Plọn Ovi Towe Lẹ

Jẹlemia Ma Jogbe

BE E ko jọ pọ́n bọ a gbọjọ bo lẹn nado jogbe ya?—a E ko jọ do mẹsusu go pọ́n. E jọ do Jẹlemia lọsu go. Ṣigba e ma dike nuhe mẹdevo lẹ dọ kavi wà ni hẹn ẹn jogbe. Gbọ mí ni pọ́n nuhewutu Jẹlemia do yin omẹ vonọtaun de na Jiwheyẹwhe, ganṣo bo lẹn nado jogbe.

Whẹpo Jẹlemia do yin jiji, Jiwheyẹwhe nugbo lọ, Jehovah, ko de e nado yin yẹwhegán he na na avase gbẹtọ lẹ dọ yé ma to homẹ Jiwheyẹwhe tọn hẹn hùn. Be a yọ́n nuhe Jẹlemia dọna Jehovah to owhe susu godo ya?— E dọmọ: “Doayi e go, yẹn ma sọgan dọho: na yẹn yin yọpọvu wutu.”

Gblọndo tẹwẹ a lẹndọ Jehovah na Jẹlemia?— Po homẹdagbe po, e dọna ẹn madoadúdẹji dọmọ: ‘A dọ, yẹn yin yọpọvu blo: na hiẹ na yì mẹhe dè yẹn na do we hlan lẹpo dè, podọ nudepope yẹn na degbena we hiẹ na dọ. A dibu blo.’ Etẹwutu? “Na yẹn tin dè we nado whlẹn we,” wẹ Jehovah dọ.—Jẹlemia 1:4-8.

Ṣogan, dile mí dọ do jẹnukọn, Jẹlemia wá gbọjọ to nukọn mẹ. E wàmọ na gbẹtọ lẹ nọ ṣàn ẹn kò na e to Jiwheyẹwhe sẹ̀n wutu. E dọmọ: ‘Mẹlẹpo wẹ to kikò mi bo to vivlẹ mi egbesọegbesọ.’ Enẹwutu, e jlo na jogbe. “Yẹn ma na dọho [Jehovah tọn], kavi dọho depope to oyín etọn mẹ ba,” wẹ e dọ. Be e ka jogbe nugbonugbo ya?

Jẹlemia dọmọ: ‘Ohó Jehovah tọn tin di miyọ́n he to jiji de he yè ṣinyọnnudo do ohú ṣie lẹ mẹ, podọ onú ṣikọna mi nado hẹn ẹn do ayiha ṣie mẹ.’ (Jẹlemia 20:7-9) Dile etlẹ yindọ Jẹlemia dibu to whedelẹnu, owanyi etọn na Jehovah ma dike e ni jogbe. Gbọ mí ni pọ́n lehe Jẹlemia yin hihọ́-basina do na e ma jogbe wutu.

Jehovah dọna Jẹlemia dọ e ni na avase gbẹtọ lẹ dọ Jelusalẹm na yin vivasudo eyin yé ma diọ jijọ ylankan yetọn lẹ. Whenue Jẹlemia na avase enẹ, gbẹtọ lẹ gblehomẹ bo dọmọ: “Dawe ehe tin jẹna okú.” Ṣigba Jẹlemia vẹ̀ yé nado “setonuna ogbè OKLUNỌ” tọn. To godo mẹ, e dọmọ: ‘Mì dona yọnẹn dọ eyin mìwlẹ hù mi, be homẹvọnọ de wẹ mì hù, na Jiwheyẹwhe wẹ do mi hlan nado dọhona mì.’ Be a yọ́n nuhe jọ to enẹgodo ya?—

Biblu dọmọ: “Ahọvi lẹ lọ po gbẹtọ lẹpo po dọhlan yẹwhenọ lẹ lọ podọ hlan yẹwhegán lẹ lọ dọ: Dawe ehe ma tin jẹna okú gba; na ewọ ko dọho hlan mí to oyín OKLUNỌ Jiwheyẹwhe mítọn tọn mẹ.” Ehe dohia dọ whenue Jẹlemia ma dike obu gbẹtọ tọn ni hẹn ẹn jogbe, Jehovah basi hihọ́na ẹn. Todin, gbọ mí ni pọ́n nuhe jọ do Ulia go, yèdọ yẹwhegán Jehovah tọn devo he yinuwa to aliho he gbọnvo pete mẹ.

Biblu dọ dọ: ‘Ulia dọ dọdai do Jelusalẹm go kẹdẹdi ohó Jẹlemia tọn lẹpo.’ Ṣigba whenue Ahọlu Jehọiakimi gblehomẹ do Ulia go, be a yọ́n nuhe Ulia wà ya?— E dibu, bo jogbe kakati nado wà ojlo Jiwheyẹwhe tọn, bosọ họnyi Egipti. Enẹwutu, ahọlu lọ domẹhlan nado dín in mọ bo plan ẹn wá. To whenuena yé plan ẹn wá, be a yọ́n nuhe ahọlu ylankan lọ wà na ẹn ya?— E yí ohí do hù i!—Jẹlemia 26:8-24.

Etẹwẹ a lẹn, naegbọn Jehovah do basi hihọ́na Jẹlemia bo jo Ulia do?— Nugbo wẹ dọ Jẹlemia na ko dibu dile Ulia wà do, ṣigba Jẹlemia ma jo Jehovah sinsẹ̀n do bo họ̀n. E ma jogbe. Etẹwẹ a lẹndọ mí sọgan plọn sọn apajlẹ Jẹlemia tọn mẹ?— Mí plọn dọ to whedelẹnu e sọgan vẹawuna mí nado wà nuhe Jiwheyẹwhe dọ, ṣigba mí dona nọ dejidego bo setonuna ẹn to whepoponu.

[Nudọnamẹ odò tọn]

Kanbiọ Lẹ:

○ Azọ́n tẹwẹ Jiwheyẹwhe dena Jẹlemia?

○ Naegbọn Jẹlemia lẹn nado jogbe?

○ Naegbọn Jehovah do basi hihọ́na Jẹlemia bo jo Ulia do?

○ Etẹwẹ a plọn sọn apajlẹ Jẹlemia tọn mẹ?