Yin Huhlọnnọ Mahopọnna Madogán Lẹ

MADOGÁN towe lẹ sọgan hú agbọ́ we. Yé nọ tẹdo mẹgo dile ojọ́ nọ tẹdo ota go do. Hiẹ sọgan lẹndọ a ma na duto yé ji gbede, kavi hiẹ sọgan tindo numọtolanmẹ nugomape tọn na a nọ yí dewe jlẹdo mẹdevo lẹ go bo nọ mọdọ emi ma sọ yé. To alọ devo mẹ, hiẹ sọgan to pipehẹ manọna sinsinyẹn de he to huhlọn yí sọn asiwe bosọ to ayajẹ towe hòyí. Vlavo na whẹwhinwhẹ́n ehelẹ kavi na devo lẹ wutu, hiẹ tindo numọtolanmẹ lọ dọ todido depope ma tin. Hiẹ sọgan nọ mọ dewe taidi Job, he dọhlan Jiwheyẹwhe dọmọ: “Ṣo dọ hiẹ do whlá mi do yọdò mẹ, dọ hiẹ do do mi nuglọ, kaka yè do hẹn homẹgble towe juyi, dọ hiẹ do de ojlẹ de na mi, bo nọ flin mi!”—Job 14:13.

Nawẹ hiẹ sọgan duto ninọmẹ todido matindo tọn mọnkọtọn ji gbọn? Mahopọnna lehe e sọgan vẹawu sọ, hiẹ dona nọ de ayiha sẹ̀ sọn nuhahun towe lẹ ji sọn ojlẹ de mẹ jẹ devo mẹ. Di apajlẹ, hiẹ sọgan lẹnnupọndo kanbiọ he Jehovah kanse devizọnwatọ nugbonọ etọn Job lẹ ji dọmọ: “Fie wẹ hiẹ te whenuena yẹn do dòdó aigba tọn lẹ ai? Dọtọ́n, eyin hiẹ yọ́n wuntuntun. Mẹnu wẹ do dogbó ojlẹ etọn lẹ tọn, eyin hiẹ yọnẹn? Kavi mẹnu wẹ dlẹn okàn do e ji?” (Job 38:4, 5) Dile mí to nulẹnpọndo nujọnu-yinyin kanbiọ enẹlẹ tọn ji, e yọnbasi dọ mí ni yin whinwhàn nado yigbe dọ nuyọnẹn po huhlọn Jehovah tọn po yiaga taun. E tindo whẹwhinwhẹ́n dagbe he wutu e do na dotẹnmẹ ninọmẹ aihọn ehe tọn lẹ nado zindonukọn.

“Owùn . . . to Agbasalan Mẹ”

Devizọnwatọ nugbonọ devo biọ to Jehovah si nado de “owùn . . . to agbasalan mẹ” kavi nuhahun he gbọṣi aimẹ de sẹ̀ na ẹn. Apọsteli Paulu vẹvẹna Jiwheyẹwhe whla atọ̀n nado de e sọn whlepọn ehe mẹ. Depope he nuhahun ehe yin, e sọgan ko hò ayajẹ Paulu tọn yí sọn e si to sinsẹ̀nzọn Jehovah tọn mẹ, taidi owùn adínọ de. Paulu dọ dọ akọndidona owùn ehe taidi nado doakọnna nulimẹ gbọzangbọzan. Gblọndo he Jehovah na ẹn wẹ yindọ: “Ojọmiọn ṣie ko pé we, na madogán mẹ wẹ yè hẹn huhlọn ṣie sọgbe te.” Jehovah ma de owùn enẹ sẹ̀ gba. Paulu dona doakọnna ẹn, podọ e yidogọ dọmọ: “Whenuena yẹn yin madogánnọ, whenẹnu wẹ yẹn yin huhlọnnọ.” (2 Kọl. 12:7-10) Etẹ dọ wẹ e te taun?

Nuhahun Paulu tọn ma busẹ to azọ́njiawu-liho. Etomọṣo, e ma glọnalina ẹn nado wà azọ́n ayidego tọn susu dotana to sinsẹ̀nzọn Jehovah tọn mẹ. Paulu ganjẹ Jehovah go bo nọ biọ alọgọ etọn to whepoponu. (Flp. 4:6, 7) Sẹpọ vivọnu gbẹzan etọn tọn to aigba ji, Paulu penugo nado dọmọ: “Yẹn ko hoavùn dagbe lọ, yẹn ko hẹn ali ṣie jẹ opodo, yẹn ko yìn yise lọ.”—2 Tim. 4:7.

