Nọ Yí Nukun Nujọnu Tọn Do Pọ́n Sinsẹ̀n-Bibasi Towe Hlan Jehovah
“Mọdona nuhe yin nujọnu hugan lẹ.”—FLP. 1:10.
1, 2. Etẹwẹ hẹn mẹsusu to aihọn ehe mẹ nado tindo pọndohlan agọ̀ gando ogbẹ̀ go, podọ kanbiọ tẹlẹ wẹ ehe fọndote?
DOPO to ojlẹ he gọ́ na nuhahun po awubla po hugan to whenuho gbẹtọvi tọn mẹ lẹ mẹ wẹ mí to gbẹnọ te. E sọgan vẹawuna mẹhe ma tindo haṣinṣan pẹkipẹki hẹ Jehovah lẹ nado doakọnna “ojlẹ awusinyẹn tọn he vẹawu nado pehẹ” ehelẹ. (2 Tim. 3:1-5) Vivẹnudido egbesọegbesọ tọn yetọn lẹ ma nọ tindo kọdetọn dagbe sọmọ. Nado dapana nukun nujọnu tọn yíyí do pọ́n ogbẹ̀ hugan lehe e jẹ do, mẹsusu nọ doafọna ayidedai voovo lẹ nado wọnji nuhahun gbẹ̀mẹ tọn lẹ go.
2 Nado doakọnna ayimajai gbẹ̀mẹ tọn lẹ, gbẹtọ lẹ nọ ze gbẹdudu do otẹn tintan mẹ. Eyin Klistiani lẹ ma tin to aṣeji, yé sọgan jẹ gbẹzan mọnkọtọn zan ji po awubibọ po. Nawẹ mí sọgan dapana enẹ gbọn? Be enẹ zẹẹmẹdo dọ mí ma dona nọ deayidai wẹ ya? Nawẹ mí sọgan hẹn jlẹkajininọ go to gbẹdudu po azọngban mítọn lẹ po ṣẹnṣẹn gbọn? Nunọwhinnusẹ́n Owe-wiwe tọn tẹlẹ wẹ na deanana mí ma nado yin hẹngogonọ dile mí to ayidonugo na nuhe yin nujọnu hugan lẹ?
Mọdona Nuhe Yin Nujọnu Hugan lẹ to Aihọn He Yiwanna Gbẹdudu de Mẹ
3, 4. Nawẹ Owe-wiwe lẹ gọalọna mí nado yọnẹn dọ mí dona mọdona nuhe yin nujọnu hugan lẹ gbọn?
3 E họnwun dọ aihọn ehe nọ pọ́n “wanyina gbẹdudu” hlan di nujọnu hugan. (2 Tim. 3:4) Lehe e nọ zinnudo gbẹdudu ji do sọgan yin owù de na gbigbọnọ-yinyin mítọn. (Howh. 21:17) Abajọ wekanhlanmẹ apọsteli Paulu tọn hlan Lomunu lẹ na tuli mí nado yin vivẹnunọ. Ayinamẹ ehe yíyí-do-yizan mẹ na gọalọna mí ma nado dike pọndohlan agọ̀ aihọn ehe tọn ni yinuwado mí ji.—Hia Lomunu lẹ 12:8.
4 Owhe kanweko lẹ jẹnukọn, Sọlomọni wlanwe gando lehe e yin nuyọnẹnnu dọ mí ni nọ lẹnnupọndo nuhe yin nujọnu to gbẹ̀mẹ lẹ ji kakati nado nọ ze ayidonugo do gbẹdudu ji to whepoponu do go. (Yẹwh. 3:4; 7:2-4) Na nugbo tọn, na ogbẹ̀ mítọn whègli wutu, mí dona “vánkan vẹkuvẹku” nado mọ ogbẹ̀ madopodo. (Luku 13:24) Enẹwutu, mí dona nọ mọdona “nuhe yin nujọnu hugan lẹ” to whepoponu. (Flp. 1:10) Enẹ zẹẹmẹdo dọ mí dona nọ na ayidonugo sọwhiwhe tọn adà gbẹzan Klistiani tọn mítọn lẹpo.
