Yin Bibaptizi to Oyín Mẹnu po Etẹ po Tọn Mẹ?
“Enẹwutu, mì yì bo hẹn gbẹtọ lẹ . . . zun devi lẹ, bosọ nọ baptizi yé to oyín Otọ́ tọn, Visunnu tọn, po gbigbọ wiwe tọn po mẹ.”—MAT. 28:19.
1, 2. (a) Etẹwẹ jọ to Jelusalẹm to Pẹntikọsti 33 W.M.? (b) Naegbọn susu mẹhe tin to gbẹtọgun lọ mẹ lẹ tọn do yin whinwhàn nado yí baptẹm?
JELUSALẸM gọ́ na gbẹtọgun he wá sọn awà voovo ji. To azán Pẹntikọsti 33 W.M. tọn gbè, hùnwhẹ titengbe de to yìyì bọ jonọ susu wá nado tindo mahẹ to e mẹ. Ṣigba nupaṣamẹ de jọ, bọ to enẹgodo apọsteli Pita dọ hodidọ ojlofọndotenamẹ tọn de he tindo kọdetọn he sẹhundaga. Hodidọ etọn whàn nudi gbẹtọ 3000, yèdọ Ju po mẹdiọzun Ju lẹ po sọmọ bọ yé lẹnvọjọ bo yin bibaptizi to osin mẹ. Gbọnmọ dali, omẹ ehelẹ yin yiyidogọ mẹhe ko tin to agun Klistiani tọn he ṣẹṣẹ yin didoai lọ mẹ lẹ. (Owalọ 2:41) Baptẹm omẹ planplan ehelẹ tọn to tándo po sinhẹnnú dahodaho lẹ po mẹ lẹdo Jelusalẹm pé dona ko hẹn hunyanhunyan susu wá!
2 Etẹwẹ zọ́n bọ omẹ planplan ehelẹ do yí baptẹm? Jẹnukọnna nujijọ enẹ to gbènẹgbè, “nudidọ de he taidi jẹhọn sinsinyẹn de tọn wá sọn olọn mẹ.” To abò aga tọn owhé de tọn mẹ, nudi devi Jesu tọn 120 gọ́ na gbigbọ wiwe. Enẹgodo, sunnu po yọnnu budisi Jiwheyẹwhe tọ́ lẹ po pli dopọ bọ e paṣa yé nado sè bọ devi enẹlẹ “jẹ ogbè voovo yí do dọho ji.” To whenue yé sè nuhe Pita dọ lẹ, ehe bẹ zẹẹmẹ dutomẹji he e basi gando okú Jesu tọn go hẹn, e yinuwado yé ji “yì ahun mẹ.” Etẹwẹ yé dona wà? Pita dọmọ: “Mì lẹnvọjọ, bo dike dopodopo mìtọn ni yin bibaptizi to oyín Jesu Klisti tọn mẹ . . . , mì nasọ mọ nunina vọnu, he yin gbigbọ wiwe yí.”—Owalọ 2:1-4, 36-38.
3. Etẹwẹ Ju po mẹdiọzun Ju he lẹnvọjọ lẹ po dona wà to azán Pẹntikọsti tọn gbè?
3 Lẹnnupọndo ninọmẹ gbigbọmẹ tọn Ju po mẹdiọzun Ju he sè ohó Pita tọn enẹlẹ po tọn ji. Yé ko kẹalọyi Jehovah taidi Jiwheyẹwhe yetọn. Podọ yé ko plọnnu to Owe-wiwe Heblu tọn lẹ mẹ gando gbigbọ wiwe go, yèdọ huhlọn-yido-wazọ́n Jiwheyẹwhe tọn he e yizan to nudida whenu podọ to enẹgodo. (Gẹn. 1:2; Whẹ. 14:5, 6; 1 Sam. 10:6; Ps. 33:6) Ṣigba enẹ kẹdẹ ma ko pé. Dandannu wẹ e yin dọ yé ni yọ́n nuyizan whlẹngán tọn he Jiwheyẹwhe wleawuna lọ bo kẹalọyi i—enẹ wẹ Mẹssia lọ, Jesu. Enẹwutu, Pita zinnudeji dọ yé dona yin “bibaptizi to oyín Jesu Klisti tọn mẹ.” Azán vude jẹnukọn, Jesu degbena Pita po mẹdevo lẹ po to fọnsọnku etọn godo nado nọ baptizi gbẹtọ lẹ “to oyín Otọ́ tọn, Visunnu tọn, po gbigbọ wiwe tọn po mẹ.” (Mat. 28:19, 20) Hogbe ehelẹ gọ́ na zẹẹmẹ taun to owhe kanweko tintan whenu podọ to egbehe ga. Zẹẹmẹ tẹ?
