Pọninọ to Owanyi mẹ—Linlin Opli Whemẹwhemẹ Tọn — WESẸDOTẸN INTẸNẸT JI TỌN Watchtower Tọn

Pọninọ to Owanyi mẹ—Linlin Opli Whemẹwhemẹ Tọn

MẸHE pli to Plitẹnhọ Plidopọ Kunnudetọ Jehovah Tọn lẹ tọn mẹ to Jersey City, New Jersey, to États-Unis lẹ gọ́ na ayajẹ nado tin to finẹ. To 3 octobre 2009 afọnnu, gbẹtọ he hugan 5000 wẹ pli dopọ na opli whemẹwhemẹ tọn sọha 125tọ Watch Tower Bible and Tract Society of Pennsylvania tọn. Gbẹtọ fọtọ́n devo lẹ dotoaina tito-to-whinnu lọ to ladio ji kavi pọ́n ẹn to televiziọn ji to owhe Bẹtẹli tọn lẹ gbè to États-Unis po Canada po. To pọmẹ, gbẹtọ 13235 he hẹn pọninọ go to owanyi mẹ lẹ duvivi opli gànhiho atọ̀n tọn ehe.

Geoffrey Jackson he yin dopo to Hagbẹ Anademẹtọ lọ mẹ wẹ yin azinponọ to gbenẹgbe. E basi oylọna pipli mẹhe nọ wazọ́n to Bẹtẹli lẹ tọn de nado jihàn sọn ohanwe yọyọ lọ mẹ nado bẹ tito-to-whinnu lọ jẹeji. David Splane he yin dopo to Hagbẹ Anademẹtọ lọ mẹ wẹ deanana pipli hànjitọ lẹ tọn lọ, podọ e dọho to kleun mẹ do nujọnu-yinyin ohàn tọn to sinsẹ̀n-bibasi wiwe mẹ ji. E yin bibiọ to mẹplidopọ lẹ si nado jihàn yọyọ atọ̀n to opli lọ whenu; pipli hànjitọ lẹ tọn lọ wẹ nọ jihàn lọ jẹnukọn, podọ to enẹgodo pipli hànjitọ lẹ tọn lọ po mẹplidopọ lẹ po nọ jihàn lọ dopọ. Pipli hànjitọ lẹ tọn de yin yiyizan na pipli vonọtaun ehe kẹdẹ, e ma dona yin yiyizan taidi apajlẹ de na opli agun tọn lẹ, plidopọ lẹdo tọn, kavi agbegbe tọn he na bọdego lẹ gba.

Linlin sọn Alahọ lẹ Mẹ

Hagbẹ Wedegbẹ́ Alahọ tọn he wá lẹ na linlin alahọ voovo atọ́n tọn. Kenneth Little dọ dọ to madẹnmẹ alahọ Canada tọn wẹ na nọ zín suhugan linlinnamẹwe lẹ tọn jẹgbonu na États-Unis po Canada po, ehe dohia dọ alahọ lọ na nọ zín owe jẹgbonu whla ao hugan dai tọn. Nado jẹ yanwle ehe kọ̀n, maṣinu wezinzin tọn yọyọ de na nọ wazọ́n na gànhiho 16 to gbèdopo bọ azọ́nwatọ lẹ na nọ diọ yede to gànhiho 8 godo.

Reiner Thompson na linlin do azọ́n Ahọluduta tọn to République Dominicaine ji, podọ Albert Olih basi zẹẹmẹ do azọ́n mítọn to Nigéria ji. Emile Kritzinger sọn Mozambique basi zẹẹmẹ dọ to homẹkẹn glọ ninọ to finẹ na owhe susu godo, Kunnudetọ Jehovah tọn lẹ wá yin alọkẹyi sọgbe hẹ osẹ́n to 1992. Otò atọ̀n lọ lẹpo wẹ tindo jideji daho to sọha wẹnlatọ lẹ tọn mẹ to agọe. Viv Mouritz sọn alahọ Australie tọn mẹ dọ jideji azọ́n lọ tọn to Timor oriental, ehe nọ yin nukunpedego gbọn mẹmẹsunnu he tin to Australie lẹ dali.

Wedegbẹ́ Hagbẹ Anademẹtọ Tọn Lẹ

Bẹsọn 1976, azọ́n Kunnudetọ Jehovah tọn lẹ tọn nọ yin nukunpedego gbọn wedegbẹ́ ṣidopo he Hagbẹ Anademẹtọ lọ zedai lẹ dali. To nukọn mẹ, gbẹtọ lẹ nọ yin pipà sọn lẹngbọ devo lẹ mẹ nado gọalọ. To alọnu din, gbẹtọ 23 wẹ nọ gọalọ to azọ́n he to yinyin wiwà lọ mẹ. Yé omẹ ṣidopo wẹ yin hokanse. To lẹndopọ mẹ, yé wà sinsẹ̀nzọn whenu-gigọ́ tọn na owhe 341—ehe madozẹnzẹn etọn yin owhe 57.

