To Susudeji to Oyọnẹn He Pegan mẹ po “Jeje” Po
DEVIZỌNWATỌ Jehovah tọn lẹpo wẹ nọ dín nukundagbe etọn. Enẹwutu, mí nọ to jejeji nado hẹn yise mítọn pọnte bo wà sinsẹ̀nzọn wiwe lọ po zohunhun po. Ṣigba, apọsteli Paulu dọ̀n ayidonugo mítọn wá owù de ji, ehe mẹ Ju delẹ jai jẹ to azán etọn gbè. E dọmọ: “Yé tindo vivẹnu Jiwheyẹwhe tọn, ṣigba e ma gbọn ali oyọnẹn [he pegan] tọn gba.” (Lom. 10:2) E họnwun dọ, yise mítọn po sinsẹ̀n-bibasi mítọn na Jehovah po ma dona sinai do numọtolanmẹ kẹdẹ ji gba. Mí dona tindo oyọnẹn he pegan Mẹdatọ mítọn po ojlo etọn po tọn.
To wekanhlanmẹ etọn devo lẹ mẹ, Paulu do kanṣiṣa he tin to walọyizan he Jiwheyẹwhe nọ kẹalọyi po jejejininọ nado mọ oyọnẹn yí po ṣẹnṣẹn hia. E hodẹ̀ dọ hodotọ Klisti tọn lẹ ni “gọ́ na [oyọnẹn he pegan]” ojlo Jiwheyẹwhe tọn nado sọgan “to zọnlinzin dole e jẹ na [Jehovah] to nukundagbe lẹpo mẹ” do, dile yé zindonukọn nado nọ “yin sinsẹ́nnọ to azọ́n dagbe lẹpo mẹ, bosọ to susu to oyọnẹn [he pegan] Jiwheyẹwhe tọn mẹ.” (Kọl. 1:9, 10) Naegbọn mí do tindo nuhudo ‘oyọnẹn he pegan’ tọn sọmọ? Podọ naegbọn mí dona sudeji to oyọnẹn mọnkọtọn mẹ?
Dodonu Yise Tọn
Oyọnẹn he pegan Jiwheyẹwhe po ojlo etọn po tọn, dile e sọawuhia to Biblu mẹ do, wẹ yin dodonu yise mítọn tọn. Matin oyọnẹn mọnkọtọn, yise mítọn to Jehovah mẹ na taidi ohọ̀ he yọpọvu lẹ nọ yí yẹnkẹn do gbá, he sọgan hányán eyin mẹde sọ́afọ ẹ poun. Paulu na tuli mí nado nọ wà sinsẹ̀nzọn wiwe hlan Jiwheyẹwhe po ‘huhlọn nulẹnpọn tọn’ mítọn po bo ‘hẹn ayiha mítọn jẹ yọyọ.’ (Lom. 12:1, 2) Biblu pinplọn to gbesisọ mẹ sọgan gọalọna mí to ehe wiwà mẹ.
Ewa, gbehosọnalitọ whepoponu tọn de to Pologne, yigbe dọmọ: “Eyin n’ma nọ plọn Ohó Jiwheyẹwhe tọn to gbesisọ mẹ, n’ma nasọ sudeji to oyọnẹn he pegan Jehovah tọn mẹ ba. Klistiani-yinyin ṣie na jẹ doyi ji, bọ yise ṣie to Jiwheyẹwhe mẹ na fá—ehe sọgan bẹpla gbigbọnọ-yinyin ṣie.” Na enẹ ni ma jọ do mí go gbede blo! Lẹnnupọndo apajlẹ dawe de tọn ji he sudeji to oyọnẹn Jehovah tọn mẹ bo gbọnmọ dali mọ nukundagbe Etọn to godo mẹ.
“Na Yẹn Ka Yiwanna Osẹ́n Towe Dole!”