To Oyín Otọ́ Tọn Mẹ
4. Diọdo tẹwẹ wá aimẹ na nuhe dù haṣinṣan gbẹtọ lẹ tọn hẹ Jehovah?
4 Dile mí donù e go do wayi, mẹhe kẹalọyi hodidọ Pita tọn lẹ ko nọ sẹ̀n Jehovah bo ko tindo haṣinṣan de hẹ ẹ dai. Yé ko to tintẹnpọn nado yìn Osẹ́n etọn, podọ enẹ wẹ zọ́n bọ delẹ to yé mẹ do tọ́n sọn awà voovo ji bo wá Jelusalẹm. (Owalọ 2:5-11) Ṣigba, Jiwheyẹwhe ko hẹn diọdo ayidego tọn de wá na nuhe dù aliho he mẹ e nọ yinuwa hẹ gbẹtọvi lẹ te. E ko gbẹ́ Ju lẹ he yin akọta dide etọn dai; yé masọ sọgan mọ nukundagbe etọn gbọn Osẹ́n lọ yìnyìn dali ba. (Mat. 21:43; Kọl. 2:14) Eyin todoaitọ enẹlẹ jlo dọ haṣinṣan yetọn hẹ Jehovah ni zindonukọn, yé dona wà nudevo de.
5, 6. Etẹwẹ Ju po mẹdiọzun Ju owhe kanweko tintan tọn susu po wà nado sọgan tindo haṣinṣan de hẹ Jiwheyẹwhe?
5 E họnwun dọ e ma yindọ yé dona lẹ́ sọn Jehovah he yin Gbẹ̀namẹtọ yetọn dè wẹ gba. (Owalọ 4:24) Mẹhe kẹalọyi zẹẹmẹ Pita tọn lẹ sọgan mọ todin hugan gbede pọ́n dọ Jehovah wẹ Otọ́ homẹdagbenọ yetọn. E do Mẹssia lọ hlan nado whlẹn yé podọ e ko wleawufo nado jona yé, etlẹ yin mẹhe go Pita dọ gando dọmọ: “Mì gbọ owhé Islaeli tọn lẹpo ni yọnẹn hezeheze dọ Jiwheyẹwhe ko yí Jesu, mẹhe mì whè do núgo lọ do basi Oklunọ po Klisti po.” Nado dọ hójọhó, mẹhe yí ohó Pita tọn do yizan mẹ lẹ na tindo whẹwhinwhẹ́n susu dogọ todin nado yọ́n pinpẹn nuhe Otọ́ lọ ko wà na mẹhe tindo haṣinṣan hẹ ẹ lẹpo tọn!—Hia Owalọ lẹ 2:30-36.
6 Na nugbo tọn, Ju po mẹdiọzun Ju ehelẹ po sọgan mọ todin dọ haṣinṣan de tintindo hẹ Jehovah biọ dọ yé ni kẹalọyi i taidi Mẹhe wleawuna whlẹngán gbọn Jesu gblamẹ. To whelọnu lo, hiẹ sọgan mọnukunnujẹ nuhewutu yé do lẹnvọjọ sọn ylando yetọn lẹ mẹ. Delẹ to ylando ehelẹ mẹ bẹ alọ dido to okú Jesu tọn mẹ hẹn, vlavo yé yọnẹn do wàmọ wẹo kavi lala. Podọ e masọ paṣa mí dọ to azán he bọdego lẹ gblamẹ, “yé sọ zindonukọn nado to yedelẹ zejo na nuplọnmẹ apọsteli lẹ tọn.” (Owalọ 2:42) Yé sọgan “yí awuvivo hodidọ tọn do dọnsẹpọ ofìn nukundagbe majẹhẹ tọn lọ” podọ yé jlo nado wàmọ.—Heb. 4:16.
