Biblu Nọ Diọ Gbẹzan Mẹtọn

ETẸWẸ whàn awhànfuntọ gufọntọ he nọ jajo dai de nado diọ gbẹzan etọn? Naegbọn avùnhotọ akonka de diọ yanwle gbẹ̀mẹ tọn etọn lẹ? Nawẹ todido he otọ́ de tindo gando visunnu etọn go yin ahọsuna gbọn? Hia kandai he bọdego ehelẹ nado mọ gblọndo lọ lẹ.

“Mahopọnna gbẹzan ylankan he n’ko zan dai, n’tindo ayajẹ todin.”—GARRY P. AMBROCIO

OWHE: 47

OTÒ HE MẸ N’WÁ SỌN: PHILIPPINES

OTÀN ṢIE: AWHÀNFUNTỌ GUFỌNTỌ

NUHE N’YIN DAI: N’whẹ́n to tòpẹvi Vintar tọn mẹ. Osó he ji ogbé wú do lẹ, tọ̀sisa he wé lẹ, po jẹhọn fifá po tin to agbàdo he mẹ mí nọ nọ̀. Mahopọnna ninọmẹ whanpẹnọ lẹdo lọ tọn, gbẹninọ vẹawu. Gbẹtọ lẹ nọ fìn kanlin mítọn lẹ bo nọ gbà owhé mítọn nado fìnnú.

To whenuena n’tin to owhe aflanmẹ tọn mẹ, yẹn po họntọn ṣie lẹ po nọ nùahàn po siga po taun, bo nọ fìn akuẹ nado sọgan họ̀ onú ehelẹ. N’tlẹ sọ fìn aṣọ́donu onọ̀-daho ṣie tọn. Ponọ lẹ nọ vẹnudo mi dọ n’yin dopo to pipli gufọntọ he nọ yin Nouvelle armée du peuple (NAP) lẹ mẹ bo nọ saba hò mi badabada. Enẹ wẹ zọ́n bọ n’basi dide nado kọnawudopọ hẹ pipli gufọntọ lọ lẹ tọn. N’nọ osó lẹ gblamẹ hẹ awhànfuntọ NAP tọn lẹ na owhe atọ́n. Gbẹninọ vẹawu to ojlẹ lọ mẹ. Mí nọ to hinhọ̀n na ponọ lẹ to whepoponu. To godo mẹ, agbọ́ pé mi nado to hinhọ̀n whlá gbọn osó lẹ gblamẹ, enẹwutu n’họ̀n yì sù ayimatẹn-gán Ilocos Norte tọn. E yinuwa hẹ mi ganji, bo tlẹ gọalọna mi nado mọ agbasazọ́n dagbe de. Etomọṣo, n’ma jo aṣa ylankan ṣie hoho lẹ do nado nọ gbà owhé lẹ bo nọ vannukundo gbẹtọ lẹ.

LEHE BIBLU DIỌ GBẸZAN ṢIE DO: To azọ́n ṣie mẹ, yọnnu de tin he nọ yin Loida bo yin dopo to Kunnudetọ Jehovah tọn lẹ mẹ. Gbọn ewọ gblamẹ, n’dukosọ hẹ Jovencio bọ e jẹ Biblu plọn hẹ mi ji. Ṣigba e gbẹsọ vẹawuna mi taun nado jo aṣa ṣie hoho lẹ do. Whenue Jovencio to Biblu plọn hẹ mi kẹdẹ wẹ n’ma nọ nù azọ̀, podọ n’gbẹ́ nọ doalọ to nuhe ma sọgbe hẹ osẹ́n lẹ mẹ. To godo mẹ, ponọ lẹ wle mi na n’gbàsẹ́n wutu bọ n’sẹ̀ngàn na osun 11. To ojlẹ enẹ mẹ, n’hodẹ̀ hlan Jehovah bo biọ alọgọ etọn. N’biọ jona to e si bo biọ gbigbọ wiwe etọn nado deanana mi bosọ na mi huhlọn.

To nukọn mẹ, dopo to Kunnudetọ Jehovah tọn lẹ mẹ wá dla mi pọ́n to gànpamẹ bo hẹn Biblu wá na mi. To whenue n’hia ẹ, n’mọdọ lẹblanunọ wẹ Jehovah podọ e tindo owanyi bosọ nọ jo nuṣiwa lẹ do namẹ. N’mọdọ Jehovah ko do lẹblanu hia mi bo na mi dotẹnmẹ nado plọnnu gando ewọ go. N’biọ to e si nado na mi huhlọn nado jo aṣa ylankan ṣie lẹ do. Nuhe n’hia to Howhinwhẹn lẹ 27:11 mẹ yinuwado ji e. N’pọ́n nuhe wefọ enẹ dọ hlan taidi dọ yẹn wẹ Jehovah to hodọna tlọlọ. Wefọ lọ dọmọ: “Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi.”