Hàngbe milomilo he wá lẹzun Psalm 119 to Biblu mítọn lẹ mẹ do numọtolanmẹ psalm-kàntọ lọ tọn lẹ hia gando osẹ́n, aṣẹdai kavi nuflinmẹ, ogbedai, gbedide, po whẹdida Jehovah tọn lẹ po go. Psalm-kàntọ lọ wlan dọmọ: “Yẹn na nọ na homẹhunhun dee to osẹ́ndoai towe lẹ mẹ. . . . Aṣẹdai towe lẹ wẹ homẹhunhun ṣie.” E sọ wlan dọmọ: “Na yẹn ka yiwanna osẹ́n towe dole! Ewu wẹ ayihamẹlẹnpọn ṣie to azán popo gbè.”—Ps. 119:16, 24, 47, 48, 77, 97.
Hogbe lọ lẹ “homẹhunhun” po “ayihamẹlẹnpọn” po de linlẹn lọ tọ́n nado nọ mọ awuvivi to ayihamẹlinlẹnpọn do Ohó Jiwheyẹwhe tọn ji mẹ. Hogbe enẹlẹ hẹn ẹn họnwun hezeheze dọ psalm-kàntọ lọ yiwanna osẹ́n Jiwheyẹwhe tọn pinplọn. Owanyi enẹ ma sinai do numọtolanmẹ he wá sọn ahun psalm-kàntọ lọ tọn mẹ kẹdẹ ji gba. Kakatimọ, ewọ tindo ojlo vẹkuvẹku nado ‘lẹnayihamẹpọn’ do osẹ́n lọ ji bo tunwun ohó Jehovah tọn lẹ go. Mí sọgan mọ sọn nuyiwa etọn mẹ dọ e jlo nado yọ́n Jiwheyẹwhe po ojlo etọn po ganji dile e sọgan yọnbasi do.
E họnwun dọ owanyi he psalm-kàntọ lọ tindo na Ohó Jiwheyẹwhe tọn wá sọn ahun etọn mẹ dọ́n. Mí sọgan kanse míde dọ: ‘Be mọ wẹ e te na yẹnlọsu ya? Be n’nọ mọ awuvivi to apadewhe Biblu tọn hihia po dogbigbapọnna ẹn po mẹ egbesọegbesọ ya? Be n’nọ dovivẹnu nado hia Ohó Jiwheyẹwhe tọn bo nọ hodẹ̀ whẹpo do bẹjẹeji ya?’ Eyin mí sọgan na gblọndo kanbiọ enẹlẹ tọn dọ mọwẹ, be e yọnbasi dọ mí ko “to susu to oyọnẹn [he pegan] Jiwheyẹwhe tọn mẹ” niyẹn.
Ewa dọmọ: “N’nọ tẹnpọn nado nọ hẹn oplọn mẹdetiti tọn ṣie pọnte to whepoponu. Sọn whenue gbọ́n alọnuwe lọ ‘Voyez le bon pays’ ko jẹ asie, dibla yin whelẹponu wẹ n’nọ yí i zan to oplọn mẹdetiti tọn ṣie whenu. N’nọ tẹnpọn nado nọ basi dodinnanu to Étude perspicace des Écritures po owe alọdlẹndonu tọn devo lẹ po mẹ whẹwhẹ.”
Sọ lẹnnupọndo apajlẹ Wojciech po Małgorzata po tọn ji, yèdọ asu po asi po he tindo azọngban whẹndo tọn susu. Nawẹ yé penugo nado yí Biblu pinplọn mẹdetiti tọn dogọ tito-to-whinnu yetọn gbọn? “Dopodopo mítọn nọ dín whenu nado plọn Ohó Jiwheyẹwhe tọn dile e sọgan yọnbasi do. Enẹgodo, to oplọn whẹndo tọn po hodọdopọ egbesọegbesọ tọn mítọn lẹ po whenu, mí nọ má nuagokun he dọ̀n ayidonugo kavi he whànmẹ lẹ hẹ ode awetọ.” Biblu pinplọn mẹdetiti tọn he siso nọ hẹn ayajẹ susu wá na yé bo nọ gọalọna yé nado ‘sudeji to oyọnẹn he pegan’ mẹ.
