Ohó Jehovah Tọn Tin to Ogbẹ̀
Nuagokun lẹ sọn Owe Jakobu po Pita po Tọn lẹ Mẹ
NUDI owhe 30 to Pẹntikọsti 33 W.M. godo, devi Jakobu—yèdọ nọvisunnu daa Jesu tọn—kanwehlan “whẹndo wiawe” Islaeli gbigbọmẹ tọn lẹ. (Jak. 1:1) Yanwle etọn wẹ nado dotuhomẹna yé nado lodo to yise mẹ bo doakọnnanu to whlepọn lẹ glọ. E sọ na ayinamẹ he na gọalọ nado jla ninọmẹ ylankan he ko fọ́n to agun lọ lẹ mẹ do.
Ojlẹ vude jẹnukọnna homẹkẹn he Ahọluigbagán Lomu tọn Néron hẹnwa Klistiani lẹ ji to owhe 64 W.M., apọsteli Pita do wekanhlanmẹ etọn tintan hlan Klistiani lẹ, bo na tuli yé nado nọtegli to yise mẹ. To wekanhlanmẹ etọn awetọ, he e kàn ojlẹ vude to enẹgodo mẹ, Pita na tuli yisenọ hatọ etọn lẹ nado payi ohó Jiwheyẹwhe tọn go bo na yé avase gando wiwá azán Jehovah tọn go. Na nugbo tọn, mí sọgan mọaleyi eyin mí payi wẹndomẹ he wekanhlanmẹ Jakobu po Pita po tọn lẹ bẹhẹn go.—Heb. 4:12.
JIWHEYẸWHE NỌ NA NUYỌNẸN MẸHE NỌ “BIỌ TO YISE MẸ” LẸ
“Donanọ wẹ dawe lọ he doakọnna whlepọn,” wẹ Jakobu wlan, “na whenuena yè tẹ́n ẹn pọ́n, e na yí jẹgbakun ogbẹ̀ tọn.” Jehovah nọ na nuyọnẹn mẹhe nọ “biọ to yise mẹ” lẹ nado sọgan doakọnna whlepọn lẹ.—Jak. 1:5-8, 12.
Mẹhe “yin mẹplọntọ” to agun mẹ lẹ sọ tindo nuhudo yise po nuyọnẹn po tọn ga. To whenuena Jakobu ko dọ dọ odẹ́ yin “awutugonu pẹvi de” he sọgan “hẹn agbasa lẹpo gble” godo, e na avase gando nuyiwadomẹji aihọn tọn he sọgan hẹn haṣinṣan he mẹde tindo hẹ Jiwheyẹwhe gble lẹ go. E sọ dọ afọdide he mẹhe to azọ̀njẹ to gbigbọ-liho lẹ dona ze nado sọgan jẹgangan.—Jak. 3:1, 5, 6; 5:14, 15.
Gblọndo Na Kanbiọ Owe-Wiwe Tọn Lẹ:
2:13—Aliho tẹ mẹ wẹ ‘lẹblanu nọ doawagun to whẹdida ji’ te? Whenuena ojlẹ sọ nado dogbè na Jiwheyẹwhe, e nọ flin lẹblanu he mí ko dohia mẹdevo lẹ bo nọ jona mí to dodonu avọ́sinsan ofligọ Ovi etọn tọn ji. (Lom. 14:12) Be ehe ma dona whàn mí nado nọ do lẹblanu hia to whepoponu ya?
4:5—Wefọ tẹwẹ Jakobu to alọdlẹndo tofi? Jakobu ma to hoyidọ sọn wefọ tangan de mẹ gba. Ṣigba, ohó he Jiwheyẹwhe gbọdo ehelẹ sọgan ko sinai do linlẹn he yin mimọ to wefọ delẹ mẹ taidi Gẹnẹsisi 6:5; 8:21; Howhinwhẹn lẹ 21:10; po Galatianu lẹ 5:17 po ji.
5:20—Alindọn mẹnu tọn wẹ “ewọ he hẹn ylandonọ de gọ̀ sọn alibubu etọn mẹ” na whlẹngán? Klistiani he hẹn ylanwatọ de gọ̀ sọn ylando etọn mẹ whlẹn alindọn mẹhe lẹnvọjọ ehe tọn sọn okú gbigbọmẹ tọn mẹ podọ vlavo sọn vasudo madopodo mẹ. Gbọnmọ dali, mẹhe to alọgọna ylanwatọ lọ nasọ “whlá [kavi ṣinyọnnudo] ylando susu” he omẹ enẹ ko wà lẹ.
