Nọ Doafọna ‘Wiwe to Osi Jiwheyẹwhe Tọn Mẹ’

NADO dohia dọ Jehovah Jiwheyẹwhe wẹ yin wiwe hugan, Biblu dọmọ: “Wiwe, wiwe, wiwe wẹ OKLUNỌ.” (Isa. 6:3; Osọhia 4:8) Hogbe Heblu po Glẹki po tọn he yin lilẹdo “wiwe” bẹ linlẹn oblọ matindo kavi dihó matindo to sinsẹ̀n-liho tọn hẹn, yèdọ ma nado yin hinhẹnflu. Wiwe-yinyin Jiwheyẹwhe tọn dlẹnalọdo nujinọtedo pipé walọ dagbe tọn etọn.

Be Jiwheyẹwhe wiwe lọ, Jehovah, ma na donukun sọn mẹhe to sinsẹ̀n ẹn lẹ si nado yin wiwe, enẹ wẹ nado gbọṣi madodiho mẹ to agbasa-liho, to walọ mẹ podọ to gbigbọ-liho ya? Biblu hẹn ẹn họnwun dọ Jehovah jlo dọ omẹ etọn lẹ ni yin wiwe. Mí hia to 1 Pita 1:16 mẹ dọmọ: “Mì [dona] yin wiwe, na wiwe wẹ yẹn.” Be gbẹtọvi mapenọ lẹ sọgan hodo apajlẹ wiwe-yinyin Jehovah tọn nugbonugbo ya? Mọwẹ, dile yé ma tlẹ sọgan wàmọ to pipé mẹ. Mí sọgan yin pinpọnhlan taidi wiwe to nukun Jiwheyẹwhe tọn mẹ eyin mí nọ sẹ̀n ẹn to ninọmẹ gbigbọmẹ tọn dagbe de mẹ bo tindo haṣinṣan pẹkipẹki de po e po.

Eyin mọ wẹ, nawẹ mí sọgan gbọṣi madodiho mẹ to aihọn he ko yin hinhẹnflu to walọyizan-liho de mẹ gbọn? Walọ tẹlẹ wẹ mí dona nọ dapana? Diọdo tẹlẹ wẹ e sọgan biọ dọ mí ni basi to hodidọ po jijọ mítọn lẹ po mẹ? Mì gbọ mí ni pọ́n nuhe mí sọgan plọn gando ehe go sọn nuhe Jiwheyẹwhe biọ to Ju lẹ si whenuena yé jlo na lẹkọ sọn Babilọni yì aigba yetọn ji to owhe 537 J.W.M. mẹ.

‘Aliho Walọ Wiwe Tọn Na Tin’

Jehovah dọ dọdai dọ omẹ etọn he tin to kanlinmọgbenu to Babilọni lẹ na yin hinhẹngọwa aigba yetọn ji. Dọdai hẹngọwa tọn lọ bẹ jidenamẹ ehe hẹn dọmọ: “Aligbó dopo wẹ na tin to finẹ po aliho dopo po, yè nasọ nọ ylọ ẹ dọ Aliho Walọ Wiwe tọn.” (Isa. 35:8a) Hogbe ehelẹ dohia dọ gbọnvona dọ Jehovah hùn aliho dotena Ju lẹ nado yì otò yetọn mẹ, e sọ hẹn yé deji dọ ewọ na basi hihọ́na yé to gbejizọnlin yetọn whenu.

Jehovah hùn “Aliho Walọ Wiwe tọn” dotena devizọnwatọ etọn egbezangbe tọn lẹ to aigba ji nado plan yé sọn Babilọni Daho lọ mẹ, yèdọ ahọluigba aihọn tọn he yin sinsẹ̀n lalo tọn. To 1919, e tún Klistiani yiamisisadode lẹ dote to gbigbọ-liho sọn kanlinmọgbenu sinsẹ̀n lalo tọn, bọ yé klọ́ sinsẹ̀n-bibasi yetọn wé vudevude sọn nuplọnmẹ lalo lẹpo mẹ. Taidi sinsẹ̀n-basitọ Jehovah tọn lẹ to egbehe, mí nọ duvivi ninọmẹ gbigbọmẹ tọn wiwe de tọn to blẹo mẹ, ehe mẹ mí sọgan sẹ̀n Jehovah te bo tindo haṣinṣan jijọho tọn hẹ ewọ podọ hẹ mẹdevo lẹ.

