‘Mì Diọnukunsọ Lẹgba’ Dile Jesu Wà Do
“Mì diọnukunsọ [Lẹgba]; e nasọ họ̀n sọn mì dè.”—JAK. 4:7.
1. Nukundiọsọmẹ tẹwẹ Jesu yọnẹn dọ emi na pehẹ to aigba ji, podọ etẹwẹ yin kọdetọn lọ?
JESU KLISTI yọnẹn dọ emi na pehẹ nukundiọsọmẹ sọn Lẹgba dè. Nugbo ehe họnwun hezeheze to nuhe Jiwheyẹwhe dọna odàn lọ dile hodidọ etọn to alọdlẹndo nudida gbigbọnọ ylankan atẹṣitọ he yí odàn lọ zan mẹ dọmọ: “Yẹn nasọ yí okẹ̀n do hiẹ po yọnnu lọ [adà olọn mẹ tọn titobasinanu Jehovah tọn] po ṣẹnṣẹn; podọ do okún towe po okún etọn po ṣẹnṣẹn: ewọ [Jesu Klisti] na só ota towe, hiẹ na só afọgbẹn etọn.” (Gẹn. 3:14, 15; Osọhia 12:9) Afọgbẹn Jesu tọn sisó zẹẹmẹdo dọ ewọ na jiya awugble whenu gli tọn de poun, whenue e na yin hùhù to aigba ji, na Jehovah na fọ́n ẹn sọnku biọ gigo olọn mẹ tọn mẹ. Ṣigba ota odàn lọ tọn sisó na zẹẹmẹdo dọ Lẹgba na jiya awugble he na hẹn okú he ma tindo fọnsọnku wá na ẹn tọn.—Hia Owalọ lẹ 2:31, 32; Heblu lẹ 2:14.
2. Naegbọn Jehovah do deji dọ Jesu na diọnukunsọ Lẹgba po kọdetọn dagbe po?
2 Jehovah deji dọ Jesu na hẹn azọ́ndenamẹ etọn di to aigba ji bo nasọ diọnukunsọ Lẹgba po kọdetọn dagbe po. Naegbọn Jehovah do deji sọmọ? Na ewọ ko doayi Jesu go na owhe susu sọn whenue gbọ́n e dá ẹ to olọn mẹ, bo yọnẹn dọ “azọ́nwatọgan” podọ “viplọnji to yé he yè dá lẹpo mẹ” ehe nọ setonu bosọ yin nugbonọ. (Howh. 8:22-31; Kọl. 1:15) Enẹwutu, to whenuena Jesu yin didohlan aigba ji bọ dotẹnmẹ yin nina Lẹgba nado whlé e pọ́n kakajẹ okú, Jiwheyẹwhe deji dọ Ovi detọ́n dopo akàn Etọn na gbawhàn po kọdetọn dagbe po.—Joh. 3:16.
Jehovah Nọ Basi Hihọ́na Devizọnwatọ Etọn Lẹ
3. Nawẹ Lẹgba nọ yinuwa hẹ devizọnwatọ Jehovah tọn lẹ gbọn?
3 Jesu dlẹnalọdo Lẹgba taidi “ahọvi aihọn ehe tọn” bo na avase devi Etọn lẹ dọ yelọsu na pehẹ homẹkẹn taidi ewọ. (Joh. 12:31; 15:20) Aihọn he tin to anademẹ Satani Lẹgba tọn glọ ehe nọ gbẹwanna Klistiani nugbo lẹ, na yé nọ sẹ̀n Jehovah bosọ yin yẹwhehodọtọ dodo tọn lẹ wutu. (Mat. 24:9; 1 Joh. 5:19) Pipotọ yiamisisadode he na wá dugán hẹ Klisti to Ahọluduta olọn mẹ tọn etọn mẹ lẹ wẹ yanwle tangan Lẹgba tọn. Satani sọ nọ yangbé susu Kunnudetọ Jehovah tọn he tindo todido nado nọgbẹ̀ kakadoi to paladisi aigba ji tọn mẹ lẹ tọn. Ohó Jiwheyẹwhe tọn na mí avase dọmọ: “Lẹgba, mẹglatọ mìtọn, di kinnikinni he to lìlì, e to zọnlinzin pé, bo to mẹhe e na tlẹndu dín.”—1 Pita 5:8.