Nuhe Mí Plọn sọn E Mẹ:
1:14, 15. Ojlo he ma sọgbe lẹ wẹ nọ hẹn ylando wá. Enẹwutu, mí ma dona nọ to nulẹnpọndo ojlo he ma sọgbe lẹ ji. Kakatimọ, mí dona ‘nọ lẹnnupọndo’ nuhe nọ jlọmẹdote lẹ ji bo dike yé ni gọ́ ayiha po ahun mítọn po mẹ.—Flp. 4:8.
2:8, 9. “Mẹhopọn gbẹtọ tọn” jẹagọdo “tado osẹ́n tọn” he yin owanyi. Enẹwutu, Klistiani nugbo lẹ ma nọ homẹnukuntapọ́n.
2:14-26. Mí nọ yin ‘whinwhlẹn gbọn yise dali,’ ‘e ma yin gbọn azọ́n’ Osẹ́n Mose tọn lẹ kavi dehe mí nọ wà taidi Klistiani lẹ dali gba. Yise bẹ nususu hẹn hugan nado dọ poun dọ Jiwheyẹwhe tin. (Efe. 2:8, 9; Joh. 3:16) E dona whàn mí nado yinuwa sọgbe hẹ ojlo Jiwheyẹwhe tọn.
3:13-17. Na nugbo tọn, “nuyọnẹn he sọn aga” ma sọgan yin yiyijlẹdo nuyọnẹn ‘aigba tọn, gbẹtọ tọn po aovi tọn po’ go! Mí dona ‘nọ dín nuyọnẹn Jiwheyẹwhe tọn taidi adọkunnu he whlá.’—Howh. 2:1-5.
3:18. Okún wẹndagbe Ahọluduta lọ tọn dona yin “didó to jijọho mẹ gbọn yé he to jijọho basi lẹ dali.” Nujọnu wẹ e yin dọ mí ni yin jijọho-dintọ, e ma yin tuklanọ, whẹgbènọ, kavi zingidinọ gba.
‘MÌ NỌTE GLIGLI TO YISE MẸ’
Pita flinnu yisenọ hatọ etọn lẹ gando “todido ogbẹ̀nọ” yetọn he yin ogú olọn mẹ tọn lọ go. “Mì wẹ whẹndo he yè de, mẹhe yin tado yẹwhenọduta tọn, akọta wiwe,” wẹ Pita dọna yé. To ayinamẹ tangan delẹ nina yé do taliai ji godo, e dotuhomẹna yemẹpo nado yin ‘homẹdoponọ, nọ do mẹtọnhopọn hia, yiwannamẹ di mẹmẹsunnu, bo yin awuvẹmẹtọ, bosọ yin dagbewatọ.’—1 Pita 1:3, 4; 2:9; 3:8.
Na “opodo [titonu Ju lẹ tọn] to sisẹpọ” wutu, Pita na ayinamẹ mẹmẹsunnu lẹ nado ‘yin huwhẹnọ, bosọ nọ họ́ yede hlan odẹ̀.’ E dọna yé dọmọ: “Mì yin huwhẹnọ bosọ nọ họ́ mìde . . . Mì . . . diọnukunsọ [Satani bo nọte] gligli to yise mẹ.”—1 Pita 4:7; 5:8, 9.
Gblọndo Na Kanbiọ Owe-Wiwe Tọn Lẹ:
3:20-22—Nawẹ baptẹm nọ whlẹn mí gbọn? Baptẹm yin nubiọtomẹsi de na mẹhe jlo na mọ whlẹngán yí lẹ. Etomọṣo, baptẹm na ede ma nọ whlẹnmẹ. Na nugbo tọn, whlẹngán nọ yin mimọ “gbọn fọnsọnku Jesu Klisti tọn” gblamẹ. Mẹhe ze yinkọ dai na baptẹm lẹ dona tindo yise dọ whlẹngán yọnbasi kiki na Jesu yí ede do sanvọ́, yin finfọnsọnku, bo “tin to adusilọ Jiwheyẹwhe tọn mẹ” bosọ tindo huhlọn do mẹhe to ogbẹ̀ po oṣiọ lẹ po ji wutu. Baptẹm he sinai do yise mọnkọtọn ji wẹ nọtena ‘alindọn ṣinatọ̀n he yin whinwhlẹn gbọn osin lọ gblamẹ.’
