Biblu Nọ Diọ Gbẹzan Mẹtọn

NAWẸ yọnnu he nọ sànú to ahànnutẹn de bo nọ zan hogbe agbàagba, nọ nùahàn zẹjlẹgo, bosọ nọ nù amasin adinọ penugo nado diọ gbẹzan etọn gbọn? Etẹwẹ whàn tonudọtọ hoho de he gbẹwanna sinsẹ̀n nado lẹzun lizọnyizọnwatọ sinsẹ̀n tọn de? Avùnnukundiọsọmẹnu tẹlẹ ji wẹ ponọ avùnhiho plọnmẹtọ Russie tọn de dona dù te nado sọgan lẹzun Kunnudetọ Jehovah tọn? Pọ́n nuhe omẹ ehelẹ dọ.

“Yẹn po onọ̀ ṣie po to vivi haṣinṣan dagbe de tọn dù.”—NATALIE HAM

OWHE HE MẸ N’YIN JIJI: 1965

OTÒ HE MẸ N’WÁ SỌN: AUSTRALIE

OTÀN ṢIE: NỌ ZAN AMASIN ADINỌ

NUHE N’YIN DAI: N’whẹ́n to tòpẹvi Robe tọn he mẹ whèvi nọ yin hùhù te mẹ, to Hùwaji Australie tọn. To ofi mọnkọtọn lẹ, hotẹli he tin to lẹdo lọ mẹ wẹ gbẹtọ lẹ nọ deayidai te. Mẹjitọ lẹ nọ yí suhugan whenu yetọn tọn zan to hotẹli lọ, enẹwutu ovi lẹ nọ yin pinplọn whẹ́n to fie ahàn sinsinyẹn ṣiṣizan, hogbe gbigble, po siga nùnù po gbayipe te.

To whenue n’tindo owhe 12, n’jẹ siga nù ji, bo nọ zan hogbe agbàagba lẹ, bosọ nọ tindo gbemanọpọ hẹ onọ̀ ṣie to whepoponu. Whenue n’tindo owhe 15 mẹjitọ ṣie lẹ klan bọ to osun 18 godo, n’tọ́n sọn whégbè. N’nọ ṣì ahàn sinsinyẹn zan, nọ tẹ́n amasin adinọ lẹ pọ́n, bo nọ zan gbẹzan gblewa tọn. N’nọ gblehomẹ bo nọ jẹflumẹ. Ṣigba, na n’ko plọn avùnhiho po lehe yọnnu lẹ sọgan yiavùnlọna yede do po na owhe atọ́n wutu, n’lẹndọ n’sọgan nọ dee si. Etomọṣo, to whenuena n’to whii bo to nulẹnpọn, n’nọ gọ́ na awubla bosọ nọ hodẹ̀ hlan Jiwheyẹwhe dọ ni gọalọna mi. Ṣigba n’nọ dọna ẹn dọ, “Ma saa biọ dọ ma yì ṣọṣi blo.”

To ojlẹ de godo, họntọn ṣie de he yiwanna sinsẹ̀n bo ma ka tin to sinsẹ̀n tangan de mẹ na mi Biblu. Ṣigba, taidi họntọn mítọn devo lẹ, ewọ lọsu nọ nù amasin adinọ lẹ. Ṣogan, e sọalọakọ́n dọ emi tindo yise ahundopo tọn to Jiwheyẹwhe mẹ bo diọlinlẹn na mi dọ n’dona yí baptẹm. E plan mi yì tándo lẹdo lọ tọn de mẹ bo basi baptẹm na mi. Bẹsọn ojlẹ enẹ mẹ, n’mọdọ n’tindo haṣinṣan vonọtaun de hẹ Jiwheyẹwhe. Ṣigba, n’ma nọ mọ whenu nado hia Biblu lọ gbede.

