Nọ Dín Anademẹ Jehovah Tọn to Onú Lẹpo Mẹ
“Jiwheyẹwhe he wẹ Jiwheyẹwhe mítọn kakadoi: ewọ wẹ na yin alihiamẹtọ mítọn yèdọ kakajẹ okú.”—Ps. 48:14.
1, 2. Naegbọn mí dona nọ hodo anademẹ Jehovah tọn kakati nado ganjẹ nuyọnẹn mítọn titi go, podọ kanbiọ tẹlẹ wẹ fọndote?
E BỌAWU nado klọ míde to whenuena mí to nulẹnpọndo nuhe yin ovọ́ kavi nuhe sọgan gbleawunamẹ lẹ ji. (Howh. 12:11) Eyin mí jlo nugbonugbo nado wà nuhe ma sọgbe na Klistiani de, ahun mítọn na nọ saba mọ whẹwhinwhẹ́n he dutomẹji lẹ nado wà nulọ. (Jẹl. 17:5, 9) Enẹwutu, psalm-kàntọ do nuyọnẹn hia to whenuena e hodẹ̀ hlan Jehovah dọmọ: “Do hinhọ́n towe po nugbo towe po hlan gbonu: na yé ni yin alihiamẹtọ ṣie.” (Ps. 43:3) E dejido Jehovah go, kakati nado ganjẹ nuyọnẹn pẹvi he e tindo go, podọ asisa anademẹ tọn dagbe hugan he e sọgan lẹhlan lọ niyẹn. Taidi psalm-kàntọ lọ, mí na wadagbe nado nọ dín anademẹ sọn Jiwheyẹwhe dè.
2 Ṣigba, naegbọn mí dona dejido anademẹ Jehovah tọn go hú mẹdevo depope tọn? Whetẹnu wẹ mí dona nọ dín in? Pọndohlan tẹlẹ wẹ mí dona wleawuna nado sọgan mọaleyi sọn anademẹ enẹ mẹ, podọ nawẹ Jehovah nọ deanana mí gbọn to egbehe? Mí na dọhodo kanbiọ titengbe ehelẹ ji to hosọ ehe mẹ.
Naegbọn Mí Dona Dejido Anademẹ Jehovah Tọn Go?
3-5. Etẹwutu wẹ mí nọ deji mlẹnmlẹn do anademẹ Jehovah tọn go?
3 Jehovah wẹ Otọ́ olọn mẹ tọn mítọn. (1 Kọl. 8:6) E yọ́n dopodopo mítọn to gigọ́ mẹ bo sọgan mọnú jẹ ahun mítọn mẹ. (1 Sam. 16:7; Howh. 21:2) Ahọlu Davidi dọna Jiwheyẹwhe dọmọ: “Hiẹ yọ́n aisinsin ṣie po finfọnṣite ṣie po, hiẹ tunwun lẹndai ṣie to olá boboe. Na ohó depope ma tin to odẹ́ ṣie mẹ, doayi e go, OKLUNỌ E, hiẹ yọnẹn patapata.” (Ps. 139:2, 4) To whenuena e yindọ Jehovah yọ́n mí sọmọ, naegbọn mí nado tindo ayihaawe dọ e yọ́n nuhe na wadagbe na mí hugan? Humọ, Jehovah wẹ nuyọnẹntọ daho lọ. E nọ mọ nulẹpo, bo nọ pọnnu hlan nukọn hú gbẹtọvi depope, bosọ nọ yọ́n kọdetọn nulẹ tọn sọn bẹjẹeji gbọ́n. (Isa. 46:9-11; Lom. 11:33) Ewọ wẹ “Jiwheyẹwhe nuyọnẹntọ dopo lọ.”—Lom. 16:27.
4 To yidogọ mẹ, Jehovah yiwanna mí bo nọ jlo nuhe na wadagbe na mí hugan to whelẹponu. (Joh. 3:16; 1 Joh. 4:8) Taidi Jiwheyẹwhe owanyinọ de, e nọ tlúalọ hlan dopodopo mítọn. Devi Jakobu wlan dọmọ: “Nunina dagbedagbe po nunina he sọgbe lẹpo po, aga wẹ e sọn, bosọ jẹte sọn Otọ́ hinhọ́n lẹ tọn dè.” (Jak. 1:17) Mẹhe nọ na dotẹnmẹ Jiwheyẹwhe nado deanana yé lẹ nọ mọ ale susu yí sọn alọtútlú etọn mẹ.