Jehovah nọ yí gbẹtọvi mapenọ lẹ zan nado hẹn ojlo etọn di mahọpọnna awugbopo po nuhahun yetọn lẹ po, podọ ehe nọ pagigona ẹn. E sọgan deanana yé bo na yé nuyọnẹn nado pehẹ nuhahun yetọn lẹ bo hẹn ayajẹ yetọn go to sinsẹ̀nzọn etọn mẹ. Mọwẹ, e sọgan yí gbẹtọvi mapenọ lẹ zan nado wà azọ́n dahodaho lẹ mahopọnna madogán yetọn lẹ.

Paulu dọ nuhewutu Jiwheyẹwhe ma do de owùn he tin to agbasalan mẹ na ẹn lọ sẹ̀ dọmọ: “Na yẹn nikaa ze dee daga zẹjlẹgo.” (2 Kọl. 12:7) “Owùn” Paulu tọn nọ flinnu in gando madogán etọn lẹ go bo nọ gọalọna ẹn nado whiwhẹ ede. Enẹ tin to kọndopọ mẹ hẹ nuhe Jesu plọnmẹ dọmọ: “Mẹdepope he na ze ede daga, na yin zínzín dai: mẹdepope he nasọ zín ede dai, na yin zizedaga.” (Mat. 23:12) Whlepọn lẹ sọgan plọn whiwhẹ devizọnwatọ Jiwheyẹwhe tọn lẹ bo gọalọna yé nado yọnẹn dọ yé dona ganjẹ Jehovah go nado sọgan doakọnnanu po nugbonọ-yinyin po. Gbọnmọ dali, yé sọgan “to awagundo to [Jehovah] mẹ,” dile apọsteli lọ wà do.—1 Kọl. 1:31.

Madogán He Whlá Lẹ

Mẹdelẹ sọgan tindo madogán delẹ bo nọma yọnẹn kavi yé sọgan nọ whleawu nado yigbe etọn. Di apajlẹ, mẹde sọgan nọ dejido ede go zẹjlẹgo, bo nọ ganjẹ nugopipe etọn titi go. (1 Kọl. 10:12) Madogán devo he gbẹtọvi mapenọ lẹ nọ saba tindo wẹ ojlo lọ nado diyin.

Joabi, he lẹzun awhàngán Ahọlu Davidi tọn, yin dawe adọgbotọ, nujikudonọ de, he yọ́n lehe yè nọ didẹ nuhahun lẹ do. Etomọṣo, Joabi hùwhẹ nuṣiwa sinsinyẹn de tọn he dohia dọ e tindo gbigbọ sakla po ojlo zogbe tọn po. E gbọn kanyinylan dali gblegbẹ̀na awhàngán awe delẹ. Tintan, e hù Abneli nado yiahọsu. Enẹgodo, Joabi doyẹklọ nafẹ-vi etọn Amasa di mẹhe jlo na dọnudo e. E yí adusilọ etọn do hẹn ogbì Amasa tọn go taidi dọ e jlo na donùnùgo na ẹn bo yí amiyọnlọ etọn do sọ́ ohí i hù. (2 Sam. 17:25; 20:8-10) Amasa ko yin dide nado diọtẹnna Joabi taidi awhàngán, enẹwutu Joabi yí dotẹnmẹ hundote enẹ zan nado didẹ agbàwhlẹnhẹmẹtọ etọn sọn aimẹ, vlavo po linlẹn lọ po dọ e na gọ̀ otẹn awhàngán tọn etọn mọyi. Hiẹ sọgan mọdọ Joabi ma dava ayilinlẹn etọn gọna ojlo zogbe ṣejannabi tọn etọn. E yinuwa po kanyinylan po bọ ayihadawhẹnamẹnu etọn ma tlẹ hoapa. To whenuena Ahọlu Davidi sẹpọ vivọnu gbẹzan etọn tọn, e degbena visunnu etọn Sọlọmọni nado hẹn ẹn diun dọ Joabi suahọ kanyinylan etọn tọn.—1 Ahọ. 2:5, 6, 29-35.

