“Omẹ Nankọ Wẹ E Jẹ Dọ Mìwlẹ Ni Yin!”
“To whenuena e yindọ onú ehe lẹpo na gbọnmọ dali yin hinhẹn yọ́, omẹ nankọ wẹ e jẹ dọ mìwlẹ ni yin to walọ wiwe lẹ po nuyiwa mẹdezejo na Jiwheyẹwhe tọn lẹ po mẹ!”—2 PITA 3:11.
1. Naegbọn wekanhlanmẹ awetọ Pita tọn yin tudohomẹnamẹ he wá do gànmẹ de na Klistiani azán etọn gbè tọn lẹ?
TO WHENUENA apọsteli Pita wlan wekanhlanmẹ gbọdo etọn awetọ, agun Klistiani tọn ko doakọnna homẹkẹn susu, ṣigba ehe ma dekanpona zohunhun agun lọ tọn kavi yinuwado jideji etọn ji gba. Enẹwutu Lẹgba yí ayiha wintinwintin devo zan, yèdọ dehe ko tindo kọdetọn dagbe whlasusu to ojlẹ delẹ mẹ wayi. Dile Pita dohia do, Satani yí mẹplọntọ lalo he tindo “nukun he gọ́ na ayọdide” po “ahun he yin pinplọn to nukunkẹn mẹ” po lẹ zan nado hẹn omẹ Jiwheyẹwhe tọn lẹ flu. (2 Pita 2:1-3, 14; Juda 4) Enẹwutu, wekanhlanmẹ awetọ Pita tọn yin tudohomẹnamẹ ahundopo tọn de nado gbọṣi nugbonọ-yinyin mẹ na Jiwheyẹwhe.
2. Etẹ ji wẹ 2 Pita weta 3 zinnudo, podọ kanbiọ tẹlẹ wẹ mí dona kanse mídelẹ?
2 Pita wlan dọmọ: “Yẹn mọdọ e sọgbe, dile e na dẹnsọ bọ yẹn na tin to gòhọtúntún ehe mẹ, nado nọ dozolanmẹna mì gbọn nuflinmẹ ṣie lẹ dali, dile yẹn yọnẹn do dọ dide dai gòhọtúntún ṣie tọn na wá aimẹ to madẹnmẹ . . . Enẹwutu, yẹn na wà nuhe go yẹn pé lẹpo ga to ojlẹ lẹpo mẹ dọ, to yìyì ṣie godo, mìwlẹ nido sọgan penugo nado nọ vọ́ onú ehelẹ flin na mìde.” (2 Pita 1:13-15) Mọwẹ, Pita yọnẹn dọ okú emitọn ko sẹpọ, ṣigba e jlo dọ nuflinmẹ etọn he wá do gànmẹ lẹ ni gbọṣi ayiha mẹ na Klistiani lẹ. Podọ na nugbo tọn, yé yin kinkan do Biblu mẹ bọ mímẹpo sọgan mọ hia to egbehe. Mí dona na ayidonugo vonọtaun weta 3tọ wekanhlanmẹ awetọ Pita tọn, na e zinnudo “azán godo tọn” aihọn ehe tọn lẹ ji podọ do vasudo olọn yẹhiadonu tọn lẹ po aigba po tọn ji. (2 Pita 3:3, 7, 10) Ayinamẹ tẹlẹ wẹ Pita na mí? Nawẹ ayinamẹ etọn lẹ yíyí do yizan mẹ na gọalọna mí nado mọ nukundagbe Jehovah tọn gbọn?
3, 4. (a) Hogbe he whànmẹ tẹwẹ Pita yizan, podọ avase tẹwẹ e na? (b) Nuagokun atọ̀n tẹlẹ wẹ mí na gbadopọnna?
