Plọn Ovi Towe lẹ Nado Yiwanna Wehihia po Nupinplọn Po

VIVẸNUDIDO vẹkuvẹku nado gọalọna ovi towe lẹ na yé nido nọ hiawe bo nọ plọnnu yin dopo to aliho dagbe hugan nado wleawuna sọgodo yetọn lẹ mẹ. Podọ ayajẹ nankọ die nuwiwa ehelẹ nọ hẹnwa! Nuhe mẹdelẹ nọ flin taun gando ovu whenu yetọn go wẹ yindọ mẹjitọ yetọn lẹ nọ hiawe na yé. Wehihia po ale he e nọ hẹnwa lẹ po sọgan hẹn awuvivi wá. Ehe yin nugbo titengbe na devizọnwatọ Jiwheyẹwhe tọn lẹ, na Biblu pinplọn nọ gọalọ taun nado hẹn nukọnyiyi mítọn pọnte dogọ to gbigbọ-liho. Mẹjitọ Klistiani de dọmọ: “Wehihia po nupinplọn po tin to nuhe họakuẹ hugan na mí lẹ mẹ.”

Aṣa dagbe nupinplọn tọn sọgan gọalọna ovi mìtọn lẹ nado wleawuna haṣinṣan pẹkipẹki de hẹ Jiwheyẹwhe. (Ps. 1:1-3, 6) Dile etlẹ yindọ wehihia ma yin nubiọtomẹsi de na whlẹngán, Biblu dohia dọ e sọgan hẹn ale susu wá to gbigbọ-liho. Di apajlẹ, Osọhia 1:3 dọmọ: “Ayajẹnọ wẹ ewọ he nọ hia po ogbè lélé po, podọ mẹhe nọ sè ohó dọdai ehe tọn lẹ.” Humọ, to ayinamẹ gbọdo apọsteli Paulu tọn hlan Timoti mẹ, e zinnudo nujọnu-yinyin ayidonugo sọwhiwhe tọn, he yin adà tangan nupinplọn tọn de ji, to whenuena e dọmọ: “Nọ lẹnnupọndo onú ehelẹ ji; jo dewe na yé.” Etẹwutu? “Na nukọnyiyi towe nido sọgan họnwun.”—1 Timoti 4:15.

Na nugbo tọn, eyin mẹde yọ́n wehia bo yọ́n lehe yè nọ plọnnu do poun, enẹ ma yin kunnudenu de dọ nugopipe ehelẹ na hẹn ale wá na ẹn gba. Susu mẹhe tindo nugopipe ehelẹ tọn nọ gboawupo nado yí yé zan; kakatimọ, yé nọ doafọna numadinu lẹ. Enẹwutu nawẹ mẹjitọ lẹ sọgan plọn ovi yetọn lẹ nado yiwanna oyọnẹn he nọ hẹn ale wá gbọn?

Owanyi po Apajlẹ Towe Po

Ovi lẹ nọ yiwanna nupinplọn taun, titengbe eyin mẹjitọ lẹ nọ do owanyi hia yé to nupinplọn whenu. Owen po Claudia po he yin asu po asi po Klistiani de, flin gando ovi yetọn awe lẹ go dọmọ: “Yé nọ to jejeji nado plọnnu, na ojlẹ vonọtaun de wẹ e nọ yin—yé nọ tindo numọtolanmẹ hihọ́ tọn bosọ nọ voawu. Yé wá mọdọ nuwiwa ehe yin ojlẹ de nado nọ duvivi owanyi zohunhun tọn.” Eyin ovi lẹ tlẹ jẹ whinwhẹ́n ji biọ owhe aflanmẹ tọn he sọgan bẹ avùnnukundiọsọmẹnu lẹ hẹn lẹ mẹ, ninọmẹ owanyi tọn he whẹndo de zedai to nupinplọn lẹ whenu gbẹ́ nọ yinuwado pọndohlan yetọn ji gando nupinplọn go. Ovi Owen po Claudia po tọn lẹ yin gbehosọnalitọ todin podọ yé gbẹ́ to alemọyi sọn wehihia po nupinplọn he mẹjitọ yetọn lẹ do dó ahun mẹ na yé po mẹ.

