Nọ Zinzọnlin to Aliho Jehovah Tọn lẹ Ji
“[Ayajẹnọ] wẹ mẹdepope he dibusi OKLUNỌ; he zinzọnlin to aliho etọn lẹ ji.”—PS. 128:1.
1, 2. Naegbọn mí sọgan dọ po nujikudo po dọ e yọnbasi nado yin ayajẹnọ?
MẸLẸPO wẹ nọ jlo nado tindo ayajẹ. Ṣogan, hiẹ na yigbe dọ onú dopo wẹ nado dín ayajẹ bo tlẹ doafọna ẹn, ṣigba onú devo pete wẹ nado yin ayajẹnọ nugbonugbo.
2 Etomọṣo, e yọnbasi nado yin ayajẹnọ. “[Ayajẹnọ] wẹ mẹdepope he dibusi OKLUNỌ; he zinzọnlin to aliho etọn lẹ ji,” wẹ Psalm 128:1 dọ. Mí sọgan yin ayajẹnọ eyin mí nọ sẹ̀n Jiwheyẹwhe bo nọ zinzọnlin to aliho etọn lẹ ji gbọn ojlo etọn wiwà dali. Nuyiwadomẹji tẹwẹ ehe sọgan tindo do walọyizan po jẹhẹnu he mí nọ dohia lẹ po ji?
Do Dewe Hia Taidi Mẹhe Go Yè Sọgan Dejido
3. Naegbọn klandowiwe mítọn na Jiwheyẹwhe dona hẹn mí nado do míde hia taidi mẹhe go yè sọgan dejido?
3 Mẹhe nọ dibusi Jehovah lẹ nọ do yede hia taidi mẹhe go yè sọgan dejido, dile ewọ lọsu te do. Jehovah hẹn opagbe he e do na Islaeli hohowhenu tọn lẹpo di. (1 Ahọ. 8:56) Klandowiwe mítọn na Jiwheyẹwhe wẹ yin opà titengbe hugan he mí sọgan do, podọ dẹ̀hiho gbọzangbọzan na gọalọna mí nado hẹn ẹn di. Mí sọgan hodẹ̀ dile psalm-kàntọ Davidi wà do dọmọ: “Hiẹ, Jiwheyẹwhe E, ko sè pàdido ṣie: . . . Yẹn na nọ jihàn pipà tọn hlan oyín towe kakadoi, na yẹn nido nọ yí pàdido ṣie wà egbesọegbesọ.” (Ps. 61:5, 8; Yẹwh. 5:4-6) Eyin mí jlo na yin họntọn Jiwheyẹwhe tọn, mí dona do míde hia taidi mẹhe go yè sọgan dejido.—Ps. 15:1, 4.
4. Nukun tẹwẹ Jẹfta po viyọnnu etọn po yí do pọ́n opà he e do na Jehovah?
4 To azán Whẹdatọ lẹ tọn gbè to Islaeli, Jẹfta dopà dọ eyin Jehovah na ẹn awhàngbigba do Ammọninu lẹ ji, ewọ na ze onú tintan he na pé e to kọlilẹ sọn awhàngbenu jo taidi “avọ́nunina mimẹ̀ de.” To godo mẹ, e wá yindọ viyọnnu Jẹfta tọn wẹ wá pé e—yèdọ ovi etọn dopo akàn lọ. Jẹfta po viyọnnu etọn he gbẹ́ pò to alọji lọ po do yise hia to Jehovah mẹ, bo de opà Jẹfta tọn. Dile etlẹ yindọ, nukun nujọnu tọn wẹ nọ yin yíyí do pọ́n alọwle po vijiji po to Islaeli to whenẹnu, viyọnnu Jẹfta tọn desọn ojlo mẹ bo gbọṣi tlẹnmẹ bosọ duvivi lẹblanulọkẹyi lọ tọn nado wà sinsẹ̀nzọn wiwe hlan Jehovah to fiwiwe etọn.—Whẹ. 11:28-40.
