Pipehẹ ‘Owùn to Agbasalan Mẹ’
“Ojọmiọn ṣie ko pé we.”—2 KỌLINTINU LẸ 12:9.
1, 2. (a) Naegbọn nugbo lọ dọ mí nọ pannukọn whlepọn po nuhahun lẹ po ma dona paṣa mí? (b) Etẹwutu mí sọgan tindo jidide mahopọnna whlepọn lẹ?
“YÉ HE jlo na nọ̀ jijọ-di-Jiwheyẹwhe tọn mẹ to Klisti Jesu mẹ lẹ, na nọ doakọnna homẹkẹn.” (2 Timoti 3:12) Etẹwutu e do yinmọ? Na Satani sọalọakọ́n dọ gbẹtọ to Jiwheyẹwhe sẹ̀n na whẹwhinwhẹ́n ṣejannabi tọn lẹ kẹdẹ wutu, podọ e magbe nado dohia dọ nugbo wẹ emi dọ. Jesu na avase apọsteli nugbonọ etọn lẹ to ojlẹ de mẹ dọ: ‘Satani ko biọ nado jàn mì di likun nkọ.’ (Luku 22:31) Jesu yọnẹn ganji dọ Jiwheyẹwhe nọ na dotẹnmẹ Satani nado yí nuhahun sinsinyẹn lẹ zan nado whlé mí pọ́n. Ṣigba, enẹ ma zẹẹmẹdo dọ Satani kavi aovi etọn lẹ dè wẹ awusinyẹnnamẹnu he mí nọ pehẹ to gbẹ̀mẹ lẹpo nọ wá sọn tlọlọ gba. (Yẹwhehodọtọ 9:11) Etomọṣo, Satani tin to jejeji nado yí nudepope he tin to huhlọn etọn mẹ zan nado hẹn tenọgligo-hinhẹn mítọn gble.
2 Biblu dọna mí dọ whlepọn mítọn lẹ ma dona paṣa mí hugan gba. Whlepọn depope he wá mí ji ma dona yin nubajonọmẹ kavi nuhe mayin nukundo de gba. (1 Pita 4:12) Na nugbo tọn, ‘nukunbibia dopolọ to jijọ do mẹmẹsunnu mítọn he tin to aihọn mẹ lẹ go.’ (1 Pita 5:9) To egbehe, Satani to kọgbidina devizọnwatọ Jiwheyẹwhe tọn lẹpo zẹjlẹgo. Homẹ Lẹgba tọn nọ hùn nado mọdọ nuhahun he taidi owùn nkọtọn susu to yasana mí. Nado wà enẹ dotana, e nọ yí titonu ylankan etọn zan to aliho de mẹ nado yidogọna kavi hẹn ‘owùn depope he tin to agbasalan’ mítọn mẹ sinyẹn deji. (2 Kọlintinu lẹ 12:7) Etomọṣo, mẹgbeyinyan Satani tọn lẹ ma dona hẹn tenọgligo-hinhẹn mítọn gble gba. Kẹdẹdile Jehovah na “de aliho de” na mí nado doakọnna whlepọn do, mọwẹ e nasọ wà onú dopolọ do to whenuena mí pannukọn nuhahun he taidi owùn to agbasalan mẹ lẹ.—1 Kọlintinu lẹ 10:13.
Lehe Mí Sọgan Pehẹ Owùn de Do
3. Etẹwẹ yin gblọndo Jehovah tọn to whenuena Paulu biọ to e si nado de owùn he tin to agbasalan etọn mẹ sẹ?
3 Apọsteli Paulu vẹvẹna Jiwheyẹwhe nado de owùn lọ sẹ sọn agbasalan emitọn mẹ. “Yẹn sọ vẹ̀ Oklunọ whlaatọ̀n na onú he, na e ni de e sọn dè e.” Etẹwẹ yin gblọndo Jehovah tọn hlan obiọ vẹkuvẹku Paulu tọn? “Ojọmiọn ṣie ko pé we, na madogán mẹ wẹ yè hẹn huhlọn ṣie sọgbe te.” (2 Kọlintinu lẹ 12:8, 9) Mì gbọ mí ni gbeje gblọndo ehe pọ́n bo pọ́n lehe e sọgan gọalọna mí nado pehẹ nuhahun he taidi owùn depope he to yasana mí lẹ do.