4:6—“Oṣiọ” tẹlẹ wẹ yè “dọyẹwheho wẹndagbe tọn” hlan? Omẹ ehelẹ wẹ mẹhe “kú to ylanwiwa po ylando po mẹ” lẹ kavi he ma tindo haṣinṣan de hẹ Jehovah whẹpo do sè wẹndagbe lọ. (Efe. 2:1) Ṣigba, to whenuena yé yí wẹndagbe lọ sè godo, yé “fọ́n do ogbẹ̀” to enẹ mẹ dọ yé wá tindo haṣinṣan hẹ Jehovah todin.
Nuhe Mí Plọn sọn E Mẹ:
1:7. Na yise mítọn nido họakuẹ taun, e dona yin whiwhlepọn kavi yin hinhẹn sọgbe. Na nugbo tọn, yise dolido mọnkọtọn ‘nọ whlẹn alindọn.’ (Heb. 10:39) Mí ma dona họ̀nna ninọmẹ he nọ whlé yise mítọn pọ́n lẹ.
1:10-12. Angẹli lẹ jlo na doun nugbo sisosiso gbigbọmẹ tọn he yẹwhegán Jiwheyẹwhe tọn hohowhenu tọn lẹ wlan gando agun Klistiani yiamisisadode tọn go lẹ mẹ pọ́n bo mọnukunnujẹ yé mẹ. Ṣigba, whenue Jehovah jẹ nuyiwa hẹ agun ehe ji kẹdẹ wẹ onú ehelẹ wá họnwun. (Efe. 3:10) Be e ma jẹ dọ mí ni hodo apajlẹ angẹli lẹ tọn bo dovivẹnu nado dindona “onú sisosiso Jiwheyẹwhe tọn lẹ” ya?—1 Kọl. 2:10.
2:21. To apajlẹ Jesu Klisti tọn hihodo mẹ, mí dona tindo ojlo nado jiya etlẹ yin kakajẹ okú nado sọgan nọgodona nupojipetọ-yinyin Jehovah tọn.
5:6, 7. Eyin mí bẹ magbọjẹ mítọn do Jehovah ji, e nọ gọalọna mí nado ze sinsẹ̀n-bibasi nugbo do otẹn tintan mẹ to gbẹzan mítọn mẹ kakati nado yin ahunmẹduna zẹjlẹgo gando nuhe na jọ to osọ go.—Mat. 6:33, 34.
‘AZÁN JEHOVAH TỌN NA WÁ’
“Dọdai ma gbọn ojlo gbẹtọ tọn dali wá to hohowhenu gba,” wẹ Pita wlan, “ṣigba gbẹtọ lẹ dọho sọn Jiwheyẹwhe dè dile yè dọ̀n yé yì do gbọn [gbigbọ wiwe] dali.” Eyin mí payi ohó dọdai tọn lọ go, mí na yin hihọ́-basina sọn “mẹplọntọ lalonọ lẹ” po mẹklọtọ devo lẹ po si.—2 Pita 1:21; 2:1-3.
Pita na avase dọ “mẹvlẹtọ lẹ na wá po ovlẹ po to azán godo tọn mẹ.” Ṣigba ‘azán Jehovah tọn na wá taidi ajotọ.’ Pita dotana wekanhlanmẹ etọn po ayinamẹ dagbe de po na mẹhe ‘to nukundo, bosọ to mizọnmizọn ji hlan wiwá azán enẹ tọn’ lẹ.—2 Pita 3:3, 10-12.
Gblọndo Na Kanbiọ Owe-Wiwe Tọn Lẹ:
1:19—Mẹnu wẹ “sunwhlẹvu afọnnu tọn lọ,” whetẹnu wẹ e zẹ̀, podọ nawẹ mí wagbọn do yọnẹn dọ ehe ko jọ? “Sunwhlẹvu afọnnu tọn lọ” wẹ Jesu Klisti to whenuena e mọ huhlọn Ahọluduta tọn yí godo. (Osọhia 22:16) To 1914, Jesu fọ́n to nudida lẹpo nukọn taidi Ahọlu Mẹssia lọ, bo to bẹjẹeji azán yọyọ de tọn lá. Nujijọ wunmẹdidiọ tọn lọ wleawuna numọdohlan-nukọn gando gigo po huhlọn Ahọluduta Jesu tọn po go, bo dohia dọ mí sọgan dejido ohó dọdai Jiwheyẹwhe tọn go. Ayipipa ohó dọdai tọn enẹ go nọ tá hinhọ́n do ahun mítọn mẹ bo nọ gbọnmọ dali gọalọna mí nado yọnẹn dọ Sunwhlẹvu Afọnnu tọn lọ ko zẹ̀.
