Be Hiẹ Na Hodo Apajlẹ Zohunhun Tọn Jehovah po Jesu po Tọn to Ojlẹ Oflin Tọn Ehe mẹ Ya?
1. Etẹwẹ Kunnudetọ Jehovah tọn lẹ nọ dovivẹnu nado wà to ojlẹ Oflin tọn mẹ?
1 Jehovah nọ yí zohunhun do hẹn lẹndai etọn di. To whenue Isaia to alọdlẹndo delẹ to dona he Ahọluduta Jiwheyẹwhe tọn na hẹnwa lẹ mẹ, e wlan to Isaia 9:7 mẹ dọmọ: “[Zohunhun] Oklunọ awhànpa lẹ tọn tọn na basi ehe.” Mọdopolọ, to lizọnyizọn aigba ji tọn etọn whenu, Visunnu Jiwheyẹwhe tọn do zohunhun ayidego tọn hia na sinsẹ̀n-bibasi nugbo. (Joh. 2:13-17; 4:34) To owhe dopodopo mẹ, wẹnlatọ livi susu lẹdo aihọn pé nọ dovivẹnu vẹkuvẹku nado wazọ́n susu dogọ to lizọnyizọn lọ mẹ to ojlẹ Oflin tọn mẹ, bo gbọnmọ dali hodo apajlẹ zohunhun tọn Jehovah po Jesu po tọn. Be hiẹ lọsu na wàmọ ya?
2. Etẹwẹ zohunhun na whàn mí nado wà bẹsọn 7 mars?
2 Nujijla Oflin Tọn: To owhe ehe mẹ, nujijla Oflin tọn na bẹjẹeji to samedi 7 mars. Basi tito bẹsọn din nado tindo mahẹ to lizọnyizọn lọ mẹ. Agun lẹ na gọ́ na ayajẹ dile yé to vivẹnudo nado wazọ́n to suhugan aigba-denamẹ yetọn lẹ tọn ji. Dovivẹnu nado yí oylọ-basinamẹwe lọ kavi jw.org zan nado ylọ plọnmẹ Biblu towe lẹ, gọyìpọn towe lẹ, wehọmẹvigbẹ́ towe lẹ, azọ́nwatọgbẹ́ towe lẹ, hẹnnumẹ towe lẹ.
3. Nawẹ mí sọgan gbloada na lizọnyizọn mítọn to osun mars po avril po tọn mẹ gbọn?
3 Gbehosọnalitọ Alọgọtọ Tọn Bibasi: Zohunhun nasọ whàn mí nado gbloada na lizọnyizọn mítọn. Matin ayihaawe, mẹsusu na penugo nado basi gbehosọnalitọ alọgọtọ tọn to osun mars po avril po tọn mẹ, na mí tindo dotẹnmẹ nado basi gànhiho 30 wutu. To sinsẹ̀n-bibasi whẹndo tọn kavi oplọn mẹdetiti tọn whenu, hodẹ̀ nado mọ aliho he mẹ hiẹ sọgan wà ehe te. (Howh. 15:22) Zohunhun towe to nujijla ehe mẹ sọgan whàn mẹdevo lẹ nado yin zohunhunnọ ga. Eyin a basi diọdo lẹ nado wà nususu dogọ, a na dohia dọ a to apajlẹ zohunhun tọn Jesu tọn hodo.—Malku 6:31-34.
4. Ale tẹlẹ wẹ mí na mọyi eyin mí hodo apajlẹ zohunhun Jehovah po Jesu po tọn?
4 Eyin mí hodo apajlẹ zohunhun tọn Jehovah po Jesu po tọn to ojlẹ Oflin tọn ehe whenu, enẹ na hẹn ale susu wá na mí. Mí na penugo nado dekunnuna mẹsusu dogọ to aigba-denamẹ mítọn ji. Mí nasọ duvivi ayajẹ gọna pekọ he nọ wá sọn Jehovah sinsẹ̀n po nunina mẹdevo lẹ po mẹ tọn. (Owalọ 20:35) Hú popolẹpo, mí na hẹn homẹhun Jiwheyẹwhe zohunhunnọ mítọn po Visunnu etọn po.