Be Jiwheyẹwhe Dopà Adọkun Tọn Na Mí Wẹ Ya?

‘Jiwheyẹwhe jlo dọ a ni lẹzun adọkunnọ—tindo mọto susu, podọ na ajọ́ towe ni disa. Saa yí i sè poun, bo do alọ apò mẹ bo bẹ nuhe a do lẹpo na ẹn.’

NUHE nọ saba yin sisè to sinsẹ̀n delẹ mẹ to Brésil niyẹn, wẹ linlinwe Brésil tọn de dọ. Mẹsusu wẹ tindo yise to hogbe enẹlẹ mẹ. Sọgbe hẹ dodinnanu he yin bibasi gando mẹhe ylọ yede dọ Klistiani to États-Unis lẹ go, linlinwe Time dọmọ: “Gbẹtọ 61 plipli to kanweko ji wẹ yise dọ Jiwheyẹwhe jlo dọ gbẹtọvi lẹ ni jẹ adọkun. Podọ gbẹtọ 31 to kanweko ji . . . wẹ yigbe dọ eyin hiẹ na akuẹ Jiwheyẹwhe, Jiwheyẹwhe na dona we po akuẹ susu po.”

To otò Amérique latine tọn susu mẹ, taidi Brésil, nuyise he fọ́n bo to gbigbayipe lọ wẹ yindọ, eyin a nọ yì ṣọṣi to gbesisọ mẹ bo nọ basi nunina lẹ, Jiwheyẹwhe na dona we po agbasanu susu po; podọ enẹ nọ zọ́n bọ mẹsusu nọ wọ̀ biọ sinsẹ̀n mọnkọtọn lẹ mẹ. Ṣigba, be Jiwheyẹwhe dopà adọkun tọn na mẹhe nọ sẹ̀n ẹn lẹ nugbonugbo ya? Be devizọnwatọ Jiwheyẹwhe tọn hohowhenu tọn lẹpo wẹ yin adọkunnọ ya?

Nugbo wẹ dọ to Owe-wiwe Heblu tọn lẹ mẹ, mí nọ saba mọdọ mẹhe Jiwheyẹwhe dona lẹ yin adọkunnọ to agbasa-liho. Di apajlẹ, to Deutelonomi 8:18 mẹ, mí hia dọmọ: “Hiẹ na nọ flin OKLUNỌ lọ Jiwheyẹwhe towe, na ewọ wẹ mẹhe na huhlọn we nado tindo adọkunnu.” Ehe hẹn Islaelivi lẹ deji dọ eyin yé setonuna Jiwheyẹwhe, ewọ na hẹn yé zun akọta adọkunnọ de.

Etẹwẹ dogbọn devizọnwatọ Jiwheyẹwhe tọn lẹ dopodopo dali? Dawe nugbonọ lọ Job jẹ adọkun taun, podọ whenue Satani hẹn ẹn zun hẹntọnọ godo, Jehovah na ẹn adọkun etọn lẹ “whla awe sù sọ ehe e ko tindo dai.” (Job 1:3; 42:10) Ablaham lọsu yin adọkunnọ. Gẹnẹsisi 13:2 dọ dọ e “wàdọkun tlala to whékanlin mẹ, to fataka mẹ, podọ to sika mẹ.” To whenue pipli awhànpa ahọlu whèzẹtẹn-waji tọn ẹnẹ wle Lọti, tavẹ-ylọvi Ablaham tọn lọ, Ablaham ‘bẹ devi pinplọn etọn lẹ, he yè jì to owhé etọn gbè jẹgbonu, fọde-kanwe-gbantọ́n-nukunatọ̀n.’ (Gẹnẹsisi 14:14) Po “devi pinplọn” 318 he penugo nado yí adanwànu lẹ zan ganji po, mí mọnukunnujẹemẹ dọ whédo Ablaham tọn dona ko klo taun. Nugbo lọ dọ e penugo nado penukundo whédo daho mọnkọtọn go dohia dọ adọkunnọ daho de wẹ ewọ yin, bo tindo lẹngbọpa po kanlinpa daho lẹ po.

Mọwẹ, to hohowhenu, devizọnwatọ nugbonọ Jiwheyẹwhe tọn susu—taidi Ablaham, Isaki, Jakobu, Davidi, Sọlọmọni, po mọmọ po—wẹ jẹ adọkun. Ṣigba, be enẹ dohia dọ Jiwheyẹwhe na hẹn mẹhe nọ sẹ̀n ẹn lẹpo jẹ adọkun wẹ ya? To alọ devo mẹ, be nugbo lọ dọ mẹde yin wamọnọ dohia dọ e ma tindo dona Jiwheyẹwhe tọn wẹ ya? Hosọ he bọdego na dọhodo kanbiọ ehelẹ ji.