Matin ayihaawe, mí ma dona nọ joawuna ojlo he ma sọgbe lẹ; mí sọgan duto madogán mítọn lẹ ji. Jẹnukọn whẹ́, mí dona yọ́n madogán mítọn lẹ bosọ kẹalọyi yé. Enẹgodo, mí sọgan yinuwa nado duto yé ji. Mí sọgan nọ hodẹ̀ hlan Jehovah to gbesisọ mẹ bo nọ biọ alọgọ etọn nado duto madogán enẹlẹ ji, bosọ nọ plọn Ohó etọn po sọwhiwhe po nado yọ́n aliho he mẹ mí sọgan dava ayilinlẹn enẹlẹ te. (Heb. 4:12) E sọgan biọ dọ mí ni nọ wazọ́n do awugbopo mítọn lẹ ji to whepoponu podọ mí ma dona gbọjọ. Ahididi ehe tlẹ sọgan zindonukọn dile e na dẹnsọ bọ mí gbẹ́ pò to mapenọ yin. Paulu lọsu mọ domọ to whẹho etọn mẹ bo wlan dọmọ: “Ehe yẹn jlo, enẹ wẹ yẹn ma wà; ṣigba ehe yẹn gbẹwanna, enẹ wẹ yẹn to wiwà.” Ṣogan, dile hiẹ yọnẹn do, Paulu ma gbọjọ taidi dọ e ma sọgan dava nuyiwa etọn lẹ paali wẹ nkọtọn. Kakatimọ, e zindonukọn nado to ahidi hẹ madogán etọn lẹ bo nọ ganjẹ alọgọ Jiwheyẹwhe tọn go gbọn Jesu Klisti gblamẹ. (Lom. 7:15-25) Paulu dọ to fidevo dọmọ: “Yẹn to nutun bo to awugblena agbasa ṣie, bosọ to hinhẹn ẹn wá taliai mẹ; dọ to nudepope mẹ, whenuena yẹn ko dọyẹwheho hlan mẹdevo lẹ, na yẹnlọsu nikaa yin gbigbẹdai.”—1 Kọl. 9:27.

Gbẹtọvi lẹ nọ saba suwhẹna yede. Mí sọgan duto ayilinlẹn enẹ ji gbọn pọndohlan Jehovah tọn tintindo dali, bo nọ yinuwa dile Paulu dotuhomẹna Klistiani lẹ do dọmọ: “Mì nọ gbẹwanna nuhe ylan: bo joawuna ehe yin dagbe.” (Lom. 12:9) To ahididi mítọn nado dava madogán mítọn lẹ mẹ, mí na tindo nuhudo nugbodidọ, linsinsinyẹn po mẹplọnlọ-dido-mẹdetiti go po tọn. Davidi biọ to Jehovah si dọmọ: “Whlé homẹ ṣie po ayiha ṣie po pọ́n.” (Ps. 26:2) E yọnẹn dọ Jiwheyẹwhe sọgan gbeje ayilinlẹn mítọn lẹ pọ́n kitokito bo gọalọna mí whenue mí tindo nuhudo etọn. Eyin mí nọ hodo anademẹ he Jehovah nọ na gbọn Ohó etọn po gbigbọ wiwe etọn po gblamẹ, mí sọgan yinukọn to vivẹnudido mítọn mẹ nado duto awugbopo mítọn lẹ ji.

Nuhahun delẹ sọgan nọ gbàhundona mẹdelẹ na yé nọ tindo numọtolanmẹ lọ dọ yé ma sọgan didẹ whẹho lọ lẹ na yede wutu. Matin ayihaawe, mẹho agun tọn lẹ sọgan gbọn owanyi dali wleawuna alọgọ po tulinamẹ po. (Isa. 32:1, 2) Ṣigba, nuyọnẹnnu wẹ e na yin nado nọ nọ̀ jlẹkaji gando nuhe mí to nukundo lẹ go. Dile titonu ehe na pò to ote, nuhahun delẹ ma sọgan mọ pọngbọ mlẹnmlẹn pọ́n gbede. Etomọṣo, mẹsusu ko plọn nado nọ doakọnna podọ enẹ ko hẹn yé penugo nado zan gbẹzan pekọhẹnwanamẹ tọn.

Jidenamẹ Jehovah Tọn Nado Gọalọna Mí

Mahopọnna nuhahun depope he mí to pipehẹ to ojlẹ awusinyẹn tọn ehelẹ mẹ, mí sọgan deji dọ Jehovah na deanana mí bo hẹn mí lodo. Biblu dotuhomẹna mí dọmọ: “Enẹwutu mì whiwhẹ mìde to alọ gángán Jiwheyẹwhe tọn glọ, na ewọ nido ze mì daga to ojlẹ etọn mẹ: mì bẹ magbọjẹ mìtọn lẹpo do alọ etọn mẹ; na ewọ to tukla mìtọn jẹ wutu.”—1 Pita 5:6, 7.

Whenuena Kathy, he ko to sinsẹ̀n to Bẹtẹli na owhe susu mọdọ asu etọn bẹ azọ̀n Alzheimer, e ma lẹndọ emi na penugo nado doakọnna nuhahun he enẹ na bẹhẹn lẹ gba. E mọ ẹn taidi dandannu de nado nọ vẹ̀ Jehovah egbesọegbesọ nado biọ nuyọnẹn po linsinsinyẹn po. Dile ninọmẹ asu etọn tọn to yinylan deji, mẹmẹsunnu lẹ gbọn owanyi dali yí whenu zan nado dín nudọnamẹ lẹ gando azọ̀n lọ go podọ mẹmẹyọnnu mẹtọnhopọntọ lẹ nọ nọgodona ẹn to numọtolanmẹ-liho. Apadewhe alọgọ mẹhẹnlodo tọn he Jehovah nọ wleawuna tọn wẹ Klistiani ehelẹ yin, podọ Kathy penugo nado penukundo asu etọn go kakajẹ okú etọn whenu to owhe 11 godo. Kathy dọmọ: “Po dasin po, n’nọ yí ahun lẹpo do dopẹna Jehovah na alọgọ etọn lẹpo; ehe wẹ hẹn mi dote. N’ma yọnẹn dọ e yọnbasi nado zindonukọn na ojlẹ dindẹn sọmọ to ninọmẹ flumẹjijẹ tọn mọnkọtọn mẹ!”

