Hẹn Alọwle Towe Tin Taidi “Okàn Atọ̀n-Slodopọ”
“Okàn atọ̀n-slodopọ ma yá winwẹ́n.”—YẸWH. 4:12.
1. Mẹnu wẹ kọ̀n sunnu po yọnnu tintan lọ po dopọ to alọwle mẹ?
TO WHENUENA Jehovah Jiwheyẹwhe ko dá atin po kanlin lẹ po godo, e dá sunnu tintan lọ, Adam. To nukọn mẹ, Jiwheyẹwhe hẹn Adam damlọn yìkànmẹ bo yí dopo to adàjahú Adam tọn lẹ mẹ do wleawuna alọgọtọ pipé de na ẹn. Whenuena Adam mọ alọgọtọ enẹ, e dọmọ: “Ehe wẹ dinvie ohú sọn ohú ṣie lẹ mẹ, podọ olàn sọn olàn ṣie mẹ.” (Gẹn. 1:27; 2:18, 21-23) Jehovah hùnhomẹ do nudida etọn ehe go, bo kọ̀n sunnu po yọnnu tintan lọ po dopọ to alọwle mẹ bosọ dona yé.—Gẹn. 1:28; 2:24.
2. Nawẹ Satani hẹn nuhahun wá Adam po Evi po ṣẹnṣẹn gbọn?
2 E blawu dọ to ojlẹ vude godo, tito alọwle tọn he Jiwheyẹwhe zedai yin nukundiọsọ. Gbọnna? Nudida gbigbọnọ ylankan he wá lẹzun Satani klọ Evi nado dù sọn atin dopo gee he osẹ́n etọn yin dido na asu po asi po lọ mẹ. Enẹgodo, Adam kọnawudopọ hẹ asi etọn to tolivivẹ etọn mẹ, bọ yé gbọnmọ dali ṣiatẹ sọta jlọjẹ Jiwheyẹwhe tọn nado dugán bo deanana yé. (Gẹn. 3:1-7) To whenuena Jehovah kàn nuhe jọ lọ sè yé, e họnwun dọ haṣinṣan Adam po Evi po tọn ko jẹ gbigble ji. Adam bli owhẹ̀ lọ do asi etọn ji dọmọ: “Yọnnu he hiẹ na nado nọhẹ mi, ewọ wẹ na mi sọn atin lọ mẹ, yẹn sọ dù.”—Gẹn. 3:11-13.
3. Pọndohlan agọ̀ tẹwẹ Ju delẹ tindo?
3 To owhe kanweko lẹ gblamẹ, Satani ko kàn ayiha gigẹdẹ voovo nado hẹn gbemanọpọ susu wá alọwlemẹ lẹ ṣẹnṣẹn. Di apajlẹ, e ko yí sinsẹ̀ngán lẹ zan to whedelẹnu nado hẹn pọndohlan he ma sọgbe hẹ Owe-wiwe lẹ gbayipe gando alọwle go. Nukọntọ Ju lẹ tọn delẹ dovọ́na nujinọtedo Jiwheyẹwhe tọn lẹ, bo nọ nagbè asu lẹ nado gbẹ́ asi yetọn lẹ na numadinu delẹ wutu, taidi eyin yọnnu lọ danú bọ e vẹ́jẹ̀. Ṣigba Jesu zinnudeji dọmọ: “Mẹdepope he na jo asi etọn dai, adavo na whẹho galilọ tọn, bosọ wlealọhẹ devo, e deayọ.”—Mat. 19:9.
