Weta 24

Nuhewutu Jesu Do Wá Aigba Ji

AZÁN he Jesu yizan to Kapẹlnaumi po devi etọn ẹnẹ lẹ po ko yin dehe ján de, bo wá vivọnu po Kapẹlnauminu lẹ he hẹn awutunọ yetọn lẹ wá na ẹn nado hẹnazọngbọna to whèjai lọ po. Ojlẹ ṣokẹdẹninọ tọn depope ma ko tin gba.

Todin e yin afọnnu fuu to wunkẹngbe etọn. To whenuena zinvlu gbẹ́ dó, Jesu fọ́n bo tọnjẹgbonu na ede. E zingbejizọnlin yì nọtẹn he tin to olá de fihe ewọ kẹdẹ sọgan hodẹ̀ te hlan Otọ́ etọn. Ṣigba tintin ṣokẹdẹ Jesu tọn yin na whenu gli na whenuena Pita po mẹdevo lẹ po doayi e go dọ e yin bibapò, yé jẹgbonu bo to dindin in pé.

To whenuena yé mọ Jesu, Pita dọmọ: “Gbẹtọ lẹpo wẹ to dindin we.” Omẹ Kapẹlnaumi tọn lẹ jlo dọ Jesu ni nọ hẹ yé. Na nugbo tọn yé yọ́n pinpẹn nuhe e ko wà na yé tọn! Ṣigba be whẹwhinwhẹ́n tangan he wutu Jesu wá aigba ji wẹ nado basi azọ́njiawu azọ̀nhẹngbọ tọn mọnkọtọn lẹ ya? Etẹwẹ ewọ dọ dogbọn ehe dali?

Sọgbe hẹ kandai Biblu tọn dopo, Jesu na gblọndo devi etọn lẹ dọmọ: “Mì gbọ mí ni yì fidevo biọ otò he sẹpọ mẹ, na yẹn nido dọyẹwheho to finẹ ga: na ehe wutu wẹ yẹn tọ́n wá.” Dile etlẹ yindọ omẹ lọ lẹ vẹ̀ Jesu nado nọ hẹ yé, e dọ na yé dọmọ: “E ma jẹ na yẹn ni nọ ma dọyẹwheho ahọludu Jiwheyẹwhe tọn hlan otò daho devo lẹ ga gba, na enẹwutu wẹ yè do mi hlan.”

Mọwẹ, Jesu wá aigba ji titengbe nado lá ahọluduta Jiwheyẹwhe tọn, he na suwhẹna oyín Otọ́ etọn tọn bo na didẹ nuhahun gbẹtọvi tọn lẹpo kakadoi. Etomọṣo, nado dohia dọ emi yin didohlan gbọn Jiwheyẹwhe dali, Jesu basi azọ̀nhẹngbọ azọ́njiawu tọn lẹ. To aliho dopolọ mẹ Mose, to owhe kanweko lẹ jẹnukọn wà azọ́njiawu lẹ nado dohia dọ emi yin devi Jiwheyẹwhe tọn.

Todin, to whenuena Jesu tlọ́n Kapẹlnaumi nado dọyẹwheho to todaho devo lẹ mẹ, devi etọn ẹnẹ lẹ hodo e sọyi. Yé omẹ ẹnẹ lọ lẹ wẹ Pita po nọvisunnu etọn Andlé po, podọ Johanu po nọvisunnu etọn Jakobu po. Hiẹ na flin dọ to osẹ he jẹnukọn wayi tlolo, yé ko yin oylọ basina nado yin gbejizọnlin basitọ-gbẹ́ Jesu tọn tintan lẹ.

Sadidi kunnudide Jesu tọn to Galili po devi etọn ẹnẹ lẹ po yin kọdetọn dagbe he sẹhundaga de! Na nugbo tọn, linlin dogbọn nuwiwa etọn lẹ dali gbayipe yèdọ jẹ otò Silia tọn lẹ mẹ. Susugege gbẹtọ lẹ tọn sọn Galili, Judé, podọ to Tọ̀sisa Jọdani tọn godo hodo Jesu po devi etọn lẹ po. Malku 1:35-39; Luku 4:42, 43; Matiu 4:23-25; Eksọdusi 4:1-9, 30, 31.

▪ Etẹwẹ jọ to afọnnu lọ he bọdo azán jinján he Jesu yizan to Kapẹlnaumi lọ go?

▪ Naegbọn Jesu do yin didohlan aigba ji, podọ lẹndai tẹwẹ azọ́njiawu etọn lẹ wazọ́n na?

▪ Mẹnu lẹ wẹ yì Galili hẹ Jesu to sadidi yẹwhehodidọ etọn tọn whenu, podọ etẹwẹ yin gbeyiyi lọ hlan nuwiwa Jesu tọn lẹ?