5. Nawẹ Hanna do ede hia taidi mẹhe go yè sọgan dejido gbọn?
5 Yọnnu budisi Jiwheyẹwhe tọ lọ Hanna do ede hia taidi mẹhe go yè sọgan dejido. E nọ nọpọ́ hẹ asu etọn Ẹlkana, he yin Levinu de, gọna asisi etọn, Pẹnina, to lẹdo osó tọn Eflaimi tọn mẹ. Pẹnina ji ovi susu bo nọ vlẹ Hanna kò na e yin wẹnsinọ wutu, titengbe eyin whẹndo lọ yì gòhọtúntún mẹ. To gbèdopo he yé yì finẹ, Hanna dopà dọ eyin emi mọ visunnu de ji, emi na ze e jo na Jehovah. To madẹnmẹ, e mọhò bo ji visunnu de he yinkọ yin didona dọ Samuẹli. To whenuena Hanna dèanọ́ na Samuẹli godo, e plan ẹn yì Jiwheyẹwhe nukọn to Ṣilo, bo whé e na Jehovah “to azán ogbẹ̀ etọn tọn lẹpo mẹ.” (1 Sam. 1:11) Gbọnmọ dali, e de opà etọn dile e ma tlẹ ko yọnẹn to whenẹnu dọ emi na gbẹ́ wá ji ovi devo lẹ to nukọn mẹ.—1 Sam. 2:20, 21.
6. Nawẹ Tikiku do ede hia taidi mẹhe go yè sọgan dejido gbọn?
6 Klistiani owhe kanweko tintan tọn lọ, Tikiku, do ede hia taidi mẹhe go yè sọgan dejido podọ “devizọnwatọ nugbonọ” de. (Kọl. 4:7) Tikiku zingbejizọnlin hẹ apọsteli Paulu sọn Grèce gbọn Makedonia, yì Asia Pẹvi, podọ vlavo kakajẹ Jelusalẹm. (Owalọ 20:2-4) E sọgan ko yindọ ewọ wẹ “mẹmẹsunnu lọ” he gọalọna Titu nado penukundo nunina he yin bibasi do yisenọ hatọ he tin to nuhudo mẹ to Jude lẹ tamẹ go. (2 Kọl. 8:18, 19; 12:18) To whenuena Paulu yin wiwle do ganmẹ whla tintan to Lomu, e do wekanhlanmẹ lẹ hlan yisenọ hatọ he tin to Efesu po Kọlọsi po lẹ gbọn afọzedaitọ dejidego lọ Tikiku gblamẹ. (Efe. 6:21, 22; Kọl. 4:8, 9) To gànpamẹninọ etọn awetọ whenu to Lomu, Paulu do Tikiku hlan Efesu. (2 Tim. 4:12) Eyin mí nọ do míde hia taidi mẹhe go yè sọgan dejido, mílọsu na mọ dona susu yí to sinsẹ̀nzọn Jehovah tọn mẹ.
7, 8. Naegbọn mí sọgan dọ dọ họntọn vivẹ wẹ Davidi po Jonatani po?
7 Jiwheyẹwhe nọ donukun dọ mí ni do míde hia taidi họntọn dejidego lẹ. (Howh. 17:17) Jonatani, visunnu Ahọlu Sauli tọn jihọntọn hẹ Davidi. To whenuena Jonatani sè dọ Davidi hù Goliati, “alindọn Jonatani tọn dọ̀n do alindọn Davidi tọn go, Jonatani sọ yiwanna ẹn di alindọn etọn titi.” (1 Sam. 18:1, 3) Jonatani tlẹ na avase Davidi whenuena Sauli to dindin in nado hù. To whenuena Davidi ko họnyi godo, Jonatani yì pé e bo basi alẹnu de hẹ ẹ. Jonatani dibla hẹn ogbẹ̀ etọn bu na e yiavunlọna Davidi to Sauli dè wutu, ṣigba họntọn awe lẹ sọ pé whladopo dogọ bo vọ́ haṣinṣan yetọn hẹn jẹ yọyọ. (1 Sam. 20:24-41) To whenuena yé pé gbọngodo, Jonatani hẹn alọ Davidi tọn dohuhlọn “to Jiwheyẹwhe mẹ.”—1 Sam. 23:16-18.