4. Etẹwẹ dohia dọ omẹ Jiwheyẹwhe tọn lẹ ko diọnukunsọ Lẹgba po kọdetọn dagbe po to ojlẹ mítọn mẹ?
4 Taidi titobasinanu he tindo godonọnamẹ Jehovah Jiwheyẹwhe tọn de, mí nọ diọnukunsọ Lẹgba po kọdetọn dagbe po. Lẹnnupọndo kunnudenu ehelẹ ji: To owhe 100 he wayi gblamẹ, delẹ to gandudu aṣẹ-glanglan-panamẹ tọn he ylan hugan to whenuho mẹ lẹ mẹ ko tẹnpọn nado sukúndona Kunnudetọ Jehovah tọn lẹ. Ṣigba sọha Kunnudetọ lẹ tọn fọ́n bo to susudeji, podọ todin sọha yetọn ko dibla yì 7 000 000 to agun he hugan 100 000 lẹ mẹ lẹdo aihọn pé. Gandudu aṣẹ-glanglan-panamẹ tọn kanylantọ lọ lẹ he dohomẹkẹn omẹ Jehovah tọn lẹ wẹ ma tin-to-aimẹ ba!
5. Nawẹ Isaia 54:17 ko mọ hẹndi gando devizọnwatọ Jehovah tọn lẹ go gbọn?
5 To whenuena Jiwheyẹwhe to hodọna agun Islaeli hohowhenu tọn, e dopagbe dọmọ: “Avùnhonu depope he yè jlẹ do gowe ma na wà nude; odẹ́ he fọ́n do jiwe to whẹdida mẹ lẹpo wẹ hiẹ na gblewhẹdo: ehe wẹ ogú devi OKLUNỌ tọn lẹ tọn, dè e wẹ dodo yetọn sọn.” (Isa. 54:17) Opagbe enẹ ko mọ hẹndi gando omẹ Jehovah tọn lẹ go lẹdo aihọn pé to ‘azán godo tọn’ ehelẹ mẹ. (2 Tim. 3:1-5, 13) Mí zindonukọn nado to nukundiọsọ Lẹgba, podọ avùnhonu depope he ewọ nọ tẹnpọn nado yizan nado sukúndona omẹ Jiwheyẹwhe tọn lẹ ma nọ tindo kọdetọn dagbe, na Jehovah tin to adà mítọn mẹ wutu.—Ps. 118:6, 7.
6. Etẹwẹ dọdai Daniẹli tọn dọna mí gando sọgodo gandudu Lẹgba tọn go?
6 To whenuena opodo aihọn ylankan ehe blebu tọn he to dindọnsẹpọ po awuyiya po na wá, adà gandudu Satani tọn lẹpo na yin didesẹ mlẹnmlẹn. Yẹwhegán Daniẹli wlan to gbọdo glọ dọmọ: “To azán ahọlu nẹlẹ [he tin to azán mítọn gbè] tọn lẹ mẹ wẹ Jiwheyẹwhe olọn tọn na ze ahọludu de daga [to olọn mẹ], he ma na yin viva gbede, mọ yè ma na jo ahọludu etọn dai hlan gbẹtọ devo lẹ gba; ṣigba e na gbà ahọludu do flinflin bo sú ahọludu he [tin todin] lẹpo do, ewọ bo nasọ nọte kakadoi.” (Dan. 2:44) To whenuena enẹ na jọ, gandudu Satani tọn po gandudu gbẹtọvi mapenọ lẹ tọn po na busẹ. Adà titonu Lẹgba tọn lẹpo na juwayi kakadoi podọ Ahọluduta Jiwheyẹwhe tọn wẹ na dugán do aigba pete ji, matin agọjẹdomẹtọ depope.—Hia 2 Pita 3:7, 13.