4. Aliho tẹlẹ mẹ wẹ Paulu mọaleyi sọn ojọmiọn Jehovah tọn mẹ te?
4 Doayi e go dọ Jiwheyẹwhe na tuli Paulu nado yọ́n pinpẹn ojọmiọn he ko yin nina ẹn gbọn Klisti gblamẹ tọn. Na nugbo tọn, Paulu ko yin didona tlala to aliho susu mẹ. Dile etlẹ yindọ e ko nọ diọnukunsọ hodotọ Jesu tọn lẹ dai po zohunhun agọ̀ po, Jehovah gbọn owanyi dali na ẹn lẹblanulọkẹyi devi-yinyin tọn. (Owalọ lẹ 7:58; 8:3; 9:1-4) Enẹgodo Jehovah gbọn homẹdagbe dali na azọ́ndenamẹ po lẹblanulọkẹyi awuvivi tọn lẹ po Paulu. Nuhe mí sọgan plọn sọn ehe mẹ họnwun. Etlẹ yin to ojlẹ he ylan hugan lẹ mẹ, mí gbẹsọ tindo dona susu lẹ he mí dona dopẹna. Whlepọn mítọn lẹ ma dona hẹn mí wọnji dagbewà susugege Jehovah tọn lẹ go gbede.—Psalm 31:19.
5, 6. (a) Nawẹ Jehovah plọn Paulu dọ ‘madogán mẹ wẹ yè nọ hẹn huhlọn Etọn sọgbe te’ gbọn? (b) Nawẹ apajlẹ Paulu tọn do Satani hia di lalonọ de gbọn?
5 Ojọmiọn Jehovah tọn pé to aliho devo mẹ. Huhlọn Jiwheyẹwhe tọn sù lankan nado gọalọna mí to whlepọn mítọn lẹ mẹ. (Efesunu lẹ 3:20) Jehovah plọn Paulu dọ ‘madogán mẹ wẹ yè hẹn huhlọn Emitọn sọgbe te.’ Gbọnna? E gbọn owanyi dali na Paulu huhlọn he e tindo nuhudo etọn lẹpo nado sọgan pehẹ whlepọn etọn. To alọ devo mẹ, akọ́ndonanu po jidide mlẹnmlẹn Paulu tọn to Jehovah mẹ po dohia mẹlẹpo dọ huhlọn Jiwheyẹwhe tọn gbawhàn to whẹho dawe madogánnọ po ylandonọ ehe tọn po mẹ. Todin lẹnnupọn do nugandomẹgo he e tindo do Lẹgba, he sọalọakọ́n dọ gbẹtọ lẹ nọ sẹ̀n Jiwheyẹwhe kiki to whenuena gbẹzan bọawu na yé bọ yé ma tindo nuhahun depope ji. Tenọgligo-hinhẹn Paulu tọn yinuwa taidi winyandomẹ sinsinyẹn de na mẹhẹngbletọ enẹ!
6 Paulu he ko yin awhànvi Satani tọn to avùnhiho sọta Jiwheyẹwhe mẹ dai, bo nọ yí kanyinylan do dohomẹkẹn Klistiani lẹ, yèdọ Falesi zohunhunnọ de, he ko duvivi gbẹzan awuvivo tọn wayi na e yin jiji do whẹndo adọkunnọ de mẹ wutu die. Todin, Paulu to sinsẹ̀nzọn wà hlan Jehovah po Klisti po taidi “godotọ apọsteli lẹ tọn.” (1 Kọlintinu lẹ 15:9) Taidi omẹ mọnkọtọn de, e yí whiwhẹ do to taliaina aṣẹpipa hagbẹ anademẹtọ Klistiani owhe kanweko tintan tọn. Podọ e sọ to akọ́ndonanu po nugbonọ-yinyin po mahopọnna owùn he tin to agbasalan etọn mẹ. Whlepọn gbẹ̀mẹ tọn lẹ ma de zohunhun Paulu tọn pò gba. Lehe enẹ na ko hẹn Satani duadi sọ! Paulu ma wọnji todido etọn dọ e na tindo mahẹ to Ahọluduta olọn mẹ Klisti tọn mẹ pọ́n gbede gba. (2 Timoti 2:12; 4:18) Mahopọnna awufiẹsa depope he owùn de sọgan hẹnwa, e ma sọgan de zohunhun etọn pò. Mọdopolọ, mì gbọ zohunhun mítọn ni to sinsinyẹn deji zọnmii! Gbọn hinhẹn mí dote to whlepọn mítọn lẹ mẹ dali, Jehovah nọ doyẹyigona mí po lẹblanulọkẹyi lọ po nado gọalọ to dido Satani hia di lalonọ mẹ.—Howhinwhẹn lẹ 27:11.