To whenue n’tọ́n sọn gànmẹ, n’gọjẹ Biblu plọn hẹ Kunnudetọ lẹ ji bo jẹ awukọndopọ hẹ yé ji to opli yetọn lẹ ji bosọ jẹ nunọwhinnusẹ́n Biblu tọn lẹ yí do yizan mẹ ji. To godo mẹ, n’penugo nado jo aṣa ylankan ṣie hoho lẹ do po alọgọ Jehovah tọn po. Enẹgodo, n’klan gbẹzan ṣie do wiwe na Jehovah Jiwheyẹwhe.

ALE HE N’MỌYI LẸ: Mahopọnna gbẹzan ylankan he n’ko zan dai, n’tindo ayajẹ todin. Dile etlẹ yindọ n’peve to walọ ylankan mẹ dai, n’ko lẹzun gbẹtọ yọyọ de todin. (Kọlọsinu lẹ 3:9, 10) To egbehe, n’tindo lẹblanulọkẹyi lọ nado tin to omẹ wiwe Jehovah tọn lẹ mẹ bo nọ gọalọna mẹdevo lẹ nado plọnnu gando Jiwheyẹwhe ganhunupotọ mítọn Jehovah go.

“N’jlo na ze afọ Brésil tọn dai.”—JULIANA APARECIDA SANTANA ESCUDEIRO

OWHE: 31

OTÒ HE MẸ N’WÁ SỌN: BRÉSIL

OTÀN ṢIE: AVÙNHOTỌ AKONKA

NUHE N’YIN DAI: N’whẹ́n to Londrina. Dile etlẹ yindọ suhugan mẹhe nọ nọ̀ finẹ lẹ tọn yin wamọnọ, agbegbe lọ mẹ́n bo yọ́npọ́n. To whenue n’tindo owhe ao, mẹdaho ṣie sunnu na mi tuli nado kọnawudopọ hẹ ẹ to avùnhiho he nọ yin yiylọdọ tae kwon do mẹ, ehe zẹẹmẹdo “alọ po afọ po yiyizan.” E ma jlo otọ́ ṣie dọ ma yì plọn avùnhiho enẹ gba, ṣigba e ma dẹn bọ e gbọ bo johodo.

N’ylọ avùnhiho lọ dọ azọ́n bo duto agbàwhinwhlẹn tae kwon do tọn susu ji to ayimatẹn Parana tọn. To godo mẹ, n’duto agbàwhinwhlẹn susu ji to otò lọ mẹ, podọ to 1993, n’yin dide taidi mẹhe tọ́nta hugan to avùnhotọ tae kwon do tọn lẹ mẹ to Brésil. E jlo mi nado whlẹnagbà to avùnhiho akọjọpli tọn lẹ mẹ. Ṣigba, whẹndo wamọnọ tọn mẹ wẹ n’wá sọn podọ mẹjitọ ṣie lẹ ma do akuẹ he n’nado dohún yì tògodo.

Todido ṣie wẹ yindọ tae kwon do ni tin to agbàwhinwhlẹn Olympique tọn lẹ mẹ, podọ e sọ yinmọ to godo mẹ. N’jlo na ze afọ Brésil tọn dai to Aihundida Agbàwhinwhlẹn Olympique tọn lẹ mẹ, enẹwutu n’wleawu taun bosọ mọ godonọnamẹtọ he gọalọna mi nado whlẹnagbà to France, Vietnam, Corée du sud po Japon po, bosọ tindo mahẹ to agbàwhinwhlẹn Amérique du sud tọn lẹ mẹ. Yanwle ṣie devo wẹ nado tindo mahẹ to agbàwhinwhlẹn he na bẹ otò Amérique tọn lẹ hẹn lẹ mẹ, podọ n’dovivẹnu sọmọ bọ n’yin dide nado yin dopo to omẹ atọ̀n he na whlẹnagbà to nujijọ enẹ tẹnmẹ lẹ mẹ to Saint-Domingue, République dominicaine to 2003.