3 To whenuena Pita ko donù vasudo aihọn tọn go godo, e dọmọ: “Omẹ nankọ wẹ e jẹ dọ mìwlẹ ni yin to walọ wiwe lẹ po nuyiwa mẹdezejo na Jiwheyẹwhe tọn lẹ po mẹ!” (2 Pita 3:11, 12) E họnwun dọ Pita ma to kanbiọ de kanse gba, ṣigba hogbe mẹwhinwhàn tọn de wẹ e yizan. Pita yọnẹn dọ mẹhe nọ wà ojlo Jehovah tọn bo nọ do jẹhẹnu he nọ hẹn homẹ Etọn hùn lẹ hia lẹ kẹdẹ wẹ na lùn “azán ahọsuyi” tọn he ja lọ tọ́n. (Isa. 61:2) Enẹwutu, apọsteli lọ yidogọ dọmọ: “Mì mẹyiwanna lẹ emi, na mì ko yọ́n ehe jẹnukọn, mì nọ họ́ mìde na mì nikaa yin dindọn yì gbọn nuṣiwa [mẹplọntọ lalo lẹ he] nọ diọnukunsọ osẹ́n lẹ tọn dali bo jai sọn tenọgligli mìtọn mẹ.”—2 Pita 3:17.
4 Na Pita yin dopo to mẹhe “ko yọ́n ehe jẹnukọn” lẹ mẹ wutu, e yọnẹn dọ to azán godo tọn lẹ mẹ Klistiani lẹ dona họ́ yede tlala nado sọgan hẹn tenọgli yetọn go. Apọsteli Johanu basi zẹẹmẹ nuhewutu e do yinmọ tọn hezeheze to godo mẹ. E mọ hlan nukọn dọ Satani yin yinyan sọn olọn mẹ bo tindo “homẹgble daho” sọta mẹhe “to gbedide Jiwheyẹwhe tọn lẹ yìn bosọ yin azọ́ndena nado dekunnu gando Jesu go lẹ.” (Osọ. 12:9, 12, 17) Devizọnwatọ yiamisisadode nugbonọ Jiwheyẹwhe tọn lẹ gọna “lẹngbọ devo” he yin gbẹdohẹmẹtọ yetọn nugbonọ lẹ na gbawhàn. (Joh. 10:16) Ṣigba etẹwẹ dogbọn dopodopo mítọn dali? Be mí na hẹn tenọgli mítọn go ya? Mí na penugo nado wàmọ eyin mí dovivẹnu bo (1) wleawuna jẹhẹnu he nọ hẹn homẹ Jiwheyẹwhe tọn hùn lẹ, (2) gbọṣi madodiho, madoblọ mẹ, podọ (3) tindo pọndohlan dagbe gando whlepọn lẹ go. Mì gbọ mí ni gbadopọnna nuagokun ehelẹ.
Wleawuna Jẹhẹnu He Nọ Hẹn Homẹ Jiwheyẹwhe Tọn Hùn Lẹ
5, 6. Jẹhẹnu tẹlẹ wẹ mí dona dovivẹnu nado wleawuna, podọ naegbọn ehe nọ biọ “vivẹnudido vẹkuvẹku”?
5 To bẹjẹeji wekanhlanmẹ awetọ Pita tọn mẹ, e wlan dọmọ: “Gbọn vivẹnudido vẹkuvẹku mìtọn lẹpo dali taidi kọdetọn de, mì yí jijọ dagbe dogọ yise mìtọn, oyọnẹn dogọ jijọ dagbe mìtọn, mawazẹjlẹgo dogọ oyọnẹn mìtọn, akọndonanu dogọ mawazẹjlẹgo mìtọn, mẹdezejo na Jiwheyẹwhe dogọ akọndonanu mìtọn, owanyi mẹmẹsunnu tọn dogọ mẹdezejo na Jiwheyẹwhe mìtọn, owanyi dogọ owanyi mẹmẹsunnu tọn mìtọn. Na eyin onú ehelẹ tin to mì mẹ bo gọfla, yé na glọnalina mì ma nado gbọjọ kavi yin mẹhe ma tindo sinsẹ́n gando oyọnẹn he pegan Oklunọ mítọn Jesu Klisti tọn go.”—2 Pita 1:5-8.
