Nugbo Kavi Lalo—Nugbo lọ Gando Jesu Go
ETẸWẸ A LẸN? BE NUGBO WẸ HODIDỌ HE BỌDEGO EHELẸ YA KAVI LALO?
Jesu yin jiji to 25 décembre.
Nuyọnẹntọ atọ̀n dla Jesu pọ́n to ojlẹ he mẹ e yin jiji te.
Jesu ma tindo nọvi.
Jesu yin Jiwheyẹwhe bo wá to agbasa gbẹtọ tọn mẹ.
Jesu ma yin mẹdagbe de poun gba.
MẸSUSU na dọ dọ hodidọ ehe lẹpo wẹ yin nugbo. Mẹdevo lẹ sọgan dọ dọ e vẹawu—kavi dọ e ma tlẹ yọnbasi—nado yọ́n gblọndo lọ taun. Vlavo linlẹn yetọn wẹ yindọ, eyin a ko gbẹ́ yí Jesu sè, onú enẹlẹ ma yin nujọnu.
Ṣigba, e ma yin nuhe Biblu dọ niyẹn. E dotuhomẹna mí nado tindo “oyọnẹn he pegan Oklunọ mítọn Jesu Klisti tọn.” (2 Pita 1:8) Mí nọ mọ oyọnẹn mọnkọtọn yí gbọn dogbigbapọnna owe Wẹndagbe tọn lẹ dali. Yé do nugbo lọ hia gando Jesu go bo nọ gọalọna mí nado yọ́n nugbo gbọnvona lalo. Enẹwutu, mì gbọ mí ni lẹnnupọndo nuhe owe Wẹndagbe tọn lẹ dọ do nuyise he yin nùdego to aga lọ lẹ ji.
NUYISE LỌ: Jesu yin jiji to 25 décembre.
NUGBO KAVI LALO: LALO.
Biblu ma dọ osun kavi azán he gbè Jesu yin jiji te tlọlọ gba. To whelọnu lo, fie wẹ azán 25 décembre tọn wá sọn? Sọgbe hẹ otanwe lọ The Encyclopædia Britannica, mẹhe ylọ yede dọ Klistiani delẹ “jlo dọ azán lọ ni dukosọ hẹ hùnwhẹ kosi tọn he nọ yin bibasi to Lomu he nọ dohiagona . . . avivọ-whenu, yèdọ ojlẹ he mẹ ozán ma nọ yawu kú bọ owhè sọ nọ yiaga taun to agahomẹ.” Otanwe dopolọ dohia dọ aṣa Noẹli tọn susu wá sọn “hùnwhẹ ogle po owhè po tọn he kosi lẹ nọ basi to avivọ-whenu lẹ” mẹ.
Be Jesu na yigbe dọ hùnwhẹ jijizan etọn tọn ni yin bibasi to 25 décembre ya? Lẹnnupọn vude: Mí ma yọ́n azán he gbè Jesu yin jiji. Owe-wiwe ma degbè to fidepope dọ mí ni dù jijizan enẹ, mọjanwẹ kunnudenu de ma dohia dọ Klistiani dowhenu tọn lẹ nọ wàmọ do niyẹn. To vogbingbọn mẹ, Biblu dọ azán he gbè Jesu kú na mí po gbesisọ po, podọ Jesu degbena hodotọ etọn lẹ nado nọ flin azán enẹ.a (Luku 22:19) E họnwun dọ ojlo Jesu tọn wẹ yindọ nuhọakuẹ okú avọ́sinsan etọn tọn wẹ ni yin ayidego kakati nido yin jiji etọn.—Matiu 20:28.
NUYISE LỌ: Nuyọnẹntọ atọ̀n (kavi ahọlu atọ̀n to aṣa delẹ mẹ) dla Jesu pọ́n to ojlẹ he mẹ e yin jiji te.
NUGBO KAVI LALO: LALO.