7. Nawẹ mẹsusu to egbehe ko diọ pọndohlan yetọn gando Jiwheyẹwhe go bo yin bibaptizi to oyín Otọ́ tọn mẹ gbọn?
7 To egbehe, gbẹtọ livi susu he wá sọn ninọmẹ voovo mẹ lẹ ko plọn nugbo lọ gando Jehovah go to Biblu mẹ. (Isa. 2:2, 3) To ojlẹ de mẹ wayi, delẹ to yé mẹ ma yise dọ Jiwheyẹwhe tin podọ mẹhe tlẹ yise dọ e tin lẹ lọsu nọ lẹndọ e ma nọ hò nudida etọn lẹ tọn pọ́n. Ṣigba, yé wá kudeji dọ Mẹdatọ de tin he yé sọgan tindo haṣinṣan nujọnu tọn de hẹ. Na mẹdevo lẹ, yẹwhe atọ̀n-to-dopomẹ kavi boṣiọ voovo lẹ wẹ yé nọ sẹ̀n dai. Yé wá plọn dọ Jehovah kẹdẹ wẹ Jiwheyẹwhe ganhunupotọ lọ, podọ todin yé nọ hodẹ̀ hlan ẹn gbọn oyín etọn titi yiyizan dali. Enẹ tin to kọndopọ mẹ hẹ gbedide he Jesu na hodotọ etọn lẹ nado nọ baptizi gbẹtọ lẹ to oyín Otọ́ tọn mẹ.
8. Etẹwẹ mẹhe ma yọ́n nudepope dogbọn ylando he mí dugu etọn sọn Adam dè dali lẹ dona yọnẹn gando Otọ́ lọ go?
8 Yé ko sọ plọn dọ yé dugu ylando tọn sọn Adam dè. (Lom. 5:12) Onú yọyọ de wẹ enẹ yin he yé dona kẹalọyi taidi nugbo. Omẹ mọnkọtọn lẹ sọgan yin yiyijlẹdo mẹhe to azọ̀njẹ bo ma yọnẹn de go. E sọgan ko mọ ohia delẹ, taidi awufiẹsa sọn ojlẹ de mẹ jẹ devo mẹ. Ṣogan na mẹde ma ko penugo nado dọ azọ̀n tangan he jẹ e te wutu, e sọgan lẹndọ emi to ganji. Ṣigba, ohia he mọ e te lẹ dekunnu dọ nude to jijọ. (Yijlẹdo 1 Kọlintinu lẹ 4:4 go.) Etẹwẹ lo eyin mẹde wá penugo nado dọ azọ̀n he jẹ e te taun na ẹn? Be e ma na yin nuyọnẹnnu dọ e ni dín bo kẹalọyi aliho nukunpedomẹgo tọn dagbe he doto lẹ yọnẹn bo yigbena de ya? Mọdopolọ, to whenue mẹsusu ko plọn nugbo lọ gando ylando he mí dugu etọn go, yé ko yigbena “azọ̀n” he Biblu mọ na yé lọ bo wá mọnukunnujẹemẹ dọ Jiwheyẹwhe jlo na “hẹnazọ̀ngbọna” yé. Mọwẹ, mẹhe ko jẹla sọn Otọ́ lọ dè lẹpo dona lẹhlan Ewọ he sọgan “hẹnazọ̀ngbọna” yé.—Efe. 4:17-19.
