Kanbiọ lẹ sọn Wehiatọ lẹ Dè

Apọsteli Paulu dọ dọ “yè na whlẹn Islaeli lẹpo gán.” (Lom. 11:26) Be nuhe dọ e te wẹ yindọ ojlẹ de na wá bọ Ju lẹpo na lẹzun Klistiani ya?

Lala, e ma yin nuhe dọ Paulu te niyẹn gba. Taidi akọta de, kúnkan Ablaham tọn jọnun lẹ gbẹ́ Jesu dai taidi Mẹssia lọ. Podọ to owhe he bọdo okú Jesu tọn go lẹ mẹ, e họnwun dọ Ju lẹpo to pọmẹ ma na lẹzun Klistiani gba. Etomọṣo, hodidọ Paulu tọn dọ “yè na whlẹn Islaeli lẹpo gán” sọgbe. Gbọnna?

Jesu dọna sinsẹ̀ngán Ju azán etọn gbè tọn lẹ dọmọ: “Yè na yí ahọludu Jiwheyẹwhe tọn sọn mì dè, yè nasọ yí na akọta de he na de sinsẹ́n etọn jẹgbonu.” (Mat. 21:43) Na akọta Islaeli tọn blebu gbẹ́ Jesu dai wutu, Jehovah na lẹ́ ayidonugo etọn hlan akọta yọyọ de, yèdọ akọta gbigbọmẹ tọn de. Paulu ylọ akọta ehe dọ “Islaeli Jiwheyẹwhe tọn.”—Gal. 6:16.

Wefọ Owe-wiwe Glẹki tọn devo lẹ dohia dọ “Islaeli Jiwheyẹwhe tọn” enẹ bẹ Klistiani yí gbigbọ do de 144 000 hẹn. (Lom. 8:15-17; Osọhia 7:4) Wefọ Osọhia 5:9, 10 tọn zinnudeji dọ pipli ehe na bẹ mẹhe ma yin Ju lẹ hẹn, na e dohia dọ Klistiani yiamisisadode lẹ wá “sọn akọta lẹpo mẹ, sọn ogbè lẹpo mẹ, sọn gbẹtọ lẹpo mẹ, podọ sọn aigba lẹpo ji.” Na taun tọn, hagbẹ Islaeli gbigbọmẹ tọn lọ tọn lẹ yin dide nado sọgan yin yíyí do ‘doahọlu podọ yẹwhenọ bo nasọ to ahọludu do aigba ji.’ Dile etlẹ yindọ Jehovah gbẹ́ Islaeli dai taidi akọta dide etọn, dopodopo Ju lẹ tọn sọgan gbọwhẹ hẹ ẹ. Nuhe gando apọsteli lẹ po Klistiani dowhenu tọn susu devo lẹ po go niyẹn. E họnwun dọ Ju enẹlẹ dona yin fifligọ po ohùn Jesu Klisti tọn po, dile e yin do na gbẹtọvi he pò lẹpo.—1 Tim. 2:5, 6; Heb. 2:9; 1 Pita 1:17-19.

Nugbo lọ dọ suhugan Juvi jọnun lẹ tọn to owhe kanweko tintan whenu hẹn dotẹnmẹ hundote lọ nado lẹzun gandutọgbẹ́ hẹ Jesu bu ma glọnalina lẹndai Jiwheyẹwhe tọn gba. Ehe ma sọgan jọ, na Jehovah dọ gbọn yẹwhegán etọn gblamẹ dọmọ: “Mọkẹdẹ wẹ ohó ṣie he tọ́n sọn onù ṣie na te: e ma na lẹgọ wá dè e agbá, ṣigba e na dotana nuhe yẹn jlo, e na wà dagbe to nuhe mẹ yẹn do e hlan te.”—Isa. 55:11.

Enẹ yin nugbo gando lẹndai Jiwheyẹwhe tọn go nado yí gandutọgbẹ́ 144 000 lẹ do doahọlu to pọmẹ hẹ Ovi etọn to olọn mẹ. Biblu hẹn ẹn họnwun dọ Jiwheyẹwhe na yiamisisadode gbẹtọ 144 000 ehelẹ to gigọ́ mẹ. Dopo ma to na whè!—Osọhia 14:1-5.

Enẹwutu, to whenuena Paulu wlan dọ “yè na whlẹn Islaeli lẹpo gán,” e ma to didọdai dọ Ju lẹpo na lẹzun Klistiani gba. Kakatimọ, nuhe dọ e te wẹ yindọ lẹndai Jiwheyẹwhe tọn dọ Islaelivi gbigbọmẹ tọn 144 000 na dugán hẹ Ovi Etọn, Jesu Klisti, to olọn mẹ na yin hinhẹndi. To ojlẹ sisọ Jiwheyẹwhe tọn mẹ, sọha pipé mẹyiamisisadode lẹ tọn—yèdọ “Islaeli lẹpo”—na ko yin whinwhlẹngán, bo na wá dugán taidi ahọlu podọ yẹwhenọ to Ahọluduta Mẹssia tọn mẹ.—Efe. 2:8.

[Yẹdide to weda 28]

Mẹyiamisisadode lẹ wá “sọn akọta lẹpo mẹ, sọn ogbè lẹpo mẹ, sọn gbẹtọ lẹpo mẹ, podọ sọn aigba lẹpo ji”