3:17—Etẹ dọ wẹ Pita te to whenuena e dọ dọ “mìwlẹ ko yọ́n onú helẹ dai”? Pita to alọdlẹndo oyọnẹn nujijọ sọgodo tọn lẹ tọn he yin nina ewọ po Biblu kàntọ devo lẹ po jẹnukọn to gbọdo glọ. To whenuena e yindọ oyọnẹn ehe tindo dogbó, e ma hẹn Klistiani dowhenu tọn lẹ penugo nado yọ́n nujijọ sọgodo tọn lẹ to gigọ́ mẹ gba. Obá de mẹ janwẹ yé yọ́n yé jẹ.
Nuhe Mí Plọn sọn E Mẹ:
1:2, 5-7. Gbọnvona dọ vivẹnudido mítọn nado wleawuna jẹhẹnu delẹ taidi yise, akọndonanu po jijọ-di-Jiwheyẹwhe po na gọalọna mí nado tindo ‘oyọnẹn he pegan Jiwheyẹwhe po Jesu po tọn’ dogọ, e sọ sọgan gọalọna mí ma nado “zun . . . madosinsẹ́nnọ” gando oyọnẹn enẹ go.—2 Pita 1:8.
1:12-15. Nado “lodo to nugbo . . . mẹ,” mí tindo nuhudo nuflinmẹ lẹ tọn, taidi dehe mí nọ mọyi gbọn opli agun tọn lẹ, oplọn mẹdetiti tọn po Biblu hihia po gblamẹ.
2:2. Mí dona tin to aṣeji ma nado dike walọyizan mítọn ni hẹn vlẹko wá Jehovah po titobasinanu etọn po ji.—Lom. 2:24.
2:4-9. Na nuhe Jehovah ko wà wayi lẹ wutu, mí sọgan deji dọ e “yọ́n le e na whlẹn ayihawiwenọ lẹ do sọn whlepọn mẹ, bosọ yí mawadodonọ lẹ whlá hlan whẹdazangbe” nado sán yé sẹ̀.
2:10-13. Dile etlẹ yindọ “mẹgángán” kavi omẹ gigonọ lẹ, yèdọ mẹho agun tọn lẹ, yin mapenọ bo sọgan nọ ṣinuwa to whedelẹnu, mí ma dona nọ zannùdo yé go.—Heb. 13:7, 17.
3:2-4, 12. Ayipipa “ohó he yè dọ sọn onù yẹwhegán wiwe lẹ tọn mẹ jẹnukọn, podọ osẹ́n . . . Oklunọ Whlẹngántọ tọn tọn lẹ” go na gọalọna mí nado hẹn do ayiha mẹ dọ azán Jehovah tọn ko sẹpọ.
3:11-14. Dile mí “to nukundo, bosọ to mizọnmizọn ji hlan wiwá azán Jiwheyẹwhe tọn,” mí dona (1) ‘tindo walọ wiwe,’ bo gbọṣi wiweji to agbasa-liho, to apọ̀nmẹ, to walọyizan-liho podọ to gbigbọ-liho; (2) sù to azọ́n he nọ do ‘mẹdezejo na Jiwheyẹwhe’ hia lẹ mẹ, taidi dehe tindo kanṣiṣa hẹ azọ́n yẹwhehodidọ Ahọluduta lọ tọn po mẹhẹnzun devi tọn po; (3) yin ‘madoblọnọ’ to walọyizan po gbẹtọ-yinyin mítọn po mẹ bo ma yin hinhẹnflu gbọn aihọn dali; (4) gbọṣi “madowango,” bo nọ wà onú lẹpo po mẹwhinwhàn dagbe po; podọ (5) tin “to jijọho mẹ” hẹ Jiwheyẹwhe, mẹmẹsunnu mítọn lẹ, po hatọ mítọn lẹ po.