Awuwledainanu Jehovah Tọn lẹ Yin Nujọnu
7, 8. (a) Aliho tẹlẹ mẹ wẹ Jehovah nọ na huhlọn devizọnwatọ etọn lẹ te to egbehe? (b) Etẹwutu Biblu hihia po pinplọn ẹn egbesọegbesọ po yin onú titengbe nado pehẹ owùn he tin to agbasalan mítọn mẹ?
7 To egbehe, Jehovah nọ na huhlọn Klistiani nugbonọ lẹ gbọn gbigbọ wiwe etọn, Ohó etọn, po mẹmẹsunnu-yinyin Klistiani tọn po gblamẹ. Taidi apọsteli Paulu, mí sọgan gbọn odẹ̀ gblamẹ ze agbàn-pinpẹn mítọn lẹ dlan Jehovah ji. (Psalm 55:22) Dile etlẹ yindọ Jiwheyẹwhe sọgan gọ̀n ma de whlepọn mítọn lẹ sẹ, e nọ na mí nuyọnẹn nado pehẹ yé, etlẹ yin dehe sinyẹn taun nado doakọnna lẹ. Jehovah sọgan sọ na mí huhlọn—yèdọ ‘huhlọn he hugan jọwamọ tọn’—he na gọalọna mí nado doakọnnanu.—2 Kọlintinu lẹ 4:7.
8 Nawẹ mí nọ mọ alọgọ mọnkọtọn lẹ yí gbọn? Mí dona yí sọwhiwhe do plọn Ohó Jiwheyẹwhe tọn, na e mẹ wẹ mí na mọ homẹmiọnnamẹ etọn te. (Psalm 94:19) To Biblu mẹ, mí hia hogbe mẹwhinwhàn tọn devizọnwatọ Jiwheyẹwhe tọn lẹ tọn dile yé to alọgọ biọ sọn olọn mẹ. Gblọndo Jehovah tọn, he nọ saba bẹ hogbe homẹmiọnnamẹ tọn lẹ hẹn, dona yin nulẹnpọndeji. Nupinplọn na na huhlọn mí bọ ‘huhlọn he hugan jọwamọ tọn nado yin sọn Jiwheyẹwhe dè, bo ma yin sọn míwlẹ dè gba.’ Kẹdẹdile mí dona dù núdùdù agbasa tọn egbesọegbesọ nado mọ hunsindagbe po huhlọn po do, mọwẹ mí dona nọ plọn ohó Jiwheyẹwhe tọn to gbesisọ mẹ do. Be mí nọ wà ehe ya? Eyin mọwẹ, to whelọnu lo mí na mọdọ ‘huhlọn he hugan jọwamọ tọn’ mimọyi nọ gọalọna mí nado doakọnna owùn yẹhiadonu tọn depope he sọgan to yasana mí todin.
9. Nawẹ mẹho lẹ sọgan gọalọna mẹhe to pipehẹ nuhahun lẹ gbọn?
9 Klistiani mẹho he dibusi Jiwheyẹwhe lẹ sọgan “taidi otẹn whiwhla tọn sọn jẹhọn” ayimajai tọn nù, podọ “bẹtẹn sọn oyú-jẹhọn” nuhahun lẹ tọn nù. Mẹho he jlo na sọgbe hẹ zẹẹmẹ gbọdo enẹlẹ nọ yí whiwhẹ po ahundopo po do biọ to Jehovah si nado na yé “odẹ́ nuyọnẹntọ tọn” na yé nido yọ́n lehe yé sọgan yí hogbe he sọgbe lẹ do gblọnhona mẹhe to yaji lẹ do. Hogbe mẹho lẹ tọn sọgan taidi jikun finfán he nọ fá bo nọ miọnhomẹna gbigbọ mítọn to ojlẹ awusinyẹnnamẹ gbẹ̀mẹ tọn lẹ whenu. Gbọn yíyí ‘homẹmimiọn do dọho na ayi mawhiwhẹnọ lẹ dali,’ mẹho lẹ nọ gọalọna mẹmẹsunnu po mẹmẹyọnnu gbigbọmẹ tọn yetọn he apọ̀ to ṣiṣi kavi he gbọjọ na owùn delẹ to agbasalan yetọn mẹ wutu lẹ po.—Isaia 32:2; 50:4; 1 Tẹsalonikanu lẹ 5:14.