9. Etẹwẹ Jehovah wà nado hẹn ẹn yọnbasi na gbẹtọvi lẹ nado tindo haṣinṣan de hẹ ẹ?
9 Eyin hiẹ ko klan gbẹzan towe do wiwe na Jehovah Jiwheyẹwhe bo ko lẹzun Klistiani he yí baptẹm, be a na ko yọnẹn dọ nujiawu de wẹ e yin nado tindo haṣinṣan de hẹ Jiwheyẹwhe. Todin, hiẹ sọgan mọ obá he mẹ Otọ́ towe, Jehovah yin owanyinọ jẹ. (Hia Lomunu lẹ 5:8.) Dile etlẹ yindọ Adam po Evi po ko waylan do Jiwheyẹwhe, ewọ de afọdide tintan na kúnkan yetọn lẹ nido sọgan tindo haṣinṣan dagbe de hẹ ẹ—kakajẹ mílọsu ji. To mọwiwà mẹ, Jiwheyẹwhe dona doakọnna awufiẹsa he yajiji po okú Visunnu vivẹ etọn tọn po hẹnwa na ẹn. Be ehe yinyọnẹn ma gọalọna mí nado kẹalọyi aṣẹpipa Jiwheyẹwhe tọn bo setonuna gbedide etọn lẹ sọn ahun mẹ ya? Eyin hiẹ ma ko klan dewe do wiwe na Jiwheyẹwhe bo yí baptẹm janwẹ, e jẹ dọ a ni wàmọ.
To Oyín Visunnu Tọn Mẹ
10, 11. (a) Obá tẹ mẹ wẹ mí dona yọ́n pinpẹn nuhe Jesu wà do ota mítọn mẹ tọn jẹ? (b) Numọtolanmẹ tẹwẹ okú Jesu tọn taidi ofligọ de nọ hẹn we tindo?
10 Ṣigba, sọ lẹnnupọndo nuhe Pita dọna gbẹtọgun lọ ji whladopo dogọ. E zinnudeji dọ yé dona kẹalọyi Jesu, ehe tindo kanṣiṣa tlọlọ hẹ baptẹm yíyí ‘to oyín Visunnu tọn mẹ.’ Naegbọn enẹ do yin nujọnu to whenẹnu, podọ todin? Alọkikẹyi Jesu po baptẹm yíyí to oyín etọn mẹ po zẹẹmẹdo nado kẹalọyi adà he ewọ nọ yiwà to haṣinṣan mítọn hẹ Mẹdatọ lọ mẹ. Jesu dona yin whiwhè do yatin go nado de dẹ̀hodo Osẹ́n lọ tọn sẹ̀ sọn Ju lẹ go; ṣigba, okú etọn sọ hẹn ale daho devo wá. (Gal. 3:13) E wleawuna avọ́sinsan ofligọ tọn he gbẹtọvi lẹpo tindo nuhudo etọn. (Efe. 2:15, 16; Kọl. 1:20; 1 Joh. 2:1, 2) Nado jẹ yanwle enẹ kọ̀n, Jesu doakọnna whẹdida mawadodo, mẹṣanko, yasanamẹ podọ okú to godo mẹ. Obá tẹ mẹ wẹ a yọ́n pinpẹn avọ́sinsan etọn tọn jẹ? Yí nukun homẹ tọn do pọ́n nujijọ lọ to whenue bato he nọ yin yiylọdọ Titanic gbà do osin-agó daho de go bo siọ to 1912. Mí ni dọ dọ owhe 12 mẹvi de wẹ hiẹ yin bo to gbejizọnlinzin to bato enẹ mẹ to whenẹnu. A tẹnpọn nado lọ́n biọ tọjihun gbẹwhlẹngán tọn de mẹ, ṣigba e ko gọ́. Todin, dawe de he tin to tọjihun enẹ mẹ donùnùgo na asi etọn, bo gọwá atọ̀ bato he to sisiọ lọ tọn ji bosọ ze we do tọjihun gbẹwhlẹngán tọn lọ mẹ. Etẹwẹ na yin numọtolanmẹ towe? Matin ayihaawe, hiẹ na yọ́n pinpẹn nuhe e wà na we tọn taun! Eyin mọ wẹ, hiẹ sọgan mọnukunnujẹ numọtolanmẹ visunnu he go onú enẹ jọ do tọn lẹ mẹ.a Ṣogan, nuhe Jesu wà na we sọ klo humọ tlala. E kú na hiẹ nido sọgan nọgbẹ̀ kakadoi.
