Aṣli 4
De Họntọn Towe lẹ po Nuyọnẹn Po
ETẸWẸ BIBLU PLỌN MÍ? “Ewọ he to zọnlinzin hẹ nuyọnẹntọ na yọnnuin.”—Howhinwhẹn lẹ 13:20.
ETẸWẸ NỌ HẸN NUHAHUN LỌ WÁ? Họntọn mítọn lẹ sọgan yidogọna pekọnọ-yinyin mítọn kavi dekanpona ẹn. Walọ po hodidọ yetọn lẹ po nọ yinuwado pọndohlan mítọn ji.—1 Kọlintinu lẹ 15:33.
Di apajlẹ, lẹnnupọndo kandai Biblu tọn he gando sunnu 12 he yì bẹ̀ Kenani pọ́n lẹ tọn go ji. Suhugan yetọn wẹ “hẹn gbedido ylankan aigba he yé ko bẹ̀pọ́n lọ tọn de wá jẹ ovi Islaeli tọn lẹ lọ dè.” Mahopọnna enẹ, awe to sunnu lọ lẹ mẹ na linlin dagbe gando Kenani go, bo ylọ ẹ dọ “aigba dagbe tlala de.” Ṣigba pọndohlan agọ̀ he amẹ́ ao lọ lẹ tindo yinuwado akọta lọ ji taun. Kandai lọ dọmọ: “Agun lọ lẹpo bo ze ogbè yetọn daga, bo dawhá, . . . ovi Islaeli tọn lẹpo lọ sọ to hùnhlún.”—Osọha lẹ 13:30–14:9.
Mọdopolọ to egbehe, mẹsusu wẹ nọ “to nuhlundọ, bo nọ to lewu gando ninọmẹ gbẹ̀mẹ tọn yetọn go.” (Juda 16) E nọ vẹawu nado yin pekọnọ to họntọn he ma nọ tindo pekọ gbede lẹ ṣẹnṣẹn.
ETẸWẸ HIẸ SỌGAN WÀ? Lẹnnupọndo hodọdopọ he a nọ tindo hẹ họntọn towe lẹ ji. Be họntọn towe lẹ nọ saba doawagun to nuhe yé tindo lẹ mẹ wẹ ya, kavi yé nọ wule whẹwhẹ gando nuhe yé ma tindo go? Podọ họntọn nankọ wẹ a yin na yé? Be a nọ tẹnpọn nado hẹn họntọn towe lẹ nado whànwu we wẹ, kavi a nọ na tuli yé nado tindo pekọ to nuhe yé tindo lẹ mẹ?
Lẹnnupọndo apajlẹ Davidi he na wá lẹzun ahọlu po Jonatani visunnu Ahọlu Sauli tọn po tọn ji. Davidi ko to gbẹnọ taidi mẹhe họ̀njẹgbé to danfafa ji. Ahọlu Sauli to budina Davidi bo jlo na hù i. Dile etlẹ yindọ Jonatani wẹ dona ko lẹzun ahọlu bọdo otọ́ etọn go, e lẹzun dopo to họntọn vivẹ́ Davidi tọn lẹ mẹ. Jonatani yọnẹn dọ Jiwheyẹwhe ko de Davidi nado lẹzun ahọlu bọdo otọ́ emitọn go, podọ e tindo pekọ nado nọgodona họntọn etọn.—1 Samuẹli 19:1, 2; 20:30-33; 23:14-18.
Hiẹ tindo nuhudo họntọn mọnkọtọn lẹ tọn, yèdọ mẹhe nọ tẹnpọn nado yin pekọnọ bo jlo dagbe towe lẹ. (Howhinwhẹn lẹ 17:17) Na nugbo tọn, eyin a jlo na tindo họntọn mọnkọtọn lẹ, hiẹ lọsu dona nọ do jẹhẹnu dopolọ lẹ hia.—Filippinu lẹ 2:3, 4.
[Yẹdide to weda 7]
Be họntọn towe lẹ nọ yidogọna pekọnọ-yinyin towe ya kavi yé nọ dekanpona ẹn?