7. Nawẹ mí wagbọn do yọnẹn dọ devizọnwatọ Jehovah tọn lẹ sọgan diọnukunsọ Lẹgba po kọdetọn dagbe po?
7 Ayihaawe ma tin dọ titobasinanu Jehovah tọn na yin hihọ́-basina bo na tindo kọdetọn dagbe to gbigbọ-liho. (Hia Psalm 125:1, 2.) Etẹwẹ dogbọn míwlẹ dali? Biblu dọ na mí dọ mí sọgan penugo nado diọnukunsọ Lẹgba po kọdetọn dagbe po, dile Jesu wà do. Na nugbo tọn, dọdai he Klisti na gbọn apọsteli Johanu gblamẹ dohia dọ mahopọnna nukundiọsọmẹ Satani tọn, “gbẹtọ susugege” he tindo todido nado nọgbẹ̀ to aigba ji lẹ na lùn opodo titonu ylankan ehe tọn tọ́n. Sọgbe hẹ Owe-wiwe, yé to awhádo po ogbè lélé po dọmọ: “Whlẹngán hlan Jiwheyẹwhe mítọn he sinai to ofìn lọ ji, podọ hlan Lẹngbọvu lọ [Jesu Klisti].” (Osọhia 7:9-14) Biblu dọho gando mẹyiamisisadode lẹ go taidi mẹhe gbawhàn Satani tọn, podọ gbẹdohẹmẹtọ yetọn “lẹngbọ devo” lẹ lọsu diọnukunsọ ẹ po kọdetọn dagbe po. (Joh. 10:16; Osọhia 12:10, 11) Ṣigba, ehe nọ biọ vivẹnudido vẹkuvẹku po odẹ̀ ahundopo tọn po nado yin ‘whinwhlẹn sọn danunọ lọ si.’—Mat. 6:13.
Apajlẹ Pipé Lehe Mí Sọgan Diọnukunsọ Lẹgba Do Tọn
8. Whlepọn tintan he Biblu basi kandai etọn tẹwẹ Lẹgba zedonukọnna Jesu to zungbo mẹ, podọ nawẹ Klisti yinuwa gbọn?
8 Lẹgba tẹnpọn nado hẹn tenọgli Jesu tọn gble. To zungbo mẹ, Satani ze whlepọn voovo lẹ donukọnna Jesu, na e nido vẹtolina Jehovah. Ṣigba, Jesu ze apajlẹ pipé dai gando lehe mí sọgan diọnukunsọ Satani do go. To whenuena Jesu blanù na okle 40 ozán 40 godo, e yọnbasi dọ huvẹ na ko to hùhù i badabada. “Eyin hiẹ yin Ovi Jiwheyẹwhe tọn,” wẹ Satani dọ, “degbena zannu helẹ ni lẹzun akla.” Ṣigba Jesu gbẹ́ nado yí huhlọn he e mọyi sọn Jiwheyẹwhe dè zan na ale etọn titi. Kakatimọ, Jesu dọmọ: “Yè ko wlanwe etọn dọ, Gbẹtọ ma to ogbẹ̀ gbọn akla dopo kẹdẹ sinmẹ gba, adavo gbọn ohó he tọn sọn onù Jiwheyẹwhe tọn mẹ lẹpo dali.”—Mat. 4:1-4; Deut. 8:3.
9. Naegbọn mí dona nọavunte sọta yẹdoklọmẹ Lẹgba tọn nado yí ojlo jọwamọ tọn mítọn lẹ zan?
9 To egbehe, Lẹgba nọ tẹnpọn nado yí ojlo jọwamọ tọn lẹ zan nado doyẹklọ devizọnwatọ Jehovah tọn lẹ. Enẹwutu, mí dona magbe nado nọavunte sọta whlepọn fẹnnuwiwa tọn he gbayipe to aihọn gblezọn ehe mẹ lẹ. Ohó Jiwheyẹwhe tọn zinnudeji dọmọ: “Be mì ma yọnẹn dọ mawadodonọ lẹ ma na dugu ahọludu Jiwheyẹwhe tọn? Yè klọ mì blo; galọtọ lẹ, kavi boṣiọ-sẹ̀ntọ lẹ, kavi ayọdetọ lẹ, kavi yọnnu jọmẹ lẹ, kavi yé he nọ yí sunnu do hẹn yede gble lẹ . . . ma na dugu ahọludu Jiwheyẹwhe tọn.” (1 Kọl. 6:9, 10) E họnwun dọ, mẹhe to gbẹzan fẹnnuwiwa tọn zan bo ma jlo na diọ lẹ ma na yin dotẹnmẹna nado nọgbẹ̀ to aihọn yọyọ Jiwheyẹwhe tọn mẹ.