11 Numọtolanmẹ tẹwẹ a tindo to whenue a sè dogbọn nuhe Visunnu Jiwheyẹwhe tọn wà na we dali? (Hia 2 Kọlintinu lẹ 5:14, 15.) Hiẹ na ko yọ́n pinpẹn etọn taun. Enẹ whàn we nado klan gbẹzan towe do wiwe na Jiwheyẹwhe podọ ‘ma nado nọgbẹ̀ na dewe ba, ṣigba na omẹ lọ he kú na we.’ Baptẹm yíyí to oyín Visunnu tọn mẹ zẹẹmẹdo nado kẹalọyi nuhe Jesu ko wà do ota towe mẹ bo yigbena aṣẹpipa etọn taidi “Afọzedaitọ-gán ogbẹ̀ tọn lọ.” (Owalọ 3:15; 5:31) To ojlẹ de mẹ wayi, hiẹ ma tindo haṣinṣan depope hẹ Mẹdatọ lọ, podọ nado dọ hójọhó a ma tindo todido nujọnu tọn de. Ṣigba gbọn yise tintindo to hùnsọndai Jesu Klisti tọn mẹ po baptẹm yíyí po dali, hiẹ tindo haṣinṣan de hẹ Otọ́ lọ todin. (Efe. 2:12, 13) Apọsteli Paulu wlan dọmọ: “Mìwlẹ he ko jẹla bo yin kẹntọ lẹ to ojlẹ de mẹ wayi na ayiha mìtọn tin to azọ́n he yin ylankan lẹ ji wutu, [Jiwheyẹwhe] ko gbọwhẹ hẹ mì whladopo dogọ todin gbọn agbasa gbẹtọ tọn [Jesu] he kú lọ tọn gblamẹ, nado sọgan hẹn mì wá ewọ nukọn to wiwe ji, madoblọ.”—Kọl. 1:21, 22.
12, 13. (a) Etẹwẹ baptẹm he hiẹ yí to oyín Visunnu tọn mẹ dona whàn we nado wà eyin mẹde ṣinuwa do we? (b) Taidi Klistiani he yin bibaptizi to oyín Jesu tọn mẹ de, azọngban tẹwẹ hiẹ tindo?
12 Dile etlẹ yindọ hiẹ ko yin bibaptizi to oyín Visunnu tọn mẹ, a yọnẹn ganji dọ emi tindo ayilinlẹn mape tọn lẹ. Enẹ he a yọnẹn nọ gọalọna we egbesọegbesọ. Di apajlẹ, eyin mẹde ṣinuwa do we, be a nọ flindọ mì omẹ awe lẹpo wẹ yin mapenọ ya? Mì omẹ awe lẹpo wẹ tindo nuhudo jona Jiwheyẹwhe tọn, podọ mì omẹ awe lẹpo wẹ dona jonamẹ. (Malku 11:25) Nado zinnudo nuhudo ehe ji, Jesu na apajlẹ de: Oklunọ afanumẹ de tọn zẹhudo ahọ́ talẹnti degba-awe-foo (enẹ wẹ denali livi 60) he afanumẹ lọ dù do e ji. To nukọn mẹ, afanumẹ enẹ gbẹ́ nado jo ahọ́ denali 100 he afanumẹ hatọ etọn dù do e na ẹn. Jesu hẹn nuagokun ehe họnwun: Jehovah ma na jona mẹhe ma nọ jona mẹmẹsunnu etọn. (Mat. 18:23-35) Mọwẹ, baptẹm yíyí to oyín Visunnu tọn mẹ zẹẹmẹdo nado kẹalọyi aṣẹpipa Jesu tọn bo tẹnpọn nado hodo apajlẹ po nuplọnmẹ etọn lẹ po, ehe bẹ ojlo tintindo nado jona mẹdevo lẹ hẹn.—1 Pita 2:21; 1 Joh. 2:6.