5 Hú popolẹpo, Jehovah wẹ ganhunupotọ. Gando ehe go, psalm-kàntọ lọ dọmọ: “Ewọ he sinai to fiwhiwhlá Gigogán tọn mẹ na nọ nọ̀ oyẹ̀ Ganhunupo tọn glọ. Yẹn na dọ gbọn OKLUNỌ tọn dali, Ewọ wẹ fibẹtado ṣie podọ figángán ṣie: Jiwheyẹwhe ṣie; ewọ go wẹ yẹn na dotudo.” (Ps. 91:1, 2) Eyin mí hodo anademẹ Jehovah tọn, e dohia dọ mí to fibẹtado dín to Jiwheyẹwhe he ma sọgan gboawupo lọ mẹ. Eyin mí tlẹ pehẹ nukundiọsọmẹ, Jehovah na nọgodona mí. E ma na hẹn mí jẹflumẹ. (Ps. 71:4, 5; Hia Howhinwhẹn lẹ 3:19-26.) Mọwẹ, Jehovah yọ́n nuhe na wadagbe na mí hugan, bo nọ jlo nuhe na wadagbe na mí hugan bosọ tindo huhlọn nado na mí nuhe na wadagbe na mí hugan. Lehe e na yin nulunu nado gbẹkọ anademẹ etọn go do sọ! Ṣigba, whetẹnu wẹ mí nọ tindo nuhudo anademẹ enẹ tọn?
Whetẹnu Wẹ Mí Nọ Tindo Nuhudo Anademẹ Tọn?
6, 7. Whetẹnu wẹ mí nọ tindo nuhudo anademẹ Jehovah tọn?
6 Nado dọ hójọhó, mí tindo nuhudo anademẹ Jiwheyẹwhe tọn to gbẹzan mítọn blebu mẹ, yèdọ sọn ovu whenu kakajẹ yọnhowhe mẹ. Psalm-kàntọ lọ dọmọ: “Jiwheyẹwhe he wẹ Jiwheyẹwhe mítọn kakadoi: ewọ wẹ na yin alihiamẹtọ mítọn yèdọ kakajẹ okú.” (Ps. 48:14) Taidi psalm-kàntọ lọ, Klistiani nuyọnẹntọ lẹ ma nọ doalọtena anademẹ Jiwheyẹwhe tọn dindin gbede.
7 Nugbo wẹ dọ to whedelẹnu, mí nọ tindo nuhudo alọgọ tọn to niyaniya mẹ. To whedelẹnu, mí nọ mọ míde to “tukla” mẹ, vlavo na homẹkẹn, manọna sinsinyẹn kavi azọ́n gbledomẹ ajiji de wutu. (Ps. 69:16, 17) To ojlẹ mọnkọtọn lẹ mẹ, homẹmiọnnamẹnu wẹ e nọ yin nado lẹhlan Jehovah, po jidide lọ po dọ e na na mí huhlọn nado doakọnna bo deanana mí nado basi nudide dagbe lẹ. (Hia Psalm 102:17.) Ṣigba, mí sọ nọ tindo nuhudo alọgọ etọn tọn to ojlẹ devo lẹ mẹ. Di apajlẹ, whenuena mí jlo na dọhona kọmẹnu mítọn lẹ dogbọn wẹndagbe Ahọluduta lọ tọn dali, mí nọ tindo nuhudo anademẹ Jehovah tọn nado sọgan dekunnu po kọdetọn dagbe po. Podọ whedepopenu he mí jlo na basi nudide—vlavo gando ayidedai, nusisọ́, aṣọ́dido, gbẹdido, agbasazọ́n, wepinplọn, kavi onú devo depope go—mí na yinuwa po nuyọnẹn po kiki eyin mí hodo anademẹ Jehovah tọn lẹ. Na nugbo tọn, adà gbẹzan mítọn tọn lẹpo mẹ wẹ mí nọ tindo nuhudo anademẹ tọn te.