Nuhe sọ nọ gọalọ taun nado do dó owanyi wehihia po nupinplọn po tọn do ahun mẹ na ovi lẹ wẹ apajlẹ mẹjitọ lẹ tọn. E yọnbasi dọ ovi he nọ saba mọ mẹjitọ yetọn lẹ to wehia bo to nuplọn lẹ ni yí nuwiwa ehelẹ do dó apadewhe gbẹzan yetọn tọn. Ṣigba, nawẹ mẹjitọ de sọgan ze apajlẹ mọnkọtọn dai gbọn eyin wehihia nọ vẹawuna ẹn? E sọgan biọ dọ hiẹ ni vọ́ tito basina nuhe tin to otẹn tintan mẹ na we lẹ kavi aṣa nupinplọn tọn towe. (Lom. 2:21) Eyin hiẹ yí wehihia egbesọegbesọ do dó aṣa, ehe na yinuwado ovi towe lẹ ji sisosiso. Vivẹnudido towe—titengbe nado nọ hia Biblu, bo nọ wleawuna opli lẹ bosọ nọ basi oplọn whẹndo tọn—na do nujọnu-yinyin nuwiwa ehelẹ tọn hia hezeheze.

Po enẹ po, owanyi po apajlẹ mìtọn po yin nujọnu nado plọn ovi mìtọn lẹ na yé nido yiwanna wehihia. Ṣigba afọdide yọ́n-na-yizan tẹlẹ wẹ mì sọgan ze nado na tuli yé?

Alọgigọna Ovi lẹ Nado Yiwanna Wehihia

Etẹwẹ yin delẹ to afọdide titengbe he a sọgan ze lẹ mẹ nado plọn ovi towe lẹ na yé nido yiwanna wehihia? Tindo owe lẹ to aimẹ na yé to whenue yé gbẹ́ pò to ovu. Mẹho agun tọn de he mẹjitọ etọn lẹ plọn ẹn nado yiwanna wehihia dọ dọ: “Mì dike ovi mìtọn lẹ ni jẹakọ hẹ owe lẹ bo nọ yí yé zan. Gbọnmọ dali, yé na yiwanna wehihia bọ e na lẹzun apadewhe gbẹzan yetọn tọn.” Po enẹ po, ovi susu ko nọ jẹakọ hẹ owe sinai do Biblu ji lẹ, taidi Plọnnu sọn Mẹplọntọ Daho lọ Dè po Owe Ṣie He Bẹ Otàn Biblu Tọn lẹ Hẹn po, taun ojlẹ dindẹn whẹpo do nọ yọ́n wehia. Eyin mì nọ hia owe mọnkọtọn lẹ hẹ ovi mìtọn lẹ, e ma yin ogbè lọ kẹdẹ wẹ yé na jẹakọ hẹ gba, ṣigba yé nasọ yọ́n “onú gbigbọ tọn lẹ” po “ohó gbigbọ tọn lẹ” po ga.—1 Kọl. 2:13.

Nọ hiawe daga whẹwhẹ. Yí i do dó aṣa nado nọ hiawe hẹ ovi towe lẹ egbesọegbesọ. Mọwiwà na gọalọna yé nado nọ ylọ hogbe lẹ tọ́n ganji bosọ hẹn aṣa wehihia tọn dagbe de go. Lehe hiẹ nọ hiawe do lọsu yin nujọnu. Nọ hiawe po numọtolanmẹ po, enẹ na gọalọna ovi towe lẹ nado nọ wà nudopolọ. Na nugbo tọn, hiẹ sọgan mọdọ ovi towe lẹ na nọ biọ to asi towe nado nọ vọ́ otàn dopolọ hia na yé pludopludo. Eyin mọ wẹ, ma nọ gbẹ́ blo! To nukọn mẹ, yé na wá jlo nado dọhodo hosọ devo lẹ ji. Ṣigba họ́ dewe ma nado hẹn yé gánnugánnu nado hiawe hẹ we. Jesu ze apajlẹ dagbe dai to aliho ehe mẹ, na e plọn hosetọ etọn lẹ “dile yé penugo nado dotoai dẹnsọ.” (Malku 4:33) Eyin hiẹ ma nọ hẹn ovi towe lẹ gánnugánnu, yé na nọ tin to jejeji na wehihia he na bọdego, podọ vudevude hiẹ na jẹ yanwle towe kọ̀n, enẹ wẹ nado plọn yé na yé nido yiwanna wehihia.

Nọ na tuli yé nado tindo mahẹ bo dọhodo nuhe mì hia ji. Homẹ towe na hùn nado mọdọ ovi towe lẹ yawu jẹ hogbe susu yọnẹn ji, bo nọ hia yé, bosọ yọ́n zẹẹmẹ yetọn. Hodidọ do nuhe mì hia lẹ ji sọgan yidogọna nukọnyiyi yetọn taun. Owe de he basi zẹẹmẹ do lehe yè sọgan gọalọna ovi lẹ nado lẹzun wehiatọ dagbe lẹ do ji dọ dọ hodọdopọ nọ gọalọna ovi lẹ “nado plọn hogbe he yé na flin to godo mẹ bo mọnukunnujẹemẹ lẹ to whenuena yé to wehia.” Owe dopolọ zindonukọn dọmọ: “Hodọdopọ yin nujọnu—yèdọ aliho he yọ́n hugan—nado gọalọna yọpọvu he bí bosọ to vivẹnudo nado yọ́n wehia lẹ.”