Hagbẹ “lẹngbọpa pẹvi” Klistiani yiamisisadode lẹ tọn po “gbẹtọ susugege” he yin “lẹngbọ devo” he fọ́n bo to susudeji lẹ po ko de nado zinzọnlin to aliho wiwe de ji bosọ to oylọ-basina mẹdevo lẹ nado kọnawudopọ hẹ yé. (Luku 12:32; Osọhia 7:9; Joh. 10:16) “Aliho Walọ Wiwe tọn” lọ hùndonuvo na mẹdepope he jlo na “yí agbasa [etọn] do basi avọ́sannu ogbẹ̀nọ, wiwe, alọkẹyi hlan Jiwheyẹwhe.”—Lom. 12:1.

“Mawenọ de Ma to Na Jugbọn Finẹ”

To owhe 537 J.W.M., Ju he lẹkọ lọ lẹ dona jẹ nubiọtomẹsi titengbe de kọ̀n. Gando mẹhe pegan nado zinzọnlin to “Aliho Walọ Wiwe tọn” lọ ji lẹ go, Isaia 35:8b dọmọ: “Mawenọ de ma to na jugbọn finẹ; na ewọ na tin hẹ yé.” To whenuena e yindọ lẹndai kọlilẹ Ju lẹ tọn yì Jelusalẹm wẹ nado vọ́ sinsẹ̀n-bibasi wiwe lọ doai, mẹhe tindo mẹwhinwhàn ṣejannabi tọn, bo ma nọ na sisi onú wiwe lẹ, kavi he hẹn yede flu to gbigbọ-liho lẹ ma tindo tẹnmẹ yetọn to finẹ. Mẹhe lẹkọ lọ lẹ dona hẹn nujinọtedo yiaga walọ dagbe tọn he Jehovah zedai lẹ go. Mẹhe jlo na mọ nukundagbe Jiwheyẹwhe tọn to egbehe lẹ dona jẹ nubiọtomẹsi dopolọ kọ̀n ga. Yé dona nọ doafọna “wiwe . . . to osi Jiwheyẹwhe tọn mẹ.” (2 Kọl. 7:1) Eyin mọ wẹ, walọ mawé tẹlẹ wẹ mí dona nọ dapana?

Apọsteli Paulu wlan dọ, “Azọ́n agbasalan tọn lẹ sọawuhia dinvie, he yin ehelẹ; ayọdide, galilọ, mawé, wantuntun.” (Gal. 5:19) Galilọ nọ dlẹnalọdo nuyiwa zanhẹmẹ tọn lẹpo he bẹ yizan vijinu lẹ tọn to gbonu alọwle tọn hẹn. Wantuntun zẹẹmẹdo “pipeve to fẹnnuwiwa mẹ, gblewa, nuwiwa winyan-matindo tọn; gbigblezọn.” Galilọ po wantuntun po jẹagọ mlẹnmlẹn do wiwe-yinyin Jehovah tọn. Enẹwutu, mẹdepope he hẹn walọ mọnkọtọn lẹ zun aṣa ma nọ yin dotẹnmẹna nado lẹzun apadewhe agun Klistiani tọn kavi nọ yin didesẹ sọn agun mẹ. Nudopolọ wẹ gando mẹhe yí mawé sinsinyẹn do dó aṣa lẹ go, enẹ wẹ mẹhe nọ ‘yí nukunkẹn do doalọ to mawé wunmẹ lẹpo mẹ.’—Efe. 4:19.

