Be E Ylan Nado Yí Oyín Jiwheyẹwhe Tọn Zan Wẹ Ya?

TO Owe-wiwe Heblu tọn, he nọ saba yin alọdlẹndo taidi “Alẹnu Hoho” lọ mẹ, oyín Jiwheyẹwhe tọn sọawuhia diblayi whla 7 000 po wekun ehelẹ po יהוה (he nọ yin hihia sọn adusi mẹ wá amiyọn mẹ). To hogbe devo mẹ, wekun Heblu tọn ẹnẹ, yèdọ Yohdh, He, Waw, po He po he nọ yin lilẹdo YHWH to paa mẹ wẹ nọtena oyín Jiwheyẹwhe tọn.

To hohowhenu, Ju lẹ de otangblo de tọ́n dọ e ma sọgbe nado yí oyín Jiwheyẹwhe tọn zan. Taidi kọdetọn de, yé gbẹ́ nado nọ ylọ oyín lọ, bosọ jẹ hogbe devo lẹ yizan do otẹn etọn mẹ ji to owe yetọn lẹ mẹ. Ṣigba, lẹdogbedevomẹ-basitọ Biblu tọn susu ko lẹ́ oyín lọ do gbedevomẹ dọ “Yahweh,” kavi “Jehovah.” Dopo to lẹdogbedevomẹ he wàmọ lẹ mẹ wẹ Biblu Wiwe Lọ—Gun Alada. Sọgbe hẹ lẹdogbedevomẹ ehe, whenue Mose kanse Jiwheyẹwhe nuhe e na gblọnna Islaelivi lẹ eyin yé kàn mẹhe do e hlan yé dè sè e, Jiwheyẹwhe dọmọ: “Le wẹ hiẹ na dọhlan ovi Islaeli tọn lẹ, Jehovah Jiwheyẹwhe otọ́ mìtọn lẹ tọn, Jiwheyẹwhe Ablaham tọn, Jiwheyẹwhe Isaki tọn, podọ Jiwheyẹwhe Jakobu tọn, ko do mi hlan mì dè. Ehe wẹ oyín ṣie kakadoidoi ehe sọ wẹ oflin ṣie hlan whẹndo lẹpo.”—Eksọdusi 3:15, nudọnamẹ odò tọn.

Dile Jesu to dẹ̀ho, e dọ gando lehe e nọ yí oyín Jiwheyẹwhe tọn zan do go dọmọ: “Yẹn sọ hẹn oyín towe zun yinyọnẹn hlan yé, bo nasọ hẹn ẹn zun yinyọnẹn.” Podọ to nuhe nọ yin yiylọ to paa mẹ dọ odẹ̀ Oklunọ tọn mẹ, Jesu dọmọ: “Otọ́ mítọn he tin to olọn mẹ, hihiọ [kavi wiwe] wẹ oyín towe.”—Johanu 17:26; Matiu 6:9.

Eyin mọ wẹ, e sọgan paṣa mí nado yọnẹn dọ to owe etọn agọe tọn lọ Jesus of Nazareth mẹ, Papa Benoît XVI dọ gando yizan oyín Jiwheyẹwhe tọn go dọmọ: “Owhẹ̀ Islaelivi lẹ tọn . . . whẹ́n mlẹnmlẹn to whenuena yé gbẹ́ nado ylọ oyín mẹdetiti Jiwheyẹwhe tọn ehe, he yin hogbe lọ YHWH, ma nado dike e ni yìdo taidi oyín yẹwhe kosi lẹ tọn. To aliho dopolọ mẹ, e ma sọgbe dọ lẹdogbedevomẹ Biblu tọn agọe tọn delẹ yí oyín—he Islaelivi lẹ nọ pọnhlan taidi nudabla he ma yọ́n ylọ—ehe zan taidi oyín hoho de poun.”

Etẹwẹ hiẹ lẹn? Be e sọgbe nado yí oyín Jiwheyẹwhe tọn zan ya? Kavi e ma sọgbe? Eyin Jehovah lọsu dọ dọ: “Ehe wẹ oyín ṣie kakadoidoi ehe sọ wẹ oflin ṣie hlan whẹndo lẹpo,” be mẹde tindo jlọjẹ nado jẹagọdo e ya?

[Yẹdide to weda 30]

Jesu nọ yí oyín Jiwheyẹwhe tọn zan to odẹ̀ mẹ