LEHE BIBLU DIỌ GBẸZAN ṢIE DO: To 1988, Kunnudetọ awe húhúhọ̀n na mi. Dopo to yé mẹ kanse mi dọ, “Be a yọ́n yinkọ Jiwheyẹwhe tọn ya?” Kunnudetọ lọ hia Psalm 83:18 sọn Biblu etọn mẹ, ehe dọmọ: “Na yé nido yọnẹn dọ, hiẹ, oyín mẹhe tọn dopo kẹdẹ nọ yin Jehovah, wẹ Gigogán to wẹkẹ lẹpo ji.” E paṣa mi taun! To whenue yé yì godo, n’kùnhún na kilomẹtlu 56 yì ṣọfu he mẹ owe Klistiani tọn lẹ nọ yin sisà te de mẹ nado pọ́n yinkọ lọ to lẹdogbedevomẹ Biblu tọn devo lẹ po wezẹhomẹ de po mẹ. Todin he n’kudeji dọ Jehovah wẹ oyín Jiwheyẹwhe tọn, n’mọdọ nususu gbẹ́ pò na mi nado plọn.

Onọ̀ ṣie ko dọna mi dọ gbẹtọ badabada wẹ Kunnudetọ Jehovah tọn lẹ yin. Onú vude he n’yọnẹn gando yé go wẹ yindọ yé yin hẹngogonọ bo ma yọ́n gbẹdu. N’lẹn nado họnbẹ eyin yé lẹkọwa. Ṣigba n’diọ linlẹn to whenue yé wá. N’yí yé bọ mí jẹ Biblu plọn ji to afọdopolọji.

To oplọn dopodopo godo, n’nọ má nuhe n’plọn hẹ họntọn sunnu ṣie, he nọ yin Craig. To gbèdopo, e gblehomẹ sọmọ bọ e gbì owe he plọn mí te lọ sọn asi e bo jẹ hihia ẹ ji. To osẹ atọ̀n gblamẹ, e wá tadona lọ kọ̀n dọ emi ko mọ nugbo lọ gando Jiwheyẹwhe go. To godo mẹ, yẹn po Craig po doalọtena amasin adinọ nùnù po ahàn sinsinyẹn ṣiṣizan po, podọ n’jo nusisà to ahànnutẹn lọ do. Nado hẹn gbẹninọ mítọn sọgbe hẹ nujinọtedo Biblu tọn lẹ, mí de nado wlealọ.

ALE HE N’MỌYI LẸ: Yẹn po Craig po ko dibla klan whẹpo do jẹ Biblu plọn hẹ Kunnudetọ Jehovah tọn lẹ ji. To egbehe, Craig yin asu dagbe de, podọ mí tindo ovi whanpẹnọ awe. Mí ko sọ jihọntọn vivẹ́ he tindo nuyise dopolọ hẹ mí lẹ.

Jẹnukọn whẹ́, onọ̀ ṣie gblehomẹ to whenue e sè dọ n’jẹ gbẹdo hẹ Kunnudetọ Jehovah tọn lẹ ji. Ṣigba, nuhe zọ́n lọ wẹ yindọ nukunnumọjẹnumẹ agọ̀ wẹ e tindo gando Kunnudetọ lẹ go. Todin, yẹn po onọ̀ ṣie po to vivi haṣinṣan dagbe de tọn dù. N’masọ nọ tindo numọtolanmẹ nuvọ́nọ-yinyin tọn ba. Kakatimọ, gbẹzan ṣie tindo zẹẹmẹ po lẹndai po, podọ n’mọdọ n’nọ mọ pekọna nuhudo gbigbọmẹ tọn ṣie lẹ.—Matiu 5:3.

“N’Plọn Nususu to Biblu mẹ He Paṣa Mi.”—ISAKALA PAENIU

OWHE HE MẸ N’YIN JIJI: 1939

OTÒ HE MẸ N’WÁ SỌN: TUVALU

OTÀN ṢIE: TONUDỌTỌ

NUHE N’YIN DAI: N’yin jiji to Nukulaelae, yèdọ lopo whanpẹnọ Pacifique tọn de he yin apadewhe Tuvalu tọn todin. Sinsẹ̀ngán he mọ nuplọnmẹ yí to wehọmẹ daho Samoa tọn de mẹ lẹ wẹ nọ paṣẹna mẹhe nọ nọ̀ lopo ehelẹ ji. Azọngban mẹhe nọ nọ̀ lopo lọ ji lẹ tọn wẹ nado nọ na núdùdù sinsẹ̀ngán lọ lẹ po whẹndo yetọn lẹ po egbesọegbesọ, nado wleawu adọtẹn tọn na yé, podọ do glido, nado na yé nudagbe hugan lẹpo. Eyin tòmẹnu lọ lẹ ma tlẹ tindo núdùdù he na pé whẹndo yetọn, yé to dandannu glọ nado hẹn pekọ wá na sinsẹ̀ngán lọ lẹ.