“Mawé” yin hogbe de he bẹ ylando voovo lẹ hẹn. Hogbe Glẹki tọn he mẹ e wá sọn lọ dlẹnalọdo dihó wunmẹ depope—yèdọ to walọ mẹ, to hodidọ mẹ, podọ to haṣinṣan gbigbọmẹ tọn lẹ mẹ. E bẹ nuyiwa he yin mawé jẹ obá de mẹ delẹ hẹn he sọgan nọma biọ dọ afọdide whẹdida tọn ni yin zize.a Ṣigba be mẹhe nọ doalọ to walọ mawé mọnkọtọn lẹ mẹ to afọdona wiwe-yinyin nugbonugbo ya?

Mì ni dọ dọ Klistiani de jẹ yẹdide fẹnnuwiwa tọn pọ́n ji to nuglọ. Vudevude, dile ojlo mawé lẹ to finfọn to ayiha etọn mẹ, gbemima etọn nado gbọṣi madodiho mẹ to Jehovah nukọn na jẹ didepo ji. Walọ etọn sọgan nọma ko ylan jẹ obá lọ mẹ nado yin pinpọnhlan taidi mawé sinsinyẹn, ṣigba e masọ to nukọnzindo nado nọ lẹnnupọn kiki do ‘nudepope he yin wiwe, wẹndagbe, jijọ dagbe po pipà po’ ji ba. (Flp. 4:8) Yẹdide fẹnnuwiwa tọn lẹ yin mawé podọ ayihaawe ma tin dọ yé nọ hẹn haṣinṣan he mẹde tindo hẹ Jiwheyẹwhe gble. Mawé wunmẹ depope ma tlẹ dona yin nùdego to ṣẹnṣẹn mítọn.—Efe. 5:3.

Lẹnnupọndo apajlẹ devo ji. Mì ni dọ dọ Klistiani de tindo aṣa lọ nado nọ yí vijinu etọn do daihun—enẹ wẹ yindọ e nọ desọn ojlo mẹ bo nọ fọ́n ojlo zanhẹmẹ tọn dote na ede—vlavo bo nọ pọ́n yẹdide fẹnnuwiwa tọn dile e to mọwà kavi lala. Dile etlẹ yindọ hogbe lọ “vijinu-yido-daihun” ma sọawuhia to Biblu mẹ, be ayihaawe sọgan tin dọ nuyiwa ehe nọ hẹnmẹ flu to numọtolanmẹ-liho podọ to apọ̀nmẹ ya? Be nukọnzinzindo to nuyiwa mẹhẹnflu tọn mọnkọtọn mẹ ma na hẹn haṣinṣan he mẹde tindo hẹ Jehovah gble taun bo hẹn ẹn zun mawé to nukun Jiwheyẹwhe tọn mẹ ya? Mì gbọ mí ni hẹn tudohomẹnamẹ apọsteli Paulu tọn do ayiha mẹ nado “klọ́ míde sọn dihó agbasalan po gbigbọ tọn lẹpo po mẹ” bo “hẹn awutugonu [mítọn] he tin to aihọn mẹ lẹ kú, galilọ, mawé, wantuntun, ojlo ylankan, po nukunkẹn po.”—2 Kọl. 7:1; Kọl. 3:5.

Aihọn he tin to anademẹ Satani tọn glọ ehe yigbena walọ mawé, bo tlẹ sọ nọ na tulimẹ nado doalọ to e mẹ. Avunteninọ sọta mẹtẹnpọn lọ nado tindo mahẹ to walọ mawé mẹ sọgan vẹawu taun. Ṣigba Klistiani nugbo lẹ ma dona nọ “zinzọnlin dile Kosi devo lẹ to zinzin do . . . to ovọ́ ayiha yetọn tọn mẹ.” (Efe. 4:17) Kiki eyin mí dapana walọ mawé, vlavo to nuglọ kavi to gbangba, wẹ Jehovah na dike dọ mí ni to zọnlinzin to “Aliho Walọ Wiwe tọn” lọ ji zọnmii.

