Lehe Hiẹ Sọgan Mọnukunnujẹ Biblu mẹ Do

1. Biọ Alọgọ sọn Jiwheyẹwhe Dè

Ninfa he nọ nọ̀ Italie dọmọ: “To ojlẹ de mẹ wayi, n’nọ hia Biblu whẹpo do yihọ . . . na n’yọnẹn dọ Ohó Jiwheyẹwhe tọn wẹ podọ dile etlẹ yindọ n’ma yiwanna wehihia sọmọ, n’jlo na yọ́n nuhe Jiwheyẹwhe wlan do Biblu mẹ. Linlẹn ṣie wẹ nado hia Biblu blebu. E bọawuna mi to bẹjẹeji, ṣigba n’wá jẹ adà he vẹawuna mi nado mọnukunnujẹemẹ lẹ ji bọ n’gbọ bo hònúpla.”

BE HIẸ ko tindo numimọ Ninfa tọn nkọ pọ́n ya? Mẹsusu ko wàmọ. Ṣogan, dile mí mọ do to hosọ he wayi mẹ, Dowatọ Biblu tọn, Jehovah Jiwheyẹwhe jlo dọ hiẹ ni mọnukunnujẹ Ohó etọn mẹ. Ṣigba, nawẹ hiẹ sọgan wàmọ gbọn? Afọdide tintan wẹ nado biọ alọgọ sọn Jiwheyẹwhe dè.

Apọsteli Jesu tọn lẹ yin pinpọnhlan taidi mẹhe “gbọ̀agba nupinplọn tọn, bosọ yin gbẹtọ wunvinọ,” na yé ma yì wehọmẹ sinsẹ̀n-nuplọnmẹ Ju lẹ tọn wutu. (Owalọ lẹ 4:13) Etomọṣo, Jesu hẹn yé deji dọ yé sọgan mọnukunnujẹ Ohó Jiwheyẹwhe tọn mẹ. Gbọnna? Jesu dọmọ: “Alọgọtọ lọ, yèdọ gbigbọ wiwe, he Otọ́ lọ na dohlan to oyín ṣie mẹ, enẹ lọ wẹ na plọn mì onú lẹpo.” (Johanu 14:26, NW) Gbigbọ wiwe kavi huhlọn-yido-wazọ́n ehe wẹ Jiwheyẹwhe yizan nado dá aigba po nutogbẹ̀ he tin to e ji lẹpo po. (Gẹnẹsisi 1:2) E sọ yí i zan nado gbọdo wekantọ 40 nado kàn linlẹn etọn lẹ do Biblu mẹ. (2 Pita 1:20, 21) Gbigbọ enẹ dopolọ sọ sọgan gọalọna mẹhe jlo na mọnukunnujẹ Biblu mẹ to egbehe lẹ.

Nawẹ hiẹ sọgan mọ gbigbọ wiwe Jiwheyẹwhe tọn yí gbọn? Hiẹ dona biọ to yise mẹ. Na nugbo tọn, hiẹ sọgan tin to dandannu glọ nado wàmọ pludopludo. ‘Mì to bibiọ zọnmii, yè nasọ yí na mì,’ wẹ Jesu dọ. “Eyin mìwlẹ . . . yọ́n le yè nọ na nunina dagbe hlan ovi mìtọn lẹ do, nẹmunẹmu wẹ Otọ́ mìtọn olọn tọn na na [gbigbọ wiwe] hlan yé he biọ to e dè lẹ.” (Luku 11:9, 13) Jehovah ko wleawufo nado na gbigbọ wiwe mẹhe yí ahundopo do biọ ẹ lẹ. Huhlọn-yido-wazọ́n enẹ sọgan gọalọna we nado mọnukunnujẹ ohó gbọdo he yin kinkàndai to Biblu mẹ sọn owhe fọtọ́n susu lẹ die wayi mẹ. Gbigbọ Jiwheyẹwhe tọn sọ sọgan na we nuyọnẹn nado yọ́n lehe hiẹ na yí owẹ̀n huhlọnnọ Biblu tọn do yizan mẹ do.—Heblu lẹ 4:12; Jakobu 1:5, 6.

Enẹwutu, whedepopenu he hiẹ sinai nado hia Biblu, nọ hodẹ̀ hlan Jiwheyẹwhe bo biọ gbigbọ wiwe etọn nado mọnukunnujẹ Ohó etọn mẹ.