‘Mì Yin Wiwe to Walọyizan Mìtọn Lẹpo Mẹ’

“Le ewọ he ylọ mì yin wiwe do, mọwẹ mì ni yin wiwe do to owalọ alọpalọpa popo mẹ; na yè ko wlanwe etọn dọ, Mì na yin wiwe, na wiwe wẹ yẹn.”—1 PITA 1:15, 16.

1. Naegbọn Pita do na tuli Klistiani lẹ nado yin wiwe?

NAEGBỌN apọsteli Pita do namẹ ayinamẹ he tin to aga ehe? Na e mọ nuhudo lọ na Klistiani dopodopo nado họ́ linlẹn po afọdide etọn lẹ po nado sọgan hẹn yé tin to hukan ji hẹ wiwejininọ Jehovah tọn. Nalete, jẹnukọnna hogbe he tin to aga helẹ e dọmọ: “Mì bla gbaja otùnu mìtọn tọn gligli, mì yin huwhẹnọ . . . Di ovi tonusetọ, to ma yí mìde do dáṣa di wantuntun hohowhenu tọn to wunvi mìtọn mẹ.”—1 Pita 1:13, 14.

2. Naegbọn ojlo mítọn lẹ do yin mawé whẹpo mí do plọn nugbo lọ?

² Ojlo mítọn dai tọn lẹ yin mawé. Etẹwutu? Na suhugan mítọn hodo aliho nuyiwa aihọn tọn whẹpo mí do kẹalọyi nugbo Klistiani tọn. Pita yọ́n ehe to whenuena e wlan hezeheze dọmọ: “Na ogbẹ̀ whenu mítọn he juwayi nido pekọna mí, nado ko wazọ́n ojlo Kosi lẹ tọn, whenuena míwlẹ to zọnlinzin to wantuntun mẹ, nujijlo ylankan, ovẹnnu zẹjlẹgo, paṣadudu, ahangbẹ́dido, podọ to boṣiọsinsẹ̀n he ylanhu mẹ.” Na nugbo tọn, Pita ma basi todohukanji walọyizan mawé tọn lẹ he gando aihọn egbezangbe tọn mítọn go gba, to whenuena e yindọ yé ma yin yinyọnẹn to ojlẹ enẹ mẹ.—1 Pita 4:3, 4.

3, 4. (a) Nawẹ mí sọgan nọavùnte sọta ojlo ylankan gbọn? (b) Be Klistiani lẹ dona yin numọtolanmẹ matindo tọ́ wẹ ya? Basi zẹẹmẹ.

³ Be hiẹ doayi e go dọ nujlomẹ ehelẹ wẹ yin dehe nọ dọ̀n agbasalan, lẹnpọn lẹ, po numọtolanmẹ lẹ po dogo ya? To whenuena mí jotẹndona ehelẹ nado dugán, whenẹnu lẹnpọn mítọn po nuyiwa mítọn lẹ po na lẹzun mawé po awubibọ po. Ehe do nuhudo lọ hia nado dike huhlọn lẹnpọn tọn ni deanana afọdide mítọn lẹ. Paulu basi zẹẹmẹ etọn to aliho ehe mẹ dọmọ: “Enẹwutu yẹn yí lẹblanu Jiwheyẹwhe tọn lẹ do vẹ̀ mì, mẹmẹsunnu emi, dọ mì ni yí agbasa mìtọn do basi avọ́sannu ogbẹ̀nọ, wiwe, alọkẹyi hlan Jiwheyẹwhe, he yin sinsẹ̀n mìtọn gbigbọnọ.”—Lomunu lẹ 12:1, 2.

⁴ Nado ze avọ́sinsan wiwe de donukọnna Jiwheyẹwhe, mí dona dikena huhlọn lẹnpọn tọn ni dugán, e ma yin numọtolanmẹ lẹ gba. Lehe mẹsusu ko doalọ to fẹnnuwiwa mẹ do sọ na yé jotẹndona numọtolanmẹ yetọn lẹ ni deanana walọyizan yetọn! Enẹ ma dohia dọ mí dona hù numọtolanmẹ mítọn lẹ gba; eyin mọwẹ, nawẹ mí sọgan do ayajẹ hia to sinsẹ̀nzọn Jehovah tọn mẹ gbọn? Etomọṣo, eyin mí jlo nado dè sinsẹ̀n gbigbọ tọn tọ́n kakati nido yin azọ́n agbasalan tọn, to whelọnu lo mí dona lilẹ́ ayiha mítọn lẹ hlan aliho nulẹnpọn Klisti tọn.—Galatianu lẹ 5:22, 23; Filippinu lẹ 2:5.

