Nupinplọn 3
Mẹnu Wẹ Jesu Klisti?
Naegbọn Jesu do yin yiylọ dọ Visunnu “plọnji” Jiwheyẹwhe tọn? (1)
Naegbọn e yin yiylọ dọ “Ohó lọ”? (1)
Naegbọn Jesu wá aigba ji taidi gbẹtọ de? (2-4)
Naegbọn e wazọ́n jiawu lẹ? (5)
Etẹwẹ Jesu na wà to sọgodo he tin to yakẹ de mẹ? (6)
1. Jesu ko nọ olọn mẹ taidi gbẹtọ gbigbọnọ de whẹpo e do wá aigba ji. Ewọ wẹ nudida Jiwheyẹwhe tọn tintan, enẹwutu e yin yiylọ dọ Visunnu “plọnji” Jiwheyẹwhe tọn. (Kọlọsinu lẹ 1:15; Osọhia 3:14) Jesu wẹ Visunnu dopo kẹdẹ lọ he Jiwheyẹwhe lọsu dá. Jehovah yí Jesu he ko tin whẹpo do sọawuhia di gbẹtọ de zan taidi “azọ́nwatọgan” etọn to didá onú devo lẹpo to olọn mẹ podọ to aigba ji. (Howhinwhẹn lẹ 8:22-31; Kọlọsinu lẹ 1:16, 17) Jiwheyẹwhe sọ yí i zan taidi ogán hoyidọtọ Etọn. Enẹwutu wẹ Jesu do yin yiylọ dọ “Ohó lọ.”—Johanu 1:1-3; Osọhia 19:13.
2. Jiwheyẹwhe do Visunnu Etọn hlan aigba ji gbọn tẹnmẹdiọna ogbẹ̀ etọn wá vidọ Malia tọn mẹ dali. Enẹwutu Jesu ma tindo otọ́ gbẹtọvi tọn de. Enẹwutu wẹ e ma do dugu ylando kavi mape depope tọn. Jiwheyẹwhe do Jesu hlan aigba ji na whẹwhinwhẹn atọ̀n wutu: (1) Nado plọn mí nugbo lọ dogbọn Jiwheyẹwhe dali (Johanu 18:37), (2) nado hẹn tenọgli pipé go, bo wleawu apajlẹ de tọn na mí nado hodo (1 Pita 2:21), podọ (3) nado yí ogbẹ̀ etọn do sanvọ́ nado whlẹn mí sọn ylando po okú po si. Naegbọn nuhudo ehe tọn do tin?—Matiu 20:28.
3. Gbọn tolivivẹ na gbedide Jiwheyẹwhe tọn dali, sunnu tintan lọ, Adam, wà nuhe Biblu ylọ dọ “ylando.” Enẹwutu Jiwheyẹwhe dawhẹ okú tọn na ẹn. (Gẹnẹsisi 3:17-19) E whete do nujinọtedo Jiwheyẹwhe tọn lẹ go, enẹwutu e ma sọ yin mẹpipe ba gba. Vude vude e poyọnho bo kú. Adam na ovi etọn lẹpo ylando. Enẹwutu wẹ míwlẹ lọsu nọ poyọnho, nọ jẹazọ̀n, bo nọ kú. Nawẹ gbẹtọvi lẹ sọgan yin whinwhlẹngan gbọn?—Lomunu lẹ 3:23; 5:12.
4. Jesu yin gbẹtọvi pipé de kẹdẹ di Adam. Nalete, gbọnvona Adam, Jesu yin tonusetọ pipé hlan Jiwheyẹwhe yèdọ to whlepọn he sinyẹn hugan lọ glọ. Enẹwutu e sọgan yí ogbẹ̀ gbẹtọvi pipé etọn tọn do sanvọ́ nado suahọ na ylando Adam tọn. Ehe wẹ nuhe Biblu dlẹnalọdo taidi “ofligọ” lọ. Ovi Adam tọn lẹ sọgan gbọnmọ dali yin whinwhlẹn sọn whẹgbledomẹ okú tọn si. Mẹhe ze yise yetọn do Jesu mẹ lẹpo sọgan mọ jona ylando yetọn tọn yí bo mọ ogbẹ̀ madopodo yí.—1 Timoti 2:5, 6; Johanu 3:16; Lomunu lẹ 5:18, 19.
5. To whenuena e tin to aigba ji Jesu gbọazọ̀nna awutunọ lẹ, na núdùdù mẹhe huvẹ to hùhù lẹ, bo whiwhẹ yujẹhọn lẹ. E tlẹ fọ́n oṣiọ lẹ. Etẹwutu wẹ e do wà azọ́njiawu lẹ? (1) E tindo numọtolanmẹ awubla tọn na mẹhe to yaji lẹ, podọ e jlo nado gọalọna yé. (2) Azọ́njiawu etọn lẹ dohia dọ Visunnu Jiwheyẹwhe Tọn wẹ ewọ yin. (3) Yé do nuhe e na wà na gbẹtọvi tonusetọ lẹ hia to whenuena e na to gandu taidi Ahọlu do aigba ji.—Matiu 14:14; Malku 2:10-12; Johanu 5:28, 29.
6. Jesu kú bosọ yin finfọnsọnku gbọn Jiwheyẹwhe dali taidi nudida gbigbọnọ huhlọnnọ de bo lẹkọyi olọn mẹ. (1 Pita 3:18) Sọn whenẹnu gbọ́n, wẹ Jiwheyẹwhe ko yí i do basi Ahọlu. To madẹnmẹ Jesu na dè ylanwiwa po yajiji lẹpo po sẹ sọn aigba ehe ji.—Psalm 37:9-11; Howhinwhẹn lẹ 2:21, 22.
[Yẹdide lẹ to weda 7]
Lizọnyizọn Jesu tọn bẹ mẹpinplọn, azọ́njiawu wiwà, yèdọ po ogbẹ̀ etọn nina mí po hẹn