4. Nawẹ tito alọwle tọn yin nukundiọsọ to egbehe gbọn?
4 Satani gbẹ́ pò to vivẹnudo nado hẹn gbakija wá whẹndo lẹ mẹ. Omẹ vijinu dopolọ tọn lẹ to alọwle to osẹ́n-liho, mẹhe ma ko wlealọ lẹ to pọnọ, podọ alọwlemẹ lẹ nọ gbẹ́ yede po awubibọ po; ehe lẹpo dohia dọ Satani to kọdetọn dagbe susu tindo to adà ehe mẹ. (Hia Heblu lẹ 13:4.) Taidi Klistiani, etẹwẹ mí sọgan wà na pọndohlan agọ̀ he gbayipe gando alọwle go ehelẹ nikaa yinuwado mí ji? Mì gbọ mí ni gbadopọnna delẹ to nuhe sọgan hẹn alọwle de yin ayajẹnọ podọ kọdetọn dagbenọ lẹ mẹ.
Natẹn Jehovah to Alọwle Towe Mẹ
5. Eyin hogbe lọ “okàn atọ̀n-slodopọ” yin yiyizan gando alọwle go, etẹwẹ e nọ zẹẹmẹdo?
5 Whẹpo alọwle de na do tindo kọdetọn dagbe, asu po asi po lọ dona natẹn Jehovah to haṣinṣan yetọn mẹ. Ohó Jiwheyẹwhe tọn dọmọ: “Okàn atọ̀n-slodopọ ma yá winwẹ́n.” (Yẹwh. 4:12) “Okàn atọ̀n-slodopọ” yin hogbe yẹhiadonu tọn de. Eyin yẹhiadonu ehe yin yiyizan gando alọwle go, e nọ bẹ asu po asi po hẹn, yèdọ okàn awe tintan lẹ, he nọ yin linlọ̀n lẹdo okàn ṣẹnṣẹn mẹ tọn lọ he nọtena Jehovah Jiwheyẹwhe. Eyin asu po asi po de natẹn Jiwheyẹwhe to haṣinṣan yetọn mẹ, yé nọ lodo to gbigbọmẹ bo nọ penugo nado duto nuhahun lẹ ji, podọ enẹ wẹ aṣli ayajẹ daho hugan lọ tọn to alọwle mẹ.
6, 7. (a) Etẹwẹ Klistiani lẹ sọgan wà nado hẹn ẹn diun dọ Jiwheyẹwhe tin to alọwle yetọn mẹ? (b) Etẹwẹ mẹmẹyọnnu de yiwanna hugan to asu etọn mẹ?
6 Ṣigba etẹwẹ asu po asi po de sọgan wà nado hẹn ẹn diun dọ alọwle yetọn taidi okàn atọ̀n-slodopọ? Psalm-kàntọ Davidi jihàn dọmọ: “Homẹ ṣie hùn nado wà ojlo towe, Jiwheyẹwhe ṣie E: nugbo, osẹ́n towe tin to yẹn homẹ dọ́n.” (Ps. 40:8) Owanyi mítọn na Jiwheyẹwhe nọ whàn mílọsu nado sẹ̀n ẹn po ahun lẹpo po. Enẹwutu, alọwlemẹ awe lẹ dona wleawuna haṣinṣan mẹdetiti tọn pẹkipẹki de hẹ Jehovah bo nọ hùnhomẹ nado wà ojlo etọn. Alọwlemẹ dopodopo sọ dona dovivẹnu nado hẹn owanyi he awetọ etọn tindo na Jiwheyẹwhe siso deji.—Howh. 27:17.
7 Eyin osẹ́n Jiwheyẹwhe tọn tin to ohò mítọn mẹ nugbonugbo, mí na nọ do jẹhẹnu delẹ hia taidi yise, todido po owanyi po, podọ enẹ na gọalọ nado hẹn kanṣiṣa alọwle mítọn tọn lodo. (1 Kọl. 13:13) Sandra, mẹmẹyọnnu de he ko wlealọ sọn owhe 50 die, dọmọ: “Nuhe n’yiwanna hugan to asu ṣie mẹ wẹ anademẹ po ayinamẹ gbigbọmẹ tọn he e nọ na mi lẹ po, gọna owanyi etọn na Jehovah, he sinyẹn hugan owanyi he e tindo na mi.” Mì asu lẹ emi, be asi mìtọn lẹ sọgan dọ nudopolọ gando mì go ya?