5. Adà gbẹzan tọn tẹwẹ mí dona yí nukun nujọnu tọn do pọ́n?
5 To apajlẹ Jehovah po Jesu po tọn hihodo mẹ, Klistiani lẹ nọ ylọ azọngban yetọn nado nọ wazọ́n sinsinyẹn dọ nujọnu. (Joh. 5:17) Taidi kọdetọn de, gbẹtọ lẹ nọ saba pà Klistiani nugbo lẹ na yé nọ wazọ́n sinsinyẹn bọ yè sọgan dejido yé go. Na taun tọn, nado wazọ́n sinsinyẹn bo penukundo whẹndo yetọn go nọ duahunmẹ tatọ́ whẹndo tọn lẹ. Humọ, mẹhe ma wleawudaina nuhudo agbasa tọn whédo etọn tọn ‘mọ́n Jehovah’!—1 Tim. 5:8.
Sinsẹ̀n-Bibasi Mítọn Yiylọ Dọ Nujọnu Ma Nọ Glọnalina Ayajẹ
6. Nawẹ mí wagbọn do yọnẹn dọ mí dona nọ ylọ sinsẹ̀n-bibasi mítọn hlan Jehovah dọ nujọnu?
6 Jehovah ma nọ yí nukunpẹvi do pọ́n sinsẹ̀n-bibasi nugbo. Di apajlẹ, to Osẹ́n Mose tọn glọ, Islaelivi lẹ jiya sinsinyẹn to whenue yé doalọtena sinsẹ̀n-bibasi hlan Jehovah. (Jọṣ. 23:12, 13) To owhe kanweko tintan W.M., hodotọ Klisti tọn lẹ dona dovivẹnu vẹkuvẹku ma nado dike nuplọnmẹ po pọndohlan agọ̀ lẹ po ni hẹn sinsẹ̀n-bibasi nugbo flu. (2 Joh. 7-11; Osọ. 2:14-16) To egbehe, Klistiani nugbo lẹ zindonukọn nado nọ ylọ sinsẹ̀n-bibasi yetọn dọ nujọnu.—1 Tim. 6:20.
7. Nawẹ Paulu nọ wleawudaina lizọnyizọn etọn gbọn?
7 Asisa ayajẹ tọn de wẹ lizọnyizọn mítọn yin. Ṣigba, nado hẹn ayajẹ go to lizọnyizọn lọ mẹ, mí dona nọ yí sọwhiwhe do lẹnnupọndeji bosọ nọ wleawudai. Paulu basi zẹẹmẹ lehe e nọ hò mẹhe e nọ plọnnu hẹ lẹ tọn pọ́n do tọn. E wlan dọmọ: “Yẹn ko lẹzun onú lẹpo na gbẹtọ wunmẹ lẹpo, na yẹn nido gbọn aliho lẹpo mẹ whlẹn mẹdelẹ gán. Ṣigba, yẹn wà onú lẹpo na wẹndagbe lọ tọn wutu, na yẹn nido má ẹn hẹ mẹdevo lẹ.” (1 Kọl. 9:22, 23) Paulu nọ mọ ayajẹ to alọgigọna mẹdevo lẹ to gbigbọ-liho mẹ, podọ e sọ nọ yí sọwhiwhe do lẹnnupọndo lehe e sọgan hẹn pekọ wá na nuhudo tangan todoaitọ etọn lẹ tọn do ji. Enẹwutu, e penugo nado na tuli yé bo whàn yé nado sẹ̀n Jehovah.
8. (a) Etẹwẹ dona yin pọndohlan mítọn gando mẹhe mí nọ plọnnu hẹ to lizọnyizọn lọ mẹ lẹ go? (b) Nawẹ anadidena plọnmẹ Biblu de sọgan yidogọna ayajẹ to lizọnyizọn lọ mẹ gbọn?