Nọ biọ to ovi towe lẹ si nado hiawe na we, bo nọ na tuli yé nado kàn kanbiọ lẹ sè. Hiẹ lọsu sọgan kàn kanbiọ lẹ sè bo dọ gblọndo he yé sọgan na lẹ na yé. Gbọnmọ dali, ovi lẹ na mọdọ owe lẹ nọ bẹ nudọnamẹ lẹ hẹn podọ hogbe he yé to hihia lẹ tindo zẹẹmẹ. Aliho ehe nọ gọalọ titengbe eyin owe he hia mì te sinai do Ohó Jiwheyẹwhe tọn, yèdọ owe he yọ́n hugan owe lẹpo lọ ji.—Heb. 4:12.

Ṣigba, ma wọn gbede blo dọ wehihia ma bọawu. E nọ biọ whenu podọ hiẹ dona nọ hiawe whẹwhẹ na e nido má we. Enẹwutu nọ na tuli jọja he yiwanna wehihia lẹ bo nọ na pipà ahundopo tọn yé. Eyin a nọ pà ovi towe lẹ, ehe na gọalọna yé nado yiwanna wehihia.

Wehihia Nọ Hẹn Ale po Awuvivi po Wá

Pinplọn ovi towe lẹ lehe yè nọ plọnnu do na gọalọna yé nado nọ hiawe. Nupinplọn nọ biọ dọ mẹde ni plọn onú voovo delẹ bo mọnukunnujẹ kanṣiṣa he yé tindo mẹ. E nọ biọ nugopipe lọ nado nọ basi titona onú lẹ, nado nọ flinnu podọ nado nọ yí nudọnamẹ lẹ zan. Tlolo he ovi de ko plọn lehe yè nọ plọnnu do bo mọnukunnujẹ lehe e sọgan gọalọna ẹn do mẹ, nupinplọn lọ nọ hẹn ale po awuvivi po wá na ẹn.—Yẹwh. 10:10.

Nọ yí adà tangan nupinplọn tọn lẹ zan. Sinsẹ̀n-Bibasi Whẹndo tọn, dogbigbapọnna wefọ egbesọegbesọ tọn po nuwiwa mọnkọtọn devo lẹ po nọ hùn dotẹnmẹ dagbe lẹ dote nado plọn ovi towe lẹ lehe yè nọ plọnnu do. Nado sinai whii bo na ayidonugo sọwhiwhe tọn hosọ tangan de na ojlẹ kleunkleun delẹ na plọn ovi le dọ ayiha zizedo fidopo yin nujọnu to nupinplọn whenu. Humọ, hiẹ sọgan na tuli visunnu towe nado dọ kanṣiṣa he tin to nuhe e ṣẹṣẹ plọn po nuhe e ko yọnẹn dai po ṣẹnṣẹn na we. Ehe na plọn ẹn nado nọ basi nuyijlẹdonugo. Etẹwẹ lo, eyin hiẹ na biọ to viyọnnu towe si nado basi bladopọ nuhe e hia tọn to hogbe etọn titi mẹ na we? Ehe na gọalọna ẹn nado mọnukunnujẹ zẹẹmẹ etọn mẹ podọ e nasọ gọalọna ẹn nado flin in. Dogbapọnnanu—enẹ wẹ nado vọ́ nuagokun lẹ dọ to hosọ de hihia godo—yin aliho devo he hiẹ sọgan yizan nado gọalọna yé nado nọ flinnu. Hiẹ tlẹ sọgan plọn yọpọvu lẹ nado nọ basi kandai kleunkleun lẹ to nupinplọn kavi opli agun tọn lẹ whenu. Lehe enẹ na gọalọna yé nado nọ ze ayiha do fidopo do sọ! Aliho he bọawu ehelẹ yiyizan nọ hẹn nupinplọn zun awuvivinu bo na hẹn ale wá na hiẹ po ovi towe lẹ po.