8 Jonatani kú to awhàn de whenu sọta Filistininu lẹ. (1 Sam. 31:6) To avihàn de mẹ, Davidi jihàn dọmọ: “Yè hẹn nukunbia mi na we, nọvisunnu ṣie Jonatani: vivinọ tlala hiẹ ko yin hlan mi: owanyi towe hlan mi yin nujiawu, zizẹ owanyi yọnnu lẹ tọn go.” (2 Sam. 1:26) Owanyi he nọ tin to họntọn lẹ ṣẹnṣẹn wẹ ehe yin, e ma bẹ whẹho zanhẹmẹ tọn hẹn gba. Họntọn vivẹ wẹ Davidi po Jonatani po.
Nọ Yin “Whiwhẹnọ” to Whepoponu
9. Nawẹ nujọnu-yinyin whiwhẹ tọn yin didohia to weta 9tọ owe Whẹdatọ tọn mẹ gbọn?
9 Nado yin họntọn Jiwheyẹwhe tọn, mí dona yin “whiwhẹnọ.” (1 Pita 3:8, NW; Ps. 138:6) Nujọnu-yinyin whiwhẹ tọn yin didohia to weta 9tọ owe Whẹdatọ tọn mẹ. Jotami, visunnu Gideoni tọn dọmọ: “Atin lẹ tọ́nyi to ojlẹ de ji nado doahọlu de do yé ji.” Olivieli-tin, ovòtin, po vẹntin po yin nùdego. Yé nọtena mẹhe tindo jlọjẹ nado dugán do Islaelivi hatọ yetọn lẹ ji ṣogan bo ma jlo nado wàmọ lẹ. Ṣigba owùntin—he yè ma nọ yí do wà nudevo hugan nado flọ miyọ́n—nọtena gandudu Abimelẹki goyitọ lọ tọn, yèdọ hlọnhutọ de he to jijlo vẹkuvẹku nado paṣẹna mẹdevo lẹ. Dile e tlẹ ‘yinuwa taidi ahọvi do Islaeli ji họ̀ owhe atọ̀n,’ e kú okú azán mapemape tọn. (Whẹ. 9:8-15, 22, 50-54) Lehe e yọ́n hugan do sọ nado yin “whiwhẹnọ”!
10. Etẹwẹ hiẹ plọn sọn awugbopo Hẹlodi tọn nado “na gigo Jiwheyẹwhe” mẹ?
10 To owhe kanweko tintan W.M., tòmẹnu Tile po Sidoni po tọn lẹ tindo wiwọ́ de hẹ Ahọlu Hẹlodi Aglipa Jude tọn, bọ yé to jijlo nado basi jijọho hẹ ahọlu lọ. To gbèdopo he Hẹlodi to hodọ to mẹlẹpo nukọn, yé dawhá dọmọ: “Ogbè yẹwhe de tọn wẹ, e ma yin gbẹtọ tọn gba.” Hẹlodi ma gbẹ́ mẹpipa zẹjlẹgo enẹ dai gba, podọ angẹli Jehovah tọn linú in bọ e kú to aliho ylankan mẹ “na e ma na gigo Jiwheyẹwhe wutu.” (Owalọ 12:20-23) Po ehe po to ayiha mẹ, nawẹ mí dona yinuwa gbọn eyin mí tindo nugopipe vonọtaun de taidi hodọtọ kavi taidi nugbo Biblu tọn plọnmẹtọ de? Mì gbọ mí ni nọ na pipà Jiwheyẹwhe na nuhe e hẹn mí penugo nado wà.—1 Kọl. 4:6, 7; Jak. 4:6.
Yin Adọgbotọ Podọ Huhlọnnọ
11, 12. Nawẹ numimọ Enọku tọn dohia dọ Jehovah nọ na adọgbigbo po huhlọn po devizọnwatọ etọn lẹ gbọn?
