Kanbiọ lẹ sọn Wehiatọ lẹ Dè

To Gẹnẹsisi 6:3 mẹ, mí hia dọmọ: “Gbigbọ ṣie ma na nọ gbẹtọ mẹ dlí gba, na sẹ́ngbigba yetọn wutu agbasalan wẹ ewọ ga; podọ mọ azán etọn lẹ na yin owhe kantọ̀n.” Be Jehovah hẹn tedidi gbẹzan gbẹtọ lẹ tọn ma nado zẹ̀ owhe 120 go wẹ ya, podọ be owhe enẹ wẹ Noa yí do dọyẹwheho gando Singigọ he ja lọ go ya?

Adà awe kanbiọ lọ tọn lẹ sin gblọndo wẹ lala.

Jẹnukọnna Singigọ lọ, gbẹtọvi susu wẹ nọgbẹ̀ na owhe kanweko lẹ. Owhe 600 wẹ Noa tindo to whenue Singigọ lọ wá aimẹ, podọ owhe 950 wẹ e tindo to whenue e kú. (Gẹn. 7:6; 9:29) Mẹhe yin jiji to Singigọ lọ godo delẹ lọsu nọgbẹ̀ hugan owhe 120. Alpakṣadi nọgbẹ̀ na owhe 438 podọ Ṣela na owhe 433. (Gẹn. 11:10-15) Ṣigba, to ojlẹ Mose tọn mẹ, owhe 70 kavi 80 wẹ tedidi gbẹzan gbẹtọ tọn. (Ps. 90:10) Enẹwutu, Gẹnẹsisi 6:3 ma to didohia dọ gbẹtọvi lẹ na nọ nọgbẹ̀ na owhe 120 kavi ma sọgan nọgbẹ̀ zẹ̀ owhe enẹ go gba.

To whelọnu lo, be nuhe wefọ lọ to didohia wẹ yindọ Jiwheyẹwhe to didọna Noa nado na avase mẹdevo lẹ gando vasudo he na wá aimẹ to owhe 120 he to nukọn ja go wẹ ya? Lala. Ojlẹ voovo mẹ wẹ Jiwheyẹwhe dọhona Noa te. Mí hia to wefọ ao he bọdego to kandai lọ mẹ dọmọ: ‘Jiwheyẹwhe sọ dọhlan Noa, dọmọ, Opodo nutogbẹ̀ lẹpo tọn ko wá nukọn ṣie; na aigba gọ́ na danuwiwa.’ To owhe he bọdego lẹ mẹ, Noa dotana azọ́n pligidi aki lọ gbigbá tọn, podọ to ojlẹ enẹ mẹ, ‘OKLUNỌ sọ dọhlan Noa dọmọ, Hiẹ wá biọ aki mẹ po whédo towe lẹpo po.’ (Gẹn. 6:13; 7:1) Podọ Jehovah na nudọnamẹ gigọ́ delẹ Noa to ojlẹ devo lẹ mẹ.—Gẹn. 8:15; 9:1, 8, 17.

Ṣigba, nuhe Gẹnẹsisi 6:3 dọ gbọnvo; e ma dọho gando Noa go, mọjanwẹ e masọ dọ dọ Jiwheyẹwhe to hodọna ẹn do niyẹn. Nuhe wefọ ehe to didohia wẹ yindọ, Jiwheyẹwhe to lẹndai kavi gbemima etọn dọtọ́n. (Yijlẹdo Gẹnẹsisi 8:21 go.) E jẹna ayidego dọ to kandai nujijọ he wá aimẹ to ojlẹ dindẹn jẹnukọnna ojlẹ Adam tọn mẹ, mí nọ mọ hogbe lẹ taidi: “Jiwheyẹwhe sọ dọmọ.” (Gẹn. 1:6, 9, 14, 20, 24) E họnwun dọ Jehovah ma to hodọna gbẹtọ de to aigba ji gba, na gbẹtọ depope ma ko yin didá.

