Kanbiọ Wehiatọ Mítọn lẹ Tọn
Eyin Adam Yin Mẹpipe, Naegbọn E Do Waylando?
E yọnbasi dọ Adam ni waylando na Jiwheyẹwhe dá ẹ po mẹdekannujẹ nudide bibasi tọn po wutu. Nunina ehe ma jẹagọdo nugbo lọ dọ Adam yin mẹpipe gba. Na nugbo tọn, Jiwheyẹwhe kẹdẹ wẹ yin mẹhe pé mlẹnmlẹn. (Deutelonomi 32:3, 4; Psalm 18:30; Malku 10:18) Mẹdevo kavi nudevo depope he yin pipé nọ tindo dogbó. Enẹwutu, mí nọ dọ dọ nude pé kiki eyin e hẹn lẹndai he wutu e do yin bibasi di.
Eyin mọ wẹ, lẹndai tẹ wutu wẹ Jiwheyẹwhe do dá Adam? Ojlo Jiwheyẹwhe tọn wẹ nado wleawuna whẹndo gbẹtọvi nuyọnẹntọ he tindo mẹdekannujẹ nudide bibasi tọn de gbọn Adam gblamẹ. Mẹhe jlo na yiwanna Jiwheyẹwhe po aliho etọn lẹ po dona de nado setonuna osẹ́n etọn lẹ. Enẹwutu, gbẹtọ ma yin jiji po nugopipe tonusise tọn po gba, kakatimọ ahun mẹ wẹ tonusise nọ wá sọn. (Deutelonomi 10:12, 13; 30:19, 20) Gbọnmọ dali, eyin Adam ma ko tindo nugopipe lọ nado de tolivivẹ wẹ, ewọ na ko yin mapenọ. Na nuhe dù lehe Adam de nado yí mẹdekannujẹ nudide bibasi tọn etọn zan do, kandai Biblu tọn dohia dọ e kọnawudopọ hẹ asi etọn bo vẹtolina osẹ́n Jiwheyẹwhe tọn gando “atin yinyọ́n dagbe po oylan po lọ tọn” go.—Gẹnẹsisi 2:17; 3:1-6.
Eyin mọ wẹ, be Jiwheyẹwhe dá Adam po madogán de po bọ e ma do penugo nado basi nudide nuyọnẹn tọn lẹ kavi duto whlepọn ji wẹ ya? Jẹnukọnna tolivivẹ Adam tọn, Jehovah Jiwheyẹwhe ko pọ́n nudida aigba ji tọn etọn lẹpo he bẹ asu po asi po tintan lọ hẹn, bo mọdọ e “yọ́n tlala.” (Gẹnẹsisi 1:31) Enẹwutu, whenuena Adam waylando, e ma biọ dọ Mẹdatọ etọn ni vọ́ nude jlado to e go, kakatimọ E gblewhẹdo Adam tlọlọ. (Gẹnẹsisi 3:17-19) Adam ma dike owanyi he e tindo na Jiwheyẹwhe po nunọwhinnusẹ́n etọn he sọgbe lẹ po ni whàn ẹn nado setonuna Jiwheyẹwhe hú nulẹpo gba.
Sọ flindọ, to whenuena Jesu tin to aigba ji, e yin mẹpipe de taidi Adam. Ṣigba, to vogbingbọn mẹ na kúnkan Adam tọn he pò lẹ, gbigbọ wiwe wẹ gọalọ bọ ohò Jesu tọn do yin mimọ. Gbọnmọ dali, e ma dugu madogán he na zọ́n bọ e na jai jẹ whlepọn mẹ tọn. (Luku 1:30, 31; 2:21; 3:23, 38) Jesu desọn ojlo mẹ bo gbọṣi nugbonọ-yinyin mẹ na Otọ́ etọn mahopọnna kọgbidinamẹ sinsinyẹn lẹ. To mẹdekannujẹ nudide bibasi tọn etọn yiyizan mẹ, Adam lọsu wẹ dona yin whẹgbledo na awugbopo etọn nado setonuna gbedide Jiwheyẹwhe tọn.
Ṣigba, naegbọn Adam de nado vẹtolina Jiwheyẹwhe? Be e lẹndọ emi na hẹn ninọmẹ emitọn pọnte to aliho de mẹ wẹ ya? Lala, na apọsteli Paulu wlan dọ “yè ma . . . klọ Adam gba.” (1 Timoti 2:14) Ṣigba, Adam de nado joawuna ojlo asi etọn tọn, mẹhe ko de nado dù sọn atin he yè dosẹ́n etọn na yé lọ mẹ. Ojlo Adam tọn nado hẹn homẹ asi etọn tọn hùn sinyẹn hugan ojlo etọn nado hẹn homẹ Mẹdatọ etọn tọn hùn. Na jide tọn, to whenuena atin-sinsẹ́n he yé ma dona dù lọ yin zizedonukọnna Adam tlolo, e dona ko yiagbọji bo lẹnnupọndo kọdetọn he tolivivẹ na tindo do haṣinṣan etọn hẹ Jiwheyẹwhe ji. Na e ma tindo owanyi he siso na Jiwheyẹwhe wutu, Adam hùndonuvo na kọgbidinamẹ lẹ, etlẹ yin asi etọn tọn.
Adam ko waylando whẹpo do jivi, enẹwutu, kúnkan etọn lẹpo wẹ yin jiji do mape mẹ. Etomọṣo, mí tindo mẹdekannujẹ nudide bibasi tọn taidi Adam. Mì gbọ mí ni nọ gbọn pinpẹn-nutọn-yinyọnẹn dali lẹnayihamẹpọn do dagbewà Jehovah tọn ji bo wleawuna owanyi he dolido na Jiwheyẹwhe, mẹhe jẹna tonusise po sinsẹ̀n-bibasi mítọn po.—Psalm 63:6; Matiu 22:36, 37.