Gbẹzan Wiwe, Ahọ́ Wiwe

5. Naegbọn Pita do yin ahunmẹduna gando nuhudo wiwejininọ tọn go?

⁵ Naegbọn Pita do tin to lẹnpọn mẹ sọmọ na nuhudo wiwejininọ Klistiani tọn? Na e yọ́n ahọ́ wiwe he ko yin nina lọ ganji nado fli gbẹtọvi tonusetọ lẹ gọ̀. E wlan dọmọ: “Mì yọnẹn dọ, yè ma yí nugbigble do fli mì gba, di fataka po sika po, sọn owalọ vọ́ mìtọn mẹ, he mì yí gbọn otanhoho lẹ dali sọn otọ́ mìtọn lẹ de; adavo ohùn Klisti tọn akuẹgegenu, di lẹngbọvu he matin apà go tọn, podọ matin dihó.” (1 Pita 1:18, 19) Mọwẹ, Asisa wiwejininọ tọn lọ, Jehovah Jiwheyẹwhe, ko do Visunnu detọn dopo akàn etọn lọ hlan, yèdọ ‘Mẹwiwe lọ,’ hlan aigba ji nado sú ofligọ he na na dotẹnmẹ gbẹtọ lẹ nado tindo haṣinṣan dagbe de hẹ Jiwheyẹwhe.—Johanu 3:16; 6:69; Eksọdusi 28:36; Matiu 20:28.

6. (a) Naegbọn e mado bọawu na mí nado doafọna walọyizan wiwe? (b) Etẹwẹ sọgan gọalọna mí nado hẹn walọyizan mítọn do wiwe ji?

⁶ Etomọṣo, mí dona yọnẹn dọ e ma bọawu nado zan gbẹzan wiwe de to whenuena mí tin to aihọn gbigble Satani tọn ṣẹnṣẹn gba. E nọ dó omọ̀ na Klistiani nugbo lẹ, he to tintẹnpọn nado lùn titonu etọn lẹ tọ́n. (Efesunu lẹ 6:12; 1 Timoti 6:9, 10) Kọgbidinamẹnu agbasazọ́n tọn, nukundiọsọmẹ whẹndo tọn, mẹṣanko wehọmẹ, po kọgbidinamẹnu ogbẹ́ tọn lẹ po hẹn ninọmẹ gbigbọmẹ tọn he lodo yin onú titengbe na mẹde nado sọgan hẹn wiwejininọ go. Enẹ zinnudo otẹn sinsinyẹn oplọn mẹdetiti tọn mítọn po opli Klistiani tọn mítọn lẹ yìyì to gbesisọmẹ po ji. Paulu na ayinamẹ Timoti dọmọ: “Hẹn ohia ohó tọn he pegan lọ go gligli, ehe hiẹ ko sè to dee, to yise po owanyi po mẹ, he tin to Klisti Jesu mẹ.” (2 Timoti 1:13) Mí nọ sè hogbe he nọ namẹ agbasalilo mọnkọtọn lẹ to Plitẹnhọ Ahọluduta Tọn mítọn lẹ mẹ podọ to oplọn Biblu mẹdetiti tọn mítọn lẹ mẹ. Yé sọgan gọalọna mí nado yin wiwe to walọyizan mítọn egbesọegbesọ tọn mẹ to aliho voovo lẹ mẹ.

Walọ Wiwe to Whẹndo Mẹ

7. Nawẹ wiwejininọ dona yinuwa do gbẹzan whẹndo mítọn tọn ji gbọn?

⁷ To whenuena Pita yihodọ sọn Levitiku 11:44 mẹ, e yí hogbe Glẹki tọn lọ haʹgi·os, ehe zẹẹmẹdo, “klan sọn ylando go podọ to enẹgodo klandowiwe hlan Jiwheyẹwhe, wiwe.” (An Expository Dictionary of New Testament Words, gbọn W. E. Vine dali.) Nawẹ ehe dona gando mí go to gbẹzan whẹndo mítọn tọn mẹ gbọn? Na nugbo tọn e dona zẹẹmẹdo dọ gbẹzan whẹndo Klistiani mítọn tọn dona sinai do owanyi ji, na “Jiwheyẹwhe wẹ owanyi.” (1 Johanu 4:8) Owanyi mẹde-yido-sanvọ́ tọn wẹ amì lọ he nọ dídí haṣinṣan to alọwlemẹ lẹ ṣẹnṣẹn podọ to mẹjitọ lẹ po ovi lẹ po ṣẹnṣẹn.—1 Kọlintinu lẹ 13:4-8; Efesunu lẹ 5:28, 29, 33; 6:4; Kọlọsinu lẹ 3:18, 21.