LEHE BIBLU DIỌ GBẸZAN ṢIE DO: To 2001, yẹn po họntọn ṣie sunnu po dukosọ hẹ Kunnudetọ Jehovah tọn lẹ, podọ yé jẹ Biblu plọn hẹ mí ji. N’ma tindo ojlo sọmọ to bẹjẹeji. Agbọ́ nọ pé mi zẹjlẹgo nado na ayidonugo nuhe plọn mí te lọ podọ n’nọ saba samlọngọ to nupinplọn lọ whenu. Mahopọnna enẹ, nuhe plọn n’te lọ to nuyiwa do ji e, podọ ehe wá họnwun to agbàwhinwhlẹn titengbe ṣie he na bọdego whenu.

Na n’yin dide nado hoavùn to agbàwhinwhlẹn he na bẹ otò Amérique tọn lẹ hẹn lẹ mẹ wutu, ogán tae kwon do tọn lẹ basi tito bọ n’na hoavùn to agbàwhinwhlẹn bẹjẹeji tọn de mẹ. To whenue ojlẹ sọ na mi nado hoavùn, apàpà ma sọ́ mi depope bọ n’ṣite ṣúdúdú to oplò lọ ji. To ajiji mẹ, n’wá flindọ Klistiani ma dona hoavùn hẹ mẹdevo lẹ gba—etlẹ yin to aihundida lanmẹyiya tọn de mẹ! Gbedide Biblu tọn nado “yiwanna kọmẹnu towe di dewe” wá ayiha mẹ na mi. (Matiu 19:19) N’saa lẹkọ sọn oplò lọ ji matin numọtolanmẹ whẹhuhu tọn depope. Gbẹtọ lẹ to pinpọn mi suu.

To whenue n’lẹkọwa whégbè, n’sinai bo lẹnnupọndo nuhe n’na yí gbẹzan ṣie do wà ji. N’ze alọnuwe de he dọhodo nuhe Jiwheyẹwhe biọ to mí si ji, ehe Kunnudetọ lẹ zinjẹgbonu. To alọnuwe lọ mẹ, n’mọ Psalm 11:5 he dọ gando Jehovah go dọmọ: ‘Mẹhe yiwanna danuwiwa ayiha etọn gbẹwanna ẹn.’ Hogbe psalm-kantọ lọ tọn ehelẹ yinuwado ji e taun, podọ n’de nado doalọtena tae kwon do.

Ogán tae kwon do tọn ṣie lẹ gblehomẹ. Yé tẹnpọn nado diọlinlẹnna mi dọ yẹn wẹ yin avùnhotọ dagbe hugan to otò lọ mẹ, podọ n’pegan na Aihundida Agbàwhinwhlẹn Olympique tọn lẹ. Ṣigba, n’ko basi nudide ṣie.

To ojlẹ enẹ mẹ, yẹn po asu mọdo-aliji ṣie po ko wlealọ. E ko to awukọndopọ hẹ Kunnudetọ lẹ to azọ́n yẹwhehodidọ gbangba tọn mẹ. E nọ gọwá whégbè po ayajẹ po bo nọ basi zẹẹmẹ hodọdopọ he ewọ tindo hẹ gbẹtọ lẹ tọn na mi. N’yọnẹn dọ eyin yẹnlọsu jlo na tindo mahẹ to azọ́n enẹ mẹ, n’dona basi diọdo lẹ to gbẹzan ṣie mẹ. N’tọ́n sọn sinsẹ̀n ṣie dai tọn mẹ, podọ to godo mẹ, n’pegan nado lẹzun Kunnudetọ he yí baptẹm de.

ALE HE N’MỌYI LẸ: Yẹn po asu ṣie po tindo ayajẹ po kanṣiṣa pẹkipẹki de po na mí nọ dovivẹnu nado yí nunọwhinnusẹ́n Biblu tọn lẹ do yizan mẹ to whẹndo mítọn mẹ wutu. Homẹ nọ hùn mi nado nọgodona ẹn dile e to alọgọ nado penukundo agun he mí nọ kọnawudopọ hẹ lọ go. N’sọgan ko vánkan nado mọ gànkuẹ sika tọn de yí bo diyin. Ṣigba, n’mọdọ nudepope he aihọn mawadodo tọn ehe nọ zedonukọnnamẹ ma sọgan yin yiyijlẹdo lẹblanulọkẹyi lọ nado sẹ̀n Jehovah Jiwheyẹwhe go.

