Plọnnu sọn Ohó Jiwheyẹwhe Tọn Mẹ

Etẹwẹ Yin Lẹndai Jiwheyẹwhe Tọn Na Aigba?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Etẹwẹ yin lẹndai Jiwheyẹwhe tọn na aigba?

Aigba yin didá na gbẹtọ nido nọ nọ̀ e ji. To whenue Jiwheyẹwhe ko dá angẹli lẹ do olọn mẹ godo, e dá gbẹtọ do aigba ji. (Job 38:4, 7) Gbọnmọ dali, Jehovah ze Adam do paladisi whanpẹnọ de mẹ he nọ yin yiylọdọ Edẹni bo hùn dotẹnmẹ nado duvivi ogbẹ̀ mavọmavọ to aigba ji tọn dotena ewọ po kúnkan etọn po.—Gẹnẹsisi 2:15-17; hia Psalm 115:16.

Ofi kleun de janwẹ jipa Edẹni tọn yin awuwlena do to aigba ji. Adam po Evi po yin gbedena nado jivi lẹ. Yé sọ dona dugán do aigba lọ ji bo hẹn ẹn zun paladisi de dile yé na to susudeji. (Gẹnẹsisi 1:28) Aigba ma na yin vivasudo gbede.—Hia Psalm 104:5.

2. Naegbọn aigba ma do yin paladisi de todin?

Adam po Evi po vẹtolina Jiwheyẹwhe, enẹwutu yé yin yinyan sọn Edẹni mẹ. Paladisi lọ yin hinhẹnbu, podọ mẹdepope ma ko penugo nado vọ́ ẹ jlado. Biblu dọmọ: “Yè jo aigba do alọ mẹylankan tọn mẹ.”—Job 9:24; hia Gẹnẹsisi 3:23, 24.

Ṣigba, Jehovah ma wọnji lẹndai dowhenu tọn etọn go gba. (Isaia 45:18) Jehovah na gọ̀ gbẹtọvi lẹ do ninọmẹ he mẹ e jlo dọ yé ni nọ to dowhenu.—Hia Psalm 37:11.

3. Nawẹ Jiwheyẹwhe na hẹn jijọho gọwá aigba ji gbọn?

Whẹpo gbẹtọvi lẹ nido duvivi jijọho tọn, Jiwheyẹwhe dona và mẹylankan lẹ sudo. Angẹli Jiwheyẹwhe tọn lẹ na và mẹhe diọnukunsọ Jiwheyẹwhe lẹpo sudo to awhàn Amagẹdọni tọn whenu. Satani na yin zizedo gànmẹ na owhe 1000, ṣigba mẹhe yiwanna Jiwheyẹwhe lẹ na luntọ́n nado duvivi aihọn yọyọ de tọn to aigba ji.—Hia Osọhia 16:14, 16; 20:1-3; 21:3, 4.

4. Whetẹnu wẹ yajiji na wá opodo?

To owhe 1000 lọ gblamẹ, Jesu na dugán sọn olọn mẹ do aigba ji bo na hẹn ẹn zun paladisi de. Humọ, e na de ylando mẹhe yiwanna Jiwheyẹwhe lẹ tọn sẹ̀. Mọwẹ, Jesu na de azọ̀n, yọnho po okú po sẹ̀.—Hia Isaia 11:9; 25:8; 33:24; 35:1.

Whetẹnu wẹ Jiwheyẹwhe na de oylan sẹ̀ sọn aigba ji? Jesu donù “ohia” de go he na gọalọna mí nado yọnẹn dọ opodo lọ ko sẹpọ. Ogbẹ̀ gbẹtọ lẹ tọn to owù mẹ na ninọmẹ he mẹ aihọn lọ te to egbehe wutu, podọ enẹ dohia dọ mí to gbẹnọ to “vivọnu titonu lọ tọn.”—Hia Matiu 24:3, 7-14, 21, 22; 2 Timoti 3:1-5.

5. Mẹnu lẹ wẹ na nọgbẹ̀ to Paladisi he ja lọ mẹ?

Jesu deazọ́nna hodotọ etọn lẹ nado hẹn gbẹtọ lẹ zun devi bo plọn yé aliho owanyi tọn Jiwheyẹwhe tọn lẹ. (Matiu 28:19, 20) Jehovah to gbẹtọ livi susu lẹ bẹpli lẹdo aihọn pé nado nọgbẹ̀ to aihọn yọyọ de mẹ to aigba ji. (Zẹfania 2:3) Gbẹtọ lẹ nọ plọn lehe yé sọgan yin asu kavi otọ́ dagbe, asi kavi onọ̀ dagbe de do to Plitẹnhọ Ahọluduta tọn Kunnudetọ Jehovah tọn lẹ tọn mẹ. To pọmẹ, ovi lẹ po mẹjitọ lẹ po nọ plọn nuhewutu mí dona donukun sọgodo dagbe de.—Hia Mika 4:1-4.

To Plitẹnhọ Ahọluduta tọn mẹ, hiẹ na mọ mẹhe yiwanna Jiwheyẹwhe bo jlo na plọn nado nọ hẹn homẹ etọn hùn lẹ.—Hia Heblu lẹ 10:24, 25.

Nado mọ nudọnamẹ dogọ, pọ́n weta 3tọ owe Etẹwẹ Bliblu Plọn Mí Taun tọn, he Kunnudetọ Jehovah tọn lẹ zinjẹgbonu.