Dọnsẹpọ Jiwheyẹwhe
Be Nudepope Sọgan “Klan Mí sọn Owanyi Jiwheyẹwhe Tọn” mẹ Ya?
MẸNU to mí mẹ wẹ ma na jlo dọ yè ni yiwanna ẹn? Na nugbo tọn, homẹ mítọn nọ hùn eyin hagbẹ whẹndo tọn lẹ kavi họntọn mítọn lẹ yiwanna mí. Ṣigba e blawu dọ, to whedelẹnu haṣinṣan gbẹtọvi lẹ tọn nọ yawu gble kavi ma nọ dẹn-to-aimẹ. Mẹyiwanna mítọn lẹ sọgan hẹn homẹ gble mí, gbẹkọ mí go kavi tlẹ gbẹ́ mí dai. Ṣogan, mẹde tin he owanyi etọn ma nọ diọ. Owanyi he Jehovah Jiwheyẹwhe tindo na sinsẹ̀n-basitọ etọn lẹ yin zẹẹmẹ basina to aliho he họnwun de mẹ to Lomunu lẹ 8:38, 39 mẹ.
“Yè hẹn mi yọnẹn dọ,” wẹ apọsteli Paulu wlan. Etẹwẹ yè hẹn ẹn yọnẹn? Dọ nudepope ma sọgan “klan mí sọn owanyi Jiwheyẹwhe tọn” mẹ. Paulu ma to ohó ede kẹdẹ tọn dọ gba, ṣigba mílọsu tọn ga—enẹ wẹ mẹhe to Jiwheyẹwhe sẹ̀n po nugbonọ-yinyin po lẹpo tọn. Nado zinnudo nuhe dọ e te ji, Paulu slẹ onú sọha delẹ he ma sọgan glọnalina owanyi Jehovah tọn nado jẹ devizọnwatọ nugbonọ etọn lẹ dè.
“Okú, kavi ogbẹ̀.” Owanyi he Jehovah tindo na omẹ etọn lẹ ma nọ doalọte to whenuena yé kú. Nado dohia dọ emi yiwanna yé, Jiwheyẹwhe nọ hẹn omẹ enẹlẹ do oflin etọn mẹ, podọ ewọ na hẹn yé gọwá ogbẹ̀ to aihọn yọyọ dodowiwa tọn he ja lọ mẹ. (Johanu 5:28, 29; Osọhia 21:3, 4) To egbehe, owanyi he Jiwheyẹwhe tindo na sinsẹ̀n-basitọ nugbo etọn lẹ ma nọ diọ mahopọnna nudepope he sọgan jọ do yé go to titonu ylankan ehe mẹ.
“Kavi angẹli lẹ, kavi ogán lẹ.” Mẹhe tindo huhlọn kavi he tin to otẹn aṣẹpipa tọn mẹ lẹ sọgan yinuwado gbẹtọvi lẹ ji, ṣigba yé ma sọgan yinuwado Jehovah ji gba. Nudida gbigbọnọ huhlọnnọ lẹ, etlẹ yin angẹli he wá lẹzun Satani, ma sọgan diọlinlẹnna Jiwheyẹwhe nado yiwanna sinsẹ̀n-basitọ etọn lẹ. (Osọhia 12:10) Mọjanwẹ ogán tonudidọ tọn lẹ, he nọ diọnukunsọ Klistiani nugbo lẹ to whedelẹnu, ma sọgan diọ pọndohlan he Jiwheyẹwhe tindo gando sinsẹ̀n-basitọ etọn lẹ go do niyẹn.—1 Kọlintinu lẹ 4:13.
“Kavi onú whenu ehe tọn lẹ, kavi nuhe ja lẹ.” Owanyi Jiwheyẹwhe tọn ma nọ depò dile ojlẹ lẹ to yìyì gba. Nudepope ma sọgan jọ do devizọnwatọ Jiwheyẹwhe tọn lẹ go to egbehe kavi to sọgodo he na zọ́n bọ Jiwheyẹwhe ma nasọ yiwanna yé ba.
“Kavi huhlọn lẹ.” Hogbe Glẹki tọn he yin yiylọdọ “huhlọn” tofi tindo zẹẹmẹ he gbloada. Depope he zẹẹmẹ lọ sọgan yin, onú dopo họnwun: Huhlọn depope ma tin to olọn mẹ kavi to aigba ji he sọgan glọnalina owanyi he Jiwheyẹwhe tindo na omẹ etọn lẹ.
“Kavi aga, kavi odò.” Jehovah nọ yiwanna omẹ etọn lẹ mahopọnna ninọmẹ depope he mẹ yé mọ yede te.
“Kavi nudida devo de.” Po hogbe ehelẹ po, Paulu to didohia dọ nudepope ma sọgan klan sinsẹ̀n-basitọ nugbonọ lẹ sọn owanyi Jehovah tọn mẹ.
To vogbingbọn mẹ na owanyi gbẹtọ tọn, he sọgan diọ kavi depò, owanyi he Jiwheyẹwhe tindo na mẹhe to dindin in po yise po lẹ ma nọ diọ; e nọ gbọṣi aimẹ kakadoi. Na jide tọn, ehe yinyọnẹn nọ whàn mí nado dọnsẹpọ Jehovah dogọ bo wà nuhe go mí pé lẹpo nado do owanyi mítọn hia ẹ.