13 Na mapenọ-yinyin towe wutu, hiẹ ma sọgan hodo apajlẹ Jesu tọn to gigọ́ mẹ. Etomọṣo, to kọndopọ mẹ hẹ klandowiwe ahundopo tọn towe hlan Jiwheyẹwhe, hiẹ jlo nado wà nuhe go a pé lẹpo nado hodo apajlẹ Jesu tọn. Ehe bẹ vivẹnudido zọnmii nado klọ́n gbẹtọ-yinyin hoho lọ dai bo ze yọyọ lọ dogo hẹn. (Hia Efesunu lẹ 4:20-24.) Eyin nuyiwa họntọn de tọn nọ jẹ towe ji, e yọnbasi dọ a na tẹnpọn nado plọnnu sọn apajlẹ po jẹhẹnu dagbe etọn lẹ po mẹ. Mọdopolọ, hiẹ na jlo nado plọnnu sọn Klisti dè bo hodo apajlẹ etọn.
14. Nawẹ hiẹ sọgan dohia gbọn dọ a kẹalọyi aṣẹpipa Jesu tọn taidi Ahọlu olọn mẹ tọn?
14 Aliho devo sọ tin he mẹ hiẹ sọgan dohia te dọ a mọnukunnujẹ nuhe baptẹm yíyí to oyín Visunnu tọn mẹ zẹẹmẹdo mẹ. Jiwheyẹwhe “hẹn onú lẹpo zun mẹmẹglọ to afọ [Jesu tọn] lẹ glọ, bo hẹn ẹn yin tatọ́ onú lẹpo tọn na agun.” (Efe. 1:22) Enẹwutu, hiẹ dona nọ na sisi aliho he mẹ Jesu nọ deanana mẹhe klan yede do wiwe na Jehovah lẹ te. Klisti to gbẹtọvi mapenọ lẹ yizan to agun lẹ mẹ, titengbe sunnu he ko whẹ́n to gbigbọ-liho lẹ, yèdọ mẹho he yin dide lẹ. Sunnu ehelẹ yin dide na “hinhẹn gọ̀ do tẹnmẹ omẹ wiwe lẹ tọn, . . . na didó daga agbasa Klisti tọn.” (Efe. 4:11, 12) Eyin gbẹtọvi mapenọ de tlẹ ṣinuwa, Jesu he yin Ahọlu Ahọluduta olọn mẹ tọn tindo nugopipe lọ nado didẹ whẹho lọ to ojlẹ po aliho he jẹ po mẹ. Be hiẹ yí ehe sè ya?
15. Eyin hiẹ ma ko yí baptẹm janwẹ, dona tẹlẹ wẹ hiẹ sọgan donukun to baptẹm towe godo?
15 Whladopo dogọ, mẹdelẹ ma ko klan yede do wiwe na Jehovah bo yí baptẹm. Eyin hiẹ ma ko wàmọ janwẹ, be nuhe mí ko dọ kakajẹ din lẹ ma dohia we dọ nuhe sọgbe hẹ lẹnpọn dagbe bo nasọ do pinpẹn-nutọn-yinyọnẹn towe hia wẹ e yin nado kẹalọyi otẹn he mẹ Visunnu lọ tin te ya? Baptẹm yíyí to oyín Visunnu tọn mẹ na hùn dotẹnmẹ dona susu tọn dotena we.—Hia Johanu 10:9-11.
To Oyín Gbigbọ Wiwe Tọn Mẹ
16, 17. Etẹwẹ baptẹm yíyí to oyín gbigbọ wiwe tọn mẹ zẹẹmẹdo na we?
16 Etẹwẹ e zẹẹmẹdo nado yin bibaptizi to oyín gbigbọ wiwe tọn mẹ? Dile mí ko donù e go do wayi, mẹhe dotoaina Pita to azán Pẹntikọsti tọn gbè lẹ ko yọ́n nuhe gbigbọ wiwe yin. Na nugbo tọn, yé sọgan mọ po nukun po tlọlọ to gbènẹgbè dọ Jiwheyẹwhe gbẹ́ pò to gbigbọ wiwe yizan. Pita he to hodọna yé yin dopo to mẹhe “gọ́ na gbigbọ wiwe bo jẹ ogbè voovo yí do dọho ji” lẹ mẹ. (Owalọ 2:4, 8) Hodidọ lọ ‘to oyín nude tọn mẹ’ ma dohia dọ gbẹtọ hodọ wẹ yè te gba. To egbehe, nususu wẹ nọ yin wiwà “to oyín gandudu tọn mẹ,” dile gandudu ma tlẹ yin gbẹtọ de do sọ. Nulọ poun wẹ yindọ aṣẹpipa gandudu tọn glọ wẹ onú ehelẹ nọ yin bibasi te. Mọdopolọ, mẹhe yin bibaptizi to oyín gbigbọ wiwe tọn mẹ nọ mọnukunnujẹemẹ dọ gbigbọ wiwe ma yin gbẹtọ de, adavo huhlọn-yido-wazọ́n Jehovah tọn. Podọ baptẹm mọnkọtọn zẹẹmẹdo dọ mẹlọ kẹalọyi adà he gbigbọ wiwe nọ yiwà to lẹndai Jiwheyẹwhe tọn mẹ.