8. Etẹwẹ alọwlemẹ lẹ dona wà nado mọ “ale dagbe de” yí?
8 Taidi asu po asi po, be mì nọ ze gbigbọnu lẹ po onú Ahọluduta lọ tọn lẹ po do otẹn tintan mẹ to gbẹzan mìtọn mẹ ya? Humọ, be mì nọ pọ́n alọwlemẹ mìtọn taidi azọ́nwatọgbẹ́ mìtọn to sinsẹ̀nzọn Jehovah tọn mẹ nugbonugbo ya? (Gẹn. 2:24) Ahọlu nuyọnẹntọ Sọlọmọni wlan dọmọ: “Omẹ awe pọnte hú mẹdopo; na yé tindo ale dagbe de na magbọjẹ yetọn.” (Yẹwh. 4:9) Na nugbo tọn, asu po asi po de dona nọ dovivẹnu nado mọ “ale dagbe de” yí, enẹ wẹ kanṣiṣa owanyi tọn he na dẹn-to-aimẹ de, ehe Jiwheyẹwhe nọ dona.
9. (a) Azọngban tẹlẹ wẹ asu lẹ tindo? (b) Sọgbe hẹ Kọlọsinu lẹ 3:19, nawẹ asu de dona nọ yinuwa hẹ asi etọn gbọn?
9 Dopo to nuhe nọ dohia dọ Jiwheyẹwhe tin to alọwle de mẹ wẹ vivẹnu he asu po asi po lọ to dido nado jẹ nubiọtomẹsi Jiwheyẹwhe tọn lẹ kọ̀n. Na taun tọn, asu lẹ wẹ tindo azọngban lọ nado penukundo whẹndo yetọn go to agbasa-liho podọ to gbigbọ-liho. (1 Tim. 5:8) Yé sọ yin tulina nado nọ hò nuhudo asi yetọn lẹ tọn pọ́n to numọtolanmẹ-liho. Mí hia to Kọlọsinu lẹ 3:19 mẹ dọmọ: “Mì asu lẹ, mì yiwanna asi mìtọn lẹ, mì sọ fiẹ do yé go blo.” Weyọnẹntọ Biblu tọn de dọ dọ hogbe lọ “fiẹ” zẹẹmẹdo “nado nọ yí hogbe kàunkàun lẹ zan na yé, kavi linú yé, bosọ gboawupo nado do owanyi, mẹtọnhopọn, nukunpedomẹgo, hihọ́-basinamẹ po godonọnamẹ po hia yé.” E họnwun dọ walọ mọnkọtọn ma sọgbe to whẹndo Klistiani tọn mẹ. Eyin asu de nọ yí tatọ́-yinyin etọn zan to aliho owanyi tọn mẹ, asi etọn na tin to gbesisọ mẹ nado litaina ẹn.
10. Gbigbọ tẹwẹ asi Klistiani lẹ dona nọ dohia?
10 Asi Klistiani he jlo dọ Jehovah ni tin to alọwle yetọn mẹ lẹ lọsu dona nọ dovivẹnu nado jẹ nubiọtomẹsi Jiwheyẹwhe tọn lẹ kọ̀n. Apọsteli Paulu wlan dọmọ: “Mì asi lẹ emi, mì nọ basi mẹmẹglọ hlan asu mìtọn lẹ taidi hlan Oklunọ. Na asu wẹ ota asi tọn dile Klisti yin ota agun tọn do.” (Efe. 5:22, 23) Satani klọ Evi, bo dolalo dọ mẹdekannujijẹ sọn Jiwheyẹwhe dè na hẹn ayajẹ tẹgbẹ tọn wá na ẹn. Mí to gbigbọ mẹdekannujẹ tọn mọ hezeheze to alọwle susu mẹ to egbehe. Ṣigba, na yọnnu budisi Jiwheyẹwhe tọ́ lẹ, awuvivinu wẹ e nọ yin nado litaina tatọ́ owanyinọ yetọn. Yé nọ flindọ Jehovah de Evi taidi “alọgọtọ de” na asu etọn, podọ e họnwun dọ otẹn yẹyi tọn de wẹ ehe yin to nukun Jiwheyẹwhe tọn mẹ. (Gẹn. 2:18) Na nugbo tọn, asi Klistiani he nọ kọngbedopọ hẹ tito enẹ sọn ojlo mẹ wá nọ yin “jẹgbakun de” na asu etọn.—Howh. 12:4.
