Jesu Klisti—Obá He mẹ Nuplọnmẹ Etọn Yinuwadomẹji Jẹ
“Matin ayihaawe, kunnudenu dagbe hugan he mí tindo gando dawe nuyọnẹntọ he wá sọn Kapẹlnaumi lọ go wẹ yindọ nuplọnmẹ etọn gbẹ́ pò to nuyiwa do ahun po ayiha gbẹtọ lẹ tọn po ji.”a—WEKANTỌ GREGG EASTERBROOK.
OHÓ dohuhlọn. Hogbe nuyọnẹn tọn he yin ṣinṣinyan ganji lẹ sọgan whànmẹ, namẹ todido bo diọ gbẹzan mẹtọn. Ohó gbẹtọvi depope tọn ma dohuhlọn sọ Jesu Klisti tọn. Dopo to mẹhe sè hodidọ Jesu tọn he yin yinyọnẹn gbayipe to egbehe taidi Yẹwhehodidọ Osó ji tọn lẹ mẹ wlan to godo mẹ dọmọ: “To whenuena Jesu dotana ohó ehelẹ, kọdetọn lọ wẹ yindọ awuji gbẹtọgun lẹ na aliho mẹpinplọn tọn etọn wutu.”—Matiu 7:28.
Kakajẹ egbé, gbẹtọ lẹ gbẹ́ jẹakọ hẹ hodidọ Jesu tọn susu lẹdo aihọn pé. Lẹnnupọndo hodidọ etọn he gọ́ na zẹẹmẹ taun delẹ ji.
“Mìwlẹ ma sọgan yin afanumẹ na Jiwheyẹwhe podọ na Adọkunnu lẹ.”—Matiu 6:24.
“Enẹwutu, nudepope he mìwlẹ jlo dọ gbẹtọ lẹ ni nọ wà na mì, mọkẹdẹ wẹ mìwlẹ dona nọ wà na yé do ga.”—Matiu 7:12.
“Mì yí onú he yin Sesali tọn lẹ na Sesali, ṣigba onú he yin Jiwheyẹwhe tọn lẹ na Jiwheyẹwhe.”—Matiu 22:21.
“Ayajẹ sù to nunamẹ mẹ hú to mimọyi mẹ.”—Owalọ lẹ 20:35.
Ṣigba Jesu ma dọ ohó vivi he na gbọṣi aimẹ lẹ poun gba. Nuplọnmẹ etọn dohuhlọn na e do nugbo lọ hia gando Jiwheyẹwhe go, bo plọn gbẹtọ lẹ lehe yé sọgan hẹn gbẹzan yetọn tindo zẹẹmẹ do, bosọ dohia hezeheze dọ Ahọluduta Jiwheyẹwhe tọn kẹdẹ wẹ na hẹn pọngbọ wá na yajiji gbẹtọvi tọn lẹpo. Dile mí na to dogbapọnna nuplọnmẹ ehe to weda he bọdego lẹ mẹ, mí na mọ nuhewutu Jesu “gbẹ́ pò to nuyiwa do ahun po ayiha gbẹtọ” livi susu lẹ tọn po ji.
[Nudọnamẹ odò tọn]