Sinsẹ̀ngán he nọ nọ̀ lopo mítọn ji lọ wẹ nọ deanana wehọmẹ gbétatò lọ tọn, bo nọ plọnnumẹ do sinsẹ̀n, nulinlẹn, po ninọmẹ lẹdo aigba tọn po ji. N’flindọ sinsẹ̀ngán lọ nọ hò wehọmẹvi lẹ po kanyinylan po sọmọ bọ ohùn nọ gọ́ agbasa na yé. Ṣigba, mẹdepope ma sọgan kẹnù, etlẹ yin mẹjitọ lẹ. Yé nọ gbògbéna sinsẹ̀ngán lọ taidi Jiwheyẹwhe nkọ.

To whenue n’tindo owhe ao, n’tọ́n sọn whégbè bo yì wehọmẹ ahọlu tọn dopo gee he tin to lẹdo lọ mẹ to lopo devo ji. To whenue n’yí gbedewema godo, n’biọ ahọluzọ́n mẹ. To ojlẹ enẹ mẹ, lopo lọ lẹ yin apadewhe lẹdo he tin to aṣẹpipa Grande-Bretagne tọn glọ tọn bo nọ yin yiylọdọ Lopo Gilbert po Ellice po. Azọ́nwatẹn voovo lẹ mẹ wẹ n’wazọ́n te whẹpo do wá lẹzun mẹhe nọ deanana zinjẹgbonu linlinwe ahọlu tọn he nọ tọ́n to sẹmẹsẹmẹ. Nulẹpo to yìyì ganji kakajẹ whenue n’zín wekanhlanmẹ wehiatọ de tọn tọ́n he mọhodọdo akuẹ he yè to zinzan nado wleawuna wiwá Ahọvi Galles tọn go. Mẹhe kàn owe lọ ma yí yinkọ etọn titi zan, podọ ogán ṣie biọ nado yọ́n yinkọ mẹlọ tọn. N’gbẹ́ dọ n’ma na dọna ẹn, podọ nudindọn ehe wá yin yinyọnẹn gbayipe.

Ojlẹ vude to nujijọ enẹ godo, n’jo ahọluzọ́n lọ do bo biọ tonudidọ mẹ. N’duto vòbibla he yin bibasi to Nukulaelae ji bo yin pipà taidi Agbagogán he nọ penukundo Ajọwiwa po Adọkunnu Jọwamọ tọn lẹ po go. To godo mẹ, to whenue mẹhe nọ nọ̀ lopo Kiribati (Gilbert dai tọn) po Tuvalu (Ellice dai tọn) po ji lẹ jlo na jẹ yedekannu sọn Grande-Bretagne glọ, ayimatẹn-gán lọ biọ to asi e nado paṣẹ do Tuvalu ji. Ṣigba, n’ma jlo dọ mẹdevo lẹ ni mọdọ n’tindo kanṣiṣa hẹ gandudu Grande-Bretagne tọn. Enẹwutu, n’gbẹ́ nuzedonukọnnamẹ lọ podọ matin godonọnamẹ yetọn, n’ze yinkọ dai na vòbibla ogántẹn daho pete tonudidọ tọn. Ṣigba, e ma pà mi. To enẹgodo, yẹn po asi ṣie po lẹkọyi lopo mítọn ji bo basi dide nado zan gbẹzan paa gbétatò tọn.

LEHE BIBLU DIỌ GBẸZAN ṢIE DO: To lopo lọ lẹ ji, Gbọjẹzan wẹ dimanche yin podọ mẹlẹpo wẹ nọ pọ́n ẹn hlan taidi azán wiwe de ṣigba yẹn ma nọ wàmọ. Azán enẹ gbè wẹ n’nọ yì tọji bo nọ hù whèvi te. N’ma jlo na yin yinyọnẹn taidi sinsẹ̀nnọ de. Otọ́ ṣie dọ lehe nuyiwa ṣie nọ hẹn emi po mẹdevo lẹ po jẹflumẹ do na mi. Ṣigba, n’magbe ma nado tin to nuyiwadomẹji ṣọṣi tọn glọ.

