Plọnnu sọn Ohó Jiwheyẹwhe Tọn Mẹ

Be Todido de Tin Na Oṣiọ lẹ Ya?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Todido tẹwẹ tin na oṣiọ lẹ?

Whenue Jesu wá Bẹtani sẹpọ Jelusalẹm, e ko yì azán ẹnẹ he họntọn etọn, Lazalọsi kú. Jesu hodo Malta po Malia po, yèdọ nọviyọnnu dawe he kú lọ tọn lẹ yì yọdò lọ kọ̀n. E ma dẹn bọ gbẹtọgun de pli. Be hiẹ sọgan yí nukun homẹ tọn do pọ́n ayajẹ he Malta po Malia po na ko tindo to whenue Jesu fọ́n Lazalọsi sọnku ya?—Hia Johanu 11:20-24, 38-44.

Malta yise dọ oṣiọ lẹ na fọ́n. Devizọnwatọ nugbonọ Jehovah tọn lẹ tindo nujikudo dọ Jiwheyẹwhe na fọ́n oṣiọ lẹ sọnku nado nọgbẹ̀ to aigba ji to sọgodo.—Hia Job 14:14, 15.

2. Etẹwẹ yin ninọmẹ oṣiọ lẹ tọn?

Dile etlẹ yindọ gbọfufu ogbẹ̀ tọn he nọ yin yiylọdọ “gbigbọ” wẹ nọ hẹn gbẹtọ po kanlin po dogbẹ̀, mí ma yin nudida gbigbọ tọn he nọ nọ̀ agbasalan mẹ gba. (Yẹwhehodọtọ 3:19; Gẹnẹsisi 7:21, 22) Kakatimọ, nudida agbasa tọn he yin didá sọn kọ́gudu mẹ wẹ mí yin. (Gẹnẹsisi 2:7; 3:19) Eyin apọ̀n mítọn kú, linlẹn mítọn lẹ nọ sudo. To whenue Lazalọsi fọnsọnku, e ma dọ dọ nude jọ do emi go to yọdò mẹ gba.—Hia Psalm 146:4; Yẹwhehodọtọ 9:5, 10.

E họnwun dọ oṣiọ lẹ ma sọgan mọ awufiẹsa. Enẹwutu, lalo wẹ nuplọnmẹ lọ dọ Jiwheyẹwhe nọ sayana gbẹtọ lẹ to okú godo yin. Enẹ nọ kọnmasin do Jiwheyẹwhe go. Linlẹn lọ nado sayana gbẹtọ lẹ to miyọ́n mẹ yin osùnú de na ẹn.—Hia Jelemia 7:31.

3. Be mí sọgan dọho hẹ oṣiọ lẹ ya?

Oṣiọ lẹ ma sọgan dọho. (Psalm 115:17) Ṣigba angẹli ylankan lẹ sọgan gbọn oklọ dali sọalọakọ́n nado yin gbigbọ mẹhe kú de tọn to whenue yé to hodọna gbẹtọ lẹ. (2 Pita 2:4) Jehovah dosẹ́n dọ mí ma dona dọho hẹ oṣiọ lẹ.—Hia Deutelonomi 18:10, 11.

4. Mẹnu lẹ wẹ na yin finfọnsọnku?

Gbẹtọ livi susu he to yọdò mẹ lẹ wẹ na yin finfọnsọnku to aihọn yọyọ he ja lọ mẹ. Delẹ to mẹhe tlẹ wà nuylankan na yé ma yọ́n Jehovah wutu lẹ mẹ na yin finfọnsọnku ga.—Hia Luku 23:43; Owalọ lẹ 24:15.

Mẹhe na yin finfọnsọnku lẹ na plọn nugbo lọ gando Jiwheyẹwhe go bo do yise hia to Jesu mẹ gbọn tonusisena ẹn dali. (Osọhia 20:11-13) Mẹhe na fọnsọnku bo na wà dagbe lẹ na duvivi ogbẹ̀ tọn to aigba ji kakadoi. Etomọṣo, delẹ to mẹhe na fọnsọnku lẹ mẹ na gbẹ́ zindonukọn to ylanwiwa mẹ. To whenuena e yindọ oylan he yé na wà to whenẹnu ji wẹ whẹdida yetọn na sinai do, fọnsọnku yetọn na yin “fọnsọnku whẹdida tọn.”—Hia Johanu 5:28, 29.

5. Etẹwẹ fọnsọnku plọn mí gando Jehovah go?

Fọnsọnku na tin na Jiwheyẹwhe do Visunnu etọn hlan nado kú do ota mítọn mẹ wutu. Enẹwutu, dohia nukundagbe majẹhẹ Jehovah tọn wẹ fọnsọnku yin.—Hia Johanu 3:16; Lomunu lẹ 6:23.

Nado mọ nudọnamẹ dogọ, pọ́n weta 6 po 7 owe ehe tọn po, Etẹwẹ Biblu Plọn Mí Taun?, he Kunnudetọ Jehovah tọn lẹ zinjẹgbonu.

[Yẹdide to weda 26]

Adam yin didá sọn kọ́gudu mẹ