6 Na nugbo tọn, e nọ biọ “vivẹnudido vẹkuvẹku” nado tindo mahẹ to nuwiwa he nọ gọalọna mí nado wleawuna jẹhẹnu he nọ hẹn homẹ Jiwheyẹwhe tọn hùn lẹ mẹ. Di apajlẹ, e nọ biọ vivẹnudido nado yì opli Klistiani tọn lẹpo, hia Biblu egbesọegbesọ, podọ nado hẹn aṣa dagbe oplọn mẹdetiti tọn de go. Podọ e sọgan biọ azọ́n sinsinyẹn gọna tito dagbe nado tindo Sinsẹ̀n-Bibasi Whẹndo tọn gbesisọ tọn he nọ hẹn awuvivi po ale po wá. Ṣigba eyin mí yí onú ehelẹ do dó aṣa, yé na lẹzun apadewhe gbẹzan mítọn tọn—titengbe to whenue mí to alemọyi sọn yé mẹ.
7, 8. (a) Etẹwẹ mẹdelẹ dọ gando Sinsẹ̀n-Bibasi Whẹndo tọn go? (b) Ale tẹwẹ hiẹ nọ mọyi sọn sinsẹ̀n-bibasi whẹndo tọn towe mẹ?
7 Gando tito sinsẹ̀n-bibasi whẹndo tọn go, mẹmẹyọnnu de wlan dọmọ: “E nọ gọalọna mí nado plọnnu gando hosọ susu go.” Mẹmẹyọnnu devo dọmọ: “Nado dọ hójọhó, n’ma jlo dọ oplọn agunwe ni doalọte. Opli he n’yiwanna hugan niyẹn. Ṣigba todin he mí tindo Sinsẹ̀n-Bibasi Whẹndo tọn mítọn, n’wá mọdọ Jehovah yọ́n nuhe mí tindo nuhudo etọn podọ to whenu he yọ́n hugan.” Tatọ́ whẹndo tọn de dọmọ: “Sinsẹ̀n-Bibasi Whẹndo tọn nọ gọalọna mí taun. Taidi asu po asi po, nuhọakuẹ de wẹ e yin nado basi opli de sọgbe hẹ nuhudo tangan mítọn lẹ! Mí mọdọ aliho he mẹ mí nọ do sinsẹ́n gbigbọ wiwe tọn hia te pọnte dogọ, podọ mí nọ mọ ayajẹ dogọ to lizọnyizọn mítọn mẹ hugan gbede pọ́n.” Tatọ́ whẹndo tọn devo dọmọ: “Ovi lẹ nọ basi dodinnanu na yede bo nọ plọn nususu—podọ yé nọ duvivi etọn. Tito lọ hẹn mí deji dogọ dọ Jehovah yọ́n ahunmẹdunamẹnu mítọn lẹ bosọ nọ na gblọndo odẹ̀ mítọn lẹ.” Be numọtolanmẹ dopolọ wẹ hiẹ lọsu tindo gando awuwledainanu gbigbọmẹ tọn dagbe ehe go ya?
8 Mì ma dike numadinu lẹ ni yitẹn sọn sinsẹ̀n-bibasi whẹndo tọn si blo. Asu po asi po de dọmọ: “To osẹ ẹnẹ agọe tọn lẹ mẹ, to jeudi whèjai lẹpo, nude nọ jọ to whẹndo mítọn mẹ bo nọ dibla glọnalina oplọn mítọn, ṣigba mí ma nọ dike ni yitẹn sọn e si.” Nugbo wẹ dọ, e sọgan biọ dọ mì ni diọ tito mìtọn to whedelẹnu. Etomọṣo, mì magbe nado nọ basi Sinsẹ̀n-Bibasi Whẹndo tọn to whepoponu—bo ma dike ni súnadu to osẹ dopo tata mẹ blo!