17 Be Biblu pinplọn ma ko gọalọna we nado yọ́n nuhe gbigbọ wiwe yin ya? Di apajlẹ, hiẹ ko wá mọnukunnujẹemẹ dọ Owe-wiwe yin kinkàn to gbọdo gbigbọ wiwe tọn glọ. (2 Tim. 3:16) Dile hiẹ to nukọnyi to gbigbọ-liho, a na ko mọnukunnujẹemẹ dogọ dọ ‘Otọ́ he to olọn mẹ nọ na gbigbọ wiwe mẹhe to bibiọ ẹ lẹ,’ kakajẹ hiẹ lọsu ji. (Luku 11:13) Vlavo hiẹ ko mọ nuyiwa gbigbọ wiwe tọn to gbẹzan towe mẹ. To alọ devo mẹ, eyin hiẹ gbẹ́ pò to nukọnpọnhlan baptẹm yíyí to oyín gbigbọ wiwe tọn mẹ, jidenamẹ Jesu tọn dọ Otọ́ lọ nọ namẹ gbigbọ wiwe dohia dọ hiẹ na duvivi dona susu tọn to whenue a na mọ gbigbọ enẹ yí.
18. Dona tẹlẹ wẹ mẹhe yin bibaptizi to oyín gbigbọ wiwe tọn mẹ lẹ nọ mọyi?
18 E họnwun dọ to egbehe ga, Jehovah to anadena agun Klistiani tọn gbọn gbigbọ etọn gblamẹ. Gbigbọ enẹ sọ nọ gọalọna dopodopo mítọn to nuyiwa mítọn egbesọegbesọ tọn lẹ mẹ. Baptẹm yíyí to oyín gbigbọ wiwe tọn mẹ nọ dohia dọ mí mọnukunnujẹ adà he e nọ yiwà to gbẹzan mítọn mẹ bo nọ gbọn pinpẹn-nutọn-yinyọnẹn dali yinuwa to kọndopọ mẹ hẹ gbigbọ enẹ. Ṣigba, mẹdelẹ sọgan kanse yede dọ nawẹ mí sọgan nọgbẹ̀ sọgbe hẹ klandowiwe he mí basi hlan Jehovah gbọn podọ nawẹ enẹ gando gbigbọ wiwe go gbọn? Mí na gbadopọnna ehe to hosọ he bọdego mẹ.
[Nudọnamẹ odò tọn]
a Pọ́n Réveillez-vous! 22 janvier 1982, weda 3-8.
Be Hiẹ Flin Ya?
• Etẹwẹ baptẹm yíyí to oyín Otọ́ tọn mẹ zẹẹmẹdo na we?
• Etẹwẹ e zẹẹmẹdo nado yin bibaptizi to oyín Visunnu tọn mẹ?
• Nawẹ hiẹ sọgan dohia dọ a mọnukunnujẹ nuhe e zẹẹmẹdo nado yí baptẹm to oyín Otọ́ po Visunnu po tọn mẹ gbọn?
• Etẹwẹ e zẹẹmẹdo nado yin bibaptizi to oyín gbigbọ wiwe tọn mẹ?
[Yẹdide to weda 10]
By permission of the Israel Museum, Jerusalem
[Asisa Yẹdide tọn]
Haṣinṣan tẹ mẹ wẹ devi yọyọ lẹ biọ hẹ Otọ́ lọ to Pẹntikọsti 33 W.M. godo?