“Otọ́ ṣie ma gbẹkọ go e pọ́n gbede.”—INGO ZIMMERMANN

OWHE: 44

OTÒ HE MẸ N’WÁ SỌN: ALLEMAGNE

OTÀN ṢIE: N’NỌ ṢỌ́ WEDUTẸN DE

NUHE N’YIN DAI: N’yin jiji to whẹndo he klan to sinsẹ̀n-liho de mẹ to akán-kùntẹn tòpẹvi Gelsenkirchen tọn mẹ. Otọ́ ṣie yin dopo to Kunnudetọ Jehovah tọn lẹ mẹ. Ṣigba onọ̀ ṣie jẹagọdo vivẹnudido otọ́ ṣie tọn lẹ nado plọn yẹn, mẹdaho ṣie sunnu po mẹdaho ṣie yọnnu awe lẹ po whẹ́n to nuyise sinsẹ̀n tọn etọn lẹ mẹ. Gànhiho ao kavi humọ wẹ e do nọ kùn agbànbẹhun to gbèdopo. E nọ saba bẹ azọ́n to ogàn awe kavi ogàn atọ̀n afọnnu tọn mẹ. Etomọṣo, e nọ dovivẹnu vẹkuvẹku nado gọalọna mí na mí nido wleawuna haṣinṣan dagbe de hẹ Jiwheyẹwhe. Mahopọnna enẹ, n’ma yọ́n pinpẹn vivẹnudido etọn lẹ tọn.

To whenue n’tindo owhe 15, agbọ́ wá pé mi do opli sinsẹ̀n tọn he otọ́ ṣie nọ plan mi yì lẹ go, bọ n’fọngu. To owhe dopo godo, n’kọnawudopọ hẹ pipli akotokún-yìntọ lẹ tọn de. To owhe awe he bọdego lẹ mẹ, n’yinuwa to aliho de mẹ he hẹn otọ́ ṣie hanú susu. To whenue n’tindo owhe 18, n’tọ́n sọn whégbè.

Na n’yiwanna aihundida lanmẹyiya tọn lẹ taun wutu, n’nọ yì plọn yé whla ṣidopo to osẹ dopo mẹ—tintan wẹ akotokún-yinyin podọ awetọ n’nọ ze nupinpẹn. Yẹn po họntọn ṣie lẹ po nọ saba yì wedutẹn lẹ to sẹfifo lẹ. To gbèdopo, n’hoavùn hẹ ahisinọ aklọ̀n-dintọ de bo hò e po awubibọ po. Dawe he tindo wedutẹn lọ doayi ehe go bo yí mi do azọ́nmẹ to afọdopolọji taidi mẹhe na nọ ṣọ́ wedutẹn lọ. Azọ́nkuẹ lọ sẹyì nukunkẹ, enẹwutu n’yigbe.

To sẹfifo lẹpo, n’nọ nọte to họngbo wedutẹn lọ tọn nukọn nado de mẹhe sọgan biọ e mẹ po mẹhe ma sọgan wàmọ lẹ po. Diblayi gbẹtọ 1000 wẹ nọ wá wedutẹn lọ, enẹwutu alọnu ṣie nọ ján taun. Avùnhiho gbayipe. Gbẹtọ lẹ nọ yí osò po ogo gbigbà lẹ po do dobuna mi. Delẹ to mẹhe n’ko gbẹna ma nado biọ wedutẹn lọ kavi yàn sọn wedutẹn lọ mẹ lẹ nọ nọtepọn mi to kọho nado yiahọsu. Owhe 20 wẹ n’tindo to whenẹnu bo nọ mọdọ mẹde ma sọgan wà nude na mi. Ṣigba, nado dọ hójọhó, nuwiwa ṣie lẹ nọ zẹ̀pá—enẹ wẹ yindọ n’nọ dú zingidi, kla, tindo ojlo zogbe bosọ nọ sinyẹnta.

LEHE BIBLU DIỌ GBẸZAN ṢIE DO: Otọ́ ṣie ma gbẹkọ go e pọ́n gbede. E basi tito na linlinnamẹwe Atọ̀họ̀-Nuhihọ́ lọ Tọn po Réveillez-vous!a po nido nọ jẹ asi e to fie n’nọ nọ̀. Yé pli do họmẹ na mi bọ n’ma tlẹ nọ hia. Ṣigba to gbèdopo, n’basi dide nado yìnnukun gbọn delẹ mẹ. Hosọ he n’hia dọho gando lehe aihọn tonudidọ, akuẹzinzan po sinsẹ̀n po tọn he tin todin na wá opodo do go, podọ enẹ whàn mi nado ylọ mẹdaho ṣie yọnnu to alokan ji. Kunnudetọ Jehovah tọn wẹ ewọ po asu etọn po yin. Yé dọ dọ eyin n’jlo emi na plọn Biblu hẹ mi, bọ n’yigbe.