11. Etẹwẹ mẹmẹsunnu de dọ dọ e gọalọna alọwle etọn?
11 Onú devo he nọ gọalọ nado natẹn Jiwheyẹwhe to alọwle de mẹ wẹ nado nọ plọn Ohó Jiwheyẹwhe tọn dopọ. Gerald, he ko yin alọwlemẹ ayajẹnọ de sọn owhe 55 die, dọmọ: “Nuhe nọ hẹn alọwle tindo kọdetọn dagbe hugan wẹ nado nọ hia Biblu bo nọ plọn ẹn dopọ.” E yidogọ dọ, “Nulẹ wiwà dopọ, titengbe gbigbọnu lẹ, nọ dọ̀n alọwlemẹ lẹ sẹpọ yede podọ sẹpọ Jehovah dogọ.” Biblu pinplọn dopọ nọ gọalọna whẹndo lọ nado hẹn nujinọtedo Jehovah tọn lẹ do ayiha mẹ gligli, bo nọ yidogọna gbigbọnọ-yinyin yetọn, bosọ nọ gọalọna yé nado to nukọnzindo.
12, 13. (a) Naegbọn dẹ̀hiho to pọmẹ do yin nujọnu sọmọ na asu po asi po lẹ? (b) Nuwiwa gbigbọmẹ tọn devo tẹlẹ wẹ sọ nọ hẹn alọwle lodo?
12 Asu po asi po ayajẹnọ lẹ sọ nọ hodẹ̀ dopọ. Eyin asu de nọ ‘kọ̀n ayiha etọn jẹgbonu’ po obiọ tangan he gando ninọmẹ yetọn go lẹ po, enẹ na hẹn kanṣiṣa alọwle lọ tọn lodo. (Ps. 62:8) Di apajlẹ, lehe e na bọawu hugan nado wọnji gbemanọpọ depope he hiẹ tindo hẹ alọwlemẹ towe go to whenuena mì ko dín anademẹ Ganhunupotọ lọ tọn to pọmẹ godo do sọ! (Mat. 6:14, 15) To kọndopọ mẹ hẹ odẹ̀ he mì hò lọ, e na sọgbe dọ alọwlemẹ dopodopo ni magbe nado gọalọna omẹ awetọ podọ nado ‘nọ sinyẹnlin hẹ ode awetọ, bo nọ jona ode awetọ.’ (Kọl. 3:13) Mì flindọ dẹ̀hiho nọ dohia dọ mì ganjẹ Jiwheyẹwhe go. Ahọlu Davidi dọmọ: “Nukun mẹpopo tọn nọte to pinpọn we.” (Ps. 145:15) Eyin mí lẹhlan Jiwheyẹwhe to odẹ̀ mẹ po todido po, magbọjẹ mítọn lẹ na depò, na mí yọnẹn dọ ‘ewọ to tukla mítọn jẹ.’—1 Pita 5:7.
13 Aliho titengbe devo nado natẹn Jehovah to alọwle de mẹ wẹ nado nọ yì opli agun tọn lẹ bo nọ wazọ́n dopọ to lizọnyizọn lọ mẹ. To opli mítọn lẹ ji, asu po asi po lẹ nọ plọn lehe yé sọgan duto “bublu” he Satani to yiyizan nado klan whẹndo lẹ ji do. (Efe. 6:11) Podọ asu po asi po he nọ wazọ́n dopọ whẹwhẹ to lizọnyizọn lọ mẹ lẹ nọ plọn nado “yin tenọglinọ, masẹafọ.”—1 Kọl. 15:58.