Enẹwutu, e sọgbe hẹ lẹnpọn dagbe nado wá dotana lọ kọ̀n dọ gbemima Jiwheyẹwhe tọn nado hẹn titonu gblezọn he to aigba ji lọ wá opodo hodọ wẹ Gẹnẹsisi 6:3 te. Jehovah lá gbedide whẹdida tọn ehe nado wàmọ to owhe 120 he to nukọn ja mẹ dile etlẹ yindọ Noa ma yọ́n ehe. Ṣigba etẹwutu Jehovah de ojlẹ tangan de? Naegbọn e nado nọte kakajẹ whenẹnu?

Apọsteli Pita basi zẹẹmẹ nuhewutu e do yinmọ tọn dọmọ: “Homẹfa Jiwheyẹwhe tọn to ote to azán Noa tọn lẹ gbè, dile aki lọ to yinyin gbigbá, to ehe mẹ omẹ vude, enẹ wẹ, alindọn ṣinatọ̀n, yin hinhẹn luntọ́n awuyẹyẹ-afọyẹyẹ gbọn osin lọ gblamẹ.” (1 Pita 3:20) Mọwẹ, to whenue Jiwheyẹwhe basi gbemima etọn gando owhe 120 go, onú gbẹ́ pò bo dona yin wiwà. To nudi owhe 20 godo, Noa po asi etọn po jẹ ovi lẹ ji ji. (Gẹn. 5:32; 7:6) Visunnu yetọn atọ̀n lẹ whẹ́n bo wlealọ, podọ sọha whẹndo lọ tọn jideji yì “alindọn ṣinatọ̀n.” Enẹgodo, yé dona gbá aki lọ, yèdọ azọ́n he na yí whenu susu, na aki lọ klo taun ṣigba whẹndo Noa tọn ma klo. Mọwẹ, homẹfa he Jiwheyẹwhe dohia na owhe 120 zọ́n bọ onú ehelẹ do yin wiwà bo hẹn ẹn yọnbasi nado whlẹn ogbẹ̀ gán, bọ gbẹtọ nugbonọ ṣinatọ̀n do yin hinhẹn “luntọ́n awuyẹyẹ-afọyẹyẹ gbọn osin lọ gblamẹ.”

Biblu ma donù owhe he mẹ Jehovah dọna Noa dọ Singigọ lọ na wá aimẹ te go gba. To whenuena e yindọ e ko ji visunnu etọn lẹ bọ yé ko whẹ́n bosọ wlealọ, vlavo e gbẹ́ pò owhe 40 kavi 50 whẹpo Singigọ lọ nado bẹjẹeji. Enẹgodo, Jehovah dọna Noa dọmọ: “Opodo nutogbẹ̀ lẹpo tọn ko wá nukọn ṣie.” E yidogọ dọ Noa dona gbá aki daho de bo biọ e mẹ po whẹndo etọn po. (Gẹn. 6:13-18) To owhe susu he pò enẹlẹ gblamẹ, Noa wà nususu hugan apajlẹ dodowiwa tọn zizedai to gbẹzan etọn mẹ. E sẹ̀n taidi “yẹwhehodọtọ dodo tọn” he tindo owẹ̀n avase tọn he họnwun de nado lá—enẹ wẹ gbemima Jiwheyẹwhe tọn nado và gbẹtọ whenẹnu tọn lẹ he ma nọ nọgbẹ̀ sọgbe hẹ nujinọtedo Jiwheyẹwhe tọn lẹ sudo. Nugbo wẹ dọ Noa ma yọ́n owhe he mẹ nujijọ lọ na wá aimẹ te ojlẹ dindẹn jẹnukọn gba, ṣigba e yọnẹn dọ e na wá dandan. Podọ mímẹpo wẹ yọnẹn dọ nujijọ lọ wá aimẹ.—2 Pita 2:5.