8, 9. (a) Ninọmẹ tẹlẹ wẹ nọ sọawuhia to whedelẹnu to owhé Klistiani tọn de gbè? (b) Ayinamẹ he họali tẹwẹ Biblu namẹ do whẹho ehe ji?

⁸ Mí sọgan lẹndọ owanyi mọnkọtọn didohia na yin nuhe nọ wá na ede to whẹndo Klistiani tọn de mẹ. Ṣogan, e dona yin alọkẹyi dọ owanyi ma nọ saba gbayipe jẹ obá he mẹ e dona jẹ to owhé Klistiani delẹ tọn gbè gba. E sọgan gbayipe to Plitẹnhọ Ahọluduta Tọn mẹ, ṣigba lehe wiwejininọ mítọn na depò po awubibọ po to whégbè do. Enẹgodo mí sọgan wọnji bleun dọ asi lọ gbẹ́ pò to mẹmẹyọnnu Klistiani mítọn tọn yin kavi dọ asu lọ gbẹ́ pò to mẹmẹsunnu dopolọ yin (podọ vlavo devizọnwatọ lizọnyizọnwiwa tọn kavi mẹho de) he sọawuhia nado nọ yin nina osi to Plitẹnhọ Ahọluduta Tọn mẹ. Adi sọgan do mí, bọ nudindọn sinsinyẹn lẹ sọgan fọndote. Nujinọtedo awe sọgan sà biọ gbẹzan mítọn lẹ mẹ. E ma sọ yin haṣinṣan asu po asi po heyin jijọ-di-Klisti tọn ba ṣigba sunnu po yọnnu po he tin to nudindọn mẹ. Yé wọnji e go dọ lẹdo wiwe de dona tin to owhé lọ gbè. Vlavo yé jẹ gbèdána yedelẹ ji taidi aihọnmẹnu lẹ. Lehe hogbe he kudiho, awugblenamẹ tọn sọgan gbọnmọ tọ́n sọn onù mẹ po awubibọ po do sọ!—Howhinwhẹn lẹ 12:18; yijlẹdo Owalọ lẹ 15:37-39 go.

⁹ Ṣigba, Paulu na ayinamẹ dọmọ: “Mì dike hogbe gbigble (Glẹki, loʹgos sa·prosʹ, “hogbe dihonọ,” he yin mawé] de tọ́n sọn onù mìtọn mẹ blo, ṣigba ehe yọ́n zinzan na dido daga, dile onú te do, na e nido wazọ́n ojọmiọn tọn hlan mẹhe sè lẹ.” Podọ enẹ dlẹnalọdo sisètọ whégbè tọn lẹpo, gọna ovi lẹ.—Efesunu lẹ 4:29; Jakobu 3:8-10.

10. Nawẹ ayinamẹ wiwejininọ tọn gando ovi lẹ go gbọn?

¹⁰ Humọ anademẹ do wiwejininọ ji ehe sọ gando ovi lẹ go to whẹndo Klistiani tọn mẹ ga. Lehe e na bọawu na yé do sọ nado lẹkọ sọn wehọmẹ bo jẹ apajlẹ atẹṣiṣi po hodidọ osi matindo ogbẹ́ aihọn mẹ yetọn lẹ tọn hodo ji! Mì ovi lẹ emi, mì ma yin dindọn gbọn jọja walọ gbíngbánnọ lẹ he ṣàn yẹwhegan Jehovah tọn kò podọ he nọ dọ onú agbàagba, nuzinzan he yin onú dopolọ to egbehe blo. (2 Ahọlu lẹ 2:23, 24) Hogbe towe ma dona yin hinhẹnflu gbọn hogbe dihonọ gbẹtọ heyin adidọnọ hugan kavi he ma tindo lẹnpọn depope nado yí hogbe he wé zan lẹ dali. Taidi Klistiani lẹ, hogbe mítọn lẹ dona wé, dọnmẹdogo, jlọmẹdote, jọmẹ, podọ “ehe mẹ ojẹ̀ pe.” E dona do mí hia taidi mẹhe gbọnvo na gbẹtọ devo lẹ.—Kọlọsinu lẹ 3:8-10; 4:6.

