Etẹwẹ Nọ Yin Ninọmẹ Mítọn Eyin Mí Kú?

DILE hiẹ lọsu na ko yọnẹn do, to egbehe, gbẹtọ lẹ nọ poyọnho, bo nọ jẹazọ̀n, bosọ nọ kú. Ovi pẹvi delẹ tlẹ nọ kú. Be hiẹ dona dibuna oṣiọ lẹ kavi mẹhe kú lẹ wẹ ya?⁠— Be a yọ́n ninọmẹ he mẹ mí nọ tin te eyin mí kú ya?⁠—

Depope to mẹhe to gbẹ̀nọ to egbehe lẹ mẹ ma ko kú bo gọwá ogbẹ̀ bo pìntàn etọn na mí pọ́n gba. Ṣigba to whenuena Jesu, Mẹplọntọ Daho lọ gbẹ́ pò to aigba ji, omẹ mọnkọtọn de tin. Eyin mí hia otàn etọn mí sọgan yọ́n ninọmẹ mẹhe kú lẹ tọn. Dawe lọ yin họntọn Jesu tọn bo nọ nọ̀ Bẹtani, gbétatò de mẹ he ma dẹn do Jelusalẹm. Dawe lọ nọ yin Lazalọsi, podọ e sọ tindo nọviyọnnu awe, he nọ yin Malta po Malia po. Gbọ mí ni pọ́n nuhe Biblu dọ dọ e jọ lọ.

To gbèdopo, Lazalọsi bẹ azọ̀n sinsinyẹn de. Jesu ko yì otò dindẹn de mẹ to whenẹnu. Enẹwutu Malta po Malia po dowẹn hlan Jesu dọ nọvisunnu yetọn Lazalọsi to azọ̀njẹ. Yé dowẹn hlan ẹn na yé yọnẹn dọ Jesu sọgan wá bo hẹnazọ̀ngbọna nọvi yetọn. Jesu ma yin doto de gba, ṣigba Jiwheyẹwhe na ẹn huhlọn he e sọgan yido hẹn azọ̀n depope gbọ̀.—Matiu 15:30, 31.

Ṣigba, whẹpo Jesu nado yì Lazalọsi dè, azọ̀n lọ ko sinyẹn tlala bo ko hù Lazalọsi. Ṣigba Jesu dọna devi etọn lẹ dọ Lazalọsi to amlọndọ bọ Emi jei nado yì fọ́n ẹn. Devi lẹ ma mọnukunnujẹ nuhe dọ Jesu te mẹ. Enẹwutu Jesu dọ ẹ tlọlọ dọ: ‘Lazalọsi ko kú.’ Etẹwẹ ehe dohia gando okú go?⁠— E dohia dọ okú taidi amlọn yìkànmẹ de. E yin amlọn he yìkànmẹ taun de bọ mẹlọ ma tlẹ sọgan kúdlọ.

Todin Jesu jei Malta po Malia po dè. Họntọn whẹndo lọ tọn susu ko wá finẹ ga. Yé wá nado miọnhomẹna nọviyọnnu lọ lẹ na nọvisunnu yetọn he ko kú wutu. To whenuena Malta sè dọ Jesu ja, e yì pé e. Malia lọsu yì to enẹgodo nado pé Jesu. E blawu taun bo to avivi, bosọ jẹklo to Jesu nukọn. Họntọn he hodo Malia lẹ lọsu to avivi ga.

Mẹplọntọ Daho lọ kàn fie yé ze Lazalọsi do biọ. Enẹwutu, gbẹtọ lẹ plan Jesu yì osókla lọ kọ̀n fie Lazalọsi yin didi do. To whenuena Jesu mọ mẹlẹpo to avivi, ewọ lọsu jẹ avivi ji ga. E yọ́n lehe e nọ vẹ́ namẹ sọ to whenuena mẹyiwanna de kú.

Zannu de tin to osókla lọ nù, enẹwutu Jesu dọmọ: “Mì ze zannu lọ sẹ̀.” Be e jẹ dọ yé ni ze zannu lọ sẹ̀ ya?⁠— Malta ma lẹndọ enẹ yin linlẹn he sọgbe de gba. E dọmọ: “Oklunọ, ewọ ko to wánlùn dinvie: na e yin azán ẹnẹ he e ko kú.”

Ṣigba Jesu dọna ẹn dọmọ: “Yẹn ma ko dọhlan we, dọ, Eyin hiẹ yise, hiẹ na mọ gigo Jiwheyẹwhe tọn?” Nuhe dọ Jesu te wẹ yindọ Malta na mọ nude he na hẹn gigo wá na Jiwheyẹwhe. Etẹ wà gbé wẹ Jesu ja? To whenuena zannu lọ yin didesẹ, Jesu hodẹ̀ po ogbè he yiaga po hlan Jehovah. Enẹgodo Jesu dawhá dọmọ: “Lazalọsi, jẹgbonu wá.” Be e na jẹgbonu wá nugbo ya? Be e sọgan wàmọ?⁠—

Be hiẹ sọgan fọ́n mẹhe to amlọndọ de sọn amlọn mẹ ya?⁠— Mọwẹ, eyin a dawhá ylọ ẹ, e na fọ́n. Ṣigba be a sọgan fọ́n mẹhe ko kú de sọn amlọn mẹ ya?⁠— Lala. Mahopọnna lehe a sọgan dawhá daga sọ, mẹhe ko kú ma sọgan sè. Nudepope ma tin he hiẹ kavi yẹn kavi mẹdevo depope to aigba ji to egbehe sọgan wà nado fọ́n mẹhe ko kú.

