Aṣli de He A Sọgan Dọna Mẹdevo Lẹ

BE MẸDE ko dọ aṣli de na we pọ́n ya?—a N’do aṣli de he n’jlo na dọna we. To Biblu mẹ, e yin yiylọdọ “aṣli wiwe he ko yin whiwhla na ojlẹ dindẹn.” (Lomunu lẹ 16:25) Jiwheyẹwhe kẹdẹ wẹ yọ́n “aṣli wiwe” lọ jẹnukọn. Gbọ mí ni pọ́n lehe Jiwheyẹwhe hẹn aṣli ehe zun yinyọnẹn na mẹsusu do.

Tintan whẹ́, be a yọ́n nuhe hogbe lọ “wiwe” zẹẹmẹdo ya?— E zẹẹmẹdo nuhe wé ṣeke kavi nuhe gbọnvo taun. Enẹ wẹ zọ́n bọ aṣli lọ do nọ yin yiylọdọ aṣli wiwe, na Jiwheyẹwhe he yin wiwe dè wẹ e wá sọn wutu. Mẹnu lẹ wẹ a lẹndọ yé jlo na yọ́n aṣli vonọtaun ehe?— Angẹli lẹ wẹ. Biblu dọmọ: “Onú ehelẹ taun mẹ wẹ angẹli lẹ to jijlo nado zín nukun do.” Mọwẹ, yé jlo na mọnukunnujẹ aṣli wiwe ehe mẹ.—1 Pita 1:12.

To whenuena Jesu wá aigba ji, e dọho gando aṣli wiwe lọ go bo jẹ zẹẹmẹ etọn basi ji. E dọna devi etọn lẹ dọmọ: “Mìwlẹ wẹ aṣli wiwe ahọluduta Jiwheyẹwhe tọn ko yin nina.” (Malku 4:11) Be a yọ́n nuhe aṣli wiwe lọ to alọdlẹndo ya?— Ahọluduta Jiwheyẹwhe tọn he Jesu plọn mí nado nọ hodẹ̀ na lọ wẹ!—Matiu 6:9, 10.

Todin gbọ mí ni pọ́n nuhewutu Ahọluduta Jiwheyẹwhe tọn do yin aṣli “na ojlẹ dindẹn” kakajẹ whenue Jesu wá aigba ji bo jẹ zẹẹmẹ etọn basi ji. To whenue Adam po Evi po ko gbàsẹ́n Jiwheyẹwhe tọn bo ko yin yinyan sọn jipa Edẹni tọn mẹ godo wẹ devizọnwatọ Jiwheyẹwhe tọn lẹ wá yọnẹn dọ Jiwheyẹwhe na gbẹsọ diọ aigba lọ pete zun paladisi de. (Gẹnẹsisi 1:26-28; 2:8, 9; Isaia 45:18) Yé kanwe gando ayajẹ he gbẹtọ lẹ na duvivi etọn to aigba ji to Ahọluduta Jiwheyẹwhe tọn glọ go.—Psalm 37:11, 29; Isaia 11:6-9; 25:8; 33:24; 65:21-24.

Todin, gbọ mí ni lẹnnupọndo Ahọlu Ahọluduta Jiwheyẹwhe tọn ji. Be a yọ́n mẹhe Jiwheyẹwhe de nado yin Ahọlu Ahọluduta etọn tọn ya?— Visunnu etọn he yin “Ahọvi Jijọho tọn” he yin Jesu Klisti wẹ. ‘Ahọludu nasọ tin to abọ́ etọn ji,’ wẹ Biblu dọ. (Isaia 9:6, 7) Yẹn po hiẹ po dona tindo “oyọnẹn . . . gando aṣli wiwe Jiwheyẹwhe tọn, he yin Klisti go.” (Kọlọsinu lẹ 2:2) Mí dona yọnẹn dọ Jiwheyẹwhe yí ogbẹ̀ angẹli tintan (Visunnu gbigbọmẹ tọn) he e dá lọ tọn do adọ̀mẹ na Malia. Visunnu enẹ he yin angẹli huhlọnnọ wẹ mẹhe Jiwheyẹwhe dohlan aigba ji nado yí ogbẹ̀ etọn do sanvọ́ do ota mítọn mẹ na mí nido sọgan mọ ogbẹ̀ madopodo.—Matiu 20:28; Johanu 3:16; 17:3.

Ṣigba, gbọnvona dọ Jiwheyẹwhe ko de Jesu nado yin Ahọlu Ahọluduta Etọn tọn, mí gbẹsọ tindo nususu devo lẹ nado yọnẹn gando aṣli ehe go. Apadewhe aṣli wiwe lọ tọn wẹ yindọ mẹdevo lẹ, yèdọ sunnu po yọnnu po, na tin to olọn mẹ hẹ Jesu he yin finfọnsọnku lọ. Yé na dugán hẹ Jesu to olọn mẹ!—Efesunu lẹ 1:8-12.

Gbọ mí ni plọn oyín mẹhe na dugán hẹ Jesu to olọn mẹ delẹ tọn. Jesu dọna apọsteli nugbonọ etọn lẹ dọ emi jei nado yì wleawu otẹn de tọn dai na yé. (Johanu 14:2, 3) Eyin a hia wefọ he bọdego ehelẹ, a na mọ yinkọ sunnu po yọnnu po he na dugán hẹ Jesu to Ahọluduta Otọ́ etọn tọn mẹ delẹ tọn.—Matiu 10:2-4; Malku 15:39-41; Johanu 19:25.

Sọn ojlẹ dindẹn die gbọ́n wẹ omẹ sọha he na dugán hẹ Jesu to olọn mẹ taidi apadewhe Ahọluduta etọn tọn ma yin yinyọnẹn. Ṣigba todin mí yọ́n sọha lọ. Be a yọ́n sọha lọ ya?— Biblu dọ dọ gbẹtọ 144 000 wẹ. Apadewhe aṣli wiwe lọ tọn wẹ ehe lọsu yin.—Osọhia 14:1, 4.

Be a yigbe dọ “aṣli wiwe ahọluduta Jiwheyẹwhe tọn” ehe wẹ aṣli dagbe hugan he mẹdepope sọgan mọnukunnujẹemẹ ya?— Eyin mọ wẹ bo gbọ mí ni tẹnpọn nado plọn nuhe go mí pé lẹpo gandego na mí nido sọgan basi zẹẹmẹ etọn na mẹsusu dile mí penugo do.