Vlavo hiẹ ko mọ yẹdide jiji Jesu tọn delẹ he do e hia taidi viyẹyẹ de to otò he mẹ kanlin nọ dùnú do de mẹ, bọ dawe nuyọnẹntọ atọ̀n lẹdo e po nunina lẹ po to alọ mẹ. Ṣigba, yẹdide oklọ tọn wẹ ehelẹ, e ma yin nugbo.
Nugbo wẹ dọ afọzedaitọ delẹ wá sọn Whèzẹtẹn-waji nado gbògbéna Jesu to ovu whenu etọn. Ṣigba, nado dọ hójọhó, sunwhlẹvu-pọntọ wẹ jonọ ehelẹ. (Matiu 2:1, Alẹnuwema Yọyọ Fọngbe tọn) Podọ, be otò de mẹ wẹ yé mọ Jesu te ya? Lala; owhé de gbè wẹ yé dla ẹ pọ́n te. E họnwun dọ, osun delẹ ko juwayi to jiji Jesu tọn godo whẹpo yé do wá.—Matiu 2:9-11.
Na nuhe dù sọha jonọ lọ lẹ tọn, be yé omẹ 2, 3 kavi 30 wẹ ya? Biblu ma dọ taun. Vlavo e sọgan yindọ nunina wunmẹ voovo atọ̀n he yé hẹnwa wẹ zọ́n bọ linlẹn lọ do gbayipe dọ yé omẹ atọ̀n wẹ.b (Matiu 2:11) Mẹdelẹ tlẹ ko de linlẹn lọ tọ́n dọ dopodopo mẹhe yin yiylọdọ nuyọnẹntọ ehelẹ tọn nọtena akọ̀ gbẹtọvi tọn dopodopo. Ṣigba Biblu ma dọ mọ. Kakatimọ, dile mẹhe nọ basi zẹẹmẹ do owe Wẹndagbe tọn lẹ ji de dọ do, lalo ehe wá sọn “hopàdọ whenuho-kàntọ owhe kanweko ṣinatọ̀ntọ tọn de tọn mẹ.”
NUYISE LỌ: Jesu ma tindo nọvi.
NUGBO KAVI LALO: LALO.
Owe Wẹndagbe tọn lẹ dohia hezeheze dọ Jesu tindo nọvi lẹ. Wẹndagbe Luku tọn dlẹnalọdo Jesu taidi “plọnji” Malia tọn, bo gbọnmọ dali dohia dọ Malia wá ji ovi devo lẹ.c (Luku 2:7) Wẹndagbe Malku tọn dọ dọ to tòdaho Nazalẹti tọn mẹ, mẹdelẹ yí Jesu jlẹdo nọvi etọn lẹ go bo pọ́n ẹn hlan taidi omẹ paa de poun. Yé kanse dọmọ: “Be e ma yin . . . nọvisunnu Jakọbu, Josẹfu, Juda po Simọni po tọn lọ die? Podọ be nọviyọnnu etọn lẹ ma tin tofi, to mí dè ya?”—Malku 6:3, TOB; Matiu 12:46; Johanu 7:5.
Mahopọnna nuhe owe Wẹndagbe tọn lẹ dọ, sinsẹ̀n-nuplọnmẹtọ susu gbẹ́ tẹkudeji dọ Jesu ma tindo nọvi. Mẹdelẹ nọ dọ dọ nọvisunnu po nọviyọnnu he yin nùdego lọ lẹ po yin nafẹ-vi Jesu tọn lẹ.d Mẹdevo lẹ nọ dọ̀nnu dọ asu Malia tọn sin ovi wẹ nọvi ehelẹ yin. Ṣigba lẹnnupọn vude: Eyin Jesu kẹdẹ wẹ Malia ji, be Nazalẹtinu enẹlẹ na ko yí hogbe enẹlẹ zan ya? To vogbingbọn mẹ, delẹ to yé mẹ sọgan ko yí nukun yetọn do mọ whenue Malia mọhò bo jivi devo lẹ. Yé yọnẹn ganji dọ Jesu yin dopo to ovi susu he Malia ji lẹ mẹ.