9. Nawẹ Jehovah penukundo Jelemia go gbọn, podọ etẹwẹ mí sọgan plọn sọn apajlẹ etọn mẹ?
9 Yẹwhegán Jelemia ze apajlẹ dagbe de dai na mí. E tindo nuhudo núdùdù gbigbọmẹ tọn he e mọyi sọn Jehovah dè tọn bosọ yọ́n pinpẹn etọn taun. Núdùdù enẹ gọalọna ẹn nado dọyẹwheho na mẹhe ma tindo ojlo lẹ po akọndonanu po. E dọmọ: “Ohó OKLUNỌ tọn . . . tin to ayiha ṣie mẹ di miyọ́n jiji de [he] yè ṣinyọnnudo do ohú ṣie lẹ mẹ.” (Jel. 20:8, 9) E sọ gọalọna ẹn nado doakọnna ojlẹ sinsinyẹn he dekọtọn do vasudo Jelusalẹm tọn mẹ lẹ. To egbehe, mí tindo Ohó Jiwheyẹwhe tọn blebu. Eyin mí nọ plọn ẹn po sọwhiwhe po bo nọ tindo pọndohlan Jiwheyẹwhe tọn do whẹho lẹ ji, mí na penugo nado doakọnnanu to lizọnyizọn lọ mẹ po ayajẹ po, bo hẹn nugbonọ-yinyin mítọn go to whlepọn lẹ glọ bosọ gbọṣi wiweji to walọyizan-liho podọ to gbigbọ-liho taidi Jelemia.—Jak. 5:10.
Gbọṣi ‘Madodiho podọ Madoblọ’ Mẹ
10, 11. Naegbọn mí dona wà nuhe go mí pé lẹpo nado gbọṣi “madodiho, madoblọ” mẹ, podọ etẹwẹ enẹ nọ biọ to mí si?
10 Taidi Klistiani, mí yọnẹn dọ azán godo tọn lẹ mẹ wẹ mí to gbẹnọ te. Enẹwutu, e ma paṣa mí dọ nuhe Jehovah gbẹwanna lẹ, taidi nukunkẹn, fẹnnuwiwa gblezọn po danuwiwa po, wẹ nọ duahunmẹna aihọn hugan. Ayiha wintinwintin Satani tọn sọgan yin bibladopọ dole: ‘Eyin e glo nado dobuna devizọnwatọ Jiwheyẹwhe tọn lẹ janwẹ, vlavo yé sọgan yin hinhẹnflu.’ (Osọ. 2:13, 14) To whelọnu lo, mí dona hẹn tudohomẹnamẹ owanyi tọn Pita tọn do ayiha mẹ dọmọ: “Mì wà nuhe go mì pé lẹpo na ewọ nido mọ mì to godo mẹ madodiho, madoblọ podọ to jijọho mẹ.”—2 Pita 3:14.
11 Hogbe lọ “mì wà nuhe go mì pé lẹpo” sọgbe hẹ tudohomẹnamẹ tintan he Pita na lọ nado nọ ‘dovivẹnu vẹkuvẹku lẹpo.’ E họnwun dọ, Jehovah—mẹhe gbọdo Pita nado dọ numọtolanmẹ enẹlẹ tọ́n—yọnẹn dọ eyin aihọn Satani tọn he kudiho ehe ma na bẹpla mí, mí dona dovivẹnu nado gbọṣi “madodiho, madoblọ,” podọ matin mọdọ mẹ. Vivẹnudido nọ biọ dọ mí ni basi hihọ́na ahun mítọn na ojlo agọ̀ lẹ nikaa yinuwado e ji. (Hia Howhinwhẹn lẹ 4:23; Jakọbu 1:14, 15.) E sọ nọ biọ dọ mí ni hẹn tenọgli mítọn go to mẹhe gbẹninọ Klistiani tọn mítọn nọ paṣa bọ yé “nọ to [mí] zùn mapote” lẹ nukọn.—1 Pita 4:4.
12. Jide tẹwẹ Luku 11:13 na mí?
12 Na mí yin mapenọ wutu, e nọ vẹawu nado wà nuhe sọgbe. (Lom. 7:21-25) Mí sọgan tindo kọdetọn dagbe kiki eyin mí lẹhlan Jehovah, yèdọ mẹhe nọ gbọn alọtútlú dali na gbigbọ wiwe etọn mẹhe nọ biọ ẹ po ahundopo po lẹ. (Luku 11:13) Taidi kọdetọn de, gbigbọ enẹ nọ gọalọna mí nado wleawuna jẹhẹnu he Jiwheyẹwhe yiwanna lẹ podọ e ma yindọ e nọ hẹn mí penugo nado doakọnna whlepọn gbẹ̀mẹ tọn lẹ kẹdẹ wẹ gba, ṣigba e sọ nọ gọalọ nado doakọnna adángbòmẹ he fọ́n bo to susudeji lẹ dile azán Jehovah tọn to sisẹpọ.