10. Sọgbe hẹ Matiu 4:5, 6, whlepọn devo tẹwẹ Satani zedonukọnna Jesu nado hẹn tenọgli etọn gble?
10 Gando dopo to whlepọn he Satani zedonukọnna Jesu to zungbo mẹ lẹ mẹ go, Owe-wiwe dọmọ: “Lẹgba sọ ze e yiaga yì otò wiwe nẹ mẹ, bosọ ze e do adadanu họta tẹmpli tọn lọ ji, bosọ dọ hlan ẹn, dọmọ, Eyin hiẹ yin Ovi Jiwheyẹwhe tọn, lọ́n jẹte na dewe: na yè wlanwe etọn dọ, E na naṣẹ angẹli etọn lẹ na hiẹ wutu: to alọ yetọn mẹ yé na ze we daga, hiẹ vlavo nikaa klẹnafọ towe do zannu go.” (Mat. 4:5, 6) Satani lẹndọ ehe na sisẹ Jesu nado basi dohia gbangba tọn dọ emi wẹ yin Mẹssia lọ. Ṣigba na nugbo tọn, enẹ na ko yin nuyiwa goyiyi tọn he ma sọgbe de, podọ e ma na ko tindo alọkẹyi po godonọnamẹ Jiwheyẹwhe tọn po. Whladopo dogọ, Jesu hẹn tenọgli etọn na Jehovah go bo yihodọ sọn wefọ de mẹ nado gblọnhona Satani. E dọmọ: “Yè sọ vọ́ ẹ wlan dọ, Hiẹ ma na whlé [Jehovah] Jiwheyẹwhe towe pọ́n.”—Mat. 4:7; Deut. 6:16.
11. Nawẹ Satani sọgan whlé mí pọ́n gbọn, podọ etẹwẹ sọgan yin kọdetọn lọ?
11 Satani sọgan sisẹ mí nado whlé Jehovah pọ́n. E sọgan tẹnpọn nado doyẹklọ mí nado hodo aṣọ́dido po nusísọ́ he to zoji to aihọn mẹ lẹ po kavi nado tindo mahẹ to ayidedai he nọ fọ́n ayihaawe dote lẹ mẹ. Ṣigba eyin mí gbẹkọ ayinamẹ Biblu tọn lẹ go bo hodo aihọn, be mí sọgan donukun dọ angẹli lẹ ni basi hihọ́na mí sọn kọdetọn ylankan nuyiwa mọnkọtọn lẹ tọn mẹ ya? Dile etlẹ yindọ Ahọlu Davidi lẹnvọjọ sọn ylando etọn hẹ Bati-ṣeba mẹ, e ma yin hihọ́-basina sọn kọdetọn nuyiwa etọn lẹ tọn mẹ gba. (2 Sam. 12:9-12) Mì dike mí whlé Jehovah pọ́n to aliho agọ̀ mẹ vlavo gbọn họntọnjiji hẹ aihọn ehe dali blo.—Hia Jakobu 4:4; 1 Johanu 2:15-17.
12. Whlepọn tẹwẹ yin nùdego to Matiu 4:8, 9 mẹ, podọ nawẹ Ovi Jiwheyẹwhe tọn yinuwa gbọn?
12 Lẹgba sọ whlé Jesu pọ́n to zungbo mẹ gbọn huhlọn tonudidọ tọn zizedonukọnna ẹn dali. Satani do ahọluigba aihọn tọn lẹpo po gigo yetọn po hia Jesu bo dọmọ: “Onú ehe lẹpo wẹ yẹn na na we, eyin hiẹ na jẹklo bo litaina mi.” (Mat. 4:8, 9) Nuyiwa nukunkẹn tọn nankọtọn die nado hò sinsẹ̀n-bibasi Jehovah tọn yí bo doyẹklọ Jesu ma nado yin nugbonọ na Jiwheyẹwhe! Gbọn nulinlẹnpọn do ojlo lọ nado yin sinsẹ̀n-basina ji dali, angẹli he yin nugbonọ dai enẹ lẹzun ylandonọ, nukunkẹnnọ, podọ mẹklọtọ ylankan lọ, yèdọ Satani Lẹgba. (Jak. 1:14, 15) Ṣigba to vogbingbọn mẹ, Jesu magbe nado gbọṣi nugbonọ-yinyin mẹ hlan Otọ́ olọn mẹ tọn etọn, enẹwutu e dọmọ: ‘Tọ́n sọn ofi, Satani: na yè wlanwe etọn dọ, Hiẹ na litaina Jehovah Jiwheyẹwhe towe, ewọ dopo kẹdẹ wẹ hiẹ na nọ sẹ̀n.’ Gbọnmọ dali, Jesu diọnukunsọ Lẹgba whladopo dogọ po hogbe he họnwun bo do nujikudo hia lẹ po. Ovi Jiwheyẹwhe tọn ma jlo na yin apadewhe aihọn Satani tọn podọ e ma na sẹ̀n omẹ ylankan lọ gbede!—Mat. 4:10; Deut. 6:13; 10:20.