Wiwenọ-yinyin po Hagbẹ Whẹndo Mayisenọ Mítọn lẹ Po

11. Naegbọn wiwejininọ ma do zẹẹmẹdo dodonọ-yinyin zẹjlẹgo?

¹¹ To whenuena mí dovivẹnu vẹkuvẹku nado tin to wiwe ji, mí ma dona sọawuhia nado yin awagundotọ po dodonọ zẹjlẹgo po gba, titengbe to whenuena mí to nuyiwa hẹ hagbẹ mayisenọ whẹndo tọn lẹ. Walọyizan he jọmẹ Klistiani tọn mítọn lẹ tata dona gọalọna yé nado mọ dọ mí gbọnvo to aliho dagbe de mẹ, dọ mí yọ́n lehe owanyi po awuvẹmẹ po sọgan yin didohia do, yèdọ dile mẹjọmẹ Samalianu lọ basi to oló Jesu tọn mẹ do.—Luku 10:30-37.

12. Nawẹ Klistiani asu po asi po lẹ sọgan hẹn nugbo lọ dọnmẹdogo hlan alọwlemẹ yetọn lẹ gbọn?

¹² Pita zinnudo nujọnu-yinyin walọyizan dagbe tọn hlan hagbẹ mayisenọ whẹndo mítọn lẹ tọn to whenuena e kanwe hlan asi Klistiani lẹ dọmọ: “Mọkẹdẹ wẹ mì asi lẹ ni nọ yin mẹmẹglọ hlan asu mìtọn titi lẹ; na, eyin mẹde ma yí ohó lọ sè, yè nido dọ̀n yé gbọn owalọ asi lẹ tọn dali, matin ohó lọ; whenuena yé to owalọ wiwe mìtọn po osi po pọ́n.” Asi Klistiani de (kavi asu depope he e sọgan yin) sọgan hẹn nugbo lọ dọnmẹdogo hlan alọwlemẹ mayisenọ de eyin walọ etọn wé, yin mẹtọnhopọn tọn, po sisi tọn po. Ehe dohia dọ adadidiọ dona tin to todohukanji yẹwhehọluduta tọn mẹ na alọwlemẹ mayisenọ lọ ma nado yin nuyiwahẹ agọ̀ kavi yin gbigbẹkọ e go gba.a—1 Pita 3:1, 2.

13. Nawẹ mẹho lẹ po devizọnwatọ lizọnyizọnwiwa tọn lẹ po sọgan gọalọna asu mayisenọ lẹ to whedelẹnu nado yọ́n pinpẹn nugbo lọ tọn gbọn?

¹³ Mẹho lẹ po devizọnwatọ lizọnyizọnwiwa tọn lẹ po sọgan gọalọ to whedelẹnu gbọn jijẹakọ hẹ asu mayisenọ lọ gbọn họntọnjihẹmẹ dali. To aliho ehe mẹ e sọgan mọnukunnujẹemẹ dọ Kunnudetọ lẹ jọmẹ, gbẹtọ he wé po ojlo he gblo de po, gọna hosọ he gbọnvona Biblu tọn lẹ. To whẹho de mẹ, mẹho de tindo ojlo to whèhùhù he asu de yiwanna hugan mẹ. Enẹ wazọ́n nado sú nùvo he tin to ṣẹnṣẹn yetọn dai lọ. Asu enẹ lẹzun mẹmẹsunnu he yí baptẹm de to godomẹ. To whẹho devo mẹ, asu mayisenọ de tindo ojlo to alọẹ lẹ mẹ. Mẹho lọ lẹ ma gbọjọ gba. Dopo to yé mẹ plọnnu dogbọn alọẹ lẹ dali na e nido sọgan bẹ hodọdopọ jẹeji do alọẹ he asu enẹ yiwanna hugan ji, to ojlẹ devo mẹ he e dukosọ hẹ ẹ! Enẹwutu, wiwenọ-yinyin, ma zẹẹmẹdo egblemakunọ-yinyin kavi ayiha hẹngogo tọn tintindo gba.—1 Kọlintinu lẹ 9:20-23.