Plọnnu po Ayiha He Hùndonuvo de Po
Taidi Klistiani, mí kudeji dọ ojlo Jiwheyẹwhe tọn wẹ yindọ “yè ni whlẹn omẹ popo gán, podọ na yé ni wá oyọnẹn [he pegan] nugbo tọn kọ̀n.” (1 Tim. 2:3, 4) Ehe zinnudo nujọnu-yinyin Biblu hihia po vivẹnudido nado “tunwun” kavi mọnukunnujẹemẹ po tọn ji. (Mat. 15:10) Dopo to nuhe na gọalọna mí nado wà enẹ lẹ mẹ wẹ nado nọ plọnnu po ayiha he hùndonuvo de po. Lehe Belea-nu hohowhenu tọn lẹ yinuwa do niyẹn to whenuena Paulu lá wẹndagbe lọ na yé. Biblu dọmọ: “Yé yí jeje daho tlala do kẹalọyi ohó lọ, bo nọ yí sọwhiwhe do gbadopọnna Owe-wiwe lẹ egbesọegbesọ nado pọ́n eyin onú ehelẹ yinmọ.”—Owalọ 17:11, NW.
Be hiẹ nọ hodo apajlẹ jejejininọ Belea-nu lẹ tọn bo nọ ze ayiha do fidopo to whenuena a to Biblu plọn ya? Klistiani de sọgan dovivẹnu nado hodo apajlẹ Belea-nu lẹ tọn, eyin e ma tlẹ ko nọ mọ awuvivi to nupinplọn mẹ dai. Humọ, mẹdelẹ nọ tindo ayilinlẹn lọ ma nado hiawe kavi plọnnu sọmọ ba dile owhe yetọn to sisẹyi, ṣigba e ma dona yinmọ na Klistiani de. Mahopọnna owhe he mẹde tindo, e sọgan dovivẹnu nado dapana ayihafẹsẹnamẹnu lẹ to nupinplọn whenu. Podọ dile hiẹ to wehia, a sọgan nọ yí jeje do dín nudọnamẹ he a na má hẹ mẹdevo lẹ. Di apajlẹ, be hiẹ sọgan yí do basi yanwle towe nado nọ dọhodo nuhe a hia kavi plọn lẹ ji hẹ alọwlemẹ towe kavi họntọn Klistiani de ya? Mọwiwà sọgan gọalọna we nado zín nuhe a plọn lẹ do ayiha po ahun towe po mẹ ganji bọ a nasọ tindo nuyiwadomẹji dagbe do mẹdevo lẹ ji.
To ojlẹ nupinplọn tọn towe lẹ mẹ, nọ hodo apajlẹ Ẹzla tọn, yèdọ devizọnwatọ Jiwheyẹwhe tọn hohowhenu tọn de he ‘wleawuna ahun etọn nado to osẹ́n Jehovah tọn dín.’ (Ẹzla 7:10) Nawẹ hiẹ sọgan wàmọ gbọn? Hiẹ sọgan wleawuna lẹdo he jẹ de nado plọnnu. Enẹgodo, sinai bo biọ anademẹ po nuyọnẹn Jehovah tọn po to odẹ̀ mẹ. (Jak. 1:5) Kanse dewe dọ, ‘Etẹwẹ n’to nukundo nado mọyi sọn nupinplọn ehe mẹ?’ Dile hiẹ to wehia, nọ doayi nuagokun lẹ go. Hiẹ sọgan jlo nado basi kandai nuagokun ehelẹ tọn kavi dohiagona adà titengbe he a na jlo nado flin lẹ. Dín aliho he mẹ hiẹ sọgan yí nudọnamẹ lọ zan te to whenuena a to yẹwhehodọ, to nudide lẹ basi, kavi to tulina yisenọ hatọ de. Sẹpọ vivọnu nupinplọn towe tọn, gbadopọnna nuhe a ko plọn lẹ to kleun mẹ. Enẹ na hẹn we penugo nado flin nuhe a ko plọn lẹ.