11 Eyin mí nọ yí whiwhẹ do zinzọnlin to aliho Jehovah tọn lẹ ji, e na na mí adọgbigbo po huhlọn po. (Deut. 31:6-8, 23) Enọku, sunnu ṣinawetọ to hukan whẹndo gbẹtọvi tọn mẹ bẹsọn Adam ji, yí adọgbigbo do zinzọnlin hẹ Jiwheyẹwhe gbọn gbẹzan dodo tọn zinzan dali to mẹylankan he nọgbẹ̀ to ojlẹ etọn mẹ lẹ ṣẹnṣẹn. (Gẹn. 5:21-24) Jehovah na huhlọn Enọku nado lá wẹndomẹ sinsinyẹn de na yé na ohó po walọ ylankan yetọn lẹ po wutu. (Hia Juda 14, 15.) Be hiẹ tindo adọgbigbo he e nọ biọ nado lá whẹdida Jiwheyẹwhe tọn lẹ ya?
12 Jehovah hẹn whẹdida ṣẹ do mẹylankan lẹ ji to Singigọ lẹdo aihọn pé he wá aimẹ to azán Noa tọn gbè lọ whenu. Ṣogan, mí sọgan mọ tuli yí sọn dọdai Enọku tọn mẹ, na mẹylankan he to gbẹnọ to egbehe lẹ na yin vivasudo to madẹnmẹ gbọn sọha daho gedegede mẹwiwe Jiwheyẹwhe tọn lẹ dali. (Osọhia 16:14-16; 19:11-16) To gblọndo mẹ na odẹ̀ mítọn lẹ, Jehovah nọ na mí adọgbigbo nado lá owẹ̀n etọn, vlavo e gando whẹdida etọn lẹ go kavi dona he gandudu Ahọluduta lọ tọn na hẹnwa lẹ.
13. Naegbọn mí sọgan deji dọ Jiwheyẹwhe sọgan na mí adọgbigbo po huhlọn he mí tindo nuhudo etọn po nado duto ninọmẹ he nọ hẹn apọṣimẹ lẹ ji?
13 Mí tindo nuhudo adọgbigbo po huhlọn he Jiwheyẹwhe nọ namẹ po tọn nado sọgan duto ninọmẹ he nọ hẹn apọṣimẹ lẹ ji. To whenuena Esau dà yọnnu awe sọn Hitinu lẹ mẹ, yé hẹn mẹjitọ etọn lẹ, Isaki po Lebeka po ‘zun adìnọ to ayiha mẹ.’ Lebeka tlẹ wule dọmọ: “Onú ogbẹ̀ ṣie tọn dikọna mi, na viyọnnu Heti tọn lẹ wutu: eyin [visunnu mítọn] Jakobu yí asi to viyọnnu Heti tọn lẹ mẹ, di ehelẹ nkọ sọn viyọnnu aigba lọ tọn lẹ mẹ, dagbe tẹwẹ ogbẹ̀ ṣie na wà na mi?” (Gẹn. 26:34, 35; 27:46) Isaki yinuwa bo do Jakobu hlan fidindẹn nado yì dà asi sọn sinsẹ̀n-basitọ Jehovah tọn lẹ mẹ. Dile etlẹ yindọ Isaki po Lebeka po ma sọgan diọ nuhe Esau ko wà, Jiwheyẹwhe na yé nuyọnẹn, adọgbigbo po huhlọn po nado gbọṣi nugbonọ-yinyin mẹ. Jehovah na wà nudopolọ na mílọsu, eyin mí nọ biọ alọgọ he mí tindo nuhudo etọn to odẹ̀ mẹ.—Ps. 118:5.