Nawẹ Mí Sọgan Yin Wiwe to Agun mẹ Gbọn?

14. (a) Etẹwẹ yin dopo to aliho nuyiwa Satani tọn lẹ mẹ nado gbà agun lọ kija? (b) Nawẹ mí sọgan nọavunte sọta omọ̀ Satani tọn lẹ gbọn?

¹⁴ Mẹhẹngbletọ wẹ Satani Lẹgba yin, na yinkọ Glẹki tọn lọ na Lẹgba, di·aʹbo·los, zẹẹmẹdo “whẹgbledomẹtọ” kavi “mẹhẹngbletọ.” Mẹhẹngble yin dopo to nuwiwa etọn lẹ mẹ, podọ e nọ tẹnpọn nado yí i zan to agun mẹ. Aliho nuwiwa tọn he e yiwanna hugan wẹ yin mẹnudidọ. Be mí nọ jotẹnna mídelẹ nado yin kanlinmọ etọn lẹ to walọyizan mawé ehe tọn mẹ wẹ ya? Nawẹ enẹ sọgan jọ gbọn? Gbọn mẹnudidọ bibẹjẹeji, gbọn vivọ́ ẹ dọ, kavi gbọn todoai hlan ẹn dali. Howhinwhẹn nuyọnẹn tọn lọ dọmọ: “Gbẹtọ yẹwatọ do avùn dai: [mẹhẹngbletọ, NW ] sọ klan họntọn do ovò.” (Howhinwhẹn lẹ 16:28) Etẹwẹ yin amasin pọngbọ tọn lọ na mẹnudidọ po mẹhẹngble po? Mí dona hẹn ẹn diun dọ hogbe mítọn lẹ nọ saba jlọmẹdote bo sinai do owanyi ji. Eyin mí din jijọ dagbe kakati nido yin nuhe mí lẹn nado yin awugbopo mẹmẹsunnu mítọn lẹ tọn, hodọdopọ mítọn lẹ na nọ saba dọnmẹdogo bo yin gbigbọmẹ tọn. Flin dọ homọdọdomẹgo bọawu. Podọ mẹhe nọ dọ onú mẹdevo lẹ tọn na we sọgan sọ dọ onú hiẹ lọsu tọn na mẹdevo lẹ ga!—1 Timoti 5:13; Titu 2:3.

15. Jẹhẹnu jijọ-di-Klisti tọn tẹlẹ wẹ na gọalọna mí nado hẹn mẹhe tin to agun lọ mẹ lẹpo do wiweji?

¹⁵ Nado sọgan hẹn agun lọ do wiweji, mímẹpo dona tindo ayiha Klisti tọn, podọ mí yọnẹn dọ jẹhẹnu yiaga hugan etọn wẹ owanyi. Nalete, Paulu na ayinamẹ Kọlọsinu lẹ nado yin awuvẹmẹtọ taidi Klisti bo dọmọ: “Enẹwutu, di mẹṣinṣinyan Jiwheyẹwhe tọn, mẹwiwe, mẹyiwanna, mì ze lẹblanu homẹ tọn, odagbewa, huwhẹ, walọmimiọn, po linsinsinyẹn po dogo . . . , mì nọ jona mìnọzo . . . Otado onú helẹ po tọn, mì ze owanyi dogo, ehe yin pọninọ gbesisọ tọn.” Enẹgodo e yidogọ dọmọ: “Mì sọ gbọ jijọho [Klisti, NW ] tọn ni dugán to ayiha mìtọn mẹ.” Na jide tọn po gbigbọ jonamẹ ehe tọn tintindo po, mí sọgan hẹn kọndopọ po wiwejininọ agun lọ tọn po go.—Kọlọsinu lẹ 3:12-15.

Be Wiwejininọ Mítọn Nọ Sọawuhia to Okọ́ Mítọn mẹ Ya?