Eyin Nuhahun lẹ Fọ́n
14. Etẹlẹ wẹ sọgan hẹn nuhahun wá alọwle mẹ?
14 Nugbo wẹ dọ, ayinamẹ he yin nina to aga lọ lẹ sọgan nọma yin nuyọyọ, ṣigba naegbọn hiẹ ma na dọhodo yé ji hẹ alọwlemẹ towe po awuvivo po? Tẹnpọn nado mọ eyin adà delẹ biọ ayidonugo dogọ to alọwle towe mẹ. Etomọṣo, Biblu lọsu dọ dọ mẹhe tlẹ nọ natẹn Jiwheyẹwhe to alọwle yetọn mẹ lẹ “na tindo tukla to agbasalan mẹ.” (1 Kọl. 7:28) Na mape gbẹtọvi tọn, nuyiwadomẹji ylankan aihọn mawadodo tọn ehe tọn, po omọ̀ Lẹgba tọn lẹ po wutu, alọwle devizọnwatọ nugbonọ Jiwheyẹwhe tọn lẹ tọn lọsu sọgan biọ nuhahun sinsinyẹn mẹ. (2 Kọl. 2:11) Ṣigba Jehovah nọ gọalọna mí nado duto nuhahun mọnkọtọn lẹ ji. Mọwẹ, mí sọgan duto yé ji. Dawe nugbonọ lọ Job hẹn kanlinpa, devi po ovi etọn lẹ po bu. Ṣogan, Biblu dọmọ: “To ehe lẹpo mẹ Job ma waylando, kavi yí nulú do dowhẹ Jiwheyẹwhe gba.”—Job 1:13-22.
15. Nawẹ nuhahun gbẹ̀mẹ tọn lẹ sọgan hẹnmẹ yinuwa gbọn, podọ nawẹ alọwlemẹ lẹ sọgan pehẹ ehe po kọdetọn dagbe po gbọn?
15 To alọ devo mẹ, asi Job tọn dọna ẹn dọmọ: “Be hiẹ gbẹsọ hẹn walọ pipé towe go gligli? Gbẹ́ Jiwheyẹwhe dai, bo kú.” (Job 2:9) Na nugbo tọn, to whenuena nugbajẹmẹji kavi ninọmẹ sinsinyẹn lẹ fọndote, ayimajai he nọ bọdego lọ sọgan hẹn mẹde yinuwa to aliho nulú tọn mẹ. “Awusinyẹnnamẹ hẹn nuyọnẹntọ dalẹ,” wẹ dawe nuyọnẹntọ lọ dọ. (Yẹwh. 7:7) Eyin alọwlemẹ towe jẹ hogbe fifiẹ tọn lẹ yizan ji na kọgbidinamẹ kavi “awusinyẹnnamẹ” gbẹ̀mẹ tọn delẹ wutu, tẹnpọn bo duto dewe ji. Gblọndo nina ẹn to aliho dopolọ mẹ sọgan hẹn dopo to mì mẹ kavi mì omẹ awe lẹpo nado dọ nude he na hẹn ninọmẹ lọ ylan dogọ. (Hia Psalm 37:8.) Enẹwutu, nọ dovọ́na ‘hogbe hlònọ tọn’ depope he apọ̀ kavi flumẹjijẹ sọgan hẹn alọwlemẹ towe nado dọ.—Ps. 106:33.
16. (a) Nawẹ nuhe Jesu dọ to Matiu 7:1-5 mẹ lẹ gando alọwle go gbọn? (b) Naegbọn lẹnpọn dagbenọ-yinyin do yin nujọnu to alọwle mẹ?