‘Mì Diọnukunsọ Lẹgba, E Nasọ Họ̀n sọn Mì Dè’
13, 14. (a) To whenuena Lẹgba do ahọluigba aihọn tọn lẹpo hia Jesu, etẹ zedonukọnna ẹn wẹ e te? (b) Nawẹ Satani nọ tẹnpọn nado hẹn ahun mítọn gblezọn gbọn?
13 Gbọn ahọluigba aihọn tọn lẹpo didohia Jesu dali, Lẹgba to aṣẹpipa he gbẹtọvi de ma ko mọyi pọ́n gbede zedonukọnna ẹn. Satani lẹndọ nuhe Jesu mọ lẹ na biọ nukunmẹ na ẹn bo na sisẹ ẹ nado lẹndọ ewọ sọgan lẹzun nukọntọ tonudidọ tọn daho hugan lọ to aigba ji. Lẹgba ma nọ ze ahọluigba lẹ donukọnna mí to egbehe gba, ṣigba e nọ tẹnpọn nado hẹn ahun mítọn lẹ gblezọn gbọn nuhe mí nọ mọ, nọ sè, po nuhe mí nọ lẹn lẹ po dali.
14 Lẹgba wẹ to anadena aihọn ehe. Gbọnmọ dali, ewọ wẹ nọ deanana linlinnamẹnu etọn lẹ. Enẹwutu, e ma nọ paṣa mí dọ nuhe aihọn nọ pọ́n, nọ doto, bo nọ hia lẹ gọ́ na fẹnnuwiwa po danuwiwa po. Nuyizan ajọ́jijla aihọn ehe tọn lẹ nọ tẹnpọn nado fọ́n ojlo dotena mí nado họ̀ nuhe mí ma tindo nuhudo etọn lẹ. Gbọn onú mọnkọtọn lẹ gblamẹ, Lẹgba nọ yí agbasanu he dọnmẹdogo bo sọgan yọ́npọ́n, yọ́nsè, bosọ dọ̀n ayidonugo mítọn lẹ zan whẹwhẹ nado whlé mí pọ́n. Ṣigba, eyin mí gbẹ́ nado pọ́n, doto, kavi hia nuhe ma sọgbe hẹ Owe-wiwe, nuhe dọ mí te taun wẹ yindọ: “Tọ́n sọn ofi, Satani.” Mí nọ gbọnmọ dali hodo apajlẹ Jesu tọn bo nọ tẹdo gbemima mítọn nado gbẹ́ aihọn mawé Satani tọn dai go gligli. Lehe mí nọ do mídelẹ hia po adọgbigbo po taidi Kunnudetọ Jehovah tọn po hodotọ Klisti tọn lẹ po do to azọ́nmẹ, to wehọmẹ, podọ to kọmẹnu po hẹnnumẹ mítọn lẹ po ṣẹnṣẹn, sọ nọ dohia dọ mí ma yin apadewhe aihọn Satani tọn.—Hia Malku 8:38.
15. Naegbọn nukundidiọsọ Satani nọ biọ dọ mí ni tin to aṣeji to whepoponu?
15 To whenuena Lẹgba gboawupo whla atọ̀ntọ to vivẹnudido etọn mẹ nado hẹn tenọgli Jesu tọn hlan Jiwheyẹwhe gble godo, “Lẹgba jo e dai.” (Mat. 4:11) Ṣigba, linlẹn Satani tọn ma yin nado jo Jesu do pete gba, na Biblu dọmọ: “Whenuena [Lẹgba] sọ dotana whlepọn lẹpo [to zungbo mẹ], e fọnyi sọn e dè na osaa de.” (Luku 4:13) Eyin mí penugo bo diọnukunsọ Lẹgba po kọdetọn dagbe po, mí dona dopẹna Jehovah. Ṣigba mí sọ dona zindonukọn nado to alọgọ Jiwheyẹwhe tọn biọ, na Lẹgba na lẹkọwa to osaa kavi dotẹnmẹ hundote devo whenu, he sọgan nọma yin ojlẹ he mẹ mí to nukundo whlepọn te. Enẹwutu, mí dona gbọṣi nukle to whepoponu bo tin to gbesisọ mẹ nado sinyẹnlin dile mí to sinsẹ̀nzọn wiwe basi hlan Jehovah mahopọnna whlepọn he mí dona pehẹ lẹ.