14. Nawẹ viyọnnu pẹvi Islaeli tọn de yinuwa po adọgbigbo po gbọn?
14 Owhe kanweko susu to enẹgodo, viyọnnu pẹvi Islaeli tọn de yin wiwle yì kanlinmọgbenu gbọn mẹgbeyantọ delẹ dali bo wá lẹzun deviyọnnu de to owhé awhàngán Silianu Naamani tọn gbè, yèdọ dawe de he to pòzọ̀n jẹ. Na ewọ ko sè dogbọn azọ́njiawu he Jiwheyẹwhe ko wà gbọn yẹwhegán Eliṣa gblamẹ lẹ dali wutu, viyọnnu lọ yí adọgbigbo do dọhona asi Naamani tọn dọmọ: ‘Eyin klunọ ṣie dike bo yì Islaeli, yẹwhegán Jehovah tọn na hẹn pòzọ̀n etọn gbọ.’ Naamani yì Islaeli nugbo, podọ e yin azọ̀nhẹngbọna to azọ́njiawu-liho. (2 Ahọ. 5:1-3) Apajlẹ dagbe nankọ die viyọnnu enẹ zedai na jọja lẹpo he nọ ganjẹ Jehovah go na adọgbigbo nado dekunnuna mẹplọntọ po wehọmẹvigbẹ́ yetọn lẹ po, gọna mẹdevo lẹ!
15. Afọdide adọgbigbo tọn tẹwẹ Obadia, họ̀nkọnsi whédo Ahabi tọn ze?
15 Adọgbigbo he Jiwheyẹwhe nọ namẹ nọ gọalọna mí nado doakọnna homẹkẹn. Lẹnnupọndo apajlẹ Obadia, họ̀nkọnsi whédo Ahọlu Ahabi tọn ji, he nọgbẹ̀ to ojlẹ dopolọ mẹ hẹ yẹwhegán Elija. To whenuena Ahọsi Jẹzebẹli degbè nado hù yẹwhegán Jiwheyẹwhe tọn lẹ, Obadia bẹ 100 to yé mẹ whlá “do kandeao kandeao to aigbaslo de mẹ.” (1 Ahọ. 18:13; 19:18) Be hiẹ na yí adọgbigbo do gọalọna Klistiani hatọ he to yinyin homẹkẹndo lẹ, dile Obadia gọalọna yẹwhegán Jehovah tọn lẹ do ya?
16, 17. Nawẹ Alistaku po Gaiu po yinuwa gbọn to homẹkẹn nukọn?
16 Eyin mí tin to homẹkẹn glọ, mí sọgan deji dọ Jehovah na tin po mí po. (Lom. 8:35-39) To nupọntẹn de mẹ to Efesu, Alistaku po Gaiu po he yin azọ́nwatọgbẹ́ Paulu tọn lẹ, jiya to alọ gbẹtọgun de tọn mẹ, he sọgan ko bẹ gbẹtọ fọtọ́n susu lẹ hẹn. Fataka-yawàtọ Demetliu fọ́n zingidi dote. Ewọ po anazọ́nwatọ hatọ etọn lẹ po nọ basi fatakahọ̀ pẹvi yẹwhe-yọnnu Diana tọn lẹ, podọ ajọ́ enẹ he nọ hẹn ale susu wá na yé tin to owù mẹ na azọ́n yẹwhehodidọ Paulu tọn ko hẹn mẹsusu to tòdaho lọ mẹ nado gbẹkọ boṣiọ-sinsẹ̀n go. Gbẹtọgun lọ dọ̀n Alistaku po Gaiu po biọ nupọntẹn lọ mẹ bo jẹ awhádo ji dọmọ: “Daho wẹ Diana Efesunu lẹ tọn.” Vlavo Alistaku po Gaiu po na ko lẹndọ okú masọ dẹn do yé ba, ṣigba tòwekantọ lẹdo lọ tọn wá hòhuwhẹ gbẹtọgun lọ.—Owalọ 19:23-41.
17 Eyin hiẹ wẹ ko jugbọn ninọmẹ mọnkọtọn mẹ, be a na ko jlo nado zan gbẹzan he voawu hugan wẹ ya? Nudepope ma dohia dọ Alistaku po Gaiu po jogbe. Taidi Tẹsalonikanu de, Alistaku yọnẹn dọ wẹndagbe lọ lilá sọgan dekọtọn do homẹkẹn mẹ. Ojlẹ vude jẹnukọnna nujijọ enẹ, zingidi de ko fọ́n to whenuena Paulu dọyẹwheho to finẹ. (Owalọ 17:5; 20:4) Na Alistaku po Gaiu po zinzọnlin to aliho Jehovah tọn lẹ ji wutu, yé mọ huhlọn po adọgbigbo po yí sọn Jiwheyẹwhe dè nado doakọnna homẹkẹn.