Don Adams, he wá Bẹtẹli to 1943 basi zẹẹmẹ dọ Wedegbẹ́ Anadenanutọ tọn bẹ anadenanutọ wedegbẹ́ atọ́n devo lẹ tọn hẹn, podọ yé nọ hẹn ẹn diun dọ azọ́n wedegbẹ́ atọ́n devo lọ lẹpo tọn to yìyì dile e jẹ do. Wedegbẹ́ ehe sọ nọ penukundo nujijọ madonukun, homẹkẹn, whẹho whẹdida tọn lẹ, nugbajẹmẹji, po whẹho niyaniya tọn devo he gando Kunnudetọ Jehovah tọn lẹ go lẹdo aihọn pé lẹ po go.

Dan Molchan basi zẹẹmẹ azọ́n he Wedegbẹ́ Nukunpedomẹgo tọn nọ wà tọn, ehe nọ penukundo dagbemẹninọ gbigbọmẹ tọn po agbasa mẹ tọn po gbẹtọ 19851 he nọ wazọ́n to Bẹtẹli lẹ tọn go lẹdo aihọn pé. David Sinclair dọ lehe Wedegbẹ́ Wezinjẹgbonu tọn nọ penukundo nuyizan po azọ́nwanu lẹ po hihọ̀ na alahọ lẹ go do. Enẹgodo, Robert Wallen he ko to azọ́nwa to Bẹtẹli na nudi owhe 60 dọ lehe Wedegbẹ́ Sinsẹ̀nzọn tọn nọ deanana azọ́n omẹ Jehovah tọn lẹ tọn to lizọnyizọn lọ mẹ podọ to agun mẹ do. William Malenfant basi zẹẹmẹ azọ́n sinsinyẹn he Wedegbẹ́ Mẹpinplọn tọn nọ wà nado wleawuna tito-to-whinnu plidopọ tọn lẹ tọn. To godo mẹ, John Wischuk basi zẹẹmẹ lehe Wedegbẹ́ Wekinkan tọn nọ penukundo awuwiwlena nuhe na yin zinzinjẹgbonu to owe mítọn mẹ lẹ po sọwhiwhe po go do tọn.a

Hosọ Owhe 2010 Tọn Sinai Do Owanyi Ji

Hodidọ atọ̀n he bọdego lẹ yin zizedonukọnnamẹ gbọn delẹ to Hagbẹ Anademẹtọ lọ mẹ dali. Gerrit Lösch bẹjẹeji po kanbiọ po dọ, “Be Hiẹ Jlo Dọ Mẹdevo lẹ Ni Yiwanna We Ya?” E basi zẹẹmẹ dọ gbẹtọvi lẹ tindo nuhudo owanyi tọn taun, podọ mímẹpo wẹ e nọ wà dagbe na. Eyin owanyi tọn dẹ́n mí ma sọgan tin, na owanyi matin ṣejannabi wẹ hẹn Jehovah nado dá mí. Onú tintan he nọ whàn mí nado dọyẹwheho bo plọnmẹ wẹ owanyi he mí tindo na Jehovah.

Owanyi he sinai do nunọwhinnusẹ́n ji nọ hẹn mí nado do owanyi hia kọmẹnu mítọn lẹ, gọna kẹntọ mítọn lẹ ga. (Mat. 5:43-45) Mẹplidopọ lẹ yin tulina nado lẹnnupọndo oyà he Jesu ji do ota mítọn mẹ ji, gbẹtọ lẹ hò e, vlẹ ẹ ko, túntán do e go, bo sọwhán ẹn. Mahopọnna ehe, e hodẹ̀ do ota awhànfuntọ he whè e do núgo lẹ tọn mẹ. Be ehe ma dona whàn mí nado yiwanna ẹn dogọ ya? Todin, mẹmẹsunnu Lösch lá dọ hosọ owhe 2010 tọn wẹ: ‘Owanyi nọ doakọnna onú lẹpo. Owanyi ma nọ gboawupo gbede.’ 1 Kọlintinu lẹ 13:7, 8. E ma yin todido nado nọgbẹ̀ kẹdẹ wẹ mí tindo gba, ṣigba nado yiwanna mẹdevo lẹ bọ mẹdevo lẹ na yiwanna mí kakadoi.

Be Mọto He Amì Vude to E mẹ Kùn Wẹ Hiẹ te Ya?

Samuel Herd bẹ hodidọ etọn jẹeji po apajlẹ de po. Mí ni dọ dọ họntọn de ze we do mọto mẹ bọ mì zingbejizọnlin jei fihe dẹn na kilomẹtlu 50. Dile a to aisinsin, a doayi nuhe nọ do fie amì jẹ hia go bo mọdọ amì ko to vivọ̀ sọn mọto lọ mẹ. A dọna họntọn towe dọ amì jlo na vọ̀ sọn mọto etọn mẹ. E dọ dọ a ni ma dibu blo; na amì ogo ẹnẹ gbẹ́ pò to e mẹ. Ṣigba, e ma dẹn bọ amì lọ vọ̀ pete. Be e sọgbe nado ‘kùn mọto he amì vude to e mẹ,’ dile a tlẹ yọnẹn dọ amì lọ sọgan vọ̀ to aliji ya? Lehe e na yọ́n hugan dọ amì ni gọ́ amì-hẹnnu lọ mẹ do sọ! To yẹhiadonu-liho, amì-hẹnnu mítọn dona gọ́ to whepoponu, na amì lọ nọtena oyọnẹn Jehovah tọn he mí tindo wutu.

Enẹwutu, mí dona nọ yí amì he pé dogọ to whelẹponu. Aliho ẹnẹ mẹ wẹ mí nọ wà ehe te. Tintan, oplọn mẹdetiti tọn, enẹ wẹ nado jẹakọ hẹ Biblu gbọn hihia ẹ egbesọegbesọ dali. Kakati nado nọ hiawe poun, mí dona mọnukunnujẹ nuhe hia mí te mẹ. Awetọ, ale mimọyi sọn Sinsẹ̀n-Bibasi Whẹndo tọn mẹ dile e jẹ do. Be mí nọ nọte nado yí amì gigọ́ do amì-hẹnnu mítọn mẹ to sẹmẹsẹmẹ kavi mí nọ yí amì vude do e mẹ wẹ ya? Atọ̀ntọ, opli agun tọn lẹ yìyì po mahẹ tintindo to yé mẹ po. Ẹnẹtọ, sọwhiwhe yíyí do lẹnayihamẹpọn to fihe tin to abọẹ de, nulinlẹnpọn do aliho Jehovah tọn lẹ ji. Psalm 143:5 dọmọ: “Yẹn flin azán hoho tọn lẹ; yẹn lẹn azọ́n towe lẹpo pọ́n.”

“Dodonọ lẹ Na to Sisẹ́ Mlanmlan”

John Barr na hodidọ atọ̀ntọ he yin godo tọn, ehe basi zẹẹmẹ apajlẹ he Jesu na gando likun po ogbé ylankan po go tọn. (Mat. 13:24-30, 38, 43) Apajlẹ enẹ dlẹnalọdo “jibẹwawhé” de to whenue “ovi ahọluduta lọ tọn lẹ” na yin bibẹpli bọ ogbé ylankan lẹ na yin didedovo nado yin fifiọ.

Mẹmẹsunnu Barr hẹn ẹn họnwun dọ likun bibẹpli lọ ma na zindonukọn kakadoi gba. E dlẹnalọdo Matiu 24:34 he dọmọ: “Whẹndo ehe ma na juwayi to aliho depope mẹ kaka onú ehe lẹpo nado jọ.” Whla awe wẹ e hia hodidọ he bọdego ehe: “E họnwun dọ nuhe dọ Jesu te wẹ yindọ mẹyiamisisadode he to ogbẹ̀ whenue ohia lọ jẹ awusọhia ji to 1914 lẹ, po mẹyiamisisadode devo he na mọ bẹjẹeji nukunbibia daho lọ tọn lẹ po, na nọgbẹ̀ to ojlẹ de mẹ dopọ.” Mí ma yọ́n ojlẹ he “whẹndo ehe” na nọgbẹ̀ dẹnsọ taun, ṣigba e bẹ pipli voovo awe ehelẹ he nọgbẹ̀ to ojlẹ de mẹ dopọ hẹn. Dile etlẹ yindọ owhe voovo wẹ mẹyiamisisadode lẹ tindo, mẹhe tin to pipli awe lọ mẹ lẹ he nọtena whẹndo lọ na nọgbẹ̀ to ojlẹ dopolọ mẹ to adà azán godo tọn lẹ tọn mẹ. Homẹmiọnnamẹnu wẹ e yin nado yọnẹn dọ mẹyiamisisadode he ma tindo owhe susu to ota lẹ he nọgbẹ̀ to ojlẹ dopolọ mẹ hẹ mẹyiamisisadode mẹhomẹ he doayi ohia lọ go to whenue e jẹ awusọhia ji to 1914 lẹ, ma na kú vọ̀ whẹpo nukunbibia daho lọ nido bẹjẹeji!

“Ovi ahọluduta lọ tọn lẹ” yí jejejininọ do to tenọpọn ahọsumẹ olọn mẹ tọn yetọn, ṣigba mímẹpo dona gbọṣi nugbonọ-yinyin mẹ, bo to sisẹ́ mlanmlan kakajẹ opodo. Lẹblanulọkẹyi nankọ die mí tindo nado mọ bibẹpli “likun” lọ tọn to ojlẹ mítọn mẹ.

To ohàn godo tọn jiji godo, Theodore Jaracz he yin dopo to Hagbẹ Anademẹtọ lọ mẹ dotana po odẹ̀ po. Lehe tito-to-whinnu opli whemẹwhemẹ tọn lọ jlọmẹdote do sọ!

[Nudọnamẹ odò tọn]

a Nado mọ zẹẹmẹ azọ́n he wedegbẹ́ Hagbẹ Anademẹtọ tọn ṣidopo lẹ nọ wà tọn, pọ́n Atọ̀họ̀-Nuhihọ́ lọ Tọn, 15 mai 2008, weda 29.

[Apotin to weda 5]

WEHỌMẸ MẸHO LẸ TỌN

To opli whemẹwhemẹ tọn lọ ji, Anthony Morris, he yin dopo to Hagbẹ Anademẹtọ lọ mẹ lá dọ mẹho agun tọn lẹ na mọ azọ́nplọnmẹ he na zindonukọn de yí. Mẹho he tin to États-Unis lẹ ko bẹ wehọmẹ lọ jẹeji to nọtẹn wepinplọn tọn to Patterson, New York to bẹjẹeji 2008 tọn. Klasi sọha 72tọ ṣẹṣẹ wá vivọnu, podọ mẹho 6720 ko mọ azọ́nplọnmẹ yí. Azọ́n susu gbẹ́ pò nado wà. To États-Unis kẹdẹ, sọha mẹho lẹ tọn hugan 86000. Enẹwutu, Hagbẹ Anademẹtọ lọ kẹalọyi dọ wehọmẹ devo ni bẹjẹeji to Brooklyn, New York to 7 décembre 2009.

Nugopọntọ tomẹyitọ ẹnẹ na mọ azọ́nplọnmẹ yí to Patterson na osun awe nado lẹzun mẹplọntọ. Enẹgodo, yé na wá Brooklyn nado plọnnu mẹho lẹ, podọ nugopọntọ ẹnẹ devo lẹ nasọ mọ azọ́nplọnmẹ yí. Enẹgodo, yé na plọnnu mẹho lẹ to wehọmẹ he tin to Brooklyn bọ omẹ ẹnẹ tintan lẹ na plọnnu mẹho lẹ to wehọmẹ he tin to Plitẹnhọ Plidopọ tọn lẹ po Plitẹnhọ Ahọluduta tọn lẹ po mẹ. Azọ́nplọnmẹ ehe na zindonukọn kakajẹ whenue yé na pé mẹplọntọ 12 nado sọgan plọnnu mẹho lẹ to wehọmẹ voovo ṣidopo to sẹmẹsẹmẹ to Glẹnsigbe mẹ to États-Unis. Enẹgodo, omẹ ẹnẹ devo lẹ nasọ mọ azọ́nplọnmẹ yí nado nọ plọnnu mẹho lẹ to Espagne-gbè mẹ. Wehọmẹ ehe ma na diọtẹnna Wehọmẹ Lizọnyizọn Ahọluduta tọn he ko tin-to-aimẹ gba; lẹndai lọ wẹ nado hẹn gbigbọnọ-yinyin mẹho lẹ tọn pọnte dogọ. Lẹdo aihọn pé, alahọ lẹ na bẹ wehọmẹ lọ jẹeji to Plitẹnhọ Plidopọ tọn lẹ po Plitẹnhọ Ahọluduta tọn lẹ po mẹ to owhe sinsẹ̀nzọn 2011 tọn mẹ.

[Yẹdide to weda 4]

Opli whemẹwhemẹ tọn lọ bẹjẹeji po hànjiji po sọn ohanwe yọyọ mítọn, “Jihàn Hlan Jehovah” mẹ