Plọn Ovi Towe Lẹ

Malku Ma Jogbe

MALKU wlan dopo to owe Biblu tọn ẹnẹ he dọhodo gbẹzan Jesu tọn ji lẹ mẹ. Owe etọn wẹ whè bosọ bọawu nado hia hugan to owe enẹlẹ mẹ. Mẹnu wẹ Malku? Be a lẹndọ e yọ́n Jesu ya?— Gbọ mí ni pọ́n whlepọn sinsinyẹn he Malku pehẹ lẹ bo mọ nuhewutu Malku ma jogbe nado yin Klistiani.

To whenuena Ahọlu Hẹlodi Aglipa ze apọsteli Pita do ganpamẹ wẹ Malku yin nùdego whla tintan to Biblu mẹ. To zánmẹ gbèdopo, angẹli de tún Pita dote, podọ to afọdopolọji Pita yì owhé Malia onọ̀ Malku tọn, he nọ nọ̀ Jelusalẹm tọn gbè. Pita yin tuntundote sọn ganpamẹ to nudi owhe ao to whenuena Jesu ko yin hùhù to Juwayi owhe 33 W.M. godo.—Owalọ lẹ 12:1-5, 11-17.

Be a yọ́n nuhewutu Pita yì owhé Malia tọn gbè ya?— Vlavo na e yọ́n hagbẹ whẹndo etọn tọn delẹ bosọ yọnẹn dọ devi Jesu tọn lẹ nọ pli do owhé etọn gbè wutu wẹ. Hẹnnumẹ Malku tọn Balnaba ko lẹzun devi sọn ojlẹ dindẹn die, e whè gbau sọn Hùnwhẹ Pẹntikọsti 33 W.M. whenu gbọ́n. Alọtútlú he e dohia mẹhe ṣẹṣẹ lẹzun devi to ojlẹ enẹ mẹ lẹ yin nùdego to Biblu mẹ. Enẹwutu Jesu sọgan ko yọ́n Balnaba, gọna Malku po onọ̀ etọn Malia po.—Owalọ lẹ 4:36, 37; Kọlọsinu lẹ 4:10.

To owe Wẹndagbe tọn etọn mẹ, Malku wlan dọ to ozán he mẹ Jesu yin wiwle, dẹpẹ de tin to finẹ he yí alavọ dopo gee do ṣinyọ́n “omẹ́ agbasa etọn tọn.” To whenuena kẹntọ lẹ wle Jesu, Malku wlan dọ dẹpẹ lọ họnyi. Mẹnu wẹ a lẹndọ dẹpẹ enẹ na ko yin?— Malku wẹ e na ko yin! Enẹwutu, to whenuena Jesu po apọsteli etọn lẹ po dedo sọn owhé he gbè yé dù hùnwhẹ Juwayi tọn te to zánhomẹ to gbènẹgbè, e taidi dọ Malku yawu ze awú de do bo hodo yé.—Malku 14:51, 52.

Na nugbo tọn, devizọnwatọ Jiwheyẹwhe tọn lẹ ṣẹnṣẹn wẹ Malku whẹ́n te. E sọgan ko tin to finẹ to whenuena gbigbọ wiwe kọ̀n jẹgbonu to Pẹntikọsti 33 W.M., podọ e yin họntọn vivẹ devizọnwatọ Jiwheyẹwhe tọn nugbonọ delẹ tọn, mẹhe Pita yin dopo to yé mẹ. Ṣigba e sọ hodo hẹnnumẹ etọn Balnaba, mẹhe gọalọna Saulu bo do e hia Pita to nudi owhe atọ̀n to whenuena Jesu ko sọawuhia Saulu to numimọ mẹ godo. To owhe delẹ godo, Balnaba yì Talsu nado dín Saulu mọ to finẹ.—Owalọ lẹ 9:1-15, 27; 11:22-26; 12:25; Galatianu lẹ 1:18, 19.

To owhe 47 W.M., Balnaba po Saulu po yin dide nado wazọ́n taidi mẹdehlan. Yé plan Malku hẹn, ṣigba na whẹwhinwhẹ́n he Biblu ma dọ delẹ wutu, Malku wá jo yé do to godo mẹ bo lẹkọyi whé to Jelusalẹm. Saulu, he wá yin yinyọnẹn po yinkọ Lomu tọn etọn Paulu po, gblehomẹ. Podọ e ma yí nukunpẹvi do pọ́n nuyiwa Malku tọn he sọawuhia to nukun etọn mẹ taidi nuṣiwa sinsinyẹn de.—Owalọ lẹ 13:1-3, 9, 13.