Nọ Pọ́n Nuhe Yin Mẹdevo lẹ Tọn Go
18. Nawẹ Pliskila po Akuila po “nọ pọ́n” nuhe yin mẹdevo lẹ tọn go gbọn?
18 Vlavo mí tin to homẹkẹn glọ to alọnu din kavi lala, mí dona nọ hò Klistiani hatọ lẹ tọn pọ́n. Pliskila po Akuila po “nọ pọ́n” nuhe yin mẹdevo lẹ tọn go. (Hia Filippinu lẹ 2:4.) Asu po asi po apajlẹ dagbenọ enẹ sọgan ko wleawu adọtẹn tọn na Paulu to Efesu, fie Demetliu fataka-yawàtọ lọ fọ́n zingidi he yin nùdego jẹnukọn lọ dote te. Nujijọ enẹ sọgan ko whàn Akuila po Pliskila po nado “yí okọ̀ yetọn bọdai” na Paulu. (Lom. 16:3, 4; 2 Kọl. 1:8) To egbehe, mẹmẹsunnu mítọn he to homẹkẹn glọ lẹ tọn hihopọn nọ hẹn mí yinuwa ‘po nuyọnẹn po di odàn.’ (Mat. 10:16-18) Mí nọ hẹn azọ́ndenamẹ mítọn di po nuyọnẹn po bo ma nọ dike nado de yé gbà gbọn yinkọ yetọn lẹ po nudọnamẹ devo lẹ po nina homẹkẹndomẹtọ lẹ dali.
19. Dagbe tẹlẹ wẹ Dọlka wà na mẹdevo lẹ?
19 Aliho voovo mẹ wẹ mí nọ pọ́n nuhe yin mẹdevo lẹ tọn go te. Klistiani delẹ tin to nuhudo mẹ, podọ vlavo mí sọgan penugo nado hẹn pekọwana yé. (Efe. 4:28; Jak. 2:14-17) To agun Jọppa tọn mẹ to owhe kanweko tintan whenu, nawe alọtlútọ de tin he nọ yin Dọlka. (Hia Owalọ lẹ 9:36-42.) Dọlka “sù to azọ́n dagbe mẹ, podọ to azọ́n nunamẹ tọn” mẹ; e họnwun dọ ehe bẹ awuwiwlena awù lẹ na asuṣiọsi nuhudonọ lẹ hẹn. To whenuena e kú to owhe 36 W.M., asuṣiọsi enẹlẹ blawu tlala. Jiwheyẹwhe yí apọsteli Pita zan nado fọ́n Dọlka sọnku, podọ e yọnbasi taun dọ e yí pipotọ gbẹzan aigba ji tọn etọn zan nado lá wẹndagbe lọ po ayajẹ po bo wadagbe na mẹdevo lẹ. Lehe homẹ mítọn nọ hùn nado tindo mẹmẹyọnnu mẹdezejotọ mọnkọtọn lẹ to ṣẹnṣẹn mítọn to egbehe do sọ!
20, 21. (a) Kanṣiṣa tẹwẹ tin to nuhe yin mẹdevo lẹ tọn go pinpọ́n po tulinina yé po ṣẹnṣẹn? (b) Etẹwẹ hiẹ sọgan wà nado yin asisa tulinamẹ tọn?
20 Mí nọ pọ́n nuhe yin mẹdevo lẹ tọn go gbọn tulinina yé dali. (Lom. 1:11, 12) Azọ́nwatọgbẹ́ Paulu tọn, Sila, do ede hia nado yin asisa tulinamẹ tọn de. To whenue nudide ko yin bibasi do whẹho whẹgbigbo tọn ji to owhe 49 W.M. godo, hagbẹ anademẹtọ lọ he tin to Jelusalẹm do afọzedaitọ lẹ hlan nado hẹn wekanhlanmẹ de yì na yisenọ he tin to fidevo lẹ. Sila, Juda, Balnaba, po Paulu po hẹn ẹn yì Antioku. To finẹ, Sila po Juda po “yí ohó do jlahomẹdona mẹmẹsunnu lẹ, bosọ dotuhomẹna yé.”—Owalọ 15:32.