10, 11. Nawẹ devizọnwatọ Jiwheyẹwhe tọn lẹ sọgan na tuli mẹhe to akọndona whlepọn sinsinyẹn lẹ gbọn?
10 Devizọnwatọ Jehovah tọn lẹpo wẹ yin apadewhe whẹndo Klistiani tọn he tin to pọmẹ etọn. Mọwẹ, ‘hagbẹ dopodopo heyin awutugonu ode awetọ tọn’ wẹ mí yin, podọ mí ‘tin to dandannu glọ nado yiwanna ode awetọ.’ (Lomunu lẹ 12:5; 1 Johanu 4:11) Nawẹ mí nọ hẹn azọngban ehe di gbọn? Sọgbe hẹ 1 Pita 3:8, mí nọ wàmọ gbọn ‘homẹ kinkọndai na mínọzo, owanyi mẹmẹsunnu tọn tintindo, podọ awuvẹmẹtọ yinyin’ hlan mẹhe gando mí go to yise mẹ lẹpo dali. Gando mẹhe to pipehẹ owùn he vẹawu taun agbasalan mẹ lẹ go, vlavo yé yin jọja kavi mẹhomẹ, mímẹpo sọgan do mẹtọnhopọn vonọtaun hia yé. Gbọnna?
11 Mí dona tẹnpọn nado nọ tindo awuvẹmẹ na yajiji yetọn. Eyin mí yin ahun sinsinyẹnnọ, numọtolanmẹ matindonọ, kavi ojlo matindonọ, mí sọgan gbọn mayọnẹn dali hẹn yajiji yetọn sinyẹn deji. Yinyọ́n whlepọn yetọn lẹ dona whàn mí nado yin nuyọnẹntọ to nuhe mí to didọ, lehe mí dọ ẹ do, po nuyiwa mítọn po mẹ. Yinyin pọndohlan dagbenọ po tulinamẹtọ mítọn po sọgan gọalọ nado de awufiẹsa sinsinyẹn he taidi owùn he to yasana yé lẹ pò. Gbọnmọ dali, mí sọgan lẹzun alọgọ mẹhẹnlodo tọn de na yé.—Kọlọsinu lẹ 4:11.
Lehe Mẹdelẹ Ko Pehẹ Ẹ po Kọdetọn Dagbe po Do
12-14. (a) Etẹwẹ Klistiani dopo wà nado pehẹ azọ̀n agbasa wiwọ̀ tọn? (b) Nawẹ mẹmẹsunnu po mẹmẹyọnnu gbigbọmẹ tọn yọnnu ehe tọn lẹ po gọalọ bosọ na ẹn tuli gbọn?
12 “Nukunbibia” lẹ to sinsinyẹn deji dile mí sẹpọ vivọnu azán godo tọn ehelẹ. (Matiu 24:8) Enẹwutu, e yọnbasi dọ whlepọn na sayana mẹhe tin to aigba ji lẹpo, titengbe devizọnwatọ nugbonọ Jehovah tọn, he to dindin nado wà ojlo etọn lẹ. Di apajlẹ, lẹnnupọn do Klistiani de he to sinsẹ̀nzọn whenu-gigọ́ tọn mẹ ji. Doto lẹ mọdọ e tindo azọ̀n agbasa wiwọ̀ tọn bọ yé dona sán agbasagonu etọn delẹ sẹ. To whenuena ewọ po asu etọn po yọnẹn dọ e tindo awutu ehe, yé lẹhlan Jehovah to afọdopolọji to odẹ̀ gaa, ovẹvivẹ tọn mẹ. Yọnnu lọ dọ to godo mẹ dọ jijọho de wá yé ji to azọ́njiawu liho. Etomọṣo, e doakọnna ojlẹ dagbe po ylankan susu po, titengbe to whenuena e to akọndona nugandomẹgo ylankan nukunpedomẹgo etọn tọn lẹ.