NUYISE LỌ: Jesu yin Jiwheyẹwhe bo wá to agbasa gbẹtọ tọn mẹ.
NUGBO KAVI LALO: LALO.
Linlẹn lọ dọ Jiwheyẹwhe wá aigba ji taidi gbẹtọvi bo nọ yin Jesu, yèdọ dodonu sinsẹ̀n-nuplọnmẹ Atọ̀n-to-Dopomẹ tọn, ko tin sọn ojlẹ dindẹn die—ṣigba e ma yin to ojlẹ Jesu tọn mẹ. Kakatimọ, otanwe lọ The Encyclopædia Britannica dọmọ: “Hogbe lọ Atọ̀n-to-Dopomẹ kavi sinsẹ̀n-nuplọnmẹ lọ lọsu ma sọawuhia to Alẹnu Yọyọ mẹ gba . . . Sinsẹ̀n-nuplọnmẹ lọ sọawuhia vudevude to owhe kanweko lẹ gblamẹ to nudindọn susu godo.”
Na nugbo tọn, sinsẹ̀n he nọ plọnmẹ dọ Jiwheyẹwhe wẹ wá to agbasa gbẹtọ tọn mẹ bo nọ yin Jesu lẹ to yẹyi desọn Jesu go.e Gbọnna? Lẹnnupọndo apajlẹ ehe ji. Mí ni dọ dọ azọ́nwatọ delẹ biọ nude to azọ́ngán yetọn si bọ e dọna yé dọ emi ma tindo aṣẹpipa nado na yé onú mọnkọtọn. Eyin nuhe azọ́ngán lọ dọ yin nugbo, be ewọ ko gbọn nuyọnẹn dali dohia dọ e yọ́n dogbó ede tọn. Eyin e ma ka yin nugbo—yèdọ eyin e sọgan na nulọ yé ṣigba bo de poun ma nado wàmọ wẹ—be mẹklọ wẹ e te.
Eyọn, nawẹ Jesu yinuwa gbọn whenue awe to apọsteli etọn lẹ mẹ jlo dọ e ni na yé otẹn nukundeji lẹ? E dọna yé dọmọ: “Nado sinai to adusilọ ṣie mẹ podọ to amiyọnlọ ṣie mẹ ma yin yẹn tọn nado namẹ gba, ṣigba otẹn ehelẹ tin na mẹhe Otọ́ ṣie ko wleawu etọn dai na lẹ.” (Matiu 20:23) Eyin Jiwheyẹwhe wẹ Jesu yin nugbonugbo, be e ma yin lalo wẹ e do niyẹn? Kakatimọ, gbọn jlọjẹ lẹpo zizedo alọ Mẹhe tindo aṣẹpipa hugan ẹn tọn mẹ dali, Jesu ze apajlẹ dagbe whiwhẹ tọn dai—bo dohia dọ ewọ ma sọzẹn hẹ Jiwheyẹwhe.
NUYISE LỌ: Jesu ma yin mẹdagbe de poun gba.
NUGBO KAVI LALO: NUGBO.
Jesu dohia hezeheze dọ emi ma yin mẹdagbe de poun. E dọmọ: “Visunnu Jiwheyẹwhe tọn wẹ yẹn.” (Johanu 10:36) Nugbo wẹ dọ mẹdepope wẹ sọgan sọalọakọ́n dọ emi yin Visunnu Jiwheyẹwhe tọn. Ṣigba eyin nuhe Jesu dọ yin lalo, gbẹtọ alọpa tẹwẹ enẹ na dohia dọ e yin? E họnwun dọ e ma na yin mẹdagbe de gba, adavo mẹklọtọ de poun!
