Plọnnu sọn Ohó Jiwheyẹwhe Tọn Mẹ

Mẹnu Wẹ Jesu Klisti?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Mẹnu wẹ Jesu Klisti?

Gbọnvona gbẹtọvi devo depope, Jesu ko nọ olọn mẹ taidi nudida gbigbọnọ de whẹpo do wá yin jiji to aigba ji. (Johanu 8:23) Ewọ wẹ nudida tintan Jiwheyẹwhe tọn, podọ e gọalọ nado dá nuhe pò lẹpo. Ewọ kẹdẹ wẹ Jehovah dá tlọlọ, enẹwutu wẹ e yin yiylọdọ Visunnu “detọ́n dopo akàn” Jiwheyẹwhe tọn. Jesu wadevizọn taidi Hoyidọtọ Jiwheyẹwhe tọn, abajọ e do yin yiylọ dọ “Ohó lọ.”—Johanu 1:1-3, 14; hia Howhinwhẹn lẹ 8:22, 23, 30; Kọlọsinu lẹ 1:15, 16.

2. Naegbọn Jesu do wá aigba ji?

Jiwheyẹwhe do Visunnu etọn hlan aigba ji gbọn ogbẹ̀ etọn didiọ sọn olọn mẹ do vidọ̀ yọnnu alọji Juvi de he nọ yin Malia tọn mẹ dali. Enẹwutu, Jesu ma tindo otọ́ gbẹtọvi de gba. (Luku 1:30-35) Jesu wá aigba ji (1) nado plọnmẹ nugbo lọ gando Jiwheyẹwhe go, (2) nado wà ojlo Jiwheyẹwhe tọn bo ze apajlẹ de dai na mí, podọ (3) nado na ogbẹ̀ pipé etọn taidi “ofligọ de.”—Hia Matiu 20:28; Johanu 18:37.

3. Naegbọn mí tindo nuhudo ofligọ de tọn?

Ofligọ yin akuẹ he nọ yin súsú nado tún mẹde dote. Okú po yọnho po ma tin to lẹndai dowhenu Jiwheyẹwhe tọn na gbẹtọvi lẹ mẹ. Nawẹ mí wagbọn do yọ́n enẹ? Jiwheyẹwhe dọna sunnu tintan lọ, Adam, dọ eyin e wà nuhe Biblu ylọ dọ ylando, e na kú. Eyin Adam ma waylando, e ma na ko kú. Dile etlẹ yindọ owhe kanweko susu lẹ godo wẹ ogbẹ̀ Adam tọn wá doalọte, e ko jẹ kúkú ji vudevude sọn gbeegbe e vẹtolina Jiwheyẹwhe. (Gẹnẹsisi 2:16, 17; 5:5) Adam jo ogú ylando po kọdetọn etọn he yin okú po tọn do na kúnkan etọn lẹpo. Gbọnmọ dali, okú “biọ” aihọn gbẹtọvi tọn mẹ gbọn Adam gblamẹ. Nuhewutu mí do tindo nuhudo ofligọ de tọn niyẹn.—Hia Lomunu lẹ 5:12; 6:23.

4. Naegbọn Jesu do kú?

Mẹnu wẹ sọgan sú ofligọ lọ nado tún mí dote sọn okú si? Kọdetọn ylando dopodopo mítọn tọn wẹ kú. Na mí yin mapenọ wutu, mí ma sọgan sú ofligọ lọ na mẹdepope.—Hia Psalm 49:7-9.

Na Jesu ma dugu mape tọn sọn otọ́ gbẹtọvi de dè wutu, ewọ kú na ylando mẹdevo lẹ tọn, e ma yin na etọn titi lẹ wutu gba. Jiwheyẹwhe do Visunnu etọn hlan nado kú do ota mítọn mẹ, ehe yin dohia owanyi vonọtaun Etọn tọn na gbẹtọvi lẹ. Jesu lọsu do owanyi hia mí gbọn tonusisena Otọ́ etọn po ogbẹ̀ etọn yíyí do sanvọ́ na ylando mítọn po dali.—Hia Johanu 3:16; Lomunu lẹ 5:18, 19.

5. Etẹ wà wẹ Jesu te todin?

Gbọn awutunọ lẹ hinhẹn jẹ gángán, oṣiọ lẹ finfọnsọnku gọna ogbẹ̀ etọn zizejo nado whlẹn gbẹtọvi lẹ sọn ylando po okú po si dali, Jesu do nuhe e na wà na gbẹtọvi tonusetọ lẹ to godo mẹ hia. (Luku 18:35-42; Johanu 5:28, 29) To okú Jesu tọn godo, Jiwheyẹwhe gọ̀ ẹ wá ogbẹ̀ taidi nudida gbigbọnọ de. (1 Pita 3:18) Enẹgodo, Jesu nọte to adusilọ Jiwheyẹwhe tọn mẹ kakajẹ whenue Jehovah na ẹn huhlọn nado dugán taidi Ahọlu do aigba lọ blebu ji. (Heblu lẹ 10:12, 13) Todin, Jesu to gandu taidi Ahọlu to olọn mẹ, podọ hodotọ etọn he to aigba ji lẹ to wẹndagbe lọ lá lẹdo aihọn pé.—Hia Daniẹli 7:13, 14; Matiu 24:14.

To madẹnmẹ, Jesu na yí huhlọn etọn zan taidi Ahọlu nado doalọtena yajiji gọna mẹhe nọ hẹn ẹn wá lẹpo. Gbẹtọ livi susu he do yise hia to Jesu mẹ bo setonuna ẹn lẹ na duvivi ogbẹ̀ tọn to paladisi aigba ji tọn de mẹ.—Hia Psalm 37:9-11.

Nado mọ nudọnamẹ dogọ, pọ́n weta 4tọ owe Etẹwẹ Bliblu Plọn Mí Taun tọn, he Kunnudetọ Jehovah tọn lẹ zinjẹgbonu.

[Yẹdide to weda 23]

Gbẹtọ livi susu he do yise hia to Jesu mẹ bo setonuna ẹn lẹ na duvivi ogbẹ̀ tọn to paladisi aigba ji tọn de mẹ