Plọnnu Sọn Ohó Jiwheyẹwhe Tọn Mẹ

Nawẹ Whẹndo Towe Sọgan Tindo Ayajẹ Gbọn?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Naegbọn alọwiwle sọgbe hẹ osẹ́n do yin nujọnu na ayajẹ whẹndo tọn?

Jehovah, Jiwheyẹwhe ayajẹnọ lọ, wẹ dowatọ alọwle tọn. Alọwle yin dandan na ayajẹ whẹndo tọn, na gbọnvona dọ e nọ wleawuna gbẹdido de to alọwlemẹ lọ lẹ ṣẹnṣẹn, e sọ nọ wleawuna lẹdo hihọ́ tọn de he mẹ ovi lẹ sọgan yin pinplọn whẹ́n te. Nukun tẹwẹ Jiwheyẹwhe nọ yí do pọ́n alọwle? E jlo dọ alọwle ni yin kọndopọ tẹgbẹ tọn, he yin kandai basina sọgbe hẹ osẹ́n, to sunnu de po yọnnu de po ṣẹnṣẹn. (Luku 2:1-5) Jiwheyẹwhe jlo dọ asu po asi po lẹ ni yin nugbonọ na ode awetọ. (Heblu lẹ 13:4) Jehovah na dotẹnmẹ Klistiani lẹ nado basi gbẹdai bo vọ́ alọwle kiki eyin alọwlemẹ yetọn deayọ.—Hia Matiu 19:3-6, 9.

2. Nawẹ asu po asi po de dona nọ yinuwa hẹ ode awetọ gbọn?

Jehovah dá sunnu po yọnnu po nado gọalọna ode awetọ to alọwle mẹ. (Gẹnẹsisi 2:18) Taidi tatọ́ whẹndo tọn, asu de dona wleawu agbasanu lẹ tọn na whẹndo etọn bosọ plọnnu yé gando Jiwheyẹwhe go. E dona nọ do owanyi mẹde-yido-sanvọ́ tọn hia asi etọn. Asu po asi po lẹ dona nọ do owanyi po sisi po hia ode awetọ. Na asu po asi po lẹpo wẹ yin mapenọ wutu, pinplọn nado nọ jonamẹ yin họnhungan de na ayajẹ to alọwle mẹ.—Hia Efesunu lẹ 4:31, 32; 5:22-25, 33; 1 Pita 3:7.

3. Be hiẹ dona klan na a ma tindo ayajẹ to alọwle towe mẹ wutu wẹ ya?

Eyin hiẹ po alọwlemẹ towe po tindo nuhahun, mì tẹnpọn nado nọ yinuwa hẹ ode awetọ po owanyi po. (1 Kọlintinu lẹ 13:4, 5) Ohó Jiwheyẹwhe tọn ma na tuli kinklan tọn taidi pọngbọ na nuhahun alọwle tọn lẹ gba. Ṣigba, to ninọmẹ sinsinyẹn delẹ mẹ, Klistiani de sọgan basi dide eyin e jẹ nado klan kavi lala.—Hia 1 Kọlintinu lẹ 7:10-13.

4. Ovi lẹ emi, etẹwẹ Jiwheyẹwhe jlo na mì?

Jehovah jlo dọ mì ni tindo ayajẹ. E na mì ayinamẹ dagbe hugan lẹ gando lehe mì sọgan duvivi jọja whenu mìtọn tọn do go. E jlo dọ mì ni mọaleyi sọn nuyọnẹn po numimọ mẹjitọ mìtọn lẹ tọn po mẹ. (Kọlọsinu lẹ 3:20) Jehovah nọ yọ́n pinpẹn nudepope he mì wà nado hẹn pipà wá na ẹn tọn.—Hia Yẹwhehodọtọ 11:9–12:1; Matiu 19:13-15; 21:15, 16.

5. Mẹjitọ lẹ emi, nawẹ ovi mìtọn lẹ sọgan mọ ayajẹ gbọn?

Mì dona dovivẹnu nado wleawuna núdùdù, adọtẹn po avọ̀ po na ovi mìtọn lẹ. (1 Timoti 5:8) Ṣigba, eyin ovi mìtọn lẹ na tindo ayajẹ, mì sọ dona plọn yé nado yiwanna Jiwheyẹwhe bo plọnnu sọn e dè. (Efesunu lẹ 6:4) Apajlẹ he mì zedai to owanyi didohia Jiwheyẹwhe mẹ sọgan yinuwado ahun ovi mìtọn lẹ tọn ji sisosiso. Eyin anademẹ mìtọn lẹ sinai do Ohó Jiwheyẹwhe tọn ji, yé sọgan yinuwado nulẹnpọn ovi mìtọn lẹ tọn ji to aliho dagbe mẹ.—Hia Deutelonomi 6:4-7; Howhinwhẹn lẹ 22:6.

Tuli po pipà po nina ovi lẹ nọ wà dagbe na yé. Yé sọ tindo nuhudo wọhẹ po mẹplọnlọ po tọn. Azọ́nplọnmẹ mọnkọtọn nọ basi hihọ́na yé sọta nuyiwa he sọgan hò ayajẹ yetọn yí lẹ. (Howhinwhẹn lẹ 22:15) Etomọṣo, mẹplọnlọ ma dona yin didomẹgo to aliho fifiẹ kavi kanyinylan tọn mẹ gba.—Hia Kọlọsinu lẹ 3:21.

Kunnudetọ Jehovah tọn lẹ nọ zín owe susu jẹgbonu he yin kinkan titengbe nado gọalọna mẹjitọ lẹ po ovi lẹ po. Owe ehelẹ nọ sinai do Biblu ji.—Hia Psalm 19:7, 11.

Na nudọnamẹ dogọ, pọ́n weta 14 owe Etẹwẹ Bliblu Plọn Mí Taun tọn, he Kunnudetọ Jehovah tọn lẹ zinjẹgbonu.