ma yin mẹlẹpo he ko yin yiylọ na todido olọn mẹ tọn sọn owhe 1930 lẹ gblamẹ wẹ diọtẹnna mẹhe ko jai lẹ gba. E họnwun dọ Jehovah ko hẹn ẹn diun dọ mí na tindo Klistiani yiamisisadode lẹ to ṣẹnṣẹn mítọn to azán godo tọn aihọn ylankan ehe tọn lẹpo gblamẹ kakajẹ vasudo “Babilọni Daho” lọ tọn whenu.b (Osọhia 17:5) Podọ mí sọgan deji dọ, sọha hagbẹ 144 000 lẹ tọn pete na pé to ojlẹ sisọ Jehovah tọn mẹ bọ yemẹpo na mọ otẹn yetọn yí to gandudu Ahọluduta lọ tọn mẹ to godo mẹ. Mí sọgan sọ yí Ohó dọdai tọn lọ sè dọ, gbẹtọ susugege he fọ́n bo to jijideji lẹ na zindonukọn nado to nugbonọ yin taidi pipli de. To madẹnmẹ, yé na “tọ́n sọn nukunbibia daho” he na wá aihọn Satani tọn ji lọ mẹ bo nasọ biọ aihọn yọyọ Jiwheyẹwhe tọn mẹ po ayajẹ po.
Afọ Hagbẹ Gandutọ Olọn mẹ Tọn lẹ Tọn Ko Dibla Pé!
17. Sọgbe hẹ 1 Tẹsalonikanu lẹ 4:15-17 po Osọhia 6:9-11 po, etẹwẹ jọ do Klistiani yiamisisadode he yin nugbonọ jẹ okú lẹ go?
17 Sọn owhe 33 W.M., Klistiani yiamisisadode fọtọ́n susu wẹ ko do yise dolido hia bo yin nugbonọ kakajẹ okú. Omẹ ehelẹ ko yin pinpọnhlan taidi mẹhe jẹ nado mọ Ahọluduta lọ yí podọ—kunnudenu dohia dọ bẹsọn ojlẹ bẹjẹeji tintin tofi Klisti tọn—yé ko mọ ahọsumẹ olọn mẹ tọn yetọn yí.—Hia 1 Tẹsalonikanu lẹ 4:15-17; Osọhia 6:9-11.
18. (a) Jidide tẹwẹ mẹyiamisisadode he gbẹ́ pò to aigba ji lẹ tindo? (b) Nukun tẹwẹ lẹngbọ devo lẹ nọ yí do pọ́n mẹmẹsunnu yiamisisadode yetọn lẹ?
18 Mẹyiamisisadode he gbẹ́ pò to aigba ji lẹ kudeji mlẹnmlẹn dọ eyin yé gbọṣi nugbonọ-yinyin mẹ, yé na mọ ahọsumẹ yí na gbẹzan nugbonọ-yinyin tọn yetọn to madẹnmẹ. Eyin livi susu lẹngbọ devo lẹ tọn lẹnnupọndo yise mẹmẹsunnu yiamisisadode yetọn lẹ tọn ji, yé nọ kọngbedopọ hẹ nuhe apọsteli Paulu dọ gando mẹmẹsunnu yiamisisadode Tẹsalonika tọn lẹ go dọmọ: “Mílọsu to gigo do to mì mẹ to agun Jiwheyẹwhe tọn lẹ mẹ, na homẹfa mìtọn, po yise mìtọn po to homẹkẹn po tuklajijẹ mìtọn po mẹ, he mì doakọnna: ehe basi ohia whẹdida Jiwheyẹwhe tọn dodo he ma buwun; na yè nido lẹn mì jẹ na ahọludu Jiwheyẹwhe tọn, na ehe tọn wutu mì to yaji ga.” (2 Tẹs. 1:3-5) Whedepopenu he hagbẹ godo tọn mẹyiamisisadode lẹ tọn na yì sọn aigba ji, afọ gandutọ olọn mẹ tọn Jiwheyẹwhe tọn lẹ tọn na pé. Lehe enẹ na hẹn ayajẹ wá do sọ—yèdọ to olọn mẹ podọ to aigba ji!
[Nudọnamẹ odò tọn lẹ]
Be Hiẹ Sọgan Na Gblọndo Ya?
• Etẹwẹ Jiwheyẹwhe dehia Ablaham he gando Whẹdazan go?
• Naegbọn Ablaham do yin whẹsuna taidi dodonọ?
• Etẹ mẹ wẹ yinyin whẹsuna taidi dodonọ dekọtọn do na hagbẹ okún Ablaham tọn lẹ?
• Jidide tẹwẹ Klistiani lẹpo tindo?
[Yẹdide to weda 20]
Jesu na tuli hodotọ etọn lẹ nado yí vivẹnu do doafọna Ahọluduta lọ
[Yẹdide to weda 21]
To Pẹntikọsti 33 W.M., Jehovah jẹ adà awetọ hagbẹ okún Ablaham tọn lẹ de ji
[Yẹdide to weda 23]
Homẹ lẹngbọ devo lẹ tọn nọ hùn dọ Klistiani yiamisisadode lẹ tin to ṣẹnṣẹn yetọn to azán godo tọn lẹ mẹ