8 Obá tẹ mẹ wẹ lizọnyizọn lọ yin nujọnu na Paulu jẹ? E wleawufo nado yí ede do basi “afanumẹ” na Jehovah podọ na mẹhe na dotoaina owẹ̀n nugbo lọ tọn lẹ. (Lom. 12:11; 1 Kọl. 9:19) To whenue mí kẹalọyi azọngban lọ nado plọn Ohó Jiwheyẹwhe tọn gbẹtọ lẹ—vlavo to plọnmẹ Biblu de whenu, to opli Klistiani tọn de whenu, kavi to Sinsẹ̀n-Bibasi Whẹndo tọn whenu—be mí nọ yí nukun nujọnu tọn do pọ́n azọngban he mí dona hẹndi do mẹhe mí nọ plọnnu lẹ tamẹ ya? Vlavo mí sọgan tindo numọtolanmẹ dọ agbàn pinpẹn wẹ e yin nado kẹalọyi anadidena plọnmẹ Biblu gbesisọ tọn de. Nugbo wẹ dọ, e nọ biọ dọ mí ni de whenu dovo sọn dehe mí nọ yizan na yanwle mẹdetiti tọn mítọn lẹ mẹ bo nọ yí whenu enẹ zan nado gọalọna mẹdevo lẹ. Ṣigba, be enẹ ma tin to kọndopọ mẹ hẹ hogbe Jesu tọn lẹ dọ “ayajẹ sù to nunamẹ mẹ hú to mimọyi mẹ” ya? (Owalọ 20:35) Mahẹ mẹdetiti tọn tintindo to aliho whlẹngán tọn pinplọn mẹdevo lẹ mẹ, na hẹn ayajẹ wá na mí hugan nuwiwa devo depope.
9, 10. (a) Be nukun nujọnu tọn yíyí do pọnnu zẹẹmẹdo dọ mí ma sọgan nọ deayidai bo jaya hẹ mẹdevo lẹ wẹ ya? Basi zẹẹmẹ. (b) Etẹwẹ na gọalọna mẹho agun tọn de nado yin asisa tulinamẹ tọn bo yọ́n dọnsẹpọ?
9 Nukun nujọnu tọn yíyí do pọnnu ma zẹẹmẹdo dọ mí ma sọgan nọ deayidai bo jaya hẹ mẹdevo lẹ gba. Jesu ze apajlẹ dagbe dai na mí, na e ma nọ yí whenu etọn lẹpo do plọnnumẹ, ṣigba e sọ nọ deayidai bo nọ wleawuna haṣinṣan dagbe hẹ mẹdevo lẹ. (Luku 5:27-29; Joh. 12:1, 2) Nukun nujọnu tọn yíyí do pọnnu masọ zẹẹmẹdo dọ mí dona nọ sọawuhia taidi hùnylantọ to whelẹponu gba. Eyin Jesu ma yin họntọnjihẹmẹtọ wẹ, ayihaawe ma tin dọ e na vẹawuna gbẹtọ lẹ nado dọnsẹpọ ẹ. Yọpọvu lẹ tlẹ nọ voawu to apá etọn. (Malku 10:13-16) Nawẹ mí sọgan hodo apajlẹ jlẹkajininọ Jesu tọn gbọn?