Owù He Awugbopo Nado Hodo Anademẹ Jiwheyẹwhe Tọn Nọ Hẹnwa Lẹ
8. Etẹwẹ nuyiwa Evi tọn dohia to whenuena e dù atin-sinsẹ́n he yè ko dosẹ́n etọn lọ?
8 Ṣigba, flindọ mí dona jlo sọn ahun mẹ wá nado nọ hodo anademẹ Jehovah tọn. Jiwheyẹwhe ma na hẹn mí gánnugánnu nado wàmọ eyin mí ma jlo gba. Gbẹtọvi tintan he de ma nado hodo anademẹ Jehovah tọn wẹ Evi, podọ apajlẹ etọn do obá he mẹ nudide mọnkọtọn sọgan ylan jẹ hia. Sọ lẹnnupọndo nuhe nudide etọn hẹnwa lẹ ji. Evi dù atin-sinsẹ́n he yè ko dosẹ́n etọn lọ na e jlo “na tin di Jiwheyẹwhe, bo nọ yọ́n onú dagbe po oylan po.” (Gẹn. 3:5) To mọwiwà mẹ, e ze ede do otẹn Jiwheyẹwhe tọn mẹ bo basi nudide na ede gando nuhe yin dagbe po oylan po go, kakati nado hodo anademẹ Jehovah tọn lẹ. Gbọnmọ dali, e gbẹ́ nupojipetọ-yinyin Jehovah tọn dai. E jlo na lẹzun klunọ edetiti tọn. Asu etọn, Adam, hodo e to atẹṣiṣi lọ mẹ.—Lom. 5:12.
9. Eyin mí nọ gbẹ́ anademẹ Jehovah tọn dai, etẹ wà wẹ mí te na taun tọn, podọ naegbọn enẹ do yin nulunu daho de?
9 Mọdopolọ to egbehe, eyin mílọsu ma nọ hodo anademẹ Jehovah tọn, e dohia dọ mí ko gboawupo nado kẹalọyi nupojipetọ-yinyin etọn. Di apajlẹ, lẹnnupọndo mẹde ji he tindo aṣa lọ nado nọ pọ́n yẹdide fẹnnuwiwa tọn lẹ. Eyin e ko to awukọndopọ hẹ agun Klistiani tọn, be e dona ko yọ́n anademẹ Jehovah tọn do whẹho ehe ji. Onú mawé lẹ ma tlẹ dona nọ yin nùdego, nẹmunẹmu wẹ wá yin nado nọ mọ awuvivi to onú mọnkọtọn lẹ pinpọn mẹ. (Efe. 5:3) Gbọn anademẹ Jehovah tọn gbigbẹdai dali, omẹ enẹ to kọgbẹ́ nupojipetọ-yinyin Jehovah tọn go bosọ to tatọ́-yinyin Etọn gbẹdai. (1 Kọl. 11:3) Nulunu daho wẹ ehe, na dile Jẹlemia dọ do, “e ma tin to mẹhe to zọnlinzin mẹ nado do afọdide etọn lẹ gba.”—Jẹl. 10:23.
10. Naegbọn mí dona yọnẹn dọ azọngban de wẹ e yin to whenuena mí to mẹdekannujẹ nudide bibasi tọn mítọn yizan?
10 Mẹdelẹ sọgan jẹagọdo nuhe Jẹlemia dọ, bo dọ dọ to whenuena e yindọ Jehovah lọsu wẹ na mí mẹdekannujẹ nudide bibasi tọn, e ma dona gblewhẹdo mí eyin mí to mẹdekannujẹ enẹ yizan. Etomọṣo, mí ma dona wọnji dọ nunina de wẹ mẹdekannujẹ nudide bibasi tọn yin bo ka sọ yin azọngban ga. Mí na dogbè nuhe mí de nado dọ kavi nado wà lẹ tọn. (Lom. 14:10) Jesu dọmọ: “Sọn susugege ayiha mẹ tọn mẹ wẹ onù to didọ.” E sọ yidogọ dọ: “Ayiha mẹ wẹ linlẹn ylankan lẹ nọ tọ́n sọn, mẹhuhu, ayọdide, galilọ, ajò, lalo kunnudide, ohó ylankan didọ.” (Mat. 12:34; 15:19) Enẹwutu, hogbe po nuyiwa mítọn lẹ po nọ do nuhe to ahun mítọn mẹ hia. Yé nọ do nuhe mí yin taun hia. Nuhe zọ́n niyẹn bọ Klistiani nuyọnẹntọ de nọ dín anademẹ Jehovah tọn to onú lẹpo mẹ. Gbọnmọ dali, Jehovah nọ mọ ẹn taidi “tenọglinọ to ayiha mẹ” bo nasọ “wadagbe” na ẹn.—Ps. 125:4.