Ṣigba Jesu gbọnvo. Jiwheyẹwhe na ẹn huhlọn vonọtaun de. Enẹwutu to whenuena Jesu dawhá ylọ Lazalọsi, onú jiawu de jọ. Dawe he ko kú sọn azán ẹnẹ die tọ́njẹgbonu sọn osókla lọ mẹ! E yin hinhẹngọwa ogbẹ̀! E sọgan gbọ bo zinzọnlin bosọ dọho whladopo dogọ! Mọwẹ, Jesu fọ́n Lazalọsi sọnku.—Johanu 11:1-44.

Todin lẹnnupọndo kanbiọ ehelẹ ji: Etẹwẹ yin ninọmẹ Lazalọsi tọn to whenuena e kú? Be alindọn kavi gbigbọ de tọ́nsọn agbasa etọn mẹ bo yì nọgbẹ̀ to fidevo wẹ ya? Be alindọn Lazalọsi tọn yì olọn mẹ wẹ ya? Be Jiwheyẹwhe po angẹli wiwe lẹ po dè wẹ e yì nọgbẹ̀ te to olọn mẹ na azán ẹnẹ lọ lẹ ya?⁠—

Lala, e ma yì fide. Flindọ, Jesu dọ amlọndọ wẹ Lazalọsi te. Etẹwẹ nọ yin ninọmẹ towe to whenuena a to amlọndọ? Eyin a to amlọn yìkànmẹ dọ́, a ma nọ yọ́n nuhe to jijọ to lẹdo towe mẹ, kavi e mayin mọwẹ?⁠— Podọ to whenuena a fọ́n sọn amlọn mẹ, a ma na yọ́n ganhiho nẹmu he a ko yido damlọn adavo eyin a wá pọ́n ogàn.

Mọwẹ e te na mẹhe kú lẹ. Yé ma nọ yọ́n nudepope. Yé ma nọ sè awuvẹ depope. Podọ yé ma sọgan wà nudepope. Nuhe jọ do Lazalọsi go to whenue e kú niyẹn. Okú tin taidi amlọn yìkànmẹ sisosiso de ehe mẹ gbẹtọ ma nọ flin nudepope te. Biblu dọmọ: “Oṣiọ lẹ ma yọ́n nude.”—Yẹwhehodọtọ 9:5, 10.

Lẹnnupọndo ehe ji ga: Eyin olọn mẹ wẹ Lazalọsi tin te na azán ẹnẹ lọ lẹ, be e ma na ko dọ nudepope gandego ya?⁠— Podọ eyin olọn mẹ wẹ e yì, be Jesu na ko hẹn ẹn lẹkọwa aigba ji tofi sọn otẹn whanpẹnọ enẹ mẹ ya?⁠— Paali!

Etomọṣo, mẹsusu nọ dọ dọ mí tindo alindọn de, bọ alindọn lọ nọ to gbẹ̀nọ to whenuena agbasa ko kú godo. Yé dọ dọ alindọn Lazalọsi tọn gbẹ́ pò to ogbẹ̀ to fide. Ṣigba Biblu ma dọmọ gba. E dọ dọ Jiwheyẹwhe basi sunnu tintan Adam bọ e lẹzun “alindọn gbẹ̀tenọ.” Adam yin alindọn de. Biblu sọ dọ dọ to whenuena Adam waylando, e kú. E lẹzun ‘alindọn oṣiọ’ de, bosọ lẹgọ̀do kọ́gudu he mẹ e ko yin bibasi sọn. Biblu sọ dọ dọ kúnkan Adam tọn lẹpo wẹ dugu ylando po okú po tọn ga.—Gẹnẹsisi 2:7; 3:⁠17-19; Osọha lẹ 6:6; Lomunu lẹ 5:12.

To whelọnu lo, e họnwun dọ mí ma tindo alindọn de he to ovo na agbasa mítọn gba. Dopodopo mítọn lẹ yin alindọn de. Podọ na gbẹtọ lẹ ko dugu ylando tọn sọn sunnu tintan, Adam si wutu, Biblu dọ dọ: ‘Alindọn he waylando na kú.’—Ezekiẹli 18:4.

Mẹdelẹ nọ dibuna oṣiọ lẹ. Yé ma nọ dike nado sẹpọ ṣiọditẹn lẹ gba na yé lẹndọ mẹkuku lẹ tindo alindọn de he nọ tọ́nsọn agbasa yetọn mẹ bo sọgan gbleawuna mẹhe to ogbẹ̀ lẹ. Ṣigba be mẹkuku de sọgan gbleawuna mẹhe to ogbẹ̀ ya?⁠— Paali.

Mẹdelẹ tlẹ yise dọ oṣiọ lẹ sọgan lẹzun gbigbọ bo wá dla mẹhe to ogbẹ̀ lẹ pọ́n. Enẹwutu yé nọ kán núdùdù do kọmẹ na oṣiọ lẹ. Ṣigba mẹhe nọ wàmọ lẹ ma yise to nuhe Jiwheyẹwhe dọ dogbọn oṣiọ lẹ dali mẹ gba. Eyin mí yise to nuhe Jiwheyẹwhe dọ mẹ, mí ma na dibuna oṣiọ lẹ gba. Podọ eyin mí jlo na dopẹna Jiwheyẹwhe nugbonugbo na ogbẹ̀ he e na mí, mí na wàmọ gbọn nuhe e kẹalọyi lẹ wiwà dali.

Ṣigba e sọgan paṣa we dọ: ‘Be Jiwheyẹwhe na fọ́n ovivu he ko kú lẹ sọnku ya? Be e jlo nado wàmọ nugbo ya?’ Mí na dọhodo enẹ ji to weta he bọdego mẹ.