10 Mẹmẹsunnu de dọ gando mẹho agun tọn de go dọmọ, “E nọ donukun nususu sọn ede si, ṣigba e ma nọ donukun dọ mẹdevo lẹ ni yin mẹpipe.” Be yè sọgan dọ nudopolọ gando hiẹ lọsu go ya? E ma ylan nado nọ donukun nuhe sọgbe hẹ lẹnpọn dagbe delẹ sọn mẹdevo lẹ si. Di apajlẹ, ovi lẹ nọ yinuwa to aliho dagbe mẹ to whenue mẹjitọ lẹ ze yanwle lẹnpọn dagbe tọn lẹ dai na yé bo gọalọna yé nado jẹ yé kọ̀n. Mọdopolọ, mẹho lẹ sọgan nọ na tuli hagbẹ agun lọ tọn lẹ nado whẹ́n to gbigbọ-liho bo nọ na yé ayinamẹ tangan lẹ do lehe yé na wàmọ do ji. Humọ, eyin mẹho agun tọn de tindo pọndohlan jlẹkaji tọn gando ede go, e na yin asisa tulinamẹ tọn de bo na yọ́n dọnsẹpọ. (Lom. 12:3) Mẹmẹyọnnu de dọmọ: “N’ma nọ jlo dọ mẹho de ni nọ yí nulẹpo do yìn aslan gba. Ṣigba, eyin e sọ nọ hẹnnu sinsinyẹn to whelẹponu, e nọ vẹawu nado dọnsẹpọ ẹ.” Mẹmẹyọnnu devo dọ dọ emi doayi e go dọ mẹho delẹ “ma nọ yọ́n dọnsẹpọ na yé yin hẹngogonọ wutu.” Mẹho lẹ ma na jlo gbede nado dekanpona ayajẹ he yisenọ lẹpo dona tindo gando sinsẹ̀n-bibasi yetọn hlan Jehovah, yèdọ “Jiwheyẹwhe ayajẹnọ lọ” go.—1 Tim. 1:11.
Nọ Kẹalọyi Azọngban to Agun Mẹ
11. Etẹwẹ e zẹẹmẹdo nado “to vivẹnudo” to agun mẹ?
11 To whenuena Paulu na tuli sunnu he to agun lọ mẹ lẹ nado dovivẹnu bo pegan na azọngban devo lẹ, e ma tindo linlẹn nado na tuli mẹdepope nado hẹn pekọ wá na ojlo mẹdetiti tọn etọn gba. Kakatimọ, e wlan dọmọ: “Eyin mẹde to vivẹnudo na azọ́ntẹn nugopọntọ tọn, azọ́n dagbe de wẹ ewọ jlo.” (1 Tim. 3:1, 4) Nado “to vivẹnudo” nọ biọ to sunnu Klistiani lẹ si dọ yé ni wleawuna ojlo sinsinyẹn nado vánkan bo tindo jẹhẹnu gbigbọmẹ tọn he jẹ lẹ nado sọgan yilizọn na mẹmẹsunnu yetọn lẹ. Eyin mẹmẹsunnu de ko yí baptẹm e whè gbau na owhe dopo bo ko jẹ nubiọtomẹsi Owe-wiwe tọn he yin sislẹ na devizọnwatọ lizọnyizọnwiwa tọn lẹ to 1 Timoti 3:8-13 mẹ kọ̀n jẹ obá de mẹ, e sọgan yin pipà na otẹn azọngban tọn ehe. Doayi e go dọ wefọ 8tọ dọ hezeheze dọmọ: “Devizọnwatọ lizọnyizọnwiwa tọn lẹ dona whèwhín.”
12, 13. Basi zẹẹmẹ aliho he mẹ mẹmẹsunnu jọja lẹ sọgan dovivẹnu na azọngban te lẹ tọn.
12 Be mẹmẹsunnu jọja he nọ yí nukun nujọnu tọn do pọ́n sinsẹ̀n-bibasi etọn hlan Jehovah de wẹ hiẹ yin ya? Aliho susu mẹ wẹ a sọgan dovivẹnu te. Aliho dopo wẹ nado yidogọna mahẹ he a nọ tindo to lizọnyizọn kunnudegbe tọn mẹ. Be hiẹ nọ duvivi azọ́nwiwa hẹ Klistiani hatọ he tindo owhe voovo lẹ tọn to lizọnyizọn kunnudegbe tọn mẹ ya? Be hiẹ to nuhe go a pé lẹpo wà nado mọ mẹhe a sọgan plọn Biblu hẹ de ya? Eyin hiẹ nọ deanana plọnmẹ Biblu de sọgbe hẹ ayinamẹ he nọ yin nina to opli Klistiani tọn ji lẹ, a na hẹn nugopipe mẹpinplọn tọn towe pọnte dogọ. Humọ, hiẹ na plọn nado nọ vẹawu mẹlọ he to aliho Jehovah tọn lẹ plọn. Dile plọnmẹ Biblu towe jẹ mimọ ji dọ emi dona basi vọjlado lẹ, hiẹ na gbọn homẹfa po zinzin po dali gọalọna ẹn nado yí nunọwhinnusẹ́n Biblu tọn lẹ do yizan mẹ.