13 Nado sọgan pehẹ ninọmẹ etọn, mẹmẹyọnnu ehe tẹnpọn nado plọn nususu gando awutu lọ go. E dọho hẹ doto lẹ. E mọ otàn gbẹzan tọn he do lehe mẹdelẹ ko pehẹ awutu ehe do hia to numọtolanmẹ-liho to Atọ̀họ̀-Nuhihọ́ Lọ Tọn po Réveillez-vous! po mẹ, gọna owe Klistiani tọn devo lẹ. E sọ hia wefọ Biblu tọn he sọgbe he do nugopipe Jehovah tọn nado hẹn omẹ etọn lẹ dote to awusinyẹnnamẹnu lẹ whenu hia, po nudọnamẹ dagbe devo lẹ po.
14 Hosọ de he dọhodo lehe yè sọgan pehẹ todido matindo ji dọ hogbe nuyọnẹn tọn ehelẹ dọmọ: “Ewọ he klan ede do ovò na domọ́ na ojlo ede tọn.” (Howhinwhẹn lẹ 18:1) Enẹwutu hosọ lọ na ayinamẹ ehe: “Hoavùn sọta ojlo lọ nado klan dewe dovo.”a Mẹmẹyọnnu lọ dọmọ: “Mẹsusu dọna mi dọ yé to dẹ̀ho na mi; mẹdevo lẹ nọ ylọ mi to alokan ji. Mẹho awe nọ ylọ mi to gbesisọ mẹ nado kàn dagbemẹ-ninọ ṣie biọ. Yẹn mọ vounvoun po kalti nudọdomẹ tọn po susu yí. Mẹdelẹ tlẹ sọ dà núdùdù wá na mi. Humọ, mẹsusu ze yede jo nado nọ ze mi yì dotowhé.
15-17. (a) Nawẹ Klistiani dopo pehẹ awusinyẹnnamẹnu he dekọtọn sọn owùnú-jijọ lẹ mẹ gbọn? (b) Alọgọ tẹwẹ mẹhe tin to agun etọn mẹ lẹ wleawuna?
15 Mẹmẹyọnnu de heyin devizọnwatọ whenu dindẹn Jehovah tọn to États-Unis, tindo numimọ owùnú-jijọ mọto tọn. E gbleawu do okọ̀ po abọ́ po ji, he hẹn húdùhúdù he e ko to akọndona na owhe 25 sinyẹn deji. E dọmọ: “E nọ sinyẹnawu na mi taun nado ze ota daga podọ nado didá nudepope he pẹnzin hugan kilo awe. Ṣigba odẹ̀ vẹkuvẹku hlan Jehovah ko hẹn mi dote taun. Mọjanwẹ hosọ lẹ sọn Atọ̀họ̀-Nuhihọ́ Lọ Tọn he mí ko plọn lẹ mẹ wà do. Dopo dọhodo Mika 6:8 ji, bo dọ dọ nado yí jlẹkaji do zinzọnlin hẹ Jiwheyẹwhe zẹẹmẹdo dogbó mẹtọn lẹ yinyọnẹn. Ehe gọalọna mi nado yọnẹn dọ mahopọnna ninọmẹ ṣie, yẹn ma dona jẹflumẹ gba, dile etlẹ yindọ ojlẹ he yẹn nọ yizan to lizọnyizọn lọ mẹ whè tlala hugan nuhe yẹn jlo nado wà. Sinsẹ̀n-bibasi hlan Jehovah po mẹwhinwhàn he sọgbe lọ po wẹ yin nujọnu hugan.”
16 E sọ wlan ga dọmọ: “Mẹho lẹ nọ saba pà mi na vivẹnudido ṣie nado wá opli lẹ podọ nado tọ́n na lizọnyizọn kunnudegbe tọn. Jọja lẹ nọ dọnudo mi po zohunhun po. Gbehosọnalitọ lẹ nọ yin sọwhiwhenọ hẹ mi taun bosọ nọ saba vọ́ tito yetọn jlado to azán he gbè yẹn ma sọgan tọ́n lẹ. Yé nọ gbọn homẹdagbe dali plan mi yì gọyìpọn lẹ kavi ylọ mi nado nọ yì plọnmẹ Biblu yetọn lẹ tẹnmẹ to whenuena ninọmẹ aimẹ tọn ylan taun. Podọ to whenuena e yindọ yẹn ma sọgan hẹn saki, wẹnlatọ devo lẹ nọ bẹ owe ṣie lẹ do saki yetọn mẹ to whenuena yẹn tọ́n na azọ́n kunnudide tọn.”
