Dọnsẹpọ Jiwheyẹwhe

Jehovah Nọ Yọ́n Pinpẹn Homẹmimiọnnọ lẹ Tọn

Osọha lẹ 12:1-15

GOYIYI, awuwhàn, ojlo zogbe. Jijọ mọnkọtọn lẹ nọ saba sọawuhia to nuyiwa mẹhe jlo na diyin to aihọn ehe mẹ lẹ tọn mẹ. Ṣigba be jijọ mọnkọtọn lẹ nọ hẹn mí tindo haṣinṣan dagbe hẹ Jiwheyẹwhe ya? Paali. Kakatimọ, Jehovah nọ yọ́n pinpẹn homẹmimiọn sinsẹ̀n-basitọ etọn lẹ tọn. Mí mọ ehe hezeheze to kandai he tin to Osọha lẹ weta 12 mẹ. Nujijọ he go kandai enẹ donù wá aimẹ to zungbo Sinai tọn mẹ, to whenue Islaelivi lẹ yin tuntundote sọn Egipti godo.

Miliami po Aalọn po, jẹ ‘ohó dọ do Mose,’ nọvi yetọn go ji. (Wefọ 1) Kakati dọ yé ni dọnsẹpọ Mose bo dọ ahunmẹdunamẹnu yetọn lẹ na ẹn, yé jẹ nuhlundọ dego ji, vlavo bo to lilá nuhe to ahunmẹduna yé lẹ pé to osla lọ mẹ. Miliami, he go kandai lọ donù jẹnukọn, wẹ na ko yin tọ́ntlọ́ngbọ́n to nuhlundọ lọ mẹ. Whẹwhinwhẹ́n tangan he wutu yé do hlunnudọ wẹ yindọ, Mose wlealọ hẹ yọnnu Kuṣinu de. Be awuwhàn wẹ Miliami te dọ akọta lọ ma na na emi ayidonugo na yọnnu he ma yin Islaelivi he Mose dà lọ wutu wẹ ya?

E ma yin enẹ kẹdẹ wutu wẹ gba. Miliami po Aalọn po nọ dọ dọ: “OKLUNỌ lọ nugbonugbo ko dọho gbọn Mose ṣokẹdẹ dali wẹ?” (Wefọ 2) Be whẹwhinwhẹ́n tangan he wutu yé do to hùnhlún wẹ ojlo lọ nado mọ aṣẹpipa po yindidi po yí dogọ ya?

Kandai lọ ma dohia dọ Mose yiavunlọna ede gba. E taidi dọ, Mose nabọẹ whii, bo doakọnna homọdọdomẹgo yetọn lẹ. Nuyiwa homẹfa tọn etọn zinnudo nuhe Biblu dọ gandego ji dọ ewọ wẹ yin “homẹmimiọnnọ tlala hú mẹhe tin to nukunmẹ aigba lọ tọn ji lẹpo.”a (Wefọ 3) E ma yin dandan dọ Mose ni dọ whẹwhinwhẹ́n de na yé gba. Jehovah to ehe lẹpo sè bosọ yiavunlọna Mose.

Jehovah Jiwheyẹwhe mọdọ emi go wẹ yé to nuhlundọ do tlọlọ. Ewọ wẹ saa de Mose do otẹn lọ mẹ. Gbọn wiwọhẹ nuhlundọtọ lọ lẹ dali, Jiwheyẹwhe flinnu yé dọ emi gbẹ́ tindo haṣinṣan dagbe hẹ Mose. E dọmọ: ‘Yẹn nọ dọho hẹ ẹ onù hlan onù.’ Enẹgodo, Jehovah kanse Miliami po Aalọn po dọmọ: “Etẹwutu avò ma vó mì nado dọho do . . . Mose go?” (Wefọ 8) Na taun tọn, homọdọdo Mose go dohia dọ yé to homọdọdo Jiwheyẹwhe go. Na nuyiwa mẹmasi tọn daho enẹ tọn wutu, homẹgble Jiwheyẹwhe tọn na wá yé ji.

Jiwheyẹwhe yí pozọ̀n do hò Miliami, mẹhe dona ko yin tọ́ntlọ́ngbọ́n to nuhlundọ lọ mẹ. Aalọn yawu vẹ̀ Mose nado dádo whẹho lọ mẹ. Yí nukun homẹ tọn do pọ́n—mẹhe go yé ko hlunnudọ do lọ wẹ dona gọalọna Miliami whẹpo e nido jẹgangan! Homẹmimiọn Mose tọn zọ́n bọ e wà nuhe Aalọn biọ to e si. Tintan he Mose na do kẹnù, ovẹ̀ vẹkuvẹku wẹ e vẹ̀ na Jehovah do Miliami tamẹ. Miliami wá jẹgangan, ṣigba e dona mọ winyan bo yin súsú do gbonu osla Islaelivi lẹ tọn na azán ṣinawe whẹ́.

Kandai ehe gọalọna mí nado yọ́n jẹhẹnu he họakuẹ to nukun Jehovah Jiwheyẹwhe tọn mẹ lẹ, po jijọ he e gbẹwanna lẹ po. Eyin mí jlo na dọnsẹpọ Jiwheyẹwhe, mí dona dovivẹnu nado de ayilinlẹn goyiyi, awuwhàn, po ojlo zogbe depope he sọgan fọ́n to ayiha mítọn mẹ po tọn sẹ̀. Homẹmimiọnnọ lẹ wẹ Jehovah nọ yiwanna. Enẹwutu e dopagbe dọmọ: “Homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.”—Psalm 37:11; Jakobu 4:6.

[Nudọnamẹ odò tọn]