Dike Whlepọn lẹ Ni Hẹn We Lodo
13. To whenue mí pehẹ whlepọn lẹ, etẹwẹ na gọalọna mí nado doakọnnanu?
13 Dile mí gbẹ́ to gbẹnọ to aihọn ylankan ehe mẹ, mí na nọ pehẹ whlepọn wunmẹ voovo lẹ janwẹ. Ṣigba kakati nado jẹflumẹ, naegbọn hiẹ ma na nọ pọ́n whlepọn lẹ hlan taidi dotẹnmẹ hundote de nado do owanyi towe hia Jiwheyẹwhe podọ nado hẹn yise towe lodo to ewọ po Ohó etọn po mẹ? Devi Jakọbu wlan dọmọ: “Mẹmẹsunnu ṣie lẹ emi, mì nọ pọ́n ẹn hlan di ayajẹ nugbonugbo, to whenuena mì pehẹ whlepọn voovo lẹ, dile mì yọnẹn do dọ nuhọakuẹ-yinyin yise mìtọn tọn he yin whiwhlepọn ehe, nọ wazọ́n akọndonanu tọn.” (Jak. 1:2-4) Sọ flindọ, “Jehovah yọ́n lehe e nọ whlẹn mẹhe ze yede jo na Jiwheyẹwhe lẹ sọn whlepọn mẹ do.”—2 Pita 2:9.
14. Nawẹ apajlẹ Josẹfu tọn na we tuli gbọn?
14 Lẹnnupọndo apajlẹ Josẹfu visunnu Jakọbu tọn ji, mẹhe nọvisunnu etọn titi lẹ sà do kanlinmọgbenu. (Gẹn. 37:23-28; 42:21) Be yise Josẹfu tọn hokọ̀ na nuyiwa domẹgo kanlinjọmẹ tọn enẹ wutu wẹ ya? Be e gblehomẹ do Jiwheyẹwhe go na ewọ na dotẹnmẹ nuylankan nado jọ do e go wutu wẹ ya? Ohó Jiwheyẹwhe tọn na gblọndo to aliho he họnwun mẹ dọ lala! Humọ, whlepọn Josẹfu tọn lẹ ma ko fó do finẹ. To nukọn mẹ, owhẹ̀ agọ̀ yin sisadokọna ẹn dọ e jlo na yí huhlọn do zanhẹmẹ podọ e yin wiwle do gànmẹ. Ṣigba, whladopo dogọ, e hẹn tenọgli etọn go na Jiwheyẹwhe. (Gẹn. 39:9-21) E dike whlepọn lẹ ni hẹn ẹn lodo, podọ na enẹ wutu, Jehovah suahọ ẹ susugege.
15. Etẹwẹ mí sọgan plọn sọn apajlẹ Naomi tọn mẹ?
15 Nugbo wẹ dọ, whlepọn lẹ sọgan hẹn mí blawu kavi tlẹ hẹn mí jẹflumẹ. Vlavo to whedelẹnu, Josẹfu na ko tindo numọtolanmẹ mọnkọtọn. Ayihaawe ma tin dọ nudopolọ ko jọ do devizọnwatọ nugbonọ Jiwheyẹwhe tọn devo lẹ go. Lẹnnupọndo apajlẹ Naomi he hẹn asu po visunnu etọn awe po bu to okú mẹ tọn ji. “Mì sọ ylọ mi dọ Naomi blo,” wẹ e dọ. “Mì nọ ylọ mi dọ Mala [he zẹẹmẹdo “Vivẹ́”]: na Ganhunupo ko yí vivẹ́ susu do [yinuwa] hẹ mi.” (Luti 1:20, 21) Mí sọgan mọnukunnujẹ numọtolanmẹ Naomi tọn mẹ. Ṣigba taidi Josẹfu, yise Naomi tọn ma hokọ̀, mọjanwẹ nujijọ enẹ ma yinuwado tenọgli etọn ji do niyẹn. Taidi kọdetọn de, Jehovah suahọ yọnnu vivẹ enẹ. (Luti 4:13-17, 22) Humọ, to Paladisi aigba ji tọn he ja lọ mẹ, e na jla nuhe Satani po aihọn ylankan etọn po ko hẹngble lẹpo do. “Yè ma na flin hoho tọn, mọ yé ma na wá linlẹn mẹ.”—Isa. 65:17.