16. Huhlọn he yiaga tẹwẹ Jehovah nọ na mí, podọ naegbọn mí dona nọ biọ ẹ to odẹ̀ mẹ?
16 Eyin mí na tindo kọdetọn dagbe to vivẹnudido mítọn nado diọnukunsọ Lẹgba mẹ, mí dona biọ gbigbọ wiwe Jiwheyẹwhe tọn to odẹ̀ mẹ—yèdọ huhlọn he yiaga hugan to wẹkẹ mẹ lọ, po jidide lọ po dọ mí na mọ ẹn yí. E na gọalọna mí nado wà nuhe go huhlọn mítọn ma pé lẹ. Jesu na jide hodotọ etọn lẹ dọ yé sọgan tindo gbigbọ Jiwheyẹwhe tọn, to whenuena e dọmọ: “Enẹwutu, eyin mìwlẹ he yin [mapenọ bo taidi] mẹylankan yọ́n le yè nọ na nunina dagbe hlan ovi mìtọn lẹ do, nẹmunẹmu wẹ Otọ́ mìtọn olọn tọn na na [gbigbọ wiwe] hlan yé he biọ to e dè lẹ.” (Luku 11:13) Mì gbọ mí ni zindonukọn nado nọ biọ gbigbọ wiwe Jehovah tọn to odẹ̀ mẹ. Eyin mí tindo godonọnamẹ huhlọn he yiaga hugan ehe tọn to gbemima mítọn nado diọnukunsọ Lẹgba mẹ, mí na penugo nado gbawhàn. Gbọnvona odẹ̀ ahundopo tọn hihò to gbesisọ mẹ, mí dona ze gbaja gbigbọmẹ tọn Jiwheyẹwhe tọn lẹpo blá dogo nado sọgan ‘nọte pehẹ bublu kavi ayiha wintinwintin Lẹgba tọn lẹ.’—Efe. 6:11-18.
17. Ayajẹ tẹwẹ gọalọna Jesu nado diọnukunsọ Lẹgba?
17 Onú devo sọ gọalọna Jesu nado diọnukunsọ Lẹgba, bo sọgan gọalọna mílọsu ga. Biblu dọmọ: “Na ayajẹ he yè ze do nukọn etọn wutu e doakọnna [yatin] lọ, ma hò winyan lọ pọ́n, bosọ sinai to adusilọ ofìn Jiwheyẹwhe tọn ji.” (Heb. 12:2) Mí sọgan tindo ayajẹ mọnkọtọn eyin mí nọgodona nupojipetọ-yinyin Jehovah tọn, gbògbéna oyín wiwe etọn, bo hẹn ale ogbẹ̀ madopodo tọn lọ do ayiha mẹ. Lehe mí na gọ́ na ayajẹ to whenuena Satani po azọ́n etọn lẹpo po na yin didesẹ kakadoi bọ ‘homẹmiọnnọ lẹ na dugu aigba tọn; bo nasọ hẹn homẹhun yede to jijọho susu mẹ’ do sọ! (Ps. 37:11) Enẹwutu, mì gbọ mí ni zindonukọn nado to nukundiọsọ Lẹgba, dile Jesu wà do.—Hia Jakobu 4:7, 8.
Nawẹ Hiẹ Na Na Gblọndo Gbọn?
• Kunnudenu tẹwẹ dohia dọ Jehovah nọ basi hihọ́na omẹ etọn lẹ?
• Nawẹ Jesu ze apajlẹ dai gando lehe mí sọgan diọnukunsọ Satani do go gbọn?
• Aliho tẹlẹ mẹ wẹ hiẹ sọgan diọnukunsọ Lẹgba te?
[Yẹdide to weda 29]
Họntọnjiji hẹ aihọn nọ hẹn mí zun kẹntọ Jiwheyẹwhe tọn
[Yẹdide to weda 31]
Jesu gbẹ́ ahọluigba aihọn tọn lẹpo he Satani zedonukọnna ẹn dai