17 Doayi lehe mẹho agun tọn lẹ po yisenọ hatọ lẹ po gọalọna mẹmẹyọnnu awe ehelẹ nado pehẹ madogán he taidi owùn nkọtọn yetọn lẹ do go. Yé na alọgọ yọn-na-yizan, homẹdagbe tọn heyin awuwlena nado pehẹ nuhudo tangan gbigbọmẹ, agbasamẹ, po numọtolanmẹ tọn lẹ po. Be enẹ ma na we tuli nado gọalọna mẹmẹsunnu kavi mẹmẹyọnnu devo he to nuhahun tindo lẹ ya? Mì jọja lẹ sọgan gọalọna mẹhe tin to agun mìtọn mẹ he to ahidihẹ owùn to agbasalan yetọn mẹ lẹ ga.—Howhinwhẹn lẹ 20:29.
18. Tulinamẹ tẹwẹ mí sọgan mọ to otàn gbẹzan tọn he nọ yin zinzinjẹgbonu to linlinnamẹwe Atọ̀họ̀-Nuhihọ́ Lọ Tọn po Réveillez-vous! po tọn lẹ mẹ?
18 Linlinnamẹwe Atọ̀họ̀-Nuhihọ́ Lọ Tọn po Réveillez-vous! po lẹ ko zín otàn po numimọ Kunnudetọ susu he ko pehẹ, bo gbẹsọ to pipehẹ nuhahun gbẹ̀mẹ tọn lẹ tọn jẹgbonu. Dile a to hosọ mọnkọtọn lẹ hia to gbesisọmẹ, hiẹ na mọdọ mẹmẹsunnu po mẹmẹyọnnu gbigbọmẹ tọn towe susu po lẹdo aihọn pé ko doakọnna awusinyẹnnamẹnu akuẹzinzan tọn, okú mẹyiwanna lẹ tọn to nugbajẹmẹji lẹ mẹ, gọna ninọmẹ ylankan awhàn whenu tọn lẹ. Mẹdevo lẹ to gbẹnọ po azọ̀n jẹmagbọ lẹ po. Mẹsusu ma sọgan wà nuhe bọawu hugan to gbẹ̀mẹ delẹ he mẹhe tin to gángán lẹ nọ yí nukun pẹvi do pọ́n lẹ. Awutu yetọn nọ whlé yé pọ́n taun, titengbe to whenuena yé ma sọgan tindo mahẹ to nuwiwa Klistiani tọn lẹ mẹ jẹ obá he mẹ yé jlo. Lehe yé nọ yọ́n pinpẹn alọgọ po godonọnamẹ mẹmẹsunnu po mẹmẹyọnnu yetọn lẹ po, jọja kavi mẹhomẹ, tọn sisosiso do sọ!
Akọ́ndonanu nọ Hẹn Ayajẹ Wá
19. Etẹwutu Paulu penugo nado jaya mahopọnna whlepọn po madogán he taidi owùn etọn lẹ po?
19 Paulu jaya nado mọ lehe Jiwheyẹwhe na ẹn huhlọn do. E dọmọ: “Yẹn na kuku yí homẹhunhun do doawagun to madogán ṣie lẹ mẹ, na huhlọn Klisti tọn nido nọte do oji e. Enẹwutu wẹ yẹn do yí homẹvivi to madogán lẹ mẹ, to vlẹko lẹ mẹ, to matindo lẹ mẹ, to homẹkẹn lẹ mẹ, to awusinyẹn lẹ mẹ na Klisti tọn wutu: na whenuena yẹn yin madogánnọ, whenẹnu wẹ yẹn yin huhlọnnọ.” (2 Kọlintinu lẹ 12:9, 10) Na numimọ mẹdetiti tọn etọn lẹ wutu, Paulu sọgan dọ po jidide po dọmọ: “E mayin dọ yẹn to didọ to ohẹ́n tọn mẹ gba: na yẹn ko plọn dọ otẹn depope mẹ yẹn te, ma [tindo pekọ] to e mẹ. Yẹn yọ́n le yè nọ zín mẹde dai do, yẹn sọ yọ́n le yè nọ sudeji do: to ofi popo, podọ to onú popo mẹ wẹ yè plọn mi nado dù gọ́hò, podọ nado nọ nọ̀ huvẹ nado sudeji, podọ nado jiya ohẹ́n jijẹ tọn. Yẹn sọgan wà onú popo gbọn [omẹ lọ he nọ namẹ huhlọn gblamẹ].”—Filippinu lẹ 4:11-13.