Alọgọ Nado Duto Madogán He Whlá lẹ Ji

To whenuena mẹdelẹ to numọtolanmẹ nugomape tọn tindo, yé sọgan lẹndọ Jehovah ma na dotoaina odẹ̀ yetọn na alọgọ to ojlẹ ayimajai tọn yetọn mẹ. Enẹwutu, nujọnu wẹ e nọ yin nado lẹnnupọndo nuhe Davidi dọ to whenuena ylando sinsinyẹn he e wà po Bati-ṣeba po vẹna ẹn ji dọmọ: “Ayiha gbigbà finfinyọ́n, Jiwheyẹwhe E, hiẹ ma to na vlẹ gba.” (Ps. 51:17) Davidi lẹnvọjọ sọn ahun mẹ wá, bosọ yọnẹn dọ emi sọgan dọnsẹpọ Jiwheyẹwhe bo dejido lẹblanu etọn go. Jesu do gbigbọ mẹtọnhopọn Jehovah tọn hia. Wẹndagbe-kàntọ Matiu yí hogbe Isaia tọn lẹ zan gando Jesu go dọmọ: “Ofán gbigbà wẹ ewọ ma to na wẹ́n, sekan he to azọ̀ tì wẹ ewọ ma to na ṣí.” (Mat. 12:20; Isa. 42:3) To whenuena Jesu tin to aigba ji, e vẹawu agbátọnọ lẹ po mẹhe tin to kọgbidinamẹ glọ lẹ po. Nado dọ ẹ to yẹhiadonu-liho, e ma ṣí gbigbọ mẹhe tin taidi sekan miyọ́ngbán he to na ṣí de tọn gba. Kakatimọ, e gbọn awuvẹmẹ dali penukundo mẹhe to yaji lẹ go na yé nido mọ agbọ́. Lehe e yinuwa to whenuena e tin to gbẹtọvi lẹ ṣẹnṣẹn do niyẹn. Be hiẹ ma yise dọ Jesu gbẹ́ pò to mọwà podọ e yọ́n vivẹ́ madogán towe lẹ tọn ya? Doayi e go dọ Heblu lẹ 4:15 dohia dọ Ewọ penugo nado “yọ́n vivẹ́ madogán mítọn lẹ tọn.”

To whenuena Paulu to wekan gando “owùn . . . to agbasalan mẹ” etọn go, e dọ dọ huhlọn Klisti tọn gọalọna emi. (2 Kọl. 12:7-9) E mọ hihọ́-basinamẹ Jiwheyẹwhe tọn gbọn Klisti gblamẹ, kẹdẹdile mẹhe biọ bẹtẹn de nọ mọ hihọ́ yí sọn owhè po jikun po nù do. Taidi Paulu, mí ma dona joawuna madogán po nuhahun mítọn lẹ po gba. Nado sọgan lodo to gbigbọ mẹ zọnmii, mí dona nọ yí nuhe Jehovah wleawuna gbọn agun aigba ji tọn etọn gblamẹ lẹpo zan. Mí sọgan wà nuhe go huhlọn gbẹtọvi tọn pé lẹpo bo lẹhlan Jehovah po jidide mlẹnmlẹn po dọ e na deanana afọdide mítọn lẹ. Eyin mí tindo numimọ lehe huhlọn Jiwheyẹwhe tọn nọ gọalọna mí to madogán mítọn lẹ mẹ do tọn, mí na penugo nado dọ nudopolọ taidi Paulu he dọmọ: “Whenuena yẹn yin madogánnọ, whenẹnu wẹ yẹn yin huhlọnnọ.”—2 Kọl. 12:10.

[Yẹdide to weda 3]

Paulu nọ hodẹ̀ hlan Jehovah to whepoponu nado deanana ẹn to lizọnyizọn etọn mẹ

[Yẹdide to weda 5]

Ahọlu Davidi de Joabi taidi awhàngán

[Yẹdide to weda 5]

Joabi yinuwa nado didẹ Amasa, agbàwhlẹnhẹmẹtọ de sọn aimẹ

[Yẹdide to weda 6]

Mẹho lẹ nọ gbọn owanyi dali na anademẹ Owe-wiwe tọn he sọgan gọalọna mí nado pehẹ nuhahun mítọn lẹ