11. Etẹwẹ mí plọn sọn otàn Islaelivi lẹ tọn mẹ?
11 Flin otàn Islaelivi lẹ tọn. To whenuena akọta lọ basi nudide dagbe lẹ, bo setonuna gbedide Jehovah tọn lẹ, Jehovah basi hihọ́na yé. (Jọṣ. 24:15, 21, 31) Ṣigba, whlasusu wẹ yé ṣì mẹdekannujẹ nudide bibasi tọn yetọn zan. To azán Jẹlemia tọn gbè, Jehovah dọ gando yé go dọmọ: “Yé ma tuntoai kavi do otó yetọn ai gba, ṣigba to zọnlinzin to hónamẹ yetọn titi lẹ mẹ podọ to tasinyẹn ayiha ylankan yetọn tọn mẹ, bosọ to godo gọyì nukọnyi ma gba.” (Jẹl. 7:24-26) Lehe enẹ blawu do sọ! Mì dike tasinsinyẹn kavi awujijona ojlo ṣejannabi tọn lẹ hẹn mí nado gbẹ́ anademẹ Jehovah tọn dai, bo zinzọnlin to ayinamẹ mítọn titi lẹ mẹ bosọ gbọnmọ dali ‘to godo gọyì kakati nado yinukọn’ gbede blo!
Etẹwẹ E Nọ Biọ Nado Hodo Ayinamẹ Jiwheyẹwhe Tọn?
12, 13. (a) Jẹhẹnu tẹwẹ nọ hẹn mí tindo ojlo nado hodo anademẹ Jehovah tọn? (b) Naegbọn yise do yin nujọnu?
12 Owanyi mítọn na Jehovah nọ hẹn mí tindo ojlo nado hodo anademẹ etọn. (1 Joh. 5:3) Ṣigba, Paulu dlẹnalọdo onú devo he mí tindo nuhudo etọn to whenuena e dọmọ: “Yise dali wẹ mí to zọnlinzin gbọn, e ma yin gbọn mimọ dali gba.” (2 Kọl. 5:6, 7) Naegbọn yise do yin nujọnu? Nugbo wẹ dọ, Jehovah nọ deanana mí gbọn “ali dodo tọn” lẹ ji, ṣigba ali enẹlẹ ma nọ hẹn mí tindo adọkun kavi yindidi to aihọn ehe mẹ gba. (Ps. 23:3) Enẹwutu, mí dona zín nukun yise tọn mítọn do dona mayọnjlẹ he nọ wá sọn sinsẹ̀n-bibasi Jehovah tọn mẹ lẹ ji. (Hia 2 Kọlintinu lẹ 4:17, 18.) Podọ yise nọ gọalọna mí nado tindo pekọ po nutindo agbasa tọn vude po.—1 Tim. 6:8.
13 Jesu dohia dọ sinsẹ̀n-bibasi nugbo nọ bẹ mẹde-yido-sanvọ́ hẹn, podọ ehe lọsu nọ biọ yise. (Luku 9:23, 24) Sinsẹ̀n-basitọ nugbonọ delẹ ko basi avọ́sinsan susu, bo doakọnna ohẹ́n, kọgbidinamẹ, nuvẹun, podọ etlẹ yin homẹkẹn sinsinyẹn. (2 Kọl. 11:23-27; Osọhia 3:8-10) Yise dolido kẹdẹ wẹ nọ gọalọna yé nado wàmọ po ayajẹ po. (Jak. 1:2, 3) Yise dolido nọ hẹn mí kudeji mlẹnmlẹn dọ anademẹ Jehovah tọn wẹ yin aliho nuyiwa tọn dagbe hugan lọ to whepoponu. Yigodo yinukọn, dagbe mẹ janwẹ e nọ dekọtọn do na mí to whepoponu. Mí kudeji mlẹnmlẹn dọ ale he mẹhe doakọnna po nugbonọ-yinyin po lẹ nọ mọyi sù tlala hú yajiji ojlẹ gli tọn depope.—Heb. 11:6.