Wleawuna ninọmẹ he nọ hẹn nupinplọn bọawu lẹ. Jẹhọn dagbe po hinhọ́n po, gọna lẹdo he to abọẹ bo hẹnmẹ voawu nọ gọalọ taun nado ze ayiha do fidopo. Na nugbo tọn, nukun he mẹjitọ lẹ nọ yí do pọ́n nupinplọn sọ yin nujọnu. Onọ̀ de dọmọ: “Nujọnu taun wẹ e yin nado nọ de whenu dovo na wehihia po nupinplọn po to gbesisọ mẹ podọ e ma dona nọ súnadu. Ehe na gọalọna ovi towe lẹ nado nọ nọ̀ titoji. Gbọnmọ dali, yé na mọdọ ehe kavi enẹ dona yin wiwadotana to ojlẹ tangan de mẹ.” Mẹjitọ susu wẹ ma nọ jlo dọ nudepope ni jántẹnna nupinplọn yetọn. Sọgbe hẹ nuhe aṣẹpatọ de dọ, aliho ehe wẹ yọ́n hugan nado plọn ovi lẹ aṣa dagbe nupinplọn tọn lẹ.

Nọ zinnudo nujọnu-yinyin oplọn tọn ji. To tadona mẹ, nọ gọalọna ovi towe lẹ nado yọ́n lehe yé na yí nuhe yé plọn lẹ zan do. Eyin ovi lẹ nọ yí nudọnamẹ he yé plọn lẹ do yizan mẹ, enẹ na gọalọna yé nado yọ́n nujọnu-yinyin oplọn tọn. Mẹmẹsunnu jọja de dọmọ: “Eyin n’ma mọ yọ́n-na-yizan nuhe plọn n’te tọn, n’saa nọ plọnnu mọmọ poun wẹ. Ṣigba eyin n’sọgan yí i zan na dee, apàpà nọ sọ́ mi nado mọnukunnujẹemẹ.” To whenuena jọja lẹ mọ nupinplọn taidi aliho de nado jẹ yanwle tangan de kọ̀n, yé nọ yiwanna ẹn taun. Enẹ na zọ́n bọ yé na nọ to jejeji nado plọnnu, dile yé nọ wà do na wehihia.

Ale Daho Hugan Lọ

Mí ma sọgan slẹ ale he tin to ovi lẹ pinplọn nado yiwanna wehihia mẹ lẹpo gba. Ṣigba delẹ to ale lọ lẹ mẹ wẹ yindọ, e nọ gọalọ nado tindo kọdetọn dagbe to wehọmẹ podọ to azọ́nmẹ, nado wleawuna haṣinṣan dagbe hẹ gbẹtọ lẹ, bo mọnukunnujẹ aihọn he mẹ mí to gbẹnọ te ehe mẹ, bosọ nọ gọalọna mẹjitọ lẹ po ovi lẹ po nado tindo haṣinṣan pẹkipẹki, podọ humọ, e nọ hẹn pekọ wá.

Hú popolẹpo, eyin ovi towe lẹ yiwanna nupinplọn, e na gọalọna yé nado yin gbẹtọ gbigbọnọ. Mọwiwà na hùn ayiha po ahun yetọn po nado yọ́n ‘gbigblo, tedidi, jiyiyi po sisosiso nugbo Owe-wiwe tọn po tọn.’ (Efe. 3:18) Na nugbo tọn, mẹjitọ Klistiani lẹ tindo nususu nado plọn ovi yetọn lẹ. To whenue mẹjitọ lẹ de whenu dovo na ovi yetọn lẹ, bo na yé ayidonugo bosọ wà nuhe go yé pé lẹpo na yé nido bẹ gbẹzan dagbe de jẹeji, yé nọ tindo todido lọ dọ ovi yetọn lẹ na de nado lẹzun sinsẹ̀n-basitọ Jehovah tọn lẹ to godo mẹ. Eyin a plọn aṣa dagbe nupinplọn tọn lẹ ovi towe lẹ, enẹ na gọalọna yé nado wleawuna haṣinṣan dagbe de hẹ Jiwheyẹwhe bo hẹn e go. Enẹwutu, dile hiẹ to vivẹnudo nado plọn ovi towe lẹ na yé nido yiwanna wehihia po nupinplọn po, nọ biọ alọgọ Jehovah tọn to odẹ̀ mẹ.—Howh. 22:6.

[Apotin/Yẹdide to weda 26]

Wehihia . . .

• Tindo owe lẹ to aimẹ

• Nọ hiawe daga

• Nọ na tuli yé nado tindo mahẹ

• Mì nọ dọhodo nuhe mì hia ji

• Nọ biọ to ovi towe lẹ si nado hiawe na we

• Nọ na tuli ovi towe lẹ nado kàn kanbiọ lẹ sè

Nupinplọn . . .

• Taidi mẹjitọ de, ze apajlẹ dagbe dai

• Plọn ovi towe lẹ nado nọ . . .

○ ze ayiha do fidopo

○ basi nuyijlẹdonugo

○ basi bladopọ

○ gbadopọnnanu

○ basi kandai

• Wleawuna ninọmẹ he nọ hẹn nupinplọn bọawu lẹ

• Nọ zinnudo nujọnu-yinyin oplọn tọn ji