16. Naegbọn sinsẹ̀n-bibasi wiwe mítọn dona yin sinsẹ̀n-bibasi ayajẹ tọn de?

¹⁶ Etẹwẹ dogbọn kọmẹnu mítọn lẹ dali? Nukun tẹwẹ yé do nọ pọ́n mí? Be mí nọ do ayajẹ nugbo tọn hia, kavi mí nọ hẹn ẹn sọawuhia taidi agbanpẹnmẹnu de wẹ ya? Eyin mí yin wiwe dile Jehovah yin wiwe do, to whelọnu lo e dona sọawuhia to hodidọ mítọn lẹ mẹ podọ to walọyizan mítọn lẹ mẹ. E dona họnwun dọ sinsẹ̀n-bibasi wiwe mítọn yin sinsẹ̀n-bibasi ayajẹ tọn de. Naegbọn e do yinmọ? Na Jehovah Jiwheyẹwhe mítọn yin Jiwheyẹwhe ayajẹ tọn de, he nọ jlo dọ sinsẹ̀n-basitọ etọn lẹ ni yin ayajẹnọ. Gbọnmọ dali, psalmkantọ lọ sọgan dọ dogbọn omẹ Jehovah tọn lẹ to ojlẹ hohowhenu tọn mẹ dali dọmọ: “Donanọ wẹ omẹ nẹlẹ, Jiwheyẹwhe mẹhetọn Oklunọ yin.” Be mí nọ do ayajẹ enẹ hia ya? Be ovi mítọn lẹ lọsu nọ do pekọnọ-yinyin hia to tintin to omẹ Jehovah tọn lẹ ṣẹnṣẹn to Plitẹnhọ Ahọluduta Tọn mẹ podọ to plidopọ lẹ tẹnmẹ ya?—Psalm 89:15, 16; 144:15b.

17. Etẹwẹ mí sọgan wà to aliho yọn-na-yizan tọn de mẹ nado do wiwejininọ jlẹkaji tọn hia?

¹⁷ Mí sọgan sọ do jlẹkajininọ hia to wiwejininọ mítọn mẹ gbọn gbigbọ gbekọndopọ mítọn po walọ dagbe didohia kọmẹnu mítọn lẹ po dali. To whedelẹnu e nọ yin dandannu na kọmẹnu lẹ nado wazọ́n dopọ, vlavo nado zà lẹdo lọ mẹ kavi, dile e tedo to otò delẹ mẹ, nado gọalọ do jla aliho lẹ po alihogboji lẹ po do. To pọndohlan ehe mẹ, wiwenọ-yinyin mítọn sọgan sọawuhia to aliho he mẹ mí nọ penukundo ogle, kọho, kavi nutindo mítọn devo lẹ go do ga. Eyin mí jó ogbó lẹ do aigba, kavi tindo kọho he kudiho kavi he to hànyàn de, vlavo etlẹ yin po zòkẹkẹ gbigble lẹ po to fie aligbọntọ lẹ sọgan mọ ẹn te, be mí sọgan dọ dọ mí to nuyiwa hẹ kọmẹnu mítọn lẹ po sisi po ya?—Osọhia 11:18.

Wiwenọ-yinyin to Azọ́nmẹ Podọ to Wehọmẹ

18. (a) Ninọmẹ sinsinyẹn tẹwẹ tin na Klistiani lẹ to egbehe? (b) Nawẹ mí sọgan gbọnvona aihọn lọ gbọn?

¹⁸ Apọsteli Paulu kanwe hlan Klistiani he tin to otò mawé Kọlinti tọn mẹ lẹ dọmọ: “Yẹn wlanwe hlan mì to episteli de mẹ ma nado dogbẹ́ hẹ ogalọtọ lẹ: ganṣo e ma yin hẹ ogalọtọ aihọn he tọn lẹpo patapata gba, hẹ nukunkẹnnọ lẹ, kavi alọslonamẹtọ lẹ, kavi hẹ boṣiọsẹntọ lẹ; na whenẹnu mì do na yì sọn aihọn mẹ.” (1 Kọlintinu lẹ 5:9, 10) Ninọmẹ sinsinyẹn de wẹ ehe yin na Klistiani lẹ, he dona nọpọ po gbẹtọ mawé lẹ po kavi mẹhe ma tindo numọtolanmẹ depope na walọyizan dagbe egbesọegbesọ tọn lẹ. Whlepọn tenọgligo-hinhẹn sinsinyẹn de wẹ ehe yin, titengbe to lẹdo delẹ mẹ fie tukladomẹ zanhẹmẹ tọn, walọ gblezọn, po nugbomadọ po yin tulina kavi yin alọkẹyi te. To lẹdo ehelẹ mẹ mí ma sọgan hẹn nujinọtedo mítọn lẹ wà odò nado sọgan sọawuhia di “mẹjọmẹ” hlan mẹhe lẹdo mí lẹ gba. Kakatimọ, walọ Klistiani tọn mítọn he gbọnvo he yin mẹjọmẹ tọn dona hẹn mí yin gbẹtọ ayidego tọn hlan gbẹtọ wuntuntunnọ, hlan mẹhe yọ́n nuhudo gbigbọmẹ tọn yetọn podọ he to nuhe yọ́n hugan de din lẹ.—Matiu 5:3; 1 Pita 3:16, 17.