21 To nukọn mẹ, Paulu po Sila po yin wiwle do ganmẹ to Filippi, ṣigba aigba sisọsisọ de zọ́n bọ yé wá yin tuntundote. Lehe e na ko vivi na yé do sọ to whenuena yé dekunnuna gàntọ-ṣọ́tọ lọ bo mọdọ ewọ po whédo etọn po lẹzun yisenọ! Whẹpo Sila po Paulu po do tọ́n sọn tòdaho enẹ mẹ, yé na tuli mẹmẹsunnu lẹ. (Owalọ 16:12, 40) Taidi Paulu po Sila po, nọ tẹnpọn nado na tuli mẹdevo lẹ to gblọndo po hodidọ towe lẹ po mẹ podọ gbọn mahẹ zohunhun tọn tintindo to sinsẹ̀nzọn kunnudegbe tọn mẹ dali. Podọ whedepopenu he hiẹ tindo “ohó homẹjlado tọn” de, jaale bo nọ ‘dọ ẹ’ tọ́n—Owalọ 13:15.
To Zọnlinzin to Aliho Jehovah Tọn lẹ ji Zọnmii
22, 23. Nawẹ mí sọgan mọaleyi sọn kandai Biblu tọn lẹ mẹ gbọn?
22 Lehe mí dona gọ́ na pẹdido do sọ dọ Jehovah, “Jiwheyẹwhe he nọ na tulimẹ to onú popo mẹ” lọ, ko wleawuna kandai jọnun gbẹzan tọn lẹ to Ohó etọn mẹ! (2 Kọl. 1:3, Byington) Nado sọgan mọaleyi sọn numimọ ehelẹ mẹ, mí dona yí nuplọnmẹ Biblu tọn lẹ zan to gbẹzan mítọn mẹ bo dike gbigbọ wiwe Jiwheyẹwhe tọn ni nọ deanana mí.—Gal. 5:22-25.
23 Ayihamẹlinlẹnpọn do kandai Biblu tọn lẹ ji na gọalọna mí nado nọ do jẹhẹnu he nọ hẹn homẹ Jiwheyẹwhe tọn hùn lẹ hia. E na hẹn haṣinṣan mítọn hẹ Jehovah lodo, mẹhe nọ na mí “nuyọnẹn, zinzin, po ayajijẹ po.” (Yẹwh. 2:26) Taidi kọdetọn de, mí sọgan hẹn homẹhun Jiwheyẹwhe owanyinọ mítọn. (Howh. 27:11) Mì gbọ mí ni magbe nado to mọwà gbọn zọnlinzinzin to aliho Jehovah tọn lẹ ji zọnmii dali.
Nawẹ Hiẹ Na Na Gblọndo Gbọn?
• Nawẹ hiẹ sọgan do dewe hia taidi mẹhe go yè sọgan dejido gbọn?
• Naegbọn mí dona yin “whiwhẹnọ”?
• Nawẹ kandai Biblu tọn lẹ sọgan gọalọna mí nado yin adọgbotọ gbọn?
• Aliho tẹlẹ mẹ wẹ mí sọgan nọ pọ́n nuhe yin mẹdevo lẹ tọn go te?
[Yẹdide to weda 8]
Jẹfta po viyọnnu etọn po do yede hia taidi mẹhe go yè sọgan dejido bo de opà Jẹfta tọn, dile e tlẹ vẹawu nado wàmọ
[Yẹdide to weda 10]
Jọja lẹ emi, etẹwẹ mì plọn sọn apajlẹ viyọnnu Islaeli tọn lọ tọn mẹ?
[Yẹdide to weda 11]
Nawẹ Dọlka penukundo nuhudo Klistiani hatọ lẹ tọn go gbọn?