16 Alọwlemẹ lẹ dona yin lẹnpọn dagbenọ to nuhe yé nọ donukun sọn ode awetọ si mẹ. Alọwlemẹ dopo sọgan doayi jijọ delẹ go to omẹ awetọ si bo lẹndọ, ‘N’sọgan diọ ẹ.’ Gbọn owanyi po homẹfa po yiyizan dali, hiẹ sọgan penugo bo gọalọna alọwlemẹ towe nado basi vọjlado delẹ dile ojlẹ to yìyì. Ṣigba, ma wọn blo dọ Jesu yí mẹhe nọ ze ayidonugo do nuṣiwa flinflin mẹdevo tọn lẹ ji jlẹdo mẹhe nọ mọ “núyọ” to nukun mẹmẹsunnu etọn tọn mẹ bo ma ka doayi “atinpo” he tin to nukun ewọ lọsu tọn mẹ go. Jesu dotuhomẹna mí domọ: “Mì dawhẹ blo, na mì ma yin mẹdawhẹna . . . blo.” (Hia Matiu 7:1-5.) Ehe ma zẹẹmẹdo dọ mí dona nọ miyọnnukundo awugbopo sinsinyẹn lẹ gba. Robert, he ko wlealọ sọn nudi owhe 40 die, dọmọ: “Nado hùndonuvo bo nọ dọ hójọhó hẹ ode awetọ bosọ wleawufo nado kẹalọyi ayinamẹ he sọgbe lẹ, sọgan zọ́n bọ alọwlemẹ lẹ na basi diọdo delẹ to gbẹzan yetọn mẹ.” Enẹwutu, yin lẹnpọn dagbenọ. Kakati jijọ he alọwlemẹ towe ma tindo lẹ nido nọ hẹn we gblehomẹ, plọn nado nọ yọ́n pinpẹn jẹhẹnu dagbe he e tindo to alọnu din lẹ tọn bo nọ duvivi yetọn.—Yẹwh. 9:9.
17, 18. Eyin nuhahun lẹ jẹ susu ji, fie wẹ mí sọgan lẹhlan na alọgọ?
17 Diọdo gbẹ̀mẹ tọn lẹ sọgan hẹn whlepọn wá. Whenuena asu po asi po de jivi, yé sọgan pehẹ nuhahun delẹ. Dopo to alọwlemẹ lọ lẹ kavi ovi yetọn lẹ mẹ sọgan bẹ azọ̀n sinsinyẹn de. Mẹjitọ he to yọnhopo lẹ sọgan tindo nuhudo nukunpedomẹgo vonọtaun tọn. Ovi lẹ sọgan yì sọn whégbè to whenuena yé whẹ́n. Lẹblanulọkẹyi po azọngban yẹwhehọluduta tọn lẹ po mimọyi sọgan sọ hẹn diọdo devo lẹ wá. Diọdo ehe lẹpo sọgan hẹn kọgbidinamẹ po magbọjẹ po wá alọwle de mẹ.
18 Eyin kọgbidinamẹ he to finfọn to alọwle towe mẹ wá jẹ agbọ́ hú we ji, etẹwẹ a sọgan wà? (Howh. 24:10) A gbọjọ blo! Nuhe Satani na jlo hugan wẹ yindọ ode to devizọnwatọ Jiwheyẹwhe tọn lẹ mẹ ni gbẹkọ sinsẹ̀n-bibasi nugbo go. Homẹ etọn na tlẹ sọ hùn hugan eyin asu po asi po de jo Jehovah do. Enẹwutu, wà nuhe go a pé lẹpo nado hẹn ẹn diun dọ alọwle towe gbẹ́ tin taidi okàn atọ̀n-slodopọ. Biblu bẹ kandai mẹsusu tọn hẹn, he gbọṣi nugbonọ-yinyin mẹ mahopọnna whlepọn sinsinyẹn lẹ. Di apajlẹ, Davidi kọ̀n ahun etọn jẹgbonu na Jehovah to gbèdopo dọmọ: “Yin lẹblanunọ hlan mi, Jiwheyẹwhe E: na gbẹtọ . . . to awusinyẹnna mi.” (Ps. 56:1) Be hiẹ ko tindo numọtolanmẹ lọ dọ “gbẹtọ” to awusinyẹnna we pọ́n ya? Mahopọnna fidepope he kọgbidinamẹ lọ to wiwá sọn, vlavo sọn mẹdevo pete kavi mẹhe sẹpọ we de dè, flin dọ: Davidi mọ huhlọn nado doakọnna, podọ hiẹ lọsu sọgan wàmọ. “Yẹn dín OKLUNỌ, e siọ mi, bosọ de mi sọn nuhiha ṣie lẹpo mẹ,” wẹ Davidi dọ.—Ps. 34:4.