To gbejizọnlin ṣie dopo whenu yì Funafuti—yèdọ lopo he mẹ tatọ́-tònọ Tuvalu tọn tin te—nọvisunnu ṣie basi oylọna mi nado hodo e yì opli Kunnudetọ Jehovah tọn lẹ tọn de tẹnmẹ. To godo mẹ, mẹdehlan Kunnudetọ de bẹ linlinnamẹwe Atọ̀họ̀-Nuhihọ́ lọ Tọn po Réveillez-vous! po susu na mi nado hia. E sọ na mi owe de he dohia dọ nuplọnmẹ he sinsẹ̀n susu he nọ ylọ yede dọ Klistiani lẹ nọ plọnmẹ lẹ tọn wá sọn kosi lẹ dè. Whlasusu wẹ n’hia owe enẹ. N’plọn nususu to Biblu mẹ he paṣa mi, gọna nugbo lọ dọ Klistiani lẹ ma tin to dandannu glọ nado yìn Gbọjẹzan to sẹmẹsẹmẹ.a N’dọ nugbo ehelẹ na asi ṣie, bọ e doalọtena ṣọṣi yìyì to afọdopolọji.

Etomọṣo, n’magbe ma nado tindo kanṣiṣa de hẹ sinsẹ̀n. Owhe awe ko dibla juwayi, ṣogan n’ma sọgan wọn nuhe n’plọn lẹ. To godo mẹ, n’kanwehlan mẹdehlan he tin to Funafuti lọ bo dọna ẹn dọ n’ko wleawufo nado diọ. E do tọjihun hadopo bo wá nado gọalọna mi nado plọnnu dogọ do Biblu ji. Otọ́ ṣie gblehomẹ taun to whenue e mọdọ n’jlo na lẹzun dopo to Kunnudetọ Jehovah tọn lẹ mẹ. Ṣigba, n’dọna ẹn dọ Kunnudetọ lẹ ko plọn mi nususu sọn Biblu mẹ sọmọ bọ n’ko basi nudide ṣie.

ALE HE N’MỌYI LẸ: To 1986, n’yí baptẹm taidi dopo to Kunnudetọ Jehovah tọn lẹ mẹ, podọ asi ṣie lọsu yí baptẹm to owhe dopo godo. Viyọnnu mítọn awe lẹ lọsu plọn Biblu bo basi dide nado lẹzun Kunnudetọ Jehovah tọn.

Todin homẹ ṣie hùn nado yin dopo to hagbẹ sinsẹ̀n de tọn mẹ he, taidi Klistiani owhe kanweko tintan tọn lẹ, ma tindo sinsẹ̀ngán lẹ dovo na omẹ paa lẹ. (Matiu 23:8-12) Yé sọ nọ hodo apajlẹ Jesu tọn po whiwhẹ po bo nọ dọyẹwheho na mẹdevo lẹ gando gandudu Ahọluduta Jiwheyẹwhe tọn go. (Matiu 4:17) Lehe n’dopẹna Jehovah Jiwheyẹwhe do sọ, na e na mi dotẹnmẹ nado plọn nugbo lọ gando ewọ po omẹ etọn lẹ po go!

“Kunnudetọ lẹ Ma Dọ Nuhe N’Dona Yise lẹ Na Mi Poun.”—ALEXANDER SOSKOV

OWHE HE MẸ N’YIN JIJI: 1971

OTÒ HE MẸ N’WÁ SỌN: RUSSIE

OTÀN ṢIE: PONỌ AVÙNHIHO PLỌNMẸTỌ

NUHE N’YIN DAI: N’yin jiji to Moscou he yin tatọ́-tònọ Union soviétique tọn to ojlẹ enẹ mẹ. Whẹndo ṣie nọ nọ̀ owhe daho de gbè, podọ susu kọmẹnu mítọn lẹ tọn nọ wazọ́n to azọ́nwhé dopolọ. N’flindọ yé nọ wule dọ n’nọ wlá gbau bo nọ lẹndọ n’na yawu kú kavi fó do gànpamẹ. Na nugbo tọn, to whenue n’tindo owhe ao poun, n’jẹ nuhahun tindo ji hẹ ponọ lẹ.