13 Mì mẹmẹsunnu jọja lẹ sọgan hẹn mìde tin-to-aimẹ na mẹhomẹ he to agun lọ mẹ lẹ bo nọ ze mìde jo nado gọalọna yé to aliho depope he mẹ e yọnbasi te. Mì sọgan sọ nọ dohia dọ mì tindo ojlo to awusọhia Plitẹnhọ Ahọluduta tọn mìtọn mẹ gbọn alọgigọ nado hẹn ẹn do wiweji dali. Eyin mì ze mìde jo nado gọalọ to aliho depope he mẹ mì sọgan wàmọ te, ehe na dohia dọ mì nọ yí nukun nujọnu tọn do pọ́n lizọnyizọn mìtọn. Taidi Timoti, mì sọgan plọn nado nọ penukundo nuhudo agun lọ tọn lẹ go po ahundopo po.—Hia Filippinu lẹ 2:19-22.
14. Nawẹ mẹmẹsunnu jọja lẹ sọgan “yin tintẹnpọn whẹ́ nado pọ́n eyin yé jẹ” nado wadevizọn to agun mẹ gbọn?
14 Mẹho lẹ emi, mì hẹn ẹn diun dọ mì nọ deazọ́nna mẹmẹsunnu jọja he to vivẹnudo nado “họ̀nna ojlo jọja whenu tọn lẹ” bo to afọdona “dodowiwa, yise, owanyi, jijọho,” po jẹhẹnu dagbe devo lẹ po. (2 Tim. 2:22) Eyin mì nọ deazọ́nna yé to agun lọ mẹ, ehe na zọ́n bọ yé na “yin tintẹnpọn whẹ́ nado pọ́n eyin yé jẹ” nado didá azọngban, podọ ehe na zọ́n bọ ‘nukọnyiyi yetọn na họnwun na gbẹtọ lẹpo.’—1 Tim. 3:10; 4:15.
Nọ Yí Nukun Nujọnu Tọn Do Pọ́n Otẹn Towe to Whẹndo mẹ Podọ to Agun Mẹ
15. Sọgbe hẹ 1 Timoti 5:1, 2, nawẹ nuyiwa mítọn hẹ mẹdevo lẹ sọgan dohia dọ mí nọ yí nukun nujọnu do pọ́n yé gbọn?
15 Nukun nujọnu tọn yíyí do pọnnu nọ biọ dọ mí ni doyẹyigona mẹmẹsunnu po mẹmẹyọnnu mítọn lẹ po. Paulu zinnudo nuhudo lọ nado nọ yinuwa hẹ mẹdevo lẹ po sisi po ji to ayinamẹ etọn hlan Timoti mẹ. (Hia 1 Timoti 5:1, 2.) Ehe yin nujọnu titengbe to whenue mí to nuyiwa hẹ omẹ vijinu awetọnọ. Apajlẹ Job tọn to yẹyi didogona yọnnu lẹ mẹ, titengbe na alọwlemẹ etọn, jẹ nado hodo. E dovivẹnu vẹkuvẹku ma nado nọ pọ́n yọnnu devo po wantuntun po. (Job 31:1) Nukun nujọnu tọn yíyí do pọ́n mẹmẹsunnu po mẹmẹyọnnu mítọn lẹ po na zọ́n bọ mí na dapana aihun gblewa tọn didà hẹ yé kavi wà nudepope he ma na hẹn yé voawu to apá mítọn. Yẹyi didogona mẹdevo lẹ sọ yin nujọnu titengbe to whenue omẹ awe to haṣinṣan owanyi tọn tindo po linlẹn lọ po nado wlealọ. Klistiani he nọ yí nukun nujọnu tọn do pọnnu ma dona yí numọtolanmẹ omẹ vijinu awetọ tọn do daihun gbede.—Howh. 12:22.