Ewa basi zẹẹmẹ aliho he mẹ e nọ plọnnu te tọn dọmọ: “Eyin n’to Biblu hia, n’nọ yí alọdlẹndonu ṣẹnṣẹn tọn lẹ, Index des publications Watch Tower, po Watchtower Library to CD-ROM ji po zan. N’nọ basi kandai lẹ po linlẹn lọ po nado yí yé zan to lizọnyizọn ṣie mẹ.”
Mẹdelẹ ko yí owhe susu do duvivi nupinplọn he siso tọn, bo gbọnmọ dali jo yede pete na gbigbọnu lẹ. (Howh. 2:1-5) Ṣigba, yé tindo azọngban susu bọ e nọ vẹawuna yé nado de whenu dovo na oplọn mẹdetiti tọn. Eyin hiẹ tin to ninọmẹ mọnkọtọn mẹ, diọdo tẹlẹ wẹ a sọgan basi to tito towe mẹ?
Nawẹ Yẹn Sọgan Mọ Whenu Gbọn?
Vlavo hiẹ na kọngbedopọ dọ e nọ bọawu hugan nado mọ whenu nado wà nuhe a yiwanna lẹ. Mẹsusu ko mọdọ nuhe nọ gọalọ nado jo yede na oplọn mẹdetiti tọn wẹ nado ze yanwle lẹnpọn dagbe tọn de dai, taidi Biblu blebu hihia. Nugbo wẹ dọ, e sọgan taidi nuhe vẹawu nado hia todohukanji gaa whẹndo tọn lẹ, zẹẹmẹ gigọ́ lẹ gando tẹmpli hohowhenu tọn lọ go, kavi dọdai gigẹdẹ he sọgan taidi nuhe ma gando gbẹzan egbesọegbesọ tọn go lẹ. Tẹnpọn bo ze afọdide he na gọalọna we nado jẹ yanwle towe kọ̀n lẹ. Di apajlẹ, whẹpo a na do gbadopọnna adà Biblu tọn he taidi nuhe vẹawu de, hiẹ sọgan hia nudọnamẹ lẹ gando nujijọ he lẹdo kandai lọ po yọ́n-na-yizan etọn po go. Nudọnamẹ mọnkọtọn lẹ sọgan yin mimọ to owe lọ “Toute Écriture est inspirée de Dieu et utile” he tin-to-aimẹ to nudi ogbè 50 mẹ.
Ojlofọndotenamẹnu wẹ e nọ yin nado yí nugopipe nulẹnpọn tọn towe zan to whenuena a to Biblu hia. Ehe sọgan gọalọna we nado yí nukun homẹ tọn do pọ́n nujijọ po mẹhe go kandai lọ donù lẹ po. E yọnbasi dọ ayinamẹ kleun ehelẹ yíyí do yizan mẹ na hẹn ojlẹ nupinplọn tọn towe lẹ zun awuvivinu bo nasọ hẹn ale wá na we dogọ. Gbọnmọ dali, hiẹ na nọ tin to jejeji nado mọ whenu na nupinplọn towe. E nasọ bọawuna we dogọ nado hẹn aṣa dagbe Biblu hihia egbesọegbesọ tọn go.
Dile etlẹ yindọ ayinamẹ he yin nina to aga lọ lẹ sọgan gọalọna dopodopo mítọn, etẹwẹ whẹndo he ma tindo vivò de sọgan wà? Naegbọn mì ma na dín ojlẹ he voawu de nado sinai bo dọhodopọ do ale he oplọn whẹndo tọn sọgan hẹnwa lẹ ji? Linlẹn dagbe lẹ sọgan tọ́n to hodọdopọ mọnkọtọn whenu, taidi nado nọ yawu fọ́n nukunwhiwhe kleun de jẹnukọnna dai tọn to azán dopodopo ji kavi to azán delẹ ji nado gbadopọnna apadewhe Biblu tọn. Kavi hodọdopọ mìtọn sọgan dohia dọ nuhudo tin nado basi diọdo delẹ to tito whẹndo lọ tọn mẹ. Di apajlẹ, whẹndo delẹ ko mọ ẹn taidi alenu de nado nọ dọhodo wefọ egbesọ tọn ji kavi hia apadewhe Biblu tọn to núdùdù pọmẹ tọn de godo. Whẹpo mẹdepope nido tlọ́n núdùdù-ká kọ̀n kavi bẹ nuwiwa devo jẹeji, whẹndo lọ nọ yí nukunwhiwhe 10 jẹ 15 zan nado dọhodo Owe-wiwe ji kavi hia apadewhe Biblu tọn sọgbe hẹ tito-to-whinnu yetọn. To bẹjẹeji, ehe sọgan taidi nuhe vẹawu, ṣigba to ojlẹ kleun de godo, e na má whẹndo lọ bo lẹzun awuvivinu.
