Lehe Hagbẹ Anademẹtọ lọ Yin Tito-Basina Do — WESẸDOTẸN INTẸNẸT JI TỌN Watchtower Tọn

Lehe Hagbẹ Anademẹtọ lọ Yin Tito-Basina Do

HAGBẸ Anademẹtọ Kunnudetọ Jehovah tọn lẹ tọn bẹ sunnu he yin devizọnwatọ yiamisisadode Jiwheyẹwhe tọn he ko klan yede do wiwe delẹ hẹn. Yé nọ yinuwa taidi afọzedaitọ pipli afanumẹ nugbonọ nuyọnẹntọ lọ tọn, he tindo azọngban lọ nado wleawuna núdùdù gbigbọmẹ tọn bo na anademẹ bosọ hẹn ẹn diun dọ azọ́n yẹwhehodidọ Ahọluduta lọ tọn to yinyin wiwà lẹdo aihọn pé.—Mat. 24:14, 45-47.

Hagbẹ Anademẹtọ lọ nọ pli to sẹmẹsẹmẹ, to paa mẹ to mercredi lẹ. Ehe nọ gọalọna mẹmẹsunnu ehelẹ nado wazọ́n to kọndopọ mẹ. (Ps. 133:1) Mẹhe tin to Hagbẹ Anademẹtọ lọ mẹ lẹ sọ nọ wazọ́n to wedegbẹ́ voovo lẹ mẹ. Nado sọgan penukundo onú Ahọluduta lọ tọn lẹ go, wedegbẹ́ dopodopo nọ penukundo adà azọ́n Kunnudetọ Jehovah tọn lẹ tọn de go, dile e yin nùdego do to kleun mẹ to odò.

◼ WEDEGBẸ́ AZINPONỌ TỌN: Wedegbẹ́ ehe bẹ azinponọ wedegbẹ́ Hagbẹ Anademẹtọ lọ tọn dopodopo tọn hẹn gọna wekantọ de he ewọ lọsu yin dopo to Hagbẹ Anademẹtọ lọ mẹ. Wedegbẹ́ ehe nọ hẹn ẹn diun dọ azọ́n wedegbẹ́ lọ lẹpo tọn to yìyì linsinlinsin dile e jẹ do. E sọ nọ penukundo nujijọ madonukun, homẹkẹn, nugbajẹmẹji, po whẹho niyaniya tọn devo he gando Kunnudetọ Jehovah tọn lẹ go lẹdo aihọn pé lẹ po go.

◼ WEDEGBẸ́ MẸPINPLỌN TỌN: Wedegbẹ́ ehe nọ penukundo nuplọnmẹ he mí nọ mọyi to plidopọ lẹ po opli agun tọn lẹ po ji go. E nọ wleawuna tito-to-whinnu gbigbọmẹ tọn lẹ na hagbẹ whẹndo Bẹtẹli tọn lẹ, bo nọ penukundo wehọmẹ voovo lẹ go, taidi Wehọmẹ Giliadi tọn po Wehọmẹ Sinsẹ̀nzọn Gbehosọnalitọ tọn po, bosọ nọ wleawuna tito-to-whinnu hoyidokanji po video po tọn lẹ.

◼ WEDEGBẸ́ NUKUNPEDOMẸGO TỌN: Mẹmẹsunnu he tin to wedegbẹ́ ehe mẹ lẹ yin azọ́ndena nado penukundo tito he gando dagbemẹninọ hagbẹ whẹndo Bẹtẹli tọn lẹ go to agbasa-liho podọ to gbigbọ-liho lẹdo aihọn pé. Wedegbẹ́ ehe wẹ nọ deanana aliho he mẹ hagbẹ yọyọ whẹndo Bẹtẹli tọn lẹ nọ yin dide bo nọ yin oylọ-basina te bosọ nọ didẹ whẹho he gando sinsẹ̀nzọn yetọn to Bẹtẹli go lẹ.

◼ WEDEGBẸ́ SINSẸ̀NZỌN TỌN: Mẹhe tin to wedegbẹ́ ehe mẹ lẹ nọ deanana azọ́n yẹwhehodidọ tọn lọ po whẹho he gando agun, gbehosọnalitọ, mẹho po nugopọntọ tomẹyitọ lẹ po go. E nọ penukundo awuwiwlena Lizọnyizọn Ahọluduta Tọn Mítọn go bo nọ basi oylọna nuplọntọ Wehọmẹ Giliadi tọn po Wehọmẹ Azọ́nplọnmẹ Devizọnwiwa tọn po tọn lẹ bosọ nọ deazọ́nna yé to gbedewema yíyí godo.

◼ WEDEGBẸ́ WEKINKAN TỌN: Azọngban wedegbẹ́ ehe tọn wẹ nado hẹn ẹn diun dọ núdùdù gbigbọmẹ tọn lọ yin awuwlena do owe lẹ mẹ bo yin didohlan yisenọ hatọ lẹ po gbonutọ lẹ po. Wedegbẹ́ ehe nọ na gblọndo kanbiọ he yin kinkanse do Biblu ji lẹ tọn bo nọ na gbèta godo tọn gando owe nupinpọn-do-plọnnu tọn lẹ po todohukanji togunmẹho tọn lẹ po go. E sọ nọ deanana azọ́n lẹdogbedevomẹ tọn he to yinyin wiwà lẹdo aihọn pé.

◼ WEDEGBẸ́ WEZINJẸGBONU TỌN: Wedegbẹ́ ehe nọ deanana zinjẹgbonu, didetọn po didohlan owe sinai do Biblu ji lẹ tọn po lẹdo aihọn pé. Ewọ wẹ nọ penukundo wezintẹn lẹ po nutindo he pipli voovo Kunnudetọ Jehovah tọn lẹ nọ yizan lẹ po go. Wedegbẹ́ ehe nọ basi tito nado yí akuẹ he yin nina do azọ́n lẹdo aihọn pé Ahọluduta lọ tọn tamẹ lẹ zan to aliho dagbe hugan mẹ.

Apọsteli Paulu yí agun mẹyiamisisadode lẹ tọn jlẹdo agbasa gbẹtọ de tọn go bo zinnudo otẹn tangan he mẹ hagbẹ lọ lẹpo tin te ji gọna aliho he mẹ yé nọ ganjẹ ode awetọ go te, bo nọ yiwanna yenọzo bosọ nọ kọngbedopọ to azọ́n he Jiwheyẹwhe dena yé wiwà mẹ. (Lom. 12:4, 5; 1 Kọl. 12:12-31) Jesu Klisti he yin Ota lọ nọ na hagbẹ agbasa lọ tọn lẹ nuhe yé tindo nuhudo etọn na gbekọndopọ po anadenanu dagbe po nido tin, podọ nado mọ núdùdù gbigbọmẹ tọn yí. (Efe. 4:15, 16; Kọl. 2:19) Gbọnmọ dali, Hagbẹ Anademẹtọ lọ yin tito-basina nado yin nukọntọ dile Jehovah to anadena yé gbọn gbigbọ wiwe etọn gblamẹ.