20, 21. (a) Naegbọn mí na mọ ayajẹ to ayihamẹlinlẹnpọn do ‘nuhe yè ma mọ lẹ’ ji mẹ? (b) Etẹwẹ yin delẹ to ‘nuhe yè ma mọ’ he hiẹ to todo nado mọ to Paladisi aigba ji tọn mẹ?
20 Enẹwutu, gbọn akọ́ndidona owùn yẹhiadonu tọn depope he tin to agbasalan mítọn mẹ dali, mí sọgan mọ ayajẹ susugege to didohia mẹlẹpo dọ huhlọn Jehovah tọn to yinyin hinhẹn sọgbe to madogán mítọn mẹ. Paulu wlan dọmọ: ‘Mí ma yọ́n nudikọ . . . Ṣigba yè to gbẹtọ mítọn homẹ tọn hẹn jẹ yọyọ egbesọegbesọ. Na nukunbibia mítọn yin ojlẹ gli tọn, ehe tin na nukunwhiwhe dopo, to azọ́n kiklo po gigo pinpẹn madopodo he hugan po wà na mí; sọle mí . . . to nuhe yè ma mọ lẹ pọ́n. Na nuhe yè ma to mimọ lẹ wẹ madopodo tọn.’—2 Kọlintinu lẹ 4:16-18.
21 Suhugan omẹ Jehovah tọn lẹ to egbehe to todo nado nọgbẹ̀ to Paladisi aigba ji tọn de mẹ bo duvivi dona he Jiwheyẹwhe ko dopagbe lẹ tọn. Mí sọgan pọ́n dona mọnkọtọn lẹ hlan to egbehe taidi ‘nuhe yè ma mọ lẹ.’ Ṣigba, ojlẹ lọ to sisẹpọ po awuyiya po to whenuena mí na yí nukun mítọn lẹ do mọ dona enẹlẹ, mọwẹ, bosọ duvivi yetọn kakadoi. Dona mọnkọtọn dopo wẹ kọgbọ tẹgbẹ̀ tọn sọn whlepọn he taidi owùn nkọtọn lẹ si! Visunnu Jiwheyẹwhe tọn na “gbà azọ́n Lẹgba tọn sudo” bo na “hù mẹhe tindo huhlọn okú tọn sudo.”—1 Johanu 3:8; Heblu lẹ 2:14.
22. Jidide po gbemima tẹ po wẹ mí dona tindo?
22 Enẹwutu, mì gbọ mí ni to pipehẹ owùn depope he to yasana mí to agbasalan mítọn mẹ to egbehe zọnmii. Taidi Paulu, mí na tindo huhlọn nado wàmọ gbọn Jehovah, he nọ na mí huhlọn to susugege mẹ gblamẹ. To whenuena mí na to gbẹnọ to Paladisi aigba ji tọn mẹ, mí na dona Jehovah Jiwheyẹwhe mítọn egbesọegbesọ na azọ́njiawu etọn lẹpo do ota mítọn mẹ.—Psalm 103:2.
[Nudọnamẹ odò tọn]
a Pọ́n hosọ lọ “D’après la Bible. . . Comment faire face au désespoir,” to zinjẹgbonu Réveillez-vous! 8 mai 2000 tọn mẹ.
Nawẹ Hiẹ Na Na Gblọndo Gbọn?
• Etẹwutu podọ nawẹ Lẹgba nọ tẹnpọn nado hẹn tenọgligo-hinhẹn Klistiani nugbo lẹ tọn gble gbọn?
• Nawẹ huhlọn Jehovah tọn nọ yin ‘hinhẹn sọgbe to madogán’ mẹ gbọn?
• Nawẹ mẹho lẹ po mẹdevo lẹ po sọgan na tuli mẹhe to nuhahun tindo lẹ gbọn?
[Apotin to weda 18]
Paulu hodẹ̀ whlaatọ̀n dọ Jiwheyẹwhe ni de owùn he tin to agbasalan emitọn mẹ sẹ