Dọnsẹpọ Jiwheyẹwhe

“Jiwheyẹwhe Ṣie E, Flin Mi, Na Dagbe”

YỌNNU de he yin Klistiani nugbonọ bo ko diahi hẹ numọtolanmẹ nuvọ́nọ-yinyin tọn dọmọ: “N’lẹndọ Jehovah, he yọ́n mi ganji, ma sọgan yiwanna mi kavi do nukundagbe hia mi gbede.” Be hiẹ ko tindo numọtolanmẹ mọnkọtọn lẹ pọ́n, bo lẹndọ a ma jẹ na Jiwheyẹwhe nido doayi gowe, kavi tlẹ do nukundagbe hia we ya? Eyin mọ wẹ, hogbe he yin kinkandai to Nẹhemia 13:31 mẹ lẹ sọgan na we tuli.

Nẹhemia he yin ayimatẹn-gán Ju lẹ tọn to owhe kanweko atọ́ntọ J.W.M., wà nuhe go e pé lẹpo nado hẹn homẹ Jiwheyẹwhe tọn hùn. E deanana adó Jelusalẹm tọn lẹ vivọ́ do mahopọnna nukundiọsọmẹ kẹntọ lẹ tọn. E hẹn ẹn diun dọ Osẹ́n Jiwheyẹwhe tọn yin tonusena bo penukundo mẹhe yin kọgbidina lẹ go bosọ dín aliho lẹ nado hẹn yise Islaelivi hatọ etọn lẹ tọn lodo. Be Jiwheyẹwhe doayi dagbe he dawe nugbonọ ehe wà lẹ go ya? Be Nẹhemia mọ nukundagbe Jehovah tọn ya? Mí sọgan mọ gblọndo lọ lẹ to hogbe he gbọngodo to owe Nẹhemia tọn mẹ lẹ mẹ.

Nẹhemia hodẹ̀ dọmọ: “Jiwheyẹwhe ṣie E, flin mi, na dagbe.”a Be obu to Nẹhemia di dọ Jiwheyẹwhe ma doayi azọ́n dagbe etọn lẹ go kavi dọ Jiwheyẹwhe na wọn ẹn wẹ ya? Lala. Matin ayihaawe, Nẹhemia yọ́n nuhe Biblu-kantọ he jẹnukọnna ẹn lẹ dọ gando ojlo vẹkuvẹku he Jehovah tindo to sinsẹ̀n-basitọ nugbonọ etọn lẹ po azọ́n dagbe yetọn lẹ po mẹ go. (Eksọdusi 32:32, 33; Psalm 56:8) To whelọnu lo, etẹ biọ wẹ e te dọ Jiwheyẹwhe ni wà? Owe alọdlẹndonu tọn de dohia dọ hogbe Heblu tọn lọ he yin lilẹdogbedevomẹ taidi “flin” zẹẹmẹdo “ojlo sinsinyẹn tintindo na nude po afọdide he nọ zọnpọ hẹ nufinflin po.” Na Nẹhemia tindo yise dolido to huhlọn odẹ̀ tọn mẹ wutu, nuhe biọ e te wẹ yindọ Jiwheyẹwhe ni flin emi po owanyi sisosiso po bo dona emi.—Nẹhemia 2:4.

Be Jehovah na na gblọndo odẹ̀ Nẹhemia tọn dọ ewọ ni flin emi ya? To aliho de mẹ, e ko wàmọ. Nugbo lọ dọ Jehovah hẹn ẹn diun dọ odẹ̀ Nẹhemia tọn gbọṣi aimẹ bo yin apadewhe Owe-wiwe gbọdo lẹ tọn, na mí jide dọ ewọ flin Nẹhemia po owanyi sisosiso po. Ṣigba, “[Ewọ] he nọ sè odẹ̀” na wà nususu dogọ nado na gblọndo obiọ ahundopo tọn Nẹhemia tọn.—Psalm 65:2.

Jiwheyẹwhe na suahọ Nẹhemia na dagbe he e wà do sinsẹ̀n-bibasi wiwe-ṣeke tamẹ lẹpo. (Heblu lẹ 11:6) To whenue aihọn yọyọ dodowiwa tọn he Jehovah dopagbe etọn lọ na wá, ewọ na dona Nẹhemia gbọn finfọn ẹn sọn oṣiọ lẹ mẹ dali.b (2 Pita 3:13; Osọhia 21:3, 4) To whenẹnu, po todido ogbẹ̀ madopodo to paladisi aigba ji tọn mẹ po, Nẹhemia na mọdọ Jehovah ko flin emi nugbonugbo na dagbe emitọn lẹ wutu.

Odẹ̀ Nẹhemia tọn dohia dọ nugbo wẹ ohó Ahọlu Davidi tọn ehe dọmọ: “Na hiẹ, OKLUNỌ E, na dona dodonọ, nukundagbe wẹ hiẹ na yí lẹdo e pé di awọ̀yinu.” (Psalm 5:12) Mọwẹ, Jiwheyẹwhe nọ doayi vivẹnudido ahundopo tọn mítọn nado hẹn homẹ etọn hùn go bosọ nọ yọ́n pinpẹn etọn. Dile e na dẹnsọ bọ hiẹ to nuhe go a pé lẹpo wà nado sẹ̀n ẹn, hiẹ sọgan deji dọ ewọ na flin we po owanyi sisosiso po bo na dona we susugege.

[Nudọnamẹ odò tọn]