To whenue n’tindo owhe 18, n’yin hinhẹn biọ awhànfuntọ lẹ mẹ bo wazọ́n taidi dogbó ṣọ́tọ de. N’lẹkọyi whé to owhe awe godo bo wazọ́n to azọ́nwhé de, ṣigba azọ́n lọ hẹn apọṣi mi. Enẹwutu, n’kọnawudopọ hẹ ponọ Moscou tọn he nọ doalọtena gufọntọ lẹ bo wazọ́n taidi mẹhe nọ plọnmẹ avùnhiho. N’nọ gọalọ nado wle danuwatọ lẹ to Moscou bosọ nọ yì lẹdo voovo he mẹ gbẹtọ lẹ to avùnho te to otò lọ mẹ lẹ. N’nọ to adi ji to whepoponu. Eyin n’lẹkọwa whégbè, n’nọ mlọn olá na asi ṣie to whedelẹnu—na n’nọ dibu dọ n’sọgan gbleawuna ẹn to amlọn mẹ.

LEHE BIBLU DIỌ GBẸZAN ṢIE DO: To whenue n’jẹ Biblu plọn ji hẹ Kunnudetọ Jehovah tọn lẹ, n’mọdọ gbẹzan danuwiwa tọn ṣie ma sọgbe hẹ nujinọtedo Biblu tọn lẹ. N’sọ mọdọ n’dona doalọtena siga nùnù bo de ahàn sinsinyẹn nùnù pò. Ṣigba, n’lẹndọ n’ma sọgan diọ agbasazọ́n ṣie, na n’ma plọn azọ́n devo de he sọgan gọalọna mi nado penukundo whẹndo ṣie go. N’sọ mọdọ n’ma sọgan yì dọyẹwheho gbede, dile Kunnudetọ lẹ nọ wà do.

N’wá kudeji dọ nuhe Biblu dọ lẹ wẹ sọgbe. Podọ n’mọ homẹmiọnnamẹ yí sọn kandai he tin to Ezekiẹli 18:21, 22 mẹ. E dọmọ: “Eyin mẹylankan lẹ́ sọn ylando etọn he e ko wà lẹpo mẹ, bosọ yìn osẹ́ndoai ṣie lẹpo . . . , depope sọn sẹ́nmẹjijẹ etọn lẹ mẹ he e ko wà ma na yin finflin do e go gba.”

Homẹ ṣie hùn dọ Kunnudetọ lẹ ma dọ nuhe n’dona yise lẹ na mi poun, ṣigba yé gọalọna mi nado lẹnnupọndo nuhe n’to pinplọn lẹ ji. N’yí linlinnamẹwe yetọn 40 kavi humọ bo hia yé to osẹ atọ̀n gblamẹ. Nuhe n’plọn lẹ hẹn mi kudeji dọ n’ko mọ sinsẹ̀n nugbo lọ.

ALE HE N’MỌYI LẸ: Whẹpo n’do jẹ Biblu plọn ji, yẹn po asi ṣie po ko jlo na basi gbẹdai. Ṣigba todin, alọwle mítọn ko lodo. Asi ṣie jẹ Biblu plọn ji to ojlẹ dopolọ mẹ hẹ mi bọ mí basi dide nado sẹ̀n Jehovah dopọ. Todin, whẹndo ṣie tindo ayajẹ taun. N’sọ penugo nado mọ azọ́n he ma jẹagọdo nunọwhinnusẹ́n Biblu tọn lẹ.

To whenue n’ṣẹṣẹ bẹ yẹwhehodidọ họndekọn-jẹ-họndekọn tọn jẹeji, adi nọ do mi sinsinyẹn—yèdọ numọtolanmẹ he n’nọ tindo dai to whenue n’jlo na yì wle jaguda lẹ. Todin n’kudeji dọ n’sọgan gbọṣi abọẹ etlẹ yin to whenue mẹde doadihomẹna mi. To ojlẹ lẹ godo, n’wá plọn nado nọ fahomẹ hẹ gbẹtọ lẹ. E vẹna mi dọ n’ko gú whenu ṣie susu, ṣigba todin n’mọdọ gbẹzan ṣie tindo zẹẹmẹ nujọnu tọn. Homẹ nọ hùn mi nado zan huhlọn ṣie lẹpo to sinsẹ̀nzọn Jehovah Jiwheyẹwhe tọn mẹ podọ nado gọalọna mẹdevo lẹ.

[Nudọnamẹ odò tọn]