Whenuena Paulu po Balnaba po lẹkọ sọn gbejizọnlin mẹdehlan tọn yetọn, yé na linlin kọdetọn dagbe jiawu he yé tindo lẹ tọn. (Owalọ lẹ 14:24-28) To osun delẹ godo, yé omẹ awe lẹ basi tito nado lẹkọyi dla devi yọyọ he tin to fie yé dọyẹwheho gbọn dai lẹ pọ́n. Balnaba jlo dọ Malku ni hodo yé yì, ṣigba be a yọ́n nuhe Paulu lẹn ya?— Ewọ ‘lẹndọ e ma yọ́n’ nado plan ẹn yì, na Malku ko jo yé do dai bo lẹkọyi whé. Matin ayihaawe, nuhe jọ bọdego hẹn Malku blawu!

Paulu po Balnaba po gblehomẹ, podọ “wiwọ́ lọ sù sọmọ” bọ yé klan. Balnaba plan Malku hẹn nado yì dọyẹwheho to Kiplu, bọ Paulu sọ plan Sila nado lẹkọyi dla devi yọyọ lọ lẹ pọ́n, dile tito lọ ko yin bibasi do. Lehe ehe na ko vẹna Malku do sọ dọ ewọ wẹ hẹn tukla wá Paulu po Balnaba po ṣẹnṣẹn!—Owalọ lẹ 15:36-41.

Mí ma yọ́n nuhewutu Malku do lẹkọyi whé to tintan whenu. E na ko lẹndọ emi tindo whẹwhinwhẹ́n dagbe nado wàmọ. To popolẹpo mẹ, e họnwun dọ Balnaba kudeji dọ onú mọnkọ ma nasọ jọ ba. Podọ owhẹ̀ etọn whẹ́n, na Malku ma jogbe! To nukọn mẹ, e wà azọ́n mẹdehlan tọn hẹ Pita to Babilọni fie dẹn tlala do owhé Malku tọn gbè. Finẹ wẹ Pita nọ̀ do do nudọdomẹ hlan bo yidogọ dọ, “Malku ovi ṣie” lọsu wàmọ.—1 Pita 5:13.

Haṣinṣan gbigbọmẹ tọn pẹkipẹki nankọ die Pita po Malku po duvivi etọn! Ehe sọ họnwun to owe Wẹndagbe Malku tọn mẹ. To owe lọ mẹ, Malku do nuhe Pita yinukundomọ to lizọnyizọn Jesu tọn whenu bo dọna ẹn lẹ hia. Di apajlẹ, yí linlin yujẹhọn he fọ́n to Ohù Galili tọn ji he devi lẹ basi kandai etọn lẹ jlẹdo yedelẹ go. Malku yí nudọnamẹ delẹ dogọ taidi fie Jesu mlọ́n to tọjihun lọ mẹ po nuhe ji e mlọ́n po, yèdọ nudọnamẹ he whèhutọ de taidi Pita na ko doayi e go. Gbọ mí ni hia ehe dopọ to Matiu 8:24; Malku 4:37, 38; po Luku 8:23 po mẹ bo yí kandai Biblu tọn ehelẹ jlẹdo yedelẹ go.

To godo mẹ, whenuena Paulu yin wiwle do ganpamẹ to Lomu, e pà Malku na godonọnamẹ gligli etọn. (Kọlọsinu lẹ 4:10, 11) Podọ whenue Paulu sọ yin wiwle do ganpamẹ to finẹ whladopo dogọ, e wlanwe hlan Timoti bo biọ to e si nado plan Malku wá, bosọ basi zẹẹmẹ dọmọ: “Ewọ doale hlan mi na devizọn lọ.” (2 Timoti 4:11) Na nugbo tọn, Malku penugo bo sẹ̀n Jiwheyẹwhe to aliho vonọtaun susu mẹ na e ma jogbe wutu.

Kanbiọ Lẹ:

○ Fie wẹ Malku nọ nọ̀, podọ naegbọn hiẹ sọgan dọ dọ ewọ na ko yọ́n Jesu?

○ Mẹnu, na taun tọn, wẹ gọalọ bo nọgodona Malku?

○ Etẹwẹ sọgan ko dibla hẹn Malku nado jogbe?

○ Nawẹ mí wagbọn do yọnẹn dọ Malku wá tindo nukundagbe apọsteli Paulu tọn to godo mẹ?

[Yẹdide to weda 21]

Mẹnu wẹ jọja ehe sọgan ko yin? Etẹwẹ to jijọ do e go, podọ etẹwutu?

[Yẹdide to weda 22]

Lẹblanulọkẹyi tẹlẹ wẹ Malku tindo na e ma jogbe wutu?