14. Naegbọn Hagali dona do whiwhẹ hia?
14 Sọ lẹnnupọndo adà he whiwhẹ nọ yiwà to anademẹ Jehovah tọn hihodo mẹ ji. Apajlẹ Hagali, deviyọnnu Sala tọn, do ehe hia. To whenuena Sala mọdọ emi ma mọ ovi ji, e ze Hagali jo na Ablaham, bọ Hagali mọhò na Ablaham. Enẹgodo, Hagali jẹ goyi mẹmẹnu etọn he yin wẹnsinọ go ji. Taidi kọdetọn de, Sala “zan alọ sinsinyẹn hẹ ẹ” bọ Hagali họnyi. Angẹli Jehovah tọn de dukosọ hẹ Hagali bo dọna ẹn dọmọ: “Gọyì yọnnu mẹmẹnu towe dè, bosọ whiwhẹ dewe to alọ etọn glọ.” (Gẹn. 16:2, 6, 8, 9) Vlavo anademẹ devo wẹ Hagali na ko jlo nado mọyi. Nado yinuwa sọgbe hẹ anademẹ angẹli lọ tọn, e dona jo gbigbọ goyiyi tọn etọn do. Ṣigba, Hagali gbọn whiwhẹ dali wà nuhe angẹli lọ dọ, bọ visunnu etọn Iṣmaeli yin jiji po awuvivo po to gòhọ otọ́ etọn Ablaham tọn mẹ.
15. Basi zẹẹmẹ ninọmẹ delẹ tọn he mẹ anademẹ Jehovah tọn hihodo sọgan biọ whiwhẹ to mí si te to egbehe.
15 Anademẹ Jehovah tọn hihodo sọgan biọ dọ mílọsu ni whiwhẹ míde. E sọgan yin dandan na mẹdelẹ nado kẹalọyi pọndohlan lọ dọ ayidedai tangan he yé nọ duvivi etọn de ma nọ hẹn homẹhun Jehovah. Klistiani de sọgan ko hẹn homẹgble hatọ etọn bọ e biọ dọ e ni vẹvẹ. Kavi e sọgan ko ṣì nude wà bọ e biọ dọ e ni yigbe etọn. Etẹwẹ lo eyin mẹde jẹ ylanwa sinsinyẹn de mẹ? E dona whiwhẹ ede bo yigbe ylando etọn tọn to mẹho lẹ nukọn. Mẹde tlẹ sọgan yin didesẹ sọn agun mẹ. Nado sọgan yin gigọyí, e dona gbọn whiwhẹ dali lẹnvọjọ bo lẹkọ sọn ylanwa etọn mẹ. To ninọmẹ ehelẹ po mọnkọtọn devo lẹ po mẹ, hogbe Howhinwhẹn lẹ 29:23 tọn lẹ sọ nọ miọnhomẹna mí: “Sakla gbẹtọ tọn wẹ na zín in do odò: ṣigba ayiha whiwhẹnọ wẹ na yí yẹyi.”
Nawẹ Jehovah Nọ Deanana Mí Gbọn?
16, 17. Nawẹ mí sọgan mọaleyi to gigọ́ mẹ sọn Biblu he yin asisa tangan anademẹ Jiwheyẹwhe tọn mẹ gbọn?
16 Asisa titengbe hugan he mẹ mí nọ mọ anademẹ Jiwheyẹwhe tọn te wẹ Biblu, Ohó gbọdo Jiwheyẹwhe tọn. (Hia 2 Timoti 3:16, 17.) Nado sọgan mọaleyi sọn Ohó enẹ mẹ to gigọ́ mẹ, nuyọnẹnnu wẹ e na yin ma nado nọte dọ ninọmẹ sinsinyẹn de ni fọndote whẹpo do dín ayinamẹ dagbe lẹ sọn Owe-wiwe mẹ. Kakatimọ, mí dona hẹn Biblu hihia egbesọegbesọ zun aṣa. (Ps. 1:1-3) To mọwiwà mẹ, mí nọ jẹakọ hẹ ohó gbọdo lẹ. Mí nọ hẹn linlẹn Jiwheyẹwhe tọn lẹ zun mítọn, bo nọ wleawufo nado pehẹ nuhahun lẹ, etlẹ yin dehe mí ma donukun lẹ.
17 Humọ, nujọnu wẹ e yin nado nọ lẹnayihamẹpọn do nuhe mí hia to Owe-wiwe mẹ lẹ ji bo hodẹ̀ gando yé go. Eyin mí to ayihamẹlẹnpọndo wefọ Biblu tọn lẹ ji, mí nọ pọ́n lehe yé sọgan yọ́n-na-yizan to ninọmẹ voovo lẹ mẹ do. (1 Tim. 4:15) To whenuena mí pannukọn nuhahun sinsinyẹn lẹ, mí nọ hodẹ̀ hlan Jehovah bo nọ biọ alọgọ nado mọ anademẹ he mí tindo nuhudo etọn. Gbigbọ Jehovah tọn na gọalọna mí nado flin nunọwhinnusẹ́n yọ́n-na-yizan Owe-wiwe tọn he mí ko hia to Biblu mẹ kavi to owe sinai do Biblu ji lẹ mẹ.—Hia Psalm 25:4, 5.
