Nuhe Jesu Plọn Mí

Gando Jiwheyẹwhe Nugbo lọ Go

Be Jiwheyẹwhe tindo oyín de ya?

Jesu plọnmẹ dọ Jiwheyẹwhe tindo oyín de. E dọmọ: “Enẹwutu le wẹ mì ni nọ hodẹ̀ do: Otọ́ mítọn he tin to olọn mẹ, hihiọ wẹ oyín towe.” (Matiu 6:9) Biblu dohia dọ Jehovah wẹ oyín Jiwheyẹwhe tọn. (Psalm 83:18) Dile Jesu to dẹ̀ho hlan Otọ́ etọn, e dọ gando devi etọn lẹ go dọmọ: “Yẹn sọ hẹn oyín towe zun yinyọnẹn hlan yé.”—Johanu 17:26.

Mẹnu wẹ Jehovah?

Jesu ylọ Jehovah dọ ‘Jiwheyẹwhe nugbo dopokẹdẹ lọ’ na Jehovah wẹ Mẹdatọ. (Johanu 17:3) Jesu dọmọ: “Be mìwlẹ ma ko hia, dọ mẹhe dá yé to whẹwhẹwhenu, dá yé asu po asi po?” (Matiu 19:4) E sọ dọ dọ: “Gbigbọ wẹ Jiwheyẹwhe.” (Johanu 4:24) Enẹwutu mí ma sọgan mọ Jiwheyẹwhe.—Eksọdusi 33:17-20.

Etẹwẹ Jiwheyẹwhe nọ donukun sọn mí si?

To whenuena mẹde kanse Jesu dọ gbedide tẹwẹ klohugan, e gblọn dọmọ: “Sè, hiẹ Islaeli E, [Jehovah] Jiwheyẹwhe mítọn, [Jehovah] dopo wẹ: podọ hiẹ na yiwanna [Jehovah] Jiwheyẹwhe towe sọn ayiha towe lẹpo mẹ, podọ sọn alindọn towe lẹpo mẹ, podọ sọn nuyọnẹn towe lẹpo mẹ, podọ sọn huhlọn towe lẹpo mẹ. Awetọ sọ wẹ ehe, Hiẹ na yiwanna kọmẹnu towe di dewe.”—Malku 12:28-31.

Nawẹ mí sọgan dohia dọ mí yiwanna Jiwheyẹwhe gbọn?

Jesu dọmọ: “Yẹn yiwanna Otọ́.” Nawẹ e do owanyi etọn hia gbọn? E dọ dọ, “Dile Otọ́ na osẹ́n mi do, yèdọ mọ wẹ yẹn wà do.” (Johanu 14:31) E sọ dọmọ: “Yẹn to nuhe yin homẹhun hlan ẹn lẹ wà to whepoponu.” (Johanu 8:29) Nado hẹn homẹhun Jiwheyẹwhe, mí dona plọnnu gando ewọ go. Dile Jesu to dẹ̀ho do devi etọn lẹ tamẹ, e dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo.”—Johanu 17:3; 1 Timoti 2:4.

Nawẹ mí sọgan plọnnu gando Jiwheyẹwhe go gbọn?

Aliho dopo nado yọ́n Jiwheyẹwhe wẹ nado lẹnnupọndo nuhe e dá lẹ ji. Di apajlẹ, Jesu dọmọ: “Mì pọ́n ohẹ̀ he to aga lẹ; yé ma dóji, mọ yé ma gbẹ̀n, mọ yé ma nọ bẹpli do zínhọ lẹ mẹ; ṣigba Otọ́ mìtọn olọn tọn to núdù na yé. Be mìwlẹ ma pọnte hú yé?” Etẹ dọ wẹ Jesu te taun? Mí ma dona dike nuhiha gando nuhudo agbasa tọn mítọn lẹ go ni glọnalina mí nado sẹ̀n Jiwheyẹwhe.—Matiu 6:26-33.

Aliho dagbe hugan lọ nado yọ́n Jehovah wẹ nado nọ plọn Ohó etọn, Biblu. Jesu ylọ Owe-wiwe dọ “ohó Jiwheyẹwhe tọn.” (Luku 8:21) E dọna Jiwheyẹwhe dọmọ: “Ohó towe wẹ nugbo.”—Johanu 17:17; 2 Pita 1:20, 21.

Jesu gọalọna gbẹtọ lẹ nado plọn nugbo lọ gando Jehovah go. Dopo to devi etọn lẹ mẹ dọ gando Jesu go dọmọ: “Be ayiha mítọn ma hunzo to ohò mítọn mẹ, whenuena e to hodọ hẹ mí to aliho, podọ e hùn Owe-wiwe hlan mí?” (Luku 24:32) Nado plọnnu gando Jiwheyẹwhe go, mí dona whiwhẹ míde bo tindo ojlo nado yin pinplọn. Jesu dọmọ: “Adavo mìwlẹ diọ bo taidi yọpọvu lẹ, mìwlẹ ma na biọ ahọludu olọn tọn mẹ gbọn alọdepope mẹ gba.”—Matiu 18:3.

Naegbọn oyọnẹn Jiwheyẹwhe tọn nọ hẹn ayajẹ wá?

Jiwheyẹwhe nọ hẹn pekọwana nuhudo mítọn nado mọnukunnujẹ lẹndai ogbẹ̀ tọn mẹ. Jesu dọmọ: “Donanọ wẹ wamọnọ lẹ to gbigbọ mẹ,” kavi mẹhe yọnẹn dọ yé tindo nuhudo gbigbọmẹ tọn lẹ. (Matiu 5:3) Jehovah nọ plọn mí aliho gbẹninọ tọn dagbe hugan lọ. Jesu dọ dọ: “Donanọ wẹ yé he sè ohó Jiwheyẹwhe tọn, bosọ yí ì whlá.”—Luku 11:28; Isaia 11:9.

Na nudọnamẹ dogọ, pọ́n weta 1 to owe lọ Etẹwẹ Biblu Plọn Mí Taun?a mẹ.

[Nudọnamẹ odò tọn]

[Yẹdide to weda 6]

“Yẹn sọ hẹn oyín towe zun yinyọnẹn hlan yé.”—Johanu 17:26

[Yẹdide to weda 6]

Mí sọgan plọnnu gando Jehovah go sọn nudida lẹ mẹ podọ sọn Biblu mẹ