16. Pọndohlan tẹwẹ mí dona tindo gando odẹ̀ go, podọ etẹwutu?
16 Mahopọnna whlepọn depope he mí sọgan pehẹ, yinyọnẹn dọ Jiwheyẹwhe yiwanna mí to whepoponu na gọalọna mí nado doakọnnanu. (Hia Lomunu lẹ 8:35-39.) Dile etlẹ yindọ agbọ́ ma na pé Satani nado hẹn mí gbọjọ, e ma na pà ẹ eyin mí “yin wunzanọ” bo nọ “to aṣeji nado nọ hodẹ̀.” (1 Pita 4:7) Jesu dọmọ: “Enẹwutu, mì nọ họ́ mìde bo nọ basi ovẹvivẹ to ojlẹ lẹpo mẹ na mì nido sọgan tindo kọdetọn dagbe to hinhọngán sọn onú ehe lẹpo he dona jọ lẹ mẹ, podọ na mì nido nọte to Visunnu gbẹtọ tọn nukọn.” (Luku 21:36) Doayi lehe Jesu yí hogbe lọ “ovẹvivẹ” he yin wunmẹ odẹ̀ ahundopo tọn de zan do go. Gbọn tuli nina mí nado nọ vẹvẹ dali, Jesu to nùzindeji dọ ojlẹ lọ die nado ylọ teninọ mítọn to ewọ po Otọ́ etọn po nukọn dọ nujọnu. Kiki mẹhe tin to ninọmẹ he Jiwheyẹwhe kẹalọyi mẹ lẹ kẹdẹ wẹ na tindo todido lọ nado lùn azán Jehovah tọn tọ́n.
Zindonukọn to Sinsẹ̀nzọn Jehovah Tọn mẹ po Zohunhun Po
17. Eyin kunnudide to aigba-denamẹ mìtọn ji nọ vẹawu, nawẹ mì sọgan mọaleyi sọn apajlẹ dagbe yẹwhegán hohowhenu tọn lẹ tọn mẹ gbọn?
17 Mahẹ tintindo to nuwiwa gbigbọmẹ tọn lẹ mẹ nọ hẹn mí lodo. Ehe hẹn mí flin hogbe Pita tọn lẹ dọmọ: “Omẹ nankọ wẹ e jẹ dọ mìwlẹ ni yin to walọ wiwe lẹ po nuyiwa mẹdezejo na Jiwheyẹwhe tọn lẹ po mẹ!” (2 Pita 3:11) Dehe yin tọ́ntlọ́ngbọ́n to nuyiwa enẹlẹ mẹ wẹ wẹndagbe lọ lilá. (Mat. 24:14) Nugbo wẹ dọ to aigba-denamẹ delẹ ji, azọ́n yẹwhehodidọ lọ tọn nọ kàn dẹpẹ biọ, vlavo na ojlo matindo kavi homẹkẹn wutu kavi na gbẹtọ lẹ nọ hẹn alọnu ján to nuyiwa egbesọegbesọ tọn lẹ mẹ wutu. Devizọnwatọ Jehovah tọn hohowhenu tọn lẹ pehẹ onú mọnkọtọn lẹ. Etomọṣo, yé ma jogbe ṣigba nọ to kọlẹyi gbẹtọ lẹ dè to “afọnnu fuu” kavi pludopludo po owẹ̀n he Jiwheyẹwhe dena yé lọ po. (Hia 2 Otannugbo lẹ 36:15, 16; Jel. 7:24-26) Etẹwẹ gọalọna yé nado doakọnnanu? Yé tindo pọndohlan Jehovah tọn gando azọ́ndenamẹ yetọn go, yé ma pọ́n ẹn hlan dile aihọn nọ wà do. Humọ, yé mọdọ lẹblanulọkẹyi daho de wẹ e yin nado tindo oyín Jiwheyẹwhe tọn to ota.—Jel. 15:16.