Dona Devo Lẹ
19. Nawẹ mí sọgan nọavunte sọta mẹgbeyinyan Satani tọn lẹ gbọn?
19 To ojlẹ opodo tọn ehe mẹ, alọwlemẹ lẹ dona ‘nọ miọnhomẹna yenọzo, bosọ nọ dó yenọzo daga.’ (1 Tẹs. 5:11) A wọnji blo dọ, Satani dọ dọ whẹwhinwhẹ́n ṣejannabi tọn lẹ wẹ nọ whàn mí nado yin nugbonọ na Jehovah. Aliho lẹpo mẹ wẹ e na gbọn, etlẹ yin gbọn gbakija alọwle tọn dali, nado hẹn tenọglinọ-yinyin mítọn na Jiwheyẹwhe gble. Nado nọavunte sọta mẹgbeyinyan Satani tọn lẹ, mí dona ze jidide mítọn lẹpo do Jehovah mẹ. (Howh. 3:5, 6) Paulu wlan dọmọ: “Yẹn sọgan wà onú popo gbọn [ewọ] he to huhlọnna mi mẹ.”—Flp. 4:13.
20. Eyin mí natẹn Jiwheyẹwhe to alọwle mítọn mẹ, dona tẹlẹ wẹ e nọ hẹnwa?
20 Eyin mí natẹn Jiwheyẹwhe to alọwle mítọn mẹ, dona susu wẹ e na hẹnwa. Ehe yin nugbo na Joel po asi etọn po he ko wlealọ sọn owhe 51 die. Joel dọmọ: “N’nọ dopẹna Jehovah to whepoponu na asi ṣie po haṣinṣan ayajẹnọ mítọn po. E ko do ede hia taidi gbẹdohẹmẹtọ he jẹna mi hugan.” Etẹwẹ yin aṣli yetọn? “Mí nọ dovivẹnu to whepoponu nado do homẹdagbe, homẹfa po owanyi po hia ode awetọ.” Depope to mí mẹ ma na pegan nado wà enẹ mlẹnmlẹn to titonu ehe mẹ. Etomọṣo, mì gbọ mí ni dovivẹnu nado nọ yí nunọwhinnusẹ́n Biblu tọn lẹ zan bo natẹn Jehovah to alọwle mítọn mẹ. Eyin mí wàmọ, alọwle mítọn na tin taidi “okàn atọ̀n-slodopọ [he] ma yá winwẹ́n.”—Yẹwh. 4:12.
Be Hiẹ Flin Ya?
• Etẹwẹ e zẹẹmẹdo nado natẹn Jehovah to alọwle de mẹ?
• Etẹwẹ alọwlemẹ lẹ dona wà eyin nuhahun lẹ fọ́n?
• Nawẹ mí nọ wagbọn do yọnẹn eyin Jiwheyẹwhe tin to alọwle de mẹ?
[Yẹdide to weda 18]
Dẹ̀hiho to pọmẹ nọ gọalọna asu po asi po lẹ nado duto ninọmẹ sinsinyẹn lẹ ji