16. Dọ vogbingbọn he tin to pọndohlan he aihọn lọ tindo gando azọngban asu kavi otọ́ de tọn go po lehe Biblu basi zẹẹmẹ azọngban etọn tọn do po ṣẹnṣẹn.
16 Mí sọ dona payi nado sọgan nọ yí nukun nujọnu tọn do pọ́n azọngban he Jiwheyẹwhe dena mí to whẹndo mẹ. Aihọn Satani tọn nọ yí nukunpẹvi do pọ́n azọngban asu po otọ́ lẹ po tọn. Awuvivinu wẹ e nọ yin to ayidedai egbezangbe tọn lẹ mẹ nado ṣàn tatọ́-whẹndo tọn lẹ kò bo do mẹmasi hia yé. Ṣigba, azọngban daho de wẹ Owe-wiwe lẹ zedo alọmẹ na asu de, to whenue e dọ dọ ewọ wẹ yin “ota na asi etọn.”—Efe. 5:23; 1 Kọl. 11:3.
17. Basi zẹẹmẹ lehe mahẹ mítọn to sinsẹ̀n-bibasi whẹndo tọn mẹ sọgan dohia dọ mí nọ yí nukun nujọnu tọn do pọ́n azọngban mítọn lẹ do tọn.
17 Asu de sọgan penukundo whẹndo etọn go to agbasa-liho. Ṣigba, eyin e ma nọ wleawu anademẹ gbigbọmẹ tọn na yé, be zinzin po nuyọnẹn po whè do e. (Deut. 6:6, 7) Enẹwutu wẹ 1 Timoti 3:4 dọ dọ eyin tatọ́ whẹndo tọn de wẹ hiẹ yin bo to vivẹnudo na azọngban devo lẹ dogọ to agun mẹ, a dona yin sunnu he “nọ penukundo whédo etọn titi go to aliho dagbe mẹ, he ovi etọn lẹ nọ yí wunza lẹpo do litai.” To whẹho ehe mẹ, kanse dewe dọ, ‘Be n’nọ de whenu dovo to gbesisọ mẹ na sinsẹ̀n-bibasi whẹndo tọn to whédo ṣie mẹ ya?’ Dibla yindọ ovẹ̀ wẹ asi Klistiani delẹ nọ vẹ̀ na asu yetọn whẹpo yé do nọ penukundo gbigbọnu lẹ go. Asu dopodopo dona yí nukun nujọnu tọn do pọ́n lehe e nọ hẹn azọngban ehe di do. Na nugbo tọn, asi Klistiani de dona nọ nọgodona tito Sinsẹ̀n-Bibasi Whẹndo tọn bosọ nọ kọngbedopọ hẹ asu etọn na tito lọ nido tindo kọdetọn dagbe.