Nunọwhinnusẹ́n he yin kinkandai to Galatianu lẹ 6:7 mẹ whàn mi nado basi diọdo lẹ to gbẹzan ṣie mẹ. Na nuhe mẹ n’ko jugbọn lẹ wutu, n’yọnẹn dọ nudepope he n’wà, dọ, kavi de nado basi todin na yinuwado gbẹzan ṣie ji to nukọn mẹ. Nuhe Isaia 1:18 dọ sọ na mi tuli taun. E dọ dọ: “OKLUNỌ dọmọ, Wá dinvie, na mí ni lẹnnu dopọ; eyin ylando mìtọn bia, yé na wé taidi kẹ́nsu, eyin yé divẹẹ taidi alaali, yé na taidi sekanfun.” Wefọ enẹ gọalọna mi sọn bẹjẹeji nupinplọn ṣie tọn ma nado tindo numọtolanmẹ nuvọ́nọ-yinyin tọn kavi dọ n’ma sọgan lẹkọwa Jehovah dè.

To osun ṣidopo gblamẹ, n’basi diọdo ayidego tọn lẹ to gbẹzan ṣie mẹ ṣigba e ma bọawu. N’dona tlọ́n lẹdo gblezọn he mẹ n’te dai bo nọla na hagbẹ ylankan he n’tindo dai lẹ. Enẹwutu, n’jẹ didọna họntọn ṣie lẹ ji dọ n’ko to Biblu plọn podọ n’nọ má nuhe n’to pinplọn lẹ hẹ yé. Hagbẹ ṣie lẹ jẹ hinhọ̀nna mi ji bo nọ ylọ mi dọ yẹwhenọ. Po alọgọ mẹdaho ṣie yọnnu tọn po, n’mọ agbasazọ́n dagbe devo.

N’sọ jẹ opli lẹ yì ji to Plitẹnhọ Ahọluduta tọn mẹ fie mẹdaho ṣie po asu etọn po nọ yì opli te, dile etlẹ yindọ e dẹnsọ kilomẹtlu 30. Plitẹnhọ Ahọluduta tọn de sẹpọ fie n’nọ nọ̀, ṣigba winyan nọ hù mi dọ n’na dukosọ hẹ mẹhe ko yọ́n mi sọn ovu gbọ́n lẹ. Obu sọ nọ di mi nado dọyẹwheho sọn whédegbè jẹ whédegbè to lẹdo he mẹ n’nọ nọ̀. N’nọ mọdọ eyin n’dukosọ hẹ mẹhe n’yàn sọn wedutẹn lọ to agọe de kavi mẹhe n’na amasin adínọ, etẹwẹ n’na wà? Ṣigba, n’plọn nude sọn aihun enẹ dida mẹ he gọalọna mi taun—enẹ wẹ yindọ aihundida lanmẹyiya tọn he vẹawu hugan lẹ wẹ nọ yin nujọnu hugan. Enẹwutu tlolo he n’pegan nado dọyẹwheho, n’tẹnpọn nado nọ wàmọ to gigọ́ mẹ.

N’sọ tindo nuhahun devo he ji n’dona dù te—enẹ wẹ yindọ n’ma yiwanna wehihia kavi nupinplọn. Ṣigba n’yọnẹn dọ eyin n’na hẹn yise ṣie lodo, n’dona do mẹplọnlọ dee go nado nọ plọnnu sisosiso gando nugbo Biblu tọn lẹ go. N’wá mọdọ, kẹdẹdile e yindo na nupinpẹn zize, n’dona dovivẹnu vẹkuvẹku eyin n’na tindo huhlọn dogọ.

ALE HE N’MỌYI LẸ: N’gbẹ́ po to ogbẹ̀! N’gbẹ́ dona nọ họ́ dee taun na madogán ṣie lẹ nikaa yinuwado ji e. Ṣigba todin, n’to vivi gbẹzan whẹndo tọn dagbe de tọn dù hẹ asi ṣie he tindo jẹhẹnu dagbe Klistiani tọn lẹ. N’tindo họntọn nujọnu tọn he go n’sọgan dejido mlẹnmlẹn lẹ to agun mẹ. Owhe atọ́n die wẹ otọ́ ṣie kú, ṣigba whẹpo e do yin matintọ, homẹ etọn hùn dọ visunnu etọn lẹkọ.

[Nudọnamẹ odò tọn]