18. Obá tẹ mẹ wẹ azọ́n yẹwhehodidọ Ahọluduta lọ tọn na yinuwado gbégbò he oyín Jiwheyẹwhe tọn na tindo to sọgodo ji jẹ?
18 Mílọsu tindo lẹblanulọkẹyi lọ nado lá oyín po lẹndai Jehovah tọn po. Pọ́n bo: Taidi dopo to kọdetọn azọ́n yẹwhehodidọ tọn mítọn tọn lẹ mẹ, kẹntọ Jiwheyẹwhe tọn lẹ ma sọgan dọ dọ emi ma sè nudepope gando Jiwheyẹwhe po lẹndai etọn po go gba to whenue ewọ na hẹn whẹdida etọn ṣẹ do yé ji. Na nugbo tọn, taidi Falo hohowhenu tọn, yé na yọnẹn dọ Jehovah wẹ to nuyiwa sọta yé. (Eks. 8:1, 20; 14:25) To ojlẹ dopolọ mẹ, Jehovah na doyẹyigona devizọnwatọ nugbonọ etọn lẹ gbọn hinhẹn họnwun hezeheze na mẹlẹpo dọ yewlẹ wẹ afọzedaitọ etọn lẹ dali.—Hia Ezekiẹli 2:5; 33:33.
19. Nawẹ mí sọgan dohia dọ mí tindo ojlo nado yí dotẹnmẹ he homẹfa Jehovah tọn hundote na mí zan ganji gbọn?
19 Sẹpọ vivọnu wekanhlanmẹ awetọ Pita tọn, e wlan hlan yisenọ hatọ etọn lẹ dọmọ: “Mì nọ pọ́n homẹfa Oklunọ mítọn tọn hlan taidi whlẹngán.” (2 Pita 3:15) Mọwẹ, mì gbọ mí ni zindonukọn nado to dotẹnmẹ he homẹfa Jehovah tọn hundote na mí yizan ganji. Gbọnna? Gbọn awuwiwlena jẹhẹnu he nọ hẹn homẹ etọn hùn lẹ, vivẹnudido nado gbọṣi “madodiho, madoblọ” mẹ, pọndohlan dagbe tintindo gando whlepọn lẹ go, podọ alọnu hinhẹn ján to sinsẹ̀nzọn Ahọluduta lọ tọn mẹ dali. Gbọnmọ dali, mí na hẹn míde tin to hukan ji na dona mavọmavọ he ‘olọn yọyọ lẹ po aigba yọyọ lọ po’ na hẹnwa lẹ.—2 Pita 3:13.
Be Hiẹ Flin Ya?
• Nawẹ mí sọgan wleawuna jẹhẹnu he nọ hẹn homẹ Jiwheyẹwhe tọn hùn lẹ gbọn?
• Nawẹ mí sọgan gbọṣi “madodiho, madoblọ” mẹ gbọn?
• Etẹwẹ mí sọgan plọn sọn apajlẹ Josẹfu po Naomi po tọn mẹ?
• Naegbọn mahẹ tintindo to azọ́n yẹwhehodidọ lọ tọn mẹ do yin lẹblanulọkẹyi daho de?
[Yẹdide to weda 9]
Etẹwẹ na gọalọna mì asu lẹ nado wleawuna jẹhẹnu he nọ hẹn homẹ Jiwheyẹwhe tọn hùn lẹ to pọmẹ hẹ whẹndo mìtọn?
[Yẹdide to weda 10]
Etẹwẹ mí sọgan plọn sọn lehe Josẹfu yinuwa to whlepọn lẹ nukọn do mẹ?