19. (a) Whlepọn tẹlẹ wẹ mì ovi lẹ nọ tindo to wehọmẹ? (b) Etẹwẹ mẹjitọ lẹ sọgan wà nado nọgodona ovi yetọn lẹ po walọyizan wiwe yetọn po?

¹⁹ Mọdopolọ, whlepọn susu lẹ tin he to pinpannukọn ovi mítọn lẹ to wehọmẹ. Be mì mẹjitọ lẹ nọ dla wehọmẹ he ovi mìtọn lẹ nọ yì pọ́n ya? Be mì yọ́n wunmẹ gbigbọ he gbayipe to finẹ ya? Be mì jẹakọ hẹ mẹplọntọ lọ lẹ ya? Naegbọn kanbiọ ehelẹ do yin onú titengbe? Na to susu nọtẹn he hùnnukun to aihọn lọ mẹ lẹ, wehọmẹ lẹ ko lẹzun agblò danuwiwa, amasin-adínọ lẹ, po zanhẹmẹ tọn lẹ po. Nawẹ ovi mìtọn lẹ sọgan hẹn tenọgli yetọn go bo hẹn walọyizan yetọn lẹ do wiweji do eyin yé ma mọ godonọnamẹ awuvẹmẹ tọn heyin mẹjitọ yetọn lẹ tọn gbọn? Po jlọjẹ po Paulu na ayinamẹ mẹjitọ lẹ dọmọ: “Mì otọ́ lẹ, mì hẹn homẹgblena ovi mìtọn lẹ blo, na yé nikaa gblehomẹ.” (Kọlọsinu lẹ 3:21) Aliho dopo nado hẹn homẹgble ovi lẹ wẹ nado gboawupo nado mọnukunnujẹ nuhahun po whlepọn egbesọegbesọ tọn yetọn lẹ po mẹ. Awuwiwlena whlepọn lẹ to wehọmẹ nọ bẹjẹeji to lẹdo gbigbọnọ owhé Klistiani tọn de gbè.—Deutelonomi 6:6-9; Howhinwhẹn lẹ 22:⁠6.

20. Naegbọn wiwejininọ do yin onú titengbe na mímẹpo?

²⁰ To tadona mẹ, naegbọn wiwejininọ do yin onú titengbe na mímẹpo? Na e nọ yinuwa taidi hihọ́ de sọta mẹgbeyinyan aihọn Satani tọn po lẹnpọn etọn lẹ po. Dona de wẹ e yin todin bo nasọ yin to sọgodo. E nọ gọalọna mí nado tindo jide to ogbẹ̀ he na yin ogbẹ̀ nujọnu tọn to aihọn yọyọ dodowiwa tọn de mẹ. E nọ gọalọna mí nado tin to jlẹkaji, mẹhe yọ́n dọnsẹpọ, Klistiani hodọdopọtọ lẹ—e ma yin hẹngogo egblemakunọ lẹ gba. Do glido, e nọ hẹn mí nado tindo jijọ-di-Klisti tọn.—1 Timoti 6:19.

[Nudọnamẹ odò tọn]

Be Hiẹ Flin Ya?

◻ Naegbọn Pita mọ nuhudo lọ nado na ayinamẹ Klistiani lẹ do wiwejininọ ji?

◻ Naegbọn e mado bọawu nado zan gbẹzan wiwe de?

◻ Etẹwẹ mímẹpo sọgan wà nado hẹn wiwejininọ go to whẹndo mẹ?

◻ Na agun lọ nido gbọṣi wiwe ji, walọyizan mawé tọn tẹwẹ mí dona dapana?

◻ Nawẹ mí sọgan gbọṣi wiwe ji to azọ́n mẹ podọ to wehọmẹ gbọn?

[Yẹdide to weda 26, 27]

Taidi Kunnudetọ Jehovah Tọn lẹ, mí dona yin ayajẹnọ to sinsẹ̀nzọn wiwà hlan Jiwheyẹwhe podọ to nuwiwa devo lẹ mẹ