Mẹnu Wẹ Sọgan Yọ́n Sọgodo?

“Yẹn wẹ Jiwheyẹwhe . . . he dọho pòdo tọn sọn whẹwhẹwhenu, podọ sọn hohowhenu nuhe ma ko jọ jẹ dinvie.”—Isaia 46:9, 10.

TO OJLẸ hunyanhunyan tọn ehelẹ mẹ, mẹhe nọ basi dodinnanu do tonudidọ, akuẹzinzan, po dagbemẹninọ gbẹtọvi tọn po ji lẹ ko lẹnnupọndo whenuho po pọndohlan egbezangbe tọn lẹ po ji, to vivẹnudido mẹ nado dọ nuhe sọgodo na yin. Mẹdevo lẹ, na yé jlo vẹkuvẹku nado yọ́n nuhe sọgodo yetọn bẹhẹn lẹ wutu, nọ lẹhlan sunwhlẹvu-plọntọ kavi afinyọnnuwatọ lẹ. Taidi kọdetọn de, omẹ mọnkọtọn lẹ nọ saba jẹflumẹ. Be e glo mlẹnmlẹn nado yọ́n nuhe na jọ do aihọn ehe, whẹndo mítọn po mídelẹ po go wẹ ya? Nado dọ hójọhó, be mẹde sọgan yọ́n sọgodo nugbonugbo ya?

To ohó he e dọna yẹwhegán Isaia lẹ mẹ, dile mí mọ do to aga, Jehovah, Jiwheyẹwhe Ganhunupotọ lọ basi zẹẹmẹ nugopipe he e tindo nado dọ nuhe na jọ to sọgodo lẹ tọn. Gbọn Isaia gblamẹ, Jiwheyẹwhe dọ dọdai tundote Islaelivi hohowhenu tọn lẹ tọn sọn kanlinmọgbenu Babilọni tọn po kọlilẹ yetọn po nado vọ́ Jelusalẹm po tẹmpli lọ po gbá. Nawẹ Isaia dọ dọdai ehe po gbesisọ po gbọn? To nudi owhe 200 lẹ jẹnukọn, Isaia dọ oyín mẹhe na gbawhàn Babilọni tọn tlọlọ, yèdọ Kilusi. Humọ, Isaia basi zẹẹmẹ lehe Kilusi na yinuwa do tọn po gbesisọ po—enẹ wẹ, nado gọkọna Tọ̀sisa Euflate he nọ basi hihọ́na tòdaho lọ. E tlẹ mọ hlan nukọn dọ Babilọninu lẹ na gbọn vọdonanu dali jo họngbo blibata tòdaho lọ tọn do nùvo, he na zọ́n bọ Kilusi na gbawhàn tòdaho lọ tọn po awubibọ po.—Isaia 44:24–45:7.

Na nuhe dù sọgodo yinyọnẹn, huhlọn gbẹtọ tọn ma sọtẹ́n yijlẹdo Jiwheyẹwhe tọn go. “A gblọn adán osọ tọn na dewe blo; na hiẹ ma yọ́n nuhe azán de sọgan hẹn wá,” wẹ Ahọlu Sọlọmọni nuyọnẹntọ lọ wlan. (Howhinwhẹn lẹ 27:1) Nuhe e dọ enẹ gbẹsọ yin nugbo. Gbẹtọvi depope ma sọgan yọ́n sọgodo, etlẹ yin etọn titi. Etẹwẹ hẹn Jiwheyẹwhe gbọnvo? E yọ́n nuhe e dá lẹpo hezeheze, kakajẹ jijọ po ayilinlẹn gbẹtọvi lẹ tọn po ji. Eyin e jlo Jiwheyẹwhe, e sọgan mọ lehe mẹdopodopo kavi akọta blebu de na wá yinuwa do pẹpẹ hlan nukọn. Humọ, e tindo nugopipe mado-dogbó nado deanana kọdetọn nujijọ lẹ tọn. To whenuena e dọ dọdai gbọn yẹwhegán etọn lẹ gblamẹ dọ nude na jọ, e nọ lẹzun “Mẹhe hẹn ohó devi etọn tọn dote, bosọ hẹn linlẹn mẹdagun etọn lẹ tọn ṣẹ.” (Isaia 44:26) Jehovah Jiwheyẹwhe kẹdẹ wẹ sọgan wàmọ.

Isaia nọgbẹ̀ to nuhe hugan owhe 700 jẹnukọnna wiwá Jesu, Mẹssia lọ tọn. Etomọṣo, Isaia dọ dọdai gando wiwá Mẹssia lọ tọn go. Ṣigba homọdọdo Biblu go tọ́ lẹ ko jẹagọdo nugbo-yinyin owe Isaia tọn, titengbe bẹsọn owhe kanweko 18tọ lọ mẹ. Yé dọ dọ dọdai Isaia tọn lẹ ma yin dọdai na taun tọn gba, ṣigba yé yin kinkàn to nujijọ lọ lẹ godo, podọ wekantọ de wẹ kàn nuhe jọ lọ lẹ dai poun. Be nugbo wẹ yé dọ ya? To 1947, vọkan owe Isaia tọn de po owe-hihá hohowhenu tọn devo lẹ po yin mimọ to osókla de mẹ sẹpọ Ohù Kúkú lọ. Weyọnẹntọ lẹ dohia dọ vọkan ehe ko tin-to-aimẹ hugan owhe kanweko whẹpo Mẹssia dopagbe lọ, kavi Klisti do yin jiji. Mọwẹ, Biblu do sọgodo hia!

Isaia po wekantọ Biblu tọn devo lẹ po ma na ko penugo nado dọ nuhe na jọ to sọgodo lẹ sọn nuyọnẹn yetọn titi kẹdẹ mẹ gba. Kakatimọ, yé “dọho sọn Jiwheyẹwhe dè dile yè dọ̀n yé yì do gbọn [gbigbọ wiwe] dali.” (2 Pita 1:21) To hosọ he bọdego lẹ mẹ, mí na zinnudo nudọnamẹ he gando gbẹzan Jesu tọn go delẹ ji, he yin didọdai gbọn Isaia gblamẹ. Enẹgodo, mí na gbadopọnna nujijọ he Jesu po devi etọn lẹ po dọ dọdai etọn gando azán mítọn po sọgodo po go lẹ.