18. Nawẹ ovi lẹ sọgan plọn nado nọ ze ayidonugo do nuhe yin nujọnu lẹ ji gbọn?
18 Ovi lẹ lọsu yin tulina nado nọ ze ayidonugo do nuhe yin nujọnu hugan to gbẹ̀mẹ lẹ ji. (Yẹwh. 12:1) Onú dagbe wẹ e yin dọ yọpọvu lẹ ni plọn nado nọ wazọ́n sinsinyẹn bo nọ wà whégbè-zọ́n lẹ sọgbe hẹ owhe po nugopipe yetọn lẹ po. (Avi. 3:27) To whenue Ahọlu Davidi gbẹ́ yin yọpọ sunnu de, e plọn nado yin lẹngbọhọtọ dagbe de. E sọ plọn nado yin hànsinọ—yèdọ azọ́n de he hẹn ẹn penugo nado yilizọn na ahọlu Islaeli tọn. (1 Sam. 16:11, 12, 18-21) Matin ayihaawe, taidi jọja de, Davidi yọ́n aihunda, ṣigba e sọ plọnazọ́n dagbe delẹ he e wá yí do pà Jehovah. Na e plọnazọ́n lẹngbọhọtọ tọn wutu, e penugo nado yí homẹfa do deanana akọta Islaeli tọn. Jọja lẹ emi, nugopipe họakuẹ tẹlẹ wẹ mì to awuwlena—yèdọ nugopipe he na gọalọna mì nado sẹ̀n Mẹdatọ mìtọn podọ nado pegan na azọngban lẹ to sọgodo?
Nọ Nọ̀ Jlẹkaji
19, 20. Pọndohlan jlẹkaji tọn tẹ go wẹ hiẹ magbe nado hẹn gando dewe po sinsẹ̀n-bibasi towe po go?
19 Mímẹpo wẹ sọgan dovivẹnu nado tindo pọndohlan jlẹkaji tọn gando míde go—bo ma yin hẹngogonọ. Mí ma dona yin ‘dodonọ lánkan.’ (Yẹwh. 7:16) Eyin mí yin jlẹkajinọ, e sọgan gọalọna mí nado duto ninọmẹ sinsinyẹn lẹ ji, vlavo to whégbè, to azọ́nmẹ, kavi to whenue mí to nuyiwa hẹ mẹmẹsunnu po mẹmẹyọnnu mítọn lẹ po. Hagbẹ whẹndo tọn lẹ dona nọ aṣeji ma nado nọ mọhodọ glanglan do ode awetọ go, na yé nikaa hẹn ninọmẹ jijọho tọn he whédo de dona tindo gble. To agun mẹ, mẹlẹpo wẹ sọgan plọn nado nọ konu podọ nado nọ jaya hẹ ode awetọ, bo nọ gbọnmọ dali hẹn hodọdopọ gọna aliho mẹpinplọn tọn mítọn yin mẹjlọdote po tulinamẹ po tọn.—2 Kọl. 13:10; Efe. 4:29.
20 Mí to gbẹnọ to aihọn he ma nọ yí nukun nujọnu tọn do pọ́n Jehovah po osẹ́n etọn lẹ po de mẹ. To vogbingbọn mẹ, omẹ Jehovah tọn lẹ nọ yí nukun nujọnu tọn do pọ́n tonusise po nugbonọ-yinyin yetọn po na Jiwheyẹwhe. Ayajẹ nankọ die nado yin dopo to pipli daho mẹhe nọ yí nukun nujọnu tọn do pọ́n sinsẹ̀n-bibasi yetọn hlan Jehovah lẹ tọn mẹ! Mì gbọ mí ni magbe nado nọ yí nukun nujọnu tọn do pọ́n ogbẹ̀ mítọn po sinsẹ̀n-bibasi mítọn po zọnmii.
Nawẹ Hiẹ Na Na Gblọndo Gbọn?
• Naegbọn mí ma dona dike pọndohlan agọ̀ aihọn ehe tọn gando ogbẹ̀ go ni yinuwado mí ji?
• Nawẹ mí sọgan yin ayajẹnọ ṣogan bo nọ yí nukun nujọnu tọn do pọ́n lizọnyizọn mítọn gbọn?
• Nawẹ pọndohlan he mí tindo gando alọkikẹyi azọngban go nọ dohia eyin mí nọ yí nukun nujọnu tọn do pọnnu kavi lala gbọn?
• Basi zẹẹmẹ nuhewutu yẹyi didogona mẹmẹsunnu po hagbẹ whẹndo tọn mítọn lẹ po do yin whẹho nujọnu tọn.
[Yẹdide to weda 12]
Asu de dona wleawudaina whẹndo etọn to agbasa-liho podọ to gbigbọ-liho