“Kinnikinni Ma to Na Tin to Finẹ”

Nado duvivi nukundagbe Jiwheyẹwhe wiwe lọ, Jehovah tọn, e sọgan biọ dọ mí ni basi diọdo ayidego tọn lẹ to walọ po hodidọ mítọn lẹ po mẹ. Isaia 35:9 domọ: “Kinnikinni ma to na tin to finẹ; mọ kanlin mẹhùdùtọ de ma to na hẹ́ [Aliho Walọ Wiwe tọn lọ] ji.” To yẹhiadonu-liho, mẹhe yin danuwatọ bosọ yin fifiẹtọ to ohó po walọ po mẹ lẹ yin yiyijlẹdo gbekanlin lẹ go. E họnwun dọ yé ma na mọtẹn to aihọn yọyọ dodowiwa Jiwheyẹwhe tọn mẹ. (Isa. 11:6; 65:25) Enẹwutu, dandannu wẹ e yin dọ mẹhe jlo na mọ nukundagbe Jiwheyẹwhe tọn lẹ ni jo walọ kanlinjọmẹ tọn enẹlẹ do bo doafọna wiwe-yinyin.

“Mì gbọ adi lẹpo, homẹfiọ, homẹgble, nutlọ, po ohó ylankan po, yè ni de e sọn mì dè po homẹkẹn lẹpo po ga,” wẹ Owe-wiwe dotuhomẹna mí dọ. (Efe. 4:31) Mí hia to Kọlọsinu lẹ 3:8 mẹ dọmọ: “Mì klọ́n ehe lẹpo dai ga, homẹgble, adi, homẹkẹn, nutlọ, po hogblo po sọn onù mìtọn mẹ.” Na taun tọn, hogbe he yin lilẹdo “nutlọ” to wefọ awe ehelẹ mẹ dlẹnalọdo hogbe awugblenamẹ, mẹdèpo kavi mẹzunzun tọn lẹ.

To egbehe, hodidọ whánsọmẹ tọn po hogbe agbàagba lẹ po gbayipe taun, etlẹ yin to whẹndo mẹ. Asu po asi po lẹ nọ yí hogbe kàunkàun, fifiẹ kavi winyandomẹ tọn lẹ zan na ode awetọ podọ na ovi yetọn lẹ. Hogbe awugblenamẹ tọn ehelẹ ma dona nọ yin sisè to owhé Klistiani tọn lẹ gbè.—1 Kọl. 5:11.

Afọdidona ‘Wiwe to Osi Jiwheyẹwhe Tọn mẹ’ Nọ Hẹn Dona Wá

Lẹblanulọkẹyi nankọ die nado sẹ̀n Jiwheyẹwhe wiwe lọ, Jehovah! (Jọṣ. 24:19) Paladisi gbigbọmẹ tọn he mẹ Jehovah hẹn mí wá họakuẹ tlala. Matin ayihaawe, walọ wiwe mítọn go hinhẹn to nukun Jehovah tọn mẹ wẹ aliho gbẹninọ tọn dagbe hugan lọ.

To madẹnmẹ, Paladisi aigba ji tọn he Jiwheyẹwhe dopagbe etọn na wá. (Isa. 35:1, 2, 5-7) Mẹhe to jijlo vẹkuvẹku nado nọ̀ e mẹ bosọ to afọdona jijọ-di-Jiwheyẹwhe lẹ na mọ otẹn yetọn to finẹ. (Isa. 65:17, 21) Enẹwutu, mahopọnna nudepope he e na biọ to mí si, mì gbọ mí ni zindonukọn nado to Jiwheyẹwhe sẹ̀n to ninọmẹ gbigbọmẹ tọn wiwe de mẹ bo hẹn haṣinṣan pẹkipẹki de go hẹ ẹ.

[Nudọnamẹ odò tọn]

[Yẹdide to weda 26]

Etẹwẹ yin bibiọ to Ju lẹ si nado sọgan zinzọnlin to “Aliho Walọ Wiwe tọn” ji?

[Yẹdide to weda 27]

Yẹdide fẹnnuwiwa tọn nọ hẹn haṣinṣan he mẹde tindo hẹ Jehovah gble

[Yẹdide to weda 28]

“Mì gbọ . . . nutlọ, po ohó ylankan po, yè ni de e sọn mì dè”