Wojciech po Małgorzata po basi zẹẹmẹ nuhe gọalọna whẹndo yetọn tọn dọmọ: “To dai, numadinu kavi nuhe ma yin dandan lẹ wẹ nọ dù whenu mítọn. Mí basi dide nado de whenu he mí nọ yizan nado do wekanhlanmẹ Internet ji tọn lẹ hlan pò. Mí sọ de ayidedai mítọn delẹ pò bo de azán po whenu tangan de po nado nọ plọnnu yinukọn.” Matin ayihaawe, diọdo enẹlẹ ma vẹna whẹndo ehe, podọ eyin whẹndo mìtọn lọsu wàmọ, e ma na vẹna mì.
E Jẹ Nado to Susudeji to Oyọnẹn He Pegan Mẹ
Ohó Jiwheyẹwhe tọn pinplọn yinukọn sọgan hẹn mí zun “sinsẹ́nnọ to azọ́n dagbe lẹpo mẹ.” (Kọl. 1:10) Dile hiẹ to mọwà to gbẹzan towe mẹ, nukọnyiyi towe na họnwun na mẹlẹpo. Hiẹ na lẹzun gbẹtọ gbigbọnọ he nọ mọnukunnujẹ nugbo Biblu tọn lẹ mẹ to gigọ́ mẹ. Hiẹ na nọ basi nudide jlẹkaji tọn lẹ podọ a na penugo dogọ nado nọ gọalọna mẹdevo lẹ, bo ma na nọ zẹ̀pá dile mẹhe ma tindo oyọnẹn lẹ nọ saba wà do. Hú popolẹpo, hiẹ na dọnsẹpọ Jehovah pẹkipẹki. A na mọnukunnujẹ jẹhẹnu etọn lẹ mẹ dogọ, podọ ehe na nọ sọawuhia eyin a to ohó etọn dọ na mẹdevo lẹ.—1 Tim. 4:15; Jak. 4:8.
Mahopọnna owhe kavi numimọ towe, dovivẹnu lẹpo nado nọ mọ awuvivi to Ohó Jiwheyẹwhe tọn mẹ bo nọ plọn ẹn yinukọn po ayiha he hùndonuvo de po. Hiẹ sọgan deji dọ Jehovah ma na wọn vivẹnudido towe lẹ. (Heb. 6:10) Ewọ na kọ̀n dona susugege etọn lẹ do jiwe.
[Apotin to weda 13]
EYIN MÍ ‘SUDEJI TO OYỌNẸN HE PEGAN MẸ’. . .
Mí nọ hẹn yise mítọn to Jiwheyẹwhe mẹ lodo bo nọ zinzọnlin dole e jẹna Jehovah do.—Kọl. 1:9, 10
Mí nọ tindo zinzin, bo nọ penugo nado yí wuntuntun zan bosọ nọ basi nudide nuyọnẹn tọn lẹ.—Ps. 119:99
Mí nọ mọ awuvivi susu dogọ to alọgigọna mẹdevo lẹ nado dọnsẹpọ Jehovah mẹ.—Mat. 28:19, 20
[Yẹdide to weda 14]
E sọgan vẹawu nado dín lẹdo he jẹ de mọ nado plọnnu, ṣigba e nọ hẹn awuvivi wá
[Yẹdide to weda 15]
Whẹndo delẹ nọ hia apadewhe Biblu tọn to núdùdù godo