Kunnudenu dejidego hugan lọ wá sọn Jiwheyẹwhe lọsu dè. E dọ whla awe gando Jesu go dọmọ: “Ehe wẹ Visunnu ṣie.” (Matiu 3:17; 17:5) Lẹnnupọn pẹẹde: Nujijọ vude poun go wẹ Owe-wiwe donù, ehe whenu ogbè Jiwheyẹwhe tọn titi yin sisè to aigba ji te—ṣogan to nujijọ enẹlẹ mẹ, whla awe plipli wẹ e dohia dọ Visunnu etọn wẹ Jesu yin! Kunnudenu dagbe hugan lọ niyẹn dọ Jesu yin mẹhe e dọ dọ emi yin lọ nugbonugbo.
Be hosọ ehe ko de nugbo de hia gando Jesu go he a ma yọnẹn dai ya? Eyin mọ wẹ, naegbọn hiẹ ma na gbadopọnna owe gbọdo Wẹndagbe tọn lẹ yinukọn dogọ? Nupinplọn mọnkọtọn sọgan yin awuvivinu bosọ hẹn ale wá. To popolẹpo mẹ, Jesu lọsu dọ dọ nugbo lọ pinplọn gando ewọ po Otọ́ etọn po go wẹ nọ namẹ “ogbẹ̀ madopodo.”—Johanu 17:3.
[Nudọnamẹ odò tọn lẹ]
a Jesu kú to Azán Juwayi tọn gbè, kavi Nisan 14tọ, sọgbe hẹ sunzanhiawe Ju lẹ tọn.—Matiu 26:2.
b Matiu wlan dọ jonọ lọ lẹ “hùn nuhe mẹ adọkunnu yetọn te lẹ” bo na sika, nuyọnwan gblingblin, po zuya po Jesu. E jẹna ayidego dọ, nunina akuẹgegenu tọn ehelẹ sọgan ko wá do gànmẹ, na to ojlẹ kleun de godo, whẹndo Jesu tọn—he kunnudenu dohia dọ e ma tindo alọnu sọmọ—to dandannu glọ nado yì dín fibẹtado to otò devo mẹ.—Matiu 2:11-15.
c Dile etlẹ yindọ azọ́njiawu-liho wẹ Malia mọhò Jesu tọn te, e mọhò ovi etọn he pò lẹ tọn to jọwamọ-liho to kọndopọ mẹ hẹ asu etọn, Josẹfu.—Matiu 1:25.
d Linlẹn he Jérôme detọ́n to nudi owhe 383 W.M. ehe gbayipe to mẹhe yise dọ Malia gbọṣi alọji to gbẹzan etọn blebu mẹ lẹ ṣẹnṣẹn. Jérôme wá dohia to godo mẹ dọ ewọ tindo ayihaawe gando nuplọnmẹ etọn go, ṣigba linlẹn lọ gbọṣi ayiha mẹsusu tọn mẹ—podọ to nuyise Ṣọṣi Katoliki tọn mẹ.
e Na nudọnamẹ dogọ gando nuplọnmẹ Atọ̀n-to-Dopomẹ tọn go, pọ́n alọnuwe lọ Be Hiẹ Dona Yí Atọ̀n-to-Dopomẹ Sè Ya? he kunnudetọ Jehovah tọn lẹ zinjẹgbonu.
[Apotin/Yẹdide to weda 14]
Nugbo Devo He Sọgan Paṣa We Lẹ
Gbẹtọ alọpa tẹwẹ Jesu yin? Be e nọ sẹ̀ ede wún bo ma yọ́n dọnsẹpọ bosọ nọ dovọ́namẹ sọmọ bọ e ma sọgan dogbẹ́ hẹ omẹ paa lẹ wẹ ya? Mẹdelẹ na dọ dọ mọwẹ. Vlavo enẹ wẹ zọ́n bọ e nọ paṣa yé nado sè dọ Jesu . . .
• yì nuwiwa ayajijẹ pọmẹ tọn lẹ tẹnmẹ.—Johanu 2:1-11.
• na pipà gbẹtọ lẹ.—Malku 14:6-9.
• duvivi gbẹdido hẹ yọpọvu lẹ tọn.—Malku 10:13, 14.
• viavi to mẹsusu nukọn.—Johanu 11:35.
• do awuvẹmẹ hia.—Malku 1:40, 41.