18. Aliho tẹlẹ mẹ wẹ Jehovah nọ yí mẹmẹsunnu mítọn lẹ zan nado deanana mí te?
18 Asisa titengbe devo he mẹ mí sọgan dín anademẹ Jehovah tọn sọn wẹ mẹmẹsunnu mítọn lẹ. Adà tangan mẹmẹsunnu-yinyin enẹ tọn wẹ “afanumẹ nugbonọ, nuyọnẹntọ” lọ po afọzedaitọ etọn Hagbẹ Anademẹtọ lọ po, he nọ wleawuna núdùdù gbigbọmẹ tọn to whepoponu gbọn owe zinjẹgbonu lẹ gọna tito-to-whinnu opli po plidopọ lẹ po tọn gblamẹ. (Mat. 24:45-47; yijlẹdo Owalọ lẹ 15:6, 22-31 go.) Humọ, to mẹmẹsunnu mítọn lẹ ṣẹnṣẹn, mí nọ mọ mẹhe whèwhín delẹ, titengbe mẹho agun tọn lẹ he pegan nado gọalọna dopodopo mítọn bo na mí ayinamẹ he sinai do Owe-wiwe ji lẹ. (Isa. 32:1) Jọja he tin to whédo Klistiani tọn mẹ lẹ sọ tindo asisa titengbe alọgọ tọn devo. Mẹjitọ yisenọ yetọn lẹ yin aṣẹpipa he Jiwheyẹwhe zedai de, he yé na wadagbe nado nọ lẹhlan na anademẹ to whepoponu.—Efe. 6:1-3.
19. Dona tẹlẹ wẹ mí nọ mọyi dile mí to anademẹ Jehovah tọn dín zọnmii?
19 Mọwẹ, Jehovah nọ na mí anademẹ to aliho susu mẹ, podọ mí na wadagbe nado mọaleyi sọn anademẹ enẹ mẹ to gigọ́ mẹ. Dile Ahọlu Davidi to hodọ gando ojlẹ de go whenuena Islaelivi lẹ yin nugbonọ, e dọmọ: “Otọ́ mítọn lẹ dotudo gowe: yé dotudo gowe, hiẹ sọ whlẹn yé. Yé dawhá ylọ we, yè whlẹn yé: yé dotudo gowe, winyan masọ hù yé.” (Ps. 22:3-5) Eyin mí nọ hodo anademẹ Jehovah tọn po jidide po, ‘winyan ma na hù’ mílọsu gbede. Mí ma na jẹflumẹ gando todido mítọn go. Eyin mí ‘jo ali mítọn do alọ Jehovah tọn mẹ,’ kakati nado ganjẹ nuyọnẹn mítọn titi go, mí na duvivi dona susu tọn bẹsọn din. (Ps. 37:5) Podọ eyin mí gbọn nugbonọ-yinyin dali to mọwà zọnmii, dona enẹlẹ na zindonukọn kakadoi. Ahọlu Davidi wlan dọmọ: “OKLUNỌ yiwanna whẹdida, bo masọ nọ gbẹ́ mẹwiwe etọn lẹ dai; yè na nọ yí yé whlá kakadoi . . . Dodonọ wẹ na dugu aigba tọn, bo nasọ nọ nọ̀ e mẹ kakadoi.”—Ps. 37:28, 29.
Be Hiẹ Sọgan Na Gblọndo Ya?
• Naegbọn mí nọ dejido anademẹ Jehovah tọn go?
• Etẹwẹ anademẹ Jehovah tọn gbigbẹdai nọ hẹnwa?
• Etẹwẹ yin delẹ to ninọmẹ he mẹ Klistiani de nọ tindo nuhudo whiwhẹ tọn te lẹ mẹ?
• Nawẹ Jehovah nọ deanana mí to egbehe gbọn?
[Yẹdide to weda 8]
Be hiẹ nọ lẹhlan Jehovah to adà gbẹzan towe tọn lẹpo mẹ ya?
[Yẹdide to weda 9]
Evi gbẹ́ nupojipetọ-yinyin Jehovah tọn dai
[Yẹdide to weda 10]
Jẹhẹnu tẹwẹ